Read Kambera BELINGU 7 Bible Online

BELINGU 7 - Kambera bible

BELINGU 7

¹“I MIRI Alami nangàndi-kai napa la tana na ngia pa-ngiangu-mi ngeru, dàngu napa Nyuna nawàngga-ya na banjaru dangu welingu lai nu. La hangga mata-mami nyimi napa ba nayaulu-ha da pihu mbua banjaru da marihi bokulu dàngu da marihi kapàru welingu lai nyimi, da tau Heti, Nggiringgahi, Amori, Kanaàngu, Perihu, Hewi dàngu Yembuhu.

²Jàka napuli-njaka i MIRI Alami da banjaru nuda la kuaha-mi nyimi dàngu hi mitalu-ha nyuda, màta nyimi kai pameti mbutaha. Àmbi mila-dunja eti jàka ndia àmbi paràndi dànja nyuda.

³Àmbi pakuru umangu dàngu nyuda, dàngu àmbi pahia-nja da anami pa-pakuru umangu dàngu nyuda,

⁴ka àmbu da pamarau-ha da anami welingu lai MIRI la palumu-nja da kamàla ala. I MIRI napa nambeni-nggai jàka mi-lumungu kamàla ala, dàngu napa nyimi mirengga molungu-du.

⁵Jia-duyaka, màtawa kai nyànggaru-ha da ngia pawotu-da maraku nuda da banjaru, pa-kaweraku-ha da andu watuda da mahàri ba wàda nyuda, pàpaha da maüna i Ahera, dàngu kai tunuha da kahala hada marapu-da da pa-marubuku-da.

⁶Ilaku-nyawa nuna mbuu ndàbana, nadu nyimi ba mangu-nanggai i MIRI Alami. Welingu la mbuu ndàbana na banjaru la pinu tana didi-akai nyimi papindi-na la patukai banjaru paleha-na.

⁷Hi kiri mbuha-nanggai dàngu napindi-kai nyimi i MIRI, nda jiaya na ruku bokulu-ami welingu la banjaru hawiangu; langatàka ana banjaru kudu-akai nyimi la pinu tana.

⁸Na nyuna hi kiri pindi-nanggai nyimi i MIRI rukuna ba nambuha-nggai dàngu na-rinjungu pa-patutu-nya na pa-ràndingu patura-na dàngu da boku la mangilu-mi. Tuna nuduka hi kiri pahàla-nanggai wàngu kuaha bokulu-na dàngu hi na-pamara-kai welingu la paata la hanganji Mehiru.

⁹Kanandi-nya! I MIRI Alami didi-aya na Ala, dàngu Nyuna Ala ma-tuturu-ya. I MIRI na-palundu-nya na paràndi-na dàngu na-paloha-nya na mbuhangu-na na ma-padaingu lundu la riu rata ana umbuku-na na tau na mambuha-nya Nyuna dàngu na ma-manundu-nja da lii pareta-na.

¹⁰Na nyuna nda jia kanodaru-ana Nyuna ba nahuku-nja da ma-paumbi-nya.

¹¹Jia ba tuna, manundu-wa la mbuu ndàbada da uku da pa-patàka-nggunggai nyimi la lodu nàhu,” wàna.

¹²“Jàkai eti wànja nuda da lii pareta, tàka hii nunjuha wàngu tuturu-mi, i MIRI Alami napa na-tuturu-mbu la pa-ràndingu na patura-na dàngu nyimi. Napa Nyuna na-paitangu mbuhangu-na na ma-padaingu, hama tuna na paràndi-na la boku la mangilu-mi.

¹³Napa Nyuna nambuha-nggai nyimi dàngu na-pakanyuru-kai, hi lupa dadangu da anami dàngu hi na-bonjangu na dangumi nggubulu-mi. Napa Nyuna na-pakanyuru-ha da wokami hi da wuangu ihida uhu nggàndumu, angguru dàngu mina haitungu. Napa Nyuna na pa-kanyuru-nggai nyimi hi lupa dadangu da hapi dàngu da mbimbimi. Mbuu ndàbada nuda da kanyuru napa mingala-nja la tana pawua-na i MIRI lai nyimi, pa-namatu-nya na paràndi-na la boku la mangilu-mi.

¹⁴Welingu la ba - banjaru-ka la pinu tana, nda ana hau banjaru-a ma-ngalangu kanyuru ma-bundungu tungu nu, hama tuna nyimi. Welingu lai nyimi mbuu ndàbami dàngu mbuu ndàbada da bandami, nda ningu haàtu mambuta jàka ndia heu mawutu.

¹⁵Napa i MIRI na-kahiri-kai nyimi welingu la mbuu ndàbana na pahidu wàngu, dàngu na-pamarau-kai welingu la mbuu ndàbana na hanggàmaru, na pambàda hakahii-mi la Mehiru, tàka napa da hanggàmaru nuda na-nàhaku wànja da muhumi.

¹⁶Nimbihu-na na banjaru na papuli-na i MIRI Alami la kuaha-mi nyimi pamolu-manja; àmbi pa-itangu-du mila etimi lai nyuda. Da kamàla alada àmbi marubuku-dunja, nadu ba timi nu kabaingu-minya wikimi la pamanjurangu.

¹⁷Talànga wanguna bai kakaya ba darihi dangupa nggubulu-da nuda da banjaru mbuu ndàbada tàka hi nda peku wàngga-miha nyuda.

¹⁸Tàka àmbi mangàdatu-nja, namuya jàka nggàraya na pa-patumbu-na i MIRI Alami hangganya na hanganji Mehiru dàngu nggubulu-na na tauna.

¹⁹Namuha da pahanggàmaru wàngu da manda ngerida da pa-hakahii wikimi, da tanda mbiha da pa-hangàtarungu, dàngu na kapàru mbana eti na pawàna i MIRI Alami la pa-pahàla-kai. Tuna numbu ba na-kukutungu i MIRI Alami la mbuu ndàbada da banjaru pa-mangàdatu-mi.

²⁰Jiapa na-patumbu mbuyaipa na pa-kanggupuku wàngu[9] la hongada nyuda, hi lupa da-molungu-mbu da tau mapalai dàngu da ma-kawiningu.

²¹Jia-duya àmbi mangàdatu-dunja da banjaru nuda. I MIRI Alami naopa-nggai. Nyuna Ala ma-bokulu-ya dàngu ma-hawiru-ya.

²²Napa nangeri wàngga - wànggaha nuda da banjaru welingu la hanggami. Àmbu rengga pamolu-dunja nyuda, ka àmbu da-bonjangu wàngu da banda bohu, hi lupa tiangu mi-handuka wànya.

²³Tuna nu napa i MIRI ba napuli-nja da muhumi lai nyimi. Napa Nyuna na-kunggalu-nja, hi lupa na-pamolu-nja.

²⁴Da hanganji-da napa napulinja Nyuna la kuaha-mi nyimi. Nyuda napa ipametiha, dàngu napa nyuda pa-marombangu-haka. Nda ningu-a haàtu ma-ngalangu pa-torungu la hanggami nyimi; napa nyimi mi-pamolu-nja mbuu ndàbada.

²⁵Da kahala hada da pa-marubuku-da màta kai tunuha. Da àmahu mabara marara da ma-padambakungu la kahala hada àmbi mataru-dunja, dàngu àmbi piti-duha tunggu wikimi. Jàka ipanggaya na pareta nuna napa nyimi imeti, nadu i MIRI ba nakaraü-manya eti na tau na ma-màrakungu kahala hada marapu.

²⁶Àmbu haudu kahala hada marapu patumi la umami, ka àmbu nanggana-kai ràtungu ma-karitaku-nya. Lupanguma karaünya eti dàngu ma-kalana-ya wàmi ba naràtunya paraïna i MIRI,” wàna.