Read Kambera BELINGU 9 Bible Online

BELINGU 9 - Kambera bible

BELINGU 9

¹“Ronguwa angu dedi! La lodu nàhu pala-minyaka na Luku Yorundangu la pa-mandapu-nya na ngaba tana ba - banjaru marihi bokulu dàngu marihi kapàru welingu lai nyimi. Da parai - paraingu-da da bo - bokulu hàla, maningu kilimbatu janggangu matoma la awangu.

²Da tau lai nu da-bàkulu tauda dàngu da-kapàru; nyuda hama milimungga-ha, dàngu nuda mbàda rongu-minyaka, ba nda ningu haàtu matara-ha nyuda pa-rawaku-ha.

³Tàka nàhu napa hakahii wiki-minyaka jàka nggikina i MIRI Alami ba nalaku mangilu la hanggami ba hama tuna epi ma-pakehi-ya. Nyuna napa na-pakàku-ha la hangga matami, hi peku nyara-miha dàngu hi pamolu parengga-nja, hama tuna na pambàda ràndina i MIRI.

⁴Ba nahàlaka i MIRI Alami payaulu-ha nyuda ndumami nyimi, àmbu jia kaka-minya la etimi hi kiri ngàndi-nanggai Nyuna lai nàhu la pamangu-nya nuna na tana ba ruku hàmu-mamika dàngu ba ruku pahàra-minja da pambuha-na i MIRI Alami tàka hi iparàkangu la pangala-nya. Nda wàngu patuna nu-a duna! Hi nanyara-ha duna da banjaru i MIRI ndumami nyimi rukuna ba da-akàtu. Hi na-pulinggai i MIRI papiti-ya na tanada ba mbuhangu-nanya pa-pahàra-nya na paràndi-na la boku la mangilu-mi, i Ambarahàmu, i Ihàku dàngu i Yakupu.

⁶Na-màndungu-ma bàdi la etimi ba nda jia wua-ana-nggainya nuna na tana ma-kamboka i MIRI ruku paràkangumi la pangala-nya. Langatàka ndia-a! Nyimi yia banjaru ma-tongguru etikai.

⁷Namuya jàka nggiki hamana nyimi bai patumbu-ya na hànggana i MIRI Alami la maràda telangu. Piti welingu la lodu dunjaku-minya la Mehiru, lupa la lodu tàkami lai yiahu, bai ndubaku-ya i MIRI.

⁸Ri - rihi la Palindi Hinai bai pawiti-nya na hàngga halawàla-na i MIRI, hi lupa nawuku-ya la pa-pamolu-nggai nyimi.

⁹Heinggunya-ka nyungga la palindi pakeiha da watu pa-ràndingu patura-na i MIRI dàngu nyimi. Patu kambulu lodu dàngu patu kambulu rudunggu ba enganggu la pinu palindi dàngu nda ngangu nda ngunungu.

¹⁰La malamiri i MIRI nawua-nggaha da dua mbàla kapapa watu, da pa-tulihu wikina i MIRI. La watu nuda pa-tulihu-ha da kareuku papanii-nanggai nyimi welingu la padua epi bai pauhi la kambu palindi.

¹¹Nu, ba na-làpahu-ka na patu kambulu lodu patu kambulu rudungu wuana-nggahaka nyungga i MIRI da dua mbàla kapapa watu pa-ràndingu.

¹²Hàla panii-nanyaka i MIRI lai nyungga, ‘Puru pa-renggangu-wa, nadu na banjaru-mu na pambàda iru ngàndimu paluhu welingu la Mehiru dawunda-ka ma-akatu. Mbàda hiliru-daka welingu la pareta - pareta-nggu, tàka hi da-pandoi kahala hada la pa-marubuku-nya,’ wànangga.

¹³Napanii-mbungga nyungga i MIRI, ‘Ku-pimanya na banjaru yiana ba lalu tongguru etiya.

¹⁴Àmbu kamangu-du pa-pabeta-ngga. Ba pamolu hàlanja wàngguka, hi lupa nda pahili namu-ahapa nyuda. Tàka nyumu màta ka kutukau amana na hau banjaru marihi bokulu marihi kapàru welingu lai nyuda,’ wànangga.

¹⁵Hàla punjilungu-nggunyaka, ba dàngu ngàndi-ngguha da dua mbàla kapapa watu pa-ràndingu la limanggu, ku-kamburungu welingu la palindi na maroka kandulangu.

¹⁶Kuita-kai ba mbàda pangga-minyaka na pareta na i MIRI Alami. Mbàda njala-mika hanggangu lai MIRI rukuna ba mbàda pandoimika nduma wikimi hau kahala hada hapi welingu la àmahu palala.

¹⁷La pa-ngiangu lai nuduka, la hangga matami, da dua mbàla kapapa watu pa-ràndingu ba ku-yàbahu-nja hi dambera kaha - hàbaru.

¹⁸Hàla hili maràbaku-nggunyaka handàkangu la hanggana i MIRI la pinu palindi patu kambulu lodu patu kambulu rudungu, nda pangangu nda pa-ngunungu. Hi kiri tunggu nu jiakai nyimi-duka bai tuyaka na manjala la hanggana i MIRI bai wundaya na ma-akatu ba wàna hi nambeni wàngu i MIRI.

¹⁹Ku-mangàdatu-nya na hànggana i MIRI na ma-kandulangu hanggangu lai nyimi, lupa ka pamolu-nja hi kiri wànanggai; ba tuna la handàkangu nunambu na-patingi-nggapa i MIRI.

²⁰I MIRI hàngga nda uku-mbunanya i Harungu, ka pameti bia-yawa wàna-maka; ka hamayangu-nggunyaka tungguna nyuna.

²¹Na kahala hada hapi na pambàda pandoi-mi hapi àmahu, ku-patàda-nya daa la epi. Hàla hi kupakaweraku-ya dàngu hi baiya lundu namija hama tuna kumburu tana, hàla na kumburu-na hi ku-kawuka-nya la ana luku, na ma-lulungu welingu nu la palindi.

²²Hamangu-kai la Tambera, la Maha dàngu la Kimburutu-Taawa, nyimi hili wuda-minyai na hànggana i MIRI Alami.

²³Hàla ba jiaya na paràha-nanggai i MIRI palaku welingu la Kandihu-Mbarania, la pa-ndàharungu pa-mandapu-nya na tana na pawuana-nggai napa i MIRI lai nyimi, hili ndubaku-minyai na pareta-na i MIRI Alami ba ndai bihu pawaiya dàngu pa-patundungu lai Nyuna.

²⁴Piti welingu ba kutanda-kai, nuangu-mana nyimi bai ndubaku-ya i MIRI.

²⁵Kupinya ba kita eti-mananya i MIRI la pa-pamolu-nggai nyimi. Tàka hi patu kambulu lodu patu kambulu rudungu ba ku-maràbaku la hanggana i MIRI

²⁶hi tuna yia ba ku-hamayangu: Dou MIRI Mahupu jangga, àmbu pamolu àrunya yiana na banjaru mangumu, na banjaru na pambàda pahàla-mu dàngu na pa-karia-mu paluhu welingu la Mehiru bau wàngu mbihamu dàngu kuaha bokulu-mu.

²⁷Namu àruha da atamu i Ambarahàmu, i Ihàku dàngu i Yakupu, àmbu tàngaru ni àruya na tongguru etina na akatu-na dàngu na njalana na banjaru yiana.

²⁸Era pamolu-mamunya yiana na banjaru-mu, ningu-duka papanii wàna na tau Mehiru, ba nda màka-munyapa la pangàndi-ya na banjaru-mu la tana na pambàda ràndimu lai nyuda, dàngu hiu karia-nja nyuda la maràda telangu ka pameti-ha, rukuna ba ndau mbuhanja, wàna wàngu duka duna, wàna.

²⁹Ba tuna namuya MIRI, nyuda yiada ba banjaru pambàda pindi-muha la patuya banjaru-mu, dàngu na pambàda ngàndimu welingu la Mehiru, bau wàngu mbihamu dàngu kuaha-mu na ma-bokulu,” wànggu.