Read Kambera BELINGU 4 Bible Online

BELINGU 4 - Kambera bible

BELINGU 4

¹Hàla i Muha hi napanii-nya na banjaru nuna, “Nunju-maya mbuu ndàbana na uku na pambàda ajaru-nggunggami, ka pekuna bai luri lundu ingianya na tana na pawua-nanggai i MIRI, na Alada da boku la mangilu-mi.

²Nggàraya na lii pareta-nggu àmbi tudunya anguna jàka ndia àmbi àli-dunya hawutu. Nunju-maha da lii pareta-na i MIRI Alami da papeka-nggunggai.

³Ba ita wiki-mami-nyaka jàka nggàraya na pa-patumbu-na i MIRI la Palindi Piuru. Nimbihu-na na tau na malumu-nya na Mbaàlu lai nu na-pamolu-nya,

⁴ba tuna nyimi ma-daingu pa-tuturu lai MIRI Alami luri bia-minyapa lundu nàhu.

⁵Mbuu ndàbada nuda da uku ku-papeka-nggainja, hama tuna na lii pareta na papanii-nangga i MIRI Alanggu. Nunju hàla-maha nuda la tana ngia patama-mi napa la pangia-nya.

⁶Nunju-maha nuda wàngu tuturu-mi. Jàka timi numaka, napa wuwa-nanyaka na manggàna-mi la banja - banjaru hawiangu. Ba darongu-haka nuda, da uku ka panii-danyaka napa, ‘Ai kanjupu manggàna dàngu mamàhi-duya nina na banjaru bokulu!’ wàdaka.

⁷Nggi banjaru bokulu-kiyaka na matika pa-mereni-nya paraïna paàla-na jàka nggàra ehina, hama tuna nu i MIRI Alanda na malihi-nda nyuta? Ba nahema-mata jàka pirangu bia ba tawara-nya ka nandula-ta.

⁸Nggi banjaru bokulu-kiyaka maningu ukungu ma-kanjupu pa-deningu hama tuna da uku pa-papeka-nggunggai la lodu nahu?

⁹Etiwà-manya dàngu patanda pahàmu-manya ka pekuna ka lundu njàpumi ba ndai maromba-nya na pambàda hakahii wikimi. Peka-manja da ana umbuku-mi

¹⁰rukuna nuna na lodu, ba jiaya na ndolaku-mi la hanggana i MIRI Alami la Palindi Hinai. La rehi nu napanii-ngga, ‘Pauhi-nya na banjaru. Ku-mbuhangu nyuda ka darongu-ya nggàraya na pa-patàka-nggu, ka peku pa-pekangu-da pa-manundu lai Nyungga lundu njàpuna na lurida, dàngu ka peku panau-danja da anada la pa-manundu lai Nyungga,’ wànangga.

¹¹Pekanja da anami jàka nggikina bai mai pa-ndolaku la kambu palindi na pa-panggàbalu kawuu kapàtangu hama tuna na karumangu timbi dàngu epi maroka toma la awangu.

¹²Tunaka nu napanii danggai nyimi i MIRI welingu la epi tàka rongu-maminya na talia liina, tàka ndai itaya jàka nggiki hamana na hadana.

¹³Lai nu Nyuna pakada-nanggai nggàra-yaka bàdi na pa-paloku-mi la pa-patutu-nya na pa-ràndingu na patura-na dàngu nyimi. Da Hakambulu Pareta da pambàda tulihu-na la dua mbàla watu, jia-mahaka bàdi da panunju-mi.

¹⁴I MIRI na-paràha-ngga pa-papeka-nggainja mbuu ndàbada da uku, màta kai nunjuha napa la paraingu na patama-mi dàngu na pangia-mi,” wàna.

¹⁵“Namu pahàmu-manya! Ba na panii danggai i MIRI weli dalungu la epi la Palindi Hinai, nda nggàra-a paita-mi.

¹⁶Rimangu ka àmbi toma la panjala bai pandoi tunggu wikimi kahala hada la pa-marubuku-nya, jiapa nda nggàra hadaya, ka miniya jàka ndia kawini-ya,

¹⁷ka ma-hawurungu-ya jàka ndia ka iyangu-ya, ka banda mabeiya jàka ndia ka banda hawiangu-ya.

¹⁸

¹⁹Àmbi tomadu la panjala bai ma-rubuku-nja dàngu bai lumunja jàka nggàraha da paita-mi la awangu, na mata lodu, na wulangu dàngu da kandunu. I MIRI Alami na-pahia-nja da banja - banjaru hawiangu pa-marubuku-nja nuda da banda awangu.

²⁰Tàka nyimi banjaru pa-pamàna-nanggai welingu la Mehiru, la ngia pa-pàdangu-mi mayila langatàka. Nyimi nangàndi-kai paluhu welingu la paraingu nuna, màta ka banjaru wiki-nanggai hama tuna na ngerami nàhu.

²¹Tàka na MIRI Alami nambeni-ngga nyungga rukumi nyimi, dàngu hi na-harangu ba nda kupala-ayapa nyungga na Luku Yorundangu la patama-nya na tana kamboka na pawua-nanggai nyimi napa.

²²Nda namandai-apa nyimi bai pala dàngu bai mandapu-nya na tana kamboka nuna; nyungga duku nda ku-kikungu-apa, napa meti ningu-nggunyaka duku lai yiahu.

²³Kanandi pahàmu-nya! Àmbi maromba-dunya na pa-ràndingu na patura-na i MIRI Alami dàngu nyimi. Nunju-maha da pareta-na; jàmangu ndoku pa-pandoingu wikimi kahala hada ka marubuku-nya jiapa nda nggàra hadaya,

²⁴nadu i MIRI Alami ba hama epi ma-patunu-ya; nda na-mbuhangu-a ka pangera-nya la ngga - nggàra.

²⁵Hama-manai jàka mbàda ndàdiku mandaimika napa la tana nuna, dàngu bai paana umbukungu-ka, àmbu njala-mbudu la pa-pandoingu wikimi kahala hada la nggàra hada bia. Na matuna nu ma-akatu-ya la matana i MIRI Alami, dàngu pahàngga wànanya.

²⁶Màlawa na awangu dàngu na tana ka na-hakahii la lodu nàhu, jàka era nda manundu-mi lai nyungga, napa mirengga molungu welingu la tana na pangia-mi napa la hapapa Luku Yorundangu. Ndai mandai-apa napa bai ngiangu lai nu; pa-pamohu molungu-makaika napa.

²⁷I MIRI napa napai - ihanggai la honga banjaru hawiangu, dàngu hi lupa hawutu-anaka napa la hongami nyimi ma-padaingu paluri.

²⁸Lai nu nyimi napa ilumunja da kamàla ala da pa-pandoi wàngu lima tau, da kamàla ala welingu la ai la watu, na manda peku ita na manda peku ronguna, na manda ngangu jàka ndia na manda hangei.

²⁹Hàla himbu-minyaka i MIRI Alami, dàngu ka era himbu weli eti-minya napa nyimi mihunggu-ya.

³⁰Era ninggami la ma-handuka dàngu mbuu ndàbana na pa-manjurangu wàngu na ma-handauni-kai, la malamiri beli-minyaka lai MIRI dàngu manundu-minyaka lai Nyuna.

³¹I MIRI Alami, Ala ma-kanjupu paaï pa-namungu-ya. Nda jia dunjaku-ananggai jàka ndia nda na-patàlaru-akai, dàngu nda jia mbula-ananya na pa-ràndingu na-patura wikina dàngu da boku la mangilu-mi.

³²Manginjiru-maya na rehi na ma-làpahu, la rehi la handàka-na ba ndedi pa-paana-nggai, piti welingu ba na-padika-nya na tau la pinu tana i Ala. Himbu-maya la pa-nggubulu awangu. Màla ningu nu handàkangu matumbu malalu tuna nu, ba ndedipa nuna? Ningu nu marongu hamangu na rukuna nuna na matumbu?

³³Ningu nu handàkangu banjaru ma-padaingu paluri, ba nahàla parongu-ya na pa-alangu na ma-kareuku welingu la epi, hama tuna na pambàda hunggumi nyimi?

³⁴Màla ningu nu handàkangu hau pa-alangu matoru mbeni papiti-ya na hau banjaru welingu la ba - banjaru da maninja, hàla hi natuya banjaru wikina, hama tuna na pambàda patumbu-na i MIRI Alami ndumami nyimi la Mehiru? Ita wiki-mami-nyaka nyimi jàka nggiki-nanggai i Ala ba nawàngu kapàru nda najaru-na ba na-patàka-nya na hanggàmaru dàngu na pabera, ba nawunda-ha da pa-hangàtarungu dàngu ba natuya jàka nggàraya na pa-katàtakungu.

³⁵Mbuu ndàbada nuda paita-nanggai nyimi i MIRI la pa-paloha-nya ba jiaya i MIRI-a na Ala, nda hili ningu hau.

³⁶Welingu la awangu, na-parongu-nya na liina lai nyimi ba na-papeka-nggai; la pinu tana yiana na-paita-nyaka lai nyimi na epina na ma-hawiru dàngu welingu la epi nuna-maka ba napanii dànggai nyimi.

³⁷Nadu ba nambuha-nja da boku la mangilu-mi, hi kiri pindi-nanggai nyimi; ba nawàngu mbiha mendina, hi nangàndi-kai nyimi paluhu welingu la Mehiru.

³⁸Da banjaru da marihi bokulu dàngu da marihi kapàru nanyara-ha welingu la hanggami, la pakaria-nggai nyimi la paraida nyuda na pawua-nanggai napa i Ala lai nyimi, na paraingu na pamangu-mi nyimi nàhu.

³⁹Jia-duya la lodu nàhu namu-maya dàngu àmbi maromba ndokunya: i MIRI, didi meha-aya na Ala la awangu dàngu la tana; nda hili ningua hau.

⁴⁰Nunju ndàba-maha da uku da pawua-nggunggai la lodu nàhu, napa imànjaku nyimi dàngu wàla wuami dàngu hii luri pa-ngalangu la tana pawua-nanggai i MIRI la pamangu-nya lundu nu - nu,” wàna.

⁴¹Hàla paita-nanjaka i Muha da tailu mbua paraingu la pahunga lodu Luku Yorundangu

⁴²jia-haka da paraingu ngia pamara, na ngia pa-pamara-na wikina na tau jàka wàngu nda harawuku-na ba na-pameti tau na nda muhuna. Pekuna nyuna papalai la hau paraingu la hongada nuda ka àmbu peku pameti-mbuya nyuna.

⁴³Tungguna na kabihu Rumbingu pa-payema-nya na paraingu Mbehiru, la pada dita la maràda telangu; tungguna na kabihu Nggàtu na paraingu Ramutu la ngaba Nggiliatu, dàngu tungguna na kabihu Manahi na paraingu Nggolàngu, la ngaba Mbahàngu.

⁴⁴Ka wuangu-nanyaka i Muha la banjaru Ihirailu da uku dàngu da kalaratu-na i Ala.

⁴⁵Nuna nu nawunda-ya la hambeli luhuda welingu la Mehiru dàngu ba ninja la lolangu la pahunga lodu Luku Yorundangu, la papa paraingu Mbetu-Piuru. La ngabana lai nu jiaya na pangia memana na ngabana i Hihungu, hanganji tau Amori, na ma-pareta àmangu la parai Hehimbungu. I Muha dàngu da banjaru Ihirailu datalu-yaka la rehi luhuda welingu la Mehiru.

⁴⁶

⁴⁷Nyuda mandapu-danyaka na tanana na Hanganji Hihungu, dàngu na tanana na Hanganji Onggu welingu la Mbahàngu, na hanganji Amori haàtu na maninya la pahunga lodu Yorundangu.

⁴⁸Na tana yiana na-tayilingu welingu la paraingu Arowiru, la hingi Luku Àrunongu, pangalangu la mbara dia lundu la Palindi Hiriyungu,[4] nu na Palindi Herumungu,

⁴⁹dàngu nggubulu-na na ngaba la pahunga lodu Luku Yorundangu hanggangu hu luru lundu toma la Tehiku Meti la kambu Palindi Pinggàhu.