Read Kambera BELINGU 33 Bible Online

BELINGU 33 - Kambera bible

BELINGU 33

¹Ba ndedipa nameti, i Muha, wunangu-na i Ala, na-pakanyuru-nya na banjaru Ihirailu, ba nawànja yiada da pulungu,

²“I MIRI namai welingu la Palindi Hinai; hi nahungu la Endumu hama tuna mata lodu, welingu la Palindi Paràngu na-paharii-nya na banjaru-na. Na-karia-nya hakambulu rata papalewa; naroka na epi la kawana-na.

³Langatàka i MIRI nambuha-nya na banjaru-na[26] Nyuna na-katindi-ya mbuu ndàbana na tau pamangu-na. Màla ta-maràbaku la tuba wihina dàngu la patundu-nja da pareta - pareta-na.

⁴Da uku da pawua-na i Muha tanunju-ha, da mangu marihi pa-wilingu la banjaru yiana.

⁵Ba jiaya na pauhi-na na Ihirailu dàngu ma-pangora-na, i MIRI na hanganji la kabungguru-na,” wàna.

⁶Na ngerana na kabihu Rumbingu napanii i Muha, “Màla àru na kabihu Rumbingu ka àmbu jia mauna, ka luka ana hawutu-ana na tauna,” wàna.

⁷Na ngerana na kabihu Yahunda napanii: “MIRI, rongu àruya na-warangu-na na Yahunda; Pambulu beli-àrunja dàngu na banjaru-na. Pabera-wa ndumada nyuda, ou MIRI, ndula àruha nyuda pahangga-nya na muhu,” wàna.[27]

⁸Na ngerana na kabihu Lewi, napanii: “Wàngu Urimu dàngu Tumimu[28] mu-paloha-nya na pawuku-mu, bau palinya la tau Lewi, ata manundu-mu. Mbàda kama-munjaka nyuda la Maha, bau pahàngga dànja la matawai Marimba.

⁹Nyuda da-tuturu rihinya mbuu ndàbana, rihinja da ma-kaweda dàngu nua kalembi. Da pareta - pareta-mu da-patundu-nja, na paràndi-mu da-patutu-nya.

¹⁰Na banjaru-mu da-ajaru-ha pa-patundu-nja mbuu ndàbada da pareta-mu dàngu la pawotu kameti maraku la pinu ngia pawotu maraku.

¹¹MIRI, karaha àruya na kabihu yiana ka na-undungu, màla àruki kau oranya na pa-paloku-da. Bera bàbaru-ya mbuu ndàbana na muhuda hi lupa nda peku hadangu belida,” wàna.

¹²Na ngerana na kabihu Mbanyamingu napanii: “Yiana-ya na kabihu pambuha-na i MIRI. Na mangganya la lodu la rudungu hi na-ngiangu ningu la hongada,” wàna.[29]

¹³Na ngerada da wàlana i Yuhupu, napanii: “Màla àruki na tanada ka na-pakanyuru-nya paraïna i MIRI wàngu wai urangu, dàngu wàngu wai la unu tana.

¹⁴Màla àru la wandu la urangu ka dabundu làndangu da wua ai da marihi hàmu, da marara la kapuka.

¹⁵Màla àru da tandula - tandula weli nungu ka dambinu wàngu ihi tana paraï manda ningu hamangu.

¹⁶Màla àru ka na-pabundu làndanya mahàmu halawàla na tanana, dàngu hi pakanyuru-ya ruku hàmuna i MIRI na mapanii welingu la rii madàka maduru. Màla àru nuna na kanyuru ka napuru la wàlana i Yuhupu, ba nyunadu na ma-pairungu welingu la njonga anguna paluhu.

¹⁷Na kapàru-na i Yuhupu kapàru heu hapi mbàtingu-ya, tàka na kadu mini rombangu hapi utangu jia-duyaka banda pira rata biaya na Manahi dàngu ba nda pira kambulu rata biaya na Epuraïmu. Na-njukulu-nja da ba - banjaru hi lundu la hupu tana ba na-dàhiku-ha,” wàna.

¹⁸Na ngera kabihu Hembulungu dàngu Ihakàru, napanii: “Màla àru i Hembulungu ka na-mbokaru ruku kàli lakuna, tàka i Ihakàru ka na-mànjaku la maü tera - maü terana.

¹⁹Da dundanja da ba - banjaru la palindi-da nyuda tàka hi dawotu lai nu kameti maraku ma-padeningu. Da-ngalangu pawulu wàngu nyuda welingu la tehiku, dàngu welingu la wara la halinggi tehiku,” wàna.

²⁰Na ngerana na kabihu Nggàtu, napanii: “Pa-wotungu-ya i Ala na ma-palera-nya tana ngabana i Nggàtu. I Nggàtu na-panedingu hama tuna hinga la pahira pungu dàngu manula katiku.

²¹Napiti tana mahàmu halawàla nduma wikina na tanggu ma-pairungu pa-pulingu-ha nyuda. Danunju-ha mbuu ndàbada da pareta dàngu da ukuna i MIRI ba jiaya na batangu-da da liku-uru Ihirailu,” wàna.[30]

²²Na ngerana na kabihu Ndàngu, napanii: “I Ndàngu hama tuna heu kamboka hingaya na ma-kapunduhu paluhu welingu la Mbahàngu,” wàna.

²³Na ngera kabihu Nàputali, napanii: “I Nàputali pa-pabundu làndangu-ya kanyuru dàngu mbuhangu-na i MIRI; na tana ngabana piti welingu la Tàma Nggalilia lundu hu luru,” wàna.

²⁴Na ngera kabihu Ahiaru, napanii: “Welingu la mbuu ndàbada da kabihu Ihirailu narihi pa-kanyurungu na kabihu Ahiaru; màla àruki ka danamu-ya anguna paluhu, da pingi haitungu datumbu kamboka la tanana.

²⁵Màla àruki ka kahiri-ha da paraingu-da wàngu pindu bokulu wudu dàngu bàhi ka pa-daingu luri mànjaku dàngu mambiru-da,” wàna.

²⁶“Ha Ihirailu! Nda ningua kamàla ala mahama-nya na Alami; Nyuna na-pàlaku-ya na awangu wàngu bunjuku-na dàngu na-pòluhu-ya na karumangu la pandula-kai nyimi.

²⁷Naingu-mana i Ala la pa-kahiri-kai nyimi, na punguna na ma-padaingu na majura-kai. Na muhumi nawàngga-ya welingu la hanggami, dàngu na-paràha-nggai pa-patàlaru-ha nyuda.

²⁸Da wàlana i Yakupu napa daluri mànjaku la tana mabundu làndangu dàngu wai angguru-na, dàngu hi paliri-nya mburungu la awangu.

²⁹Oha-amuka dumu, ha Ihirailu! Nda ningua banjaru hama tuna nyumu na pa-pamàna i MIRI. I MIRI hama tuna hapanda dàngu temingu-ya lai nyumu; la pa-kahiri-kau dàngu hi nawua-nggau patalu wàngu. Da muhumu napa damai pa-paumbu miri, dàngu napa nyumu mu-kali - lijaku-nja nyuda,” wàna.[31]