Read Kambera YUHANI 10 Bible Online

YUHANI 10 - Kambera bible

YUHANI 10

¹“Ma-padeningu langatàka-maya yiana na papanii-nggu,” wàna i Yehu. “Na tau na mali ningu la oka ba natama la oka mbimbi, hi nda la ngaru pindu-aya nali ningu, tàka nawàngu pahei ningu bia la hau pangia na tau nuna ma-manganga dàngu ma-rambangu-ya.

²Tàka na tau na mali ningu la ngaru pindu jiaya duna na mini pawangu-da da mbimbi.

³Na-bunggahu-nya pindu paraïna madai pindu, tàka da mbimbi da-katàmbalu-nya na talia liina ba napaau mara heu - mara heunja da tamuda hi nairu ngàndiha la hambeli.

⁴Ba nangàndi-haka da mbimbi la hambeli, mangilu-nanyaka na mini pawangu, hi datundu-nya paraï da mbimbi, maa ba datanda-duya na talia liina.

⁵Nda jia bihu-ada pa-tundungu la tau hawiangu, jiapa dapalai mbunyaipa nu na tau, maa ba nda datanda-duya na talia liina,” wànanja.

⁶Napanii-ya nuna na lii pangerangu i Yehu, tàka nyuda nda da-jàngapu-aya jàka nggàraya na pawuku-na.

⁷Nahili panii i Yehu, “Ma-padeningu langatàka-maya yiana na papanii-nggu: Nyungga pinduda da mbimbika.

⁸Mbuu ndàbana namamai mangilu-ngga Nyungga ma-manganga-ha dàngu ma-rambangu-ha, tàka da mbimbi nda da-katàmbalu-anja da talia liida nyuda.

⁹Nyungga pinduka jàka nggamuya na mali ningu lai Nyungga ba natama jiaya na mamara; ka tama luhu-nanyaka hi na-ngalangu pangangu.

¹⁰Na ma-manganga mainanya pa-manganga pa-pameti dàngu pa-paruha-ma-a duna. Tàka na mainggu Nyungga jiaya ka na-ngalangu luri na tau — luri mabundu làndangu.

¹¹Nyungga yia mini pawangu mahàmu-maka. Na mini pawangu na mahàmu na-wuangu-ya na lurina lumuda da mbimbina.

¹²Na tau pa-wuangu wunda hi nda mini pawangu-aya dàngu nda mangu-mbunanja da mbimbi, napalai wàrunja napa da mbimbi jàka nàmungu ahu rumba. Tàka hi na-njàkilu-ha ahu rumba da mbimbi hi napai - ihanja.

¹³Hi napalai-ya nu na pa-wuangu wunda, maa ba kehangu-nanya wunda-ma-a duna hi naràma. Nda na-ihili-anja da mbimbi.

¹⁴Nyungga yia mini pawangu mahàmu-maka. Hama tuna i Ama ba natanda-ka Nyungga dàngu Nyungga ba kutanda-ya i Ama, tuna numbu Nyungga ba kutanda-ha da mbimbinggu dàngu nyuda nu da mbimbinggu datanda-mbuka Nyungga. Tàka Nyungga hi ku-pajàma-nya na luringgu lumuda nyuda nu da mbimbinggu.

¹⁶Ninjaipa da mbimbi hawiangu da mangu-mbunggu, tàka nda pa-papohungu-aha la kabàba mbimbi yiana. Nyuda dambimbi nuda lupangu-ma ku-karia-nja hi darongu-ya na talia liinggu. Hi hau kabàba-ahaka[25] mbuu ndàbada ba haàtu-ana na mini pawangu-da.

¹⁷I Ama nambuha-ngga maa ba kuwua-duya na luringgu, ka kukei beliya.

¹⁸Nda haàtu-mbu ma-ngalangu pa-butuhu-ya na luringgu welingu lai Nyungga. Nyunggama duku mawàngu etinggu la pawua-ya na luringgu. Kumàka-ma duku pawua-ya, dàngu kumàka-mbu papiti beliya. Nuna-duya na wai ngera pangala-nggu welingu la Amanggu,” wàna.

¹⁹Ba tuna nu na paniina i Yehu, ka palumungu-danyaka da tau Yahundi.

²⁰Dadangu da mapanii, “Huruku-nanya wàndi! Katoba-nanya! Nggikina hii patingi-nya?” wàda.

²¹Tàka ningumai hawiangu mapanii, “Na tau pa-huruku wàndi nda tuna nua na kareuku-na! Jia ngalangu-nakaka na wàndi pa-pabulangu mata tau mapoki hi naita?” wàda.

²²Da tau la Yeruhali mbabu-danya na Lodu Remi Katua-ya na Umana i Miri. La rehi nu wula urangu-ya.

²³Nyuna i Yehu wenangu-nanya la Kawindu Halomu la Umana i Miri,

²⁴ba jiaya namaida da tau Yahundi pa-langgungguru-nya i Yehu. Dapanii, “Lundu pirangu-mapa bau pa-mbilimbua-kama. Panii pa-habola-nggamanya jàka jia langatàka kau na Hanganji Ma-pamànangu,” wàdanya.

²⁵Nanapa-ya i Yehu, “Hi mbàda panii-madu-nggunggaika, tàka ndai pawaia. Da paràma pawunda-nggu la tamuna na Amanggu, jiaha da mbutina na rukunggu Nyungga.

²⁶Hi ndai pawai nyimi jiaya ba ndai tamadu la dihada da mbimbinggu.

²⁷Da mbimbinggu da-katàmbalu-manya na talia liinggu. Kutanda-maha duku, dàngu datundu-mangga duku.

²⁸Na luri na ma-langatàka dàngu na ma-palupangu jiaya na pawua-nggunja, hi nda da-molungu lundu nu - nu. Nda jia haàtu-a ma-ngalangu paramba-nja welingu la limanggu.

²⁹Na Amanggu, na mambàda wua-nggaha Nyungga, narihi[26] ndàbanya. Dàngu nda haàtu-a ma-ngalangu paramba-nja welingu la limana i Ama.

³⁰Nyungga dàngu i Ama mbulungu-ma-ama.”

³¹Ka hili piti-danyaka watu da tau Yahundi ka nàhaku-nya i Yehu ba wàda.

³²Tàka hi napanii-nja i Yehu, “Mbàda ita-mami-nggaka ba dadangu da paràma mahàmu pawunda-nggu, da pa-pabuku-nangga i Ama. Welingu la mbuu ndàbada nuda da paràma nggàraya nu na ma-pawiti-nya tàka hii mbuhangu pa-nàhaku-ngga watu?” wànanja.

³³Dahema da tau Yahundi, “Nda rukuda da paràma-mu da mahàmu-a, ka nàhaku-nya watu hi wàmanggu, tàka rukuna bau lapiya i Ala. Alaka ba wàmu, tàka hi tau-madukau.”

³⁴Nanapa-ya i Yehu, “Ka nda nianya na pa-tulihu la Mbuku Ukumi: ‘alakai nyimi’ ba wàna i Ala?

³⁵Tapi-manya jàka nggàraya na pa-tulihu la Huratu Matua, ba na-undungu pa-daingu-ma duna. Nu ba tuna, ‘alakai’ jàka wàna bidua i Ala la tau da ma-kataku-ya na puluna,

³⁶ka nggikina nyimi lapi-nanya i Ala hi wàmingga rukuna na paniinggu Ana Alaka ba wànggu? Tàka làti wàmu, i Ama na mapindi-ka hi na-palewa-ka la pinu tana.

³⁷Jàka nda kuwunda-ha da paràma pa-pabuku-nangga i Ama, àmbi pawaidu lai Nyungga.

³⁸Tàka rukuna ba kuwunda-ha, waiyawa nu na pawunda-nggu, jiapa-kai ka ndai bihu papawai lai Nyungga. Ba timi nu ingalangu papinya dàngu pa-jàngapu-ya ba daingu pambulu dànangga i Ama, tàka Nyungga ba daingu pambulu dànggunya i Ama,” wànanja.

³⁹Ka hili pa-luangu-madanyai lima payàpa-ya i Yehu, tàka nggepi tamàhiku-ma-ananya welingu la limada.

⁴⁰Ka beli-nanyaka i Yehu la hapapa Luku Yorundangu, la ngia pa-parunungu-na tau àmangu i Yuhani, hi na-ndàdiku lai nu.

⁴¹Nadangu na tau na mamai lai Nyuna. Tàka hi dapanii, “Nda nawunda-a pa-hangàtarungu i Yuhani na nyuna da pa-deningu ndàbama da papanii-na na rukuna na tau yiana,” wàda.

⁴²Ka dangu-nanyaka na tau lai nu na mapawai lai Yehu.