Read Kambera BELINGU 8 Bible Online

BELINGU 8 - Kambera bible

BELINGU 8

¹“Mbuu ndàbada da uku pa-pakata-nggunggai la lodu nàhu màta kai nunjuha dàngu tuturumi, ka peku pa-daingu-na bai luri, bai woru dàngu kai ngianya na tana na paràndi-na i MIRI la boku la mangilu-mi.

²Namuya! Patu kambulu ndaungu mandaina ba nairu ngàndikai paraïna i MIRI Alami nàmu la ngarangia mamarau la maràda telangu. Na hanàhu-mi nàmu la ngarangia wuku-mananya i MIRI la pakama-nggai, ka peku ita-nanya na maninya la etimi dàngu jàkai manundu la pareta - pareta-na.

³Namàta-nggai pa-rimbangu, hàla hi nawua-nggai màna nduma pangami. Ndedi ihandàkangu-ma pangangu matungu nu nyimi dàngu da boku la mangilu-mi. Hi tuna nu na pawunda-na i MIRI ajaru-nanggai, ba nda mbulungu pangangu pàku hi naluri na tau tàka rukuna mbuu ndàbana na papanii-na i MIRI duna.

⁴La ngala patu kambulu ndaungu nu nda da-katàri-a da pakimi dàngu nda dambua-a da wihimi.

⁵Namu-maya ba ajaru-nanggai paraïna i MIRI Alami hama tuna na haàtu ama ba na-ajaru-ha da anana.

⁶Jia-duya, wànjawa mbuu ndàbada da lii pareta-na i MIRI. Luriwa tundunja da ukuna dàngu màta nyimi kai tembiya Nyuna.

⁷I MIRI Alami nangàndi-kai la tana ma-kamboka; la tana na madangu lukuna dàngu matawai-na, dàngu na luku lulungu la unu tana na ma-tapanjiru la lo - lolangu dàngu la tandula - tandula.

⁸Na tana nuna na-wuangu ma - màtu uhu nggàndumu, angguru, wua kapilitu, wua ndalima, haitungu dàngu manggaluwangu.

⁹Lai nu nyimi ndai handàkangua pa-rimbangu jàka ndia la paningu ma-njakangu. Da kaba watuna da-pabàhingu dàngu welingu la tandula - tandula-na peku àki ningumi wudu.

¹⁰Napa ingangu lundu dirami, dàngu napa mi-pamalangu-nya i MIRI Alami rukuna na tana hàmu na pambàda wuana-nggami,” wàna.

¹¹“Rima pa-hàmungu ka àmbi toma la pa-maromba-nya i MIRI Alami; welingu la pareta - pareta-na na pa-pakatanggu-nggai la lodu nàhu, àmbu ningudu hau palànja-mi.

¹²Jàka lundu dira-mika bai ngangu, dàngu ba mbàda pa-hadangu-mika uma - uma hàmu pangia-mi,

¹³dàngu jàka daworu-ka da hapi da mbimbimi, da àmahu mabara da àmahu marara-mi, hamanai mbuu ndàbada da banda mangumi hawiangu,

¹⁴mangga pa-hàmungu ka àmbi lua pa-katadaku hi lupa mi-maromba-nya i MIRI Alami na mambàda pahàla-kai welingu la Mehiru, na ngia pa-paata-kai.

¹⁵I MIRI nairu ngàndikai pali ningu la maràda telangu ma-nggailaru dàngu ma-mbàringu, na madangu ularu paupahungu, madangu tamihiku-na. La tana màdu kàrangu manda pa-waingu, na-paràha-nya na wai pa-lulungu welingu la kaba watu, hi pekuna nyimi bai unu lundu hodami.

¹⁶La maràda telangu nawua-nggai màna pangami, pangangu pandedi tandada da boku la mangilu-mi. I MIRI nawunda-ya nuna la pakama-nggai nyimi dàngu ka pa-karàda-ha da etimi, ka màta tai la malamiri nawunda-nggai mahàmu.

¹⁷Jia-duya, jàma juangu papangàdangu, ba ruku màhinggu dàngu kapàru-manggu duku hi kuwulu; àmbi wàmi.

¹⁸Patandanya, ba i MIRI Ala duna na matunggai pawulu wàngu. Hi kiri tunanya na matuna nu, nadu lundu lodu nàhu ba tuturu-mana-nyapa la paràndi-na, na patura-na dàngu boku la mangilu-mi.

¹⁹Àmbi maromba-nya i MIRI Alami dàngu àmbi pa-mbelingu la kamàla ala la palumu-nja dàngu la pa-karadaku-nja. La lodu nàhu ku-panamu-nggai jàka era wundamaminya jiangu-maka duna na-pamolu-nggai i MIRI.

²⁰Jàka era nda manundu-mi lai MIRI Alami, nyimi napa na-pamolu-mbunggai, hama tuna da banjaru da pa-pamolu-na la hangga matami,” wànanja.