Read Kambera BELINGU 32 Bible Online

BELINGU 32 - Kambera bible

BELINGU 32

¹“Rongu awangu, màta ka kupeka-ya, ha tana, talelingu kahilu-mu!

²Màla àru ka beri puru urangu-ya na lii pa-pekangu-nggu, ka hama kawàtiku wai hamburungu-ya na paniinggu, ka ngera ura karitiku la rumbaya, ka ngera mbungu ura kawalu-ya la ngara matumbu.

³Kuwotu-nya na tamuna i MIRI. Bobaru-ya na mangunju-na na Alanda!

⁴I MIRI na ma-kahiri-kami na-kaborangu, na paràma-na na-lànyapu, mbuuna na àndana natànji. Na Alami na-tuturu, nda ningua pa-lapingu-na, na rukuna nahàmu dàngu na-padeningu.

⁵Tàka nyimi hau banjaru manda tuturu-kami, nda ràkana ba na-banjaru-nggai, banjaru mambinu wàngu pa-lapingu dàngu njala.

⁶Nuyaka nu bai palimba-nya na hàmuna na MIRI-mi, ha tau nduba dàngu tau kambànga? Màla nda Ama-minya, nu na mawulu-kai, na ma-panjadi-kai hau banjaru?

⁷Namuya na rehi na ma-làpahu, hamata-ya na rehi la handàni na ma-lundungu. Paàra-nja da ma-kaweda-mi, ka dapanii-nggainya nyimi.

⁸Ba jiaya na-paberingu-na tana i Mahupu jangga, nimbihu banjaru pa-kawuku-nya tana ngabana dàngu na hau kamàla ala ka ma-kuaha-ya.

⁹Tàka na wàlana i Yakupu yiana napindi-ya paraïna i MIRI nduma wikina Nyuna.

¹⁰Nahunggu-ha nyuda ba talànga lindingu-da la pangia ma-indiku dàngu mambila la maràda telangu. Hàla hi naopa-nja dàngu na-kabubulu-ha dàngu hi namangga-nja hama tuna mangu wikina.

¹¹Hama ikitu ma-papekangu anana pa-hawurungu na-kataku-ya la wulu kàpana da ma-tawàlahu na pandema-nya la pinu kàpana,

¹²tunu nu ba didi-aya MIRI ma-kapipi-ya na banjaru-na, nda ningu kamàla ala ma-karaha-ya nyuna.

¹³Nyuna ma-pawiti-nja nyuda pa-kuaha-ha da palindi; dangangu ihi paraïda la woka dàngu da-unungu manggaluangu matàmba welingu la tandula watu. Da-ngalangu mina welingu la pingi haitungu da matumbu la tana ma-pawatungu.

¹⁴Da hapi da mbimbi da kamàmbi-da dadangu da wai huhuda; da bandada kanjupu mahàmu-ha, da uhu nggàndumu dàngu da wai angguru-da kanjupu hàmuha.

¹⁵Na banjaru-na i MIRI nalua-ya la wulu, tàka na-patula ngganggangu, da kambombu ndàba, dambihu la pangangu. Hàla hi da-dunjaku-nya i Ala, na mawulu-ha dàngu da-jukaru-nya i Ma-pahàla na ma-kaborangu.

¹⁶Dalumu-nja da marapu hi na-kapihi i MIRI, na-hambumbatu na hànggana rukuna nuna na ma-akatu.

¹⁷Dawotu kameti maraku la wàndi - wàndi akatu da nda Ala, la kamàla ala da panda tandada, da bidi kamàla ala panda mangàdatu boku la mangilu-da.

¹⁸Dalànja-nya i Ma-pahàla na Ma-kaborangu, da-maromba-nya i Ala na ma-wuanja luri.

¹⁹Ba naita-ha nuda nahàngga i MIRI, ka jukaru-nanjaka nu da anana Nyuna.

²⁰Napanii Nyuna, ‘Nda kuhili bihu-apa Nyungga pandula-ha nyuda; màta ka kuita-ya jàka nggikina nyuda la njàpuna. Nadu ba na-tongguru etina nuna na banjaru dàngu nda ana tuturu-mana.

²¹Da-pawiti-nya na kapihi-nggu Nyungga hangganja da manda Ala, dàngu la pambeni hangganja da kahala hada marapu-da. Ka pawiti-nggunyaka na banjaru-nggu pa-kapihi-nya na manda banjaru, dàngu ka dahàngga-nya na banjaru tau kambànga.

²²Napa na hàngganggu na-hanjulangu hama tuna epi na matunu pa-lupangu la pangia tau meti. Nuna na epi natunu-ya na pinu tana dàngu na ihi paraï-naka, hamanai da palindi pa-ràpangu la amu-naka.

²³Ku-patàka-nja da ura pàda da manda padirangu, ku-pahaliru ndàbanja da pananggu.

²⁴Napa nyuda dameti ruku pariti dàngu rimbangu, dàngu ruku hidu mayila. Kupuli-nja ka na-nyàkapu-ha banda bohu, dàngu ka nakati-ha kataru pa-upahungu.

²⁵Na pabera nangàndi pameti wàngu la ànda ngarangia; da ma-ndàdiku la umambu na-handauni-ha mangàdatu. Da bidi tau dàngu da ana karia pa-patàlaru-ha napa, hamangui da ana rara dàngu da ma-kaweda.

²⁶Ku-orangu pa-pamolu-nja nyuda mbuu hàlada, màta nyuda ka àmbu hili namu-duhapa.

²⁷Na nyuna nda kubihu-a ka da-hamemu da muhu Ihirailu; ka àmbu da kaka àngaya ba nyudaika ma-pakàku-ya na banjaru-nggu,’ tàka làti duna Nyungga duku ma-paluangu limanggu.

²⁸Na Ihirailu banjaru nda ningu eti dihaya; kuku kira nda ningua lai nyuda.

²⁹Làti jàka da-manggàna, napa da-jàngapu-ya, hi da-kanandi hahanya na hupu njàpuda nyuda.

³⁰Nggiki hamana na haàtu tau hi na-ngalangu bia payaulu tau 1000, dàngu da tau madua hi dapalai-nja tau 10.000? Mbàda dangga-nanjaka nyuda paraïna i MIRI, na Alanda; mbàda dunjaku-nanjaka paraïna i Ala na ma-kaborangu.

³¹Na muhu Ihirailu napi-manya, na ma-kahiri-ha nyuda nda hama-ana i Ala na ma-kahiri-ya na Ihirailu.

³²Nadu ba da-akatu nyuda hama tuna na Hondumu dàngu Nggomora, hama tuna pingi angguru na ma-paita dàngu ba pameti wànguya na wuana.

³³Da wai angguru-da nyuda bai upahu kataru mbana rukuha.

³⁴Na paruku-da da muhu banjaru-na nanamu hàla-maha i MIRI, napa na hukunja jàka jia-yaka na rehina.

³⁵I MIRI napa natungu hilu dàngu nahuku-nja nyuda, nda namandai-apa ba danjoru hi da-tàlaru; mareni-ama-naka na rehina ba da-kaweraku.

³⁶I MIRI napa na-pamàna-nya na banjaru-na dàngu ba namila-nja eti da atana, jàka naita-ha nyuda ba nda nggàra wàda dàngu ba nanjàpu-njaka pa-kapàru wàda.

³⁷Ka paàrangu-duna-nyaka i MIRI la banjaru-na, ‘Nggihaka da kamàla ala ma-kapàru da pamonu-mi?’

³⁸Dangangu aparu nu da mangejingu pawotu-mi, dàngu da unungu wai angguru pa-maraku wàngumi. Paràha-nja ka damai pandula-kai, màtawa nyuda ka jiaha da ma-kahiri-kai.

³⁹Tàngaru, Nyungga Ala Kamehangu-ka, hinggilu-nggu Nyungga nda hili ningu Ala. Nyungga ma-pameti, dàngu Nyungga ma-paluri, ma-pamanua dàngu ma-palànga. Jàka ku-paluangu limanggu, nda ningua haàtu malawa-ngga.

⁴⁰Parongu wikinggu Nyungga, Ala maluri, ku-wulaku-ya na limanggu hi kuharangu:

⁴¹Napa kudeli-ya na hapanda-nggu na ma-kajilaku, hi ku-palaku-ya na hukungu. Kutungu hilu la mbuu ndàbana na papanggu hi kuhuku-nya mbuu ndàbana na ma-karaü-ngga eti.

⁴²Nambinu wànguka riada nyuda da pananggu; mbuu ndàbana na ma-ndubaku-ka Nyungga, ku-pameti wànya hapanda-nggu. Nda kumàta-anya nggàmu biaya na malawa-ngga Nyungga; da tau pa-tahangu dàngu da ma-manua lupangu dameti-mbu.

⁴³Ha dimi banjaru-ka, wotunya na banjaru-na i MIRI, nadu i MIRI nahuku-nja mbuu ndàbada da ma-pameti-ha nyuda. Nyuna natungu hilu kiringu la muhuna na nyuna najàma-nja da njala banjaru-na,” wàna.

⁴⁴I Muha dàngu i Yuhua anana i Nungu da mawunda-ya na ludu yiana, hi peku rongu nggubulu-na na banjaru Ihirailu.

⁴⁵Nahàla-ka pa-patàka-nja da paaja - paajaru-na i MIRI la banjaru Ihirailu,

⁴⁶panii-nanyaka i Muha, “Rimangu ka peku patundu hàlami-nja da pareta - pareta da pa-pakatanggu-nggai la lodu nàhu. Ajaru-ha la anami, ka peku pinguda pa-patundungu wàngu tuturu-da la mbuu ndàbada da pa-ajaru-na i MIRI.

⁴⁷Yiada da pa-ajaru nda kareuku jua-aha, tàka jiaya na huri lurimi. Patundu hàlanja nudaka da pareta, ka peku malaina na ndau lurimi la tana na manda pira-anapa na mandapu-minya la hapapa Luku Yorundangu,” wàna.

⁴⁸La lodu nunamai i MIRI ba napanii-nya i Muha,

⁴⁹“Lakuwa la Palindi Ambarimu la tana Muapu la papana na paraingu Yeriku. Kau kandekalu la Palindi Nembu dàngu kau tàngaru-ya na tana Kanaàngu na manda pira-anapa nawua-nggunya la banjaru Ihirailu.

⁵⁰Napa meti-munyaka nyumu, la palindi nuna, hama tuna na angumu paluhu i Harungu ba mbàda meti-naka la Palindi Hòru.

⁵¹Nyimi tau madua ndai tuturu lai Nyungga dàngu ndai maraku-ngga la hangga banjaru Ihirailu ba jiaya na ninggai la matawai Marimba, la lihi paraingu Kandihu, la maràda telangu Njingu.

⁵²Jia-duyaka nu hi nda peku tama-munya na tana pawua-nggunya na banjaru Ihirailu; jiaya bau wàngu paita marau-aya,” wànanya.