Read Kambera BELINGU 31 Bible Online

BELINGU 31 - Kambera bible

BELINGU 31

¹I Muha nahili panii-nya na banjaru Ihirailu,

²“Nàhu na ndau luringgu mbàda hangahu dua kambulu ndaunaka dàngu nda kumàka-apa pairu ngàndikai. Hinggilu-nai nuna, i MIRI napanii-manggaka, ba nda kupala-ayapa nyungga na Luku Yorundangu.

³I MIRI Alami napa nalaku mangilu-nggai dàngu na ma-pamija mauya na ba - banjaru na ma-ngiangu lai nu, hi lupa mi-mandapu-nya na tanada. I Yuhua napa na mairu ngàndikai, hama tuna ba mbàda wàna i MIRI.

⁴I MIRI napa na ma-pamija mauha nuda da ba - banjaru, hama tuna ba na-pakaku-ha i Hihungu dàngu i Onggu, hanganji tau Amori, ba na-palàru-ha da paraida.

⁵Napa nawua-nggai patalu wàngu i MIRI lai nyuda, hàla jàka nggiki hama-minja màta kai nunju pawingu-nya hama tuna ba mbàda wànggunggai.

⁶Màlawa kai dàdungu dàngu kai kaborangu! Àmbi mangàdatu-dunja, nadu i MIRI wikima duna na ma-karaha-kai. Nda jia panyonga-ananggai jàka ndia nda na-dunjaku-anggai,” wàna.

⁷Hàla i Muha hi napaau-nya i Yuhua, dàngu la hanggana mbuu ndàbana na banjaru Ihirailu hi napanii-nya, “Màlawa kau dàdungu dàngu kau kaborangu, Yuhua! Nyumuka mairu ngàndiya yia na banjaru la pamandapu-nya na tana na pambàda ràndina i MIRI la boku la mangilu-da.

⁸I MIRI wikima duna napa na ma-kapipi-kau dàngu na ma-karaha-kau. Nda jia panyonga-ananggau jàka ndia nda jia dunjaku-ananggau. Jia-duya nu, àmbu mangàdatu-du jàka ndia àmbu na-màlidu na hamangu-mu,” wànanya.

⁹Ka tulihu-nanjaka i Muha da Ukuna i MIRI Ala dàngu hi na-pakata-nja da ratu Lewi da pa-patanggungu la pa-paloku-ya na Pàti Pa-ràndingu, dàngu la ma-pangora - pangora Ihirailu.

¹⁰Hi nawua-nja pareta, “Handàka - handàka la njàpuna na pihu mbua ndaungu, la ndaungu podahu njala ba Remi Maü Ma-paraüngu,

¹¹lupangu-ma imbahaha yiada da uku wàngu pakodungu-mi la tau Ihirailu da mamai palumu-nya i MIRI Alami la pangia papindi-na.

¹²Paràha hàlanya na tau mini, kawini dàngu anakeda, lupa na tau hangàdangu na ma-ngiangu la parai - paraingu-mi ka da-pauhi la pa-patingi-nya nuna na padiha, ka peku papekangu-da la pa-maraku-nya i MIRI Alami, dàngu ka da-tuturu pa-manundu la lii pareta - lii pareta-na.

¹³Ba wànya nuna na pawàngu da a - anami da mandedi handàkangu parongu-ya rukuna na ukuna i MIRI Alami peku rongu-danyaka dàngu papekangu-danyaka pa-maraku-nya i MIRI la ngala lurida la tana na manda pira-anapa na mandapu-minya la hapapa Luku Yorundangu,” wàna.

¹⁴Tunaka nu napanii i MIRI lai Muha, “Nda namandai-apa na lurimu. Ba tuna, paaunya-wa i Yuhua, dàngu karia-nyawa la Maü teranggu, ka peku wua-nggunyaha jàka nggàraha da pawàngu,” wànanya. Ka laku-danyaka i Muha dàngu i Yuhua la Maü terana i MIRI,

¹⁵ka pa-wuwangu-nanya wiki i MIRI lai nyuda daa la tandai karumangu la lihi pindu Maü tera.

¹⁶I MIRI napanii-nya i Muha, “Mareni-nanyaka na kawuku njàpu lurimu. Taliu metimu nyumu, nda na-tuturu-apa na banjaru Ihirailu lai Nyungga dàngu hi da-taluru-nya na pa-ràndingu patura-nggu dàngu nyuda. Napa nyuda da-dunjaku-ngga Nyungga la palumu-nja da kamàla ala da pa-lumungu la tana na manda pira-anapa na tama-danya.

¹⁷Jàka tunaka nu, ka hambumbatu-nanyaka na hàngga-nggunja nyuda. Napa ku-dunjaku-nja hi ku-patàlaru-ha. Na dangu na manjurangu nda najaru napa na manggàna-ha nyuda, hina-duka hi da pinya hi kiri njadida nuda mbuu ndàbada rukuna ba nda ni-anggapa Nyungga Alada, nu la pahiku la hongada.

¹⁸La rehina nuna Nyungga nda kubihu-apa pandula-ha, nadu nyuda ba mbàda tudaka ma-akatu dàngu ba dalumu-nja da kamàla ala.

¹⁹Nàhu tulihu-yawa na ludu yiana. Papeka-nya nuna la banjaru Ihirailu ka peku hakahii-na hanggangu lai nyuda.

²⁰Napa Nyungga ku-ngàndiha nyuda la paraingu wulu dàngu kamboka, hama tuna na pambàda ràndi-nggunja da boku la mangilu-da. Lai nu napa daluri dàngu dangala hàlanja da pangangu na pa-kalana-da. Tàka la malamiri napa nyuda da-pambelingu hi dalumu-nja da kamàla ala. Napa da-jukaru-ngga dàngu da-taluru-nya na paràndi-nggu,

²¹dàngu napa dangu na ura pàda manda dajaru ma-nàhaku-ha. Tàka na ludu yiana napa daingu ludu wàdanya dàngu hi tuya hakahii hangganja nyuda. Jiapa nàhumbu, ba ndedi kungàndi-ha la tana paràndi-nggu, kupi-manya na pa-kanandi-da,” wàna.

²²La lodu nunama i Muha ba na-tulihu-ya na ludu nuna, hàla hi na-papeka-nya na banjaru Ihirailu.

²³Tunaka nu panii-nanyaka i MIRI lai Yuhua anana i Nungu, “Màtawa kau dàdungu dàngu kau kaborangu, Yuhua! Nyumu napa mairu ngàndiya na banjaru Ihirailu patama-nya na tana na pambàda ràndi-nggunja nyuda, dàngu Nyungga napa kundula-ha nyuda,” wànanya.

²⁴Tunaka nu i Muha hi na-tulihu-ha da ukuna i MIRI la hau mbuku, na-tulihu pa-manitiku-maha, welingu la pakiri-na lundu la njàpuna.

²⁵Ba na-panjàpu-yaka, panii dàna-njaka da ratu Lewi da matanggu paloku-ya na Pàti Pa-ràndingu,

²⁶“Piti-yawa yïana na Mbuku Ukuna i Ala, dàngu tuya la karaha Pàti Pa-ràndingu-na i MIRI Alami, ka peku pa-daingu-na lai nu ka hakahii-ya hanggangu la banjaru nuna.

²⁷Kupi-manya jàka nggiki hama tongguru etina na banjaru nuna dàngu ba nakàli patula ngganggangu. Nyuda mbàda patula ngganggangu-daka lai MIRI ba talànga luringgu; ka narihi-aipa duna napa jàka taliu metinggu!

²⁸Nàhu, paràha hàlanja da liku uru banjaru dàngu da parawira ka da-pauhi la hangganggu, ka peku patàka-nggunja da rukuda yiada lai nyuda. Kupiti-ya na awangu na tana ka da-hakahii hangganja nyuda.

²⁹Kupi-manya jàka ku-talurungu-ka, akatu-danyaka da tau nuda dàngu da-jukaru-nya jàka nggàraya na pambàda ajaru-nggunja. Dàngu napa la lodu malamiri na-handauni-ha ura pàda, nadu ba dawuda-ya na hànggana i MIRI, ba dawàngu papangga-ya na lii palara-na,” wànanja.

³⁰Tunaka nu i Muha wunda-nanyaka na ludu yiana lundu na-panjàpu-ya, ba dàngu pa-tingingu-na na nggubulu banjaru Ihirailu.