Read Kambera BELINGU 5 Bible Online

BELINGU 5 - Kambera bible

BELINGU 5

¹I Muha na-pauhi ndàbanya na banjaru Ihirailu, hàla hi napanii-nja, “Angu dedi, patingi ndàbanja da uku da pa-kawana-nggunggai lodu nàhu. Papeka-nja nuda da uku dàngu nunju-maha wàngu tuturu.

²La Palindi Hinai i MIRI Alanda natura hau pa-ràndingu,

³nda mbulungu bia dàngu da boku la mangilu-nda, tàka dàngu nyuta mbuu ndàbanda la lodu nàhu maninda la yiahu.

⁴Welingu la epi nu dita la pinu palindi na-mbuhangu papanii pahangga nggorungu i MIRI dàngu nyimi.

⁵Tàka rukuna bai mangàdatungu epi dàngu ba ndai toru mbeni pa-kandekalu la palindi, jia duyaka la rehi nu hi ku-ndolaku li padua-nggai nyimi dàngu i MIRI la pa-patàka-nggainya na hupu liina i MIRI lai nyimi.

⁶I MIRI na-pakada-nya, ‘Nyungga MIRI Alami, mangàndi-kai paluhu welingu la Mehiru, la ngia pa-paata-kai.

⁷Àmbi lumungu-du kamàla ala. Lumungga Nyungga-a.

⁸Àmbi pandoi-du nduma wikimi kahala hada, jiapa nda nggàra hadaya, la awangu jàka ndia la tana, jàka ndia la wai la unu tana.

⁹Àmbi marubukungu kahala hada tungu nu, nadu ba Nyungga MIRI Alami, dàngu nda ku-pahiangu ka pahama-ngga la nggàra bia. Da tau da ma-paumbi-ngga kuhuku-nja pa-lupangu la ana umbuku-da la tailu ndalihu patu ndalihu.

¹⁰Na nyuna ku-paita-nja na mila etinggu ka pira riu rataya na wàlada[5] nyuda da mambuha-ngga dàngu da ma-manundu la pareta-nggu.

¹¹Àmbi àtalu tiki-minya na tamunggu, nadu ba Nyungga MIRI Alami, mahuku-nya jàka nggamuya na mawà ànganya na tamunggu.

¹²Mbabunya na lodu Hangahu dàngu tembiya na lodu nuna ba lodu matua-ya, nadu ba Nyungga MIRI Alami na mawua-nggainya na pareta nuna lai nyimi.

¹³Nyimi kuwua-nggai nomu mbua lodu paràma wàmi,

¹⁴tàka na lodu papihu wàna lodu hangahu pa-kahaungu-ya tunggunggu Nyungga. La lodu nuna àmbu ningudu haàtu maràma, nyimi wiki, hamanai da anami, da atami, da bandami jàka ndia na tau tàka na maninya la paraimi. Da atami lupangu-ma da-hangahu bàdi hama tuna nyimi wiki.

¹⁵Namuya, àmangu la Mehiru nyimi ba pa-atakai, tàka hi na-pahàla-kai paraïna i MIRI Alami wàngu kodi màkana manda najaru. Jia-duya hi ku-pareta-kai la pambabu-nya na lodu Hangahu.

¹⁶Tembiha dàngu kabubulu-ha da amami da inami; nuya na pareta-nggu Nyungga, MIRI Alami, ka peku mànangu-mi dàngu ka peku malundungu-mi la tana na pawua-nggunggami napa.

¹⁷Àmbu ningu pa-pameti-mi.

¹⁸Àmbi njuraku.

¹⁹Àmbi manganga.

²⁰Àmbi hakahii kambàliku rukuna na tau hawiangu.

²¹Àmbi mataru-nya na mangu tau hawiangu: na umana, na tanana, na papaha-na, da atana, da bandana, da kalandai-na, dàngu ngga - nggàra bia manguna,’ wàna.

²²Nuda-haka da pareta da pawua-na i MIRI lai nyimi mbuu ndàbami, ba jiaya na pauhi-mi la palindi. Ba jiaya na paniina ba nawàngu lingu kanduruku welingu la epi dàngu la karumangu matimbi, na-wuangu-ha yiada da pareta, dàngu nda ningu hili haui. Hàlaka tulihu-nanjaka la dua mbàla watu hi na-pakata-ngganja lai nyungga,” wàna.

²³“Ba jia-yaka na roka ndàbana na palindi dàngu bai rongu-yaka na lii welingu la kapàtangu, mai-danyaka mbuu ndàbada da liku uru dàngu da ama-bokulu kabihu-mi lai nyungga.

²⁴Dapanii, ‘I MIRI na Alanda na-pajiliku-nyaka na bunjuku-na dàngu na mangunju-na ba marongu-ya ba napanii welingu la epi. La lodu nàhu hakahii-ma-manyaka, ba tuba pekuna na tau ba daingu lurina, jiapa ka napanii dànya paraïna i Ala.

²⁵Ba tuna nggàra hi makabai-nya na lurima? Na epi mbangatu tungu nu napa na-patàlaru-kama! Mapi hàmu-manya duma napa ba mameti jàka marongu-ya i MIRI Ala ba nahili panii dànggama.

²⁶Màla ningu nu handàka ba daingu luri biana na tau ba nahàla parongu-ya i Ala maluri ba napanii welingu la epi?

²⁷Jia ba tuna, lua bia hi Muha, patingi-nya mbuu ndàbana na hupu liina i MIRI, Alanda, hàla màta kau hili beli kau patàka-nggamanya jàka nggàra wàna lai nyumu. Napa ma-patingi-manya dàngu ma-patundu-manya duma,’ wàda.

²⁸Ba narongu-yaka na rukuna nuna i MIRI, ka panii-nanggaka nyungga, ‘Kurongu-yaka jàka nggàra wàna na banjaru yiana, ma-deningu-maya na paniida.

²⁹Làti ka tuda nu mànu na pa-tandangu-da! Làti ka tuda nu mànu ba da-maraku-ngga dàngu ba da-patundu hàlanja da pareta-nggu, hi lupa da-mànangu dàngu wàla wuada lundu nu - nu!

³⁰Luawa nu, kau paràha-nja ka dabeli la maüda haàtu - haàtu.

³¹Tàka nyumu ha Muha, beli kau ndàdiku yiahu angunggu Nyungga; napa kuwua hàla-nggaunja da uku dàngu da pareta-nggu. Màlawa nyumu kau papeka-nja nyuda, ka peku nunju-danya la tana na pawua-nggunja,’ wàna.

³²Angu dedi, nunju-hawa wàngu tuturu-minja mbuu hàlada da pareta-na i MIRI Alami lai nyimi. Nudaka da pareta àmbu ningudu hau papangga-mi.

³³Nunju hàla-maha da pareta-na i MIRI Alami lai nyimi ka peku mànangu-mi dàngu ka peku pa-engangu-mi la tana na ngia pa-ngiangu-mi napa,” wàna.