Read Kambera YUHANI 11 Bible Online

YUHANI 11 - Kambera bible

YUHANI 11

¹Ninya na haàtu na ma-tamungu Laharu na ma-ndàdiku la Mbetani dàngu da ana winina i Maria dàngu i Màrata.

²I Maria jiaya na kawini na maburi-nja mina mbii kati da wihina i Miri hi na-kanguli wànya lunggina. La hau rehi hidu-nanya i Laharu.

³Da ana winina da madua da-pangàndi-nya langu i Yehu, “Miri na ana minima na pambuha-mu hidu-nanya,” wàda.

⁴Ba narongu-yaka nu i Yehu, panii-nanyaka, “Na hidu yiana nda nalua-aya la meti. Nu hi tuna ka pa-mangunju wànya i Ala, dàngu rukuna nuna ka pa-mangunju-mbuya na Ana Ala,” wàna.

⁵Nyuna i Yehu nanamu-ha i Màrata, i Maria dàngu i Laharu.

⁶Na nyuna ba narongu-ka i Yehu ba hidu-nanya i Laharu na-harawukui-pa pa-ndàdiku dàmbu lodu lai nu.

⁷Hàlaka nu hina-duka hi napanii la papanau-na, “Màla ndawa tabeli la Yundia,” wànanja.

⁸Danapa-ha nyuda, “Umbu Ngguru, bidi pàku-napa ka ta-nàhaku-nya watu ba wàdanggau tau Yahundi, tàka nàhu hili beli lai nàhu wàmui?”

⁹Tàka i Yehu, “Ka nda ha-kambulu dàmbu njàmu-ana dimi na lodu?” wàna. “Na tau na malaku wàngu lodu, nda na-tunjuru-a, ba naita-duya na harii la pinu tana yiana.

¹⁰Tàka na tau na malaku wàngu rudungu na tunjuru, ba nda nidunya na harii lai nyuna,” wànanja.

¹¹Nuya na paniina i Yehu. Hàlaka hi nahili panii, “Na angu mbuhanda i Laharu katuda-nanyaka, tàka ka kulua pabengi-nya wànggu,” wànanja.

¹²Danapa-ha da papanau-na, “Miri, jàka katuda-nanya i Laharu, napa nahàmu-ma duna,” wàdanya.

¹³Na palana i Yehu jiaya ba mbàda meti-naka duna i Laharu. Tàka nyuda jiaya na katuda pa-tànjingu ihu na palana i Yehu wàda bia.

¹⁴Tuna nuduka hi napanii pa-habola-nja paraïna i Yehu, “Mbàda meti-naka i Laharu, hi wànanja.

¹⁵Tàka nambaha-mai na etinggu ba nda ningga lai nu, ba narihi hàmu-dupa ndumami nyimi, ka peku pawaimi. Ba tuna màla-ndawa nàhu ka talua lai Laharu,” wànanja.

¹⁶Tàka i Tomahu, “i Ana Ndua” ba wàdanya napanii-nja da anguna pa-panaungu, “Màla ka talua-mbu nyuta, ka tameti karia-nya,” wànanja.

¹⁷Ba natàka-ka lai nu i Yehu, mbàda patu mbua lodu-naka la reti i Laharu.

¹⁸Lihina la Yeruhali-ya na Mbetani, ràkangu tailu mbua kiluna marauna.

¹⁹Nadangu na tau Yahundi na mambàda mai lai Màrata dàngu i Maria la pa-panggaüru-ha ba jiaya na metina na ana minida.

²⁰Ba narongu-ka i Màrata ba nàmunya i Yehu, lua-nanyaka pa-tàbuku-ya, tàka i Maria la umaya.

²¹Nu ka panii-nanyaka i Màrata, “Miri, jàka ninggau yiahu làti yia nana, nda tuana Miri ka nameti na ana mininggu.

²²Jiapa-kai ba tuna kupi-manya duku ba jiangu-ma nawua memanggau nàhu i Ala, jiapa ka nggàra biaya na pakarai-mu,” wànanya.

²³Tàka i Yehu, “Napa naluri beli na ana minimu,” wànanya i Màrata.

²⁴Nanapa-ya i Màrata, “Kupi-manya ba na-hadangu beli napa i Laharu, la rehi pahada belinja da mameti la Hupu Njàpuna,” wàna.

²⁵Tàka i Yehu, “Nyungga jiaka ma-wuangu luri dàngu ma-pahadangu beli tau mameti,” wànanya i Màrata. “Na tau mapawai lai Nyungga napa naluri jiapa ka mbàda meti-nakai.

²⁶Tàka na tau maluri na mapawai lai Nyungga, nda jia meti-anapa lundu nu - nu. Muwai-duya nuna?” wànanya.

²⁷“Miri,” wàna i Màrata, “kupawai-ma duku ba Ana Alakau, dàngu ba Hanganji Ma-pamànangu-kau na mamai la pinu tana yiana,” wànanya.

²⁸Ba napanii tunaka nu i Màrata, lua-nanyaka papaau-nya i Maria, na anguna kawini hi na-kanguruku-nya, “Ninya ni i Umbu Ngguru; paàra-nanggau,” wànanya.

²⁹Ba narongu-yaka nu, ri - ringa-naka ba na-hadangu i Maria hi nalua pa-tàbuku-ya i Yehu.

³⁰Nu ndedi natama-a i Yehu la kotaku. Jiapa-mayapa la ngia pa-tàbuku-nanya i Màrata.

³¹Na hadangu-na dàngu ba ri - ringana paluhu i Maria, daita-ya paraï da tau Yahundi da ma-mandapu dànya i Maria la uma. Ka ndàki-danyaka i Maria làbu lua-nanya pahii ningu la reti wàda bia.

³²Ba natàka-ka i Maria la ngia paninya i Yehu, dàngu ba naita-kiyaka, patika-nanyaka la hanggana i Yehu hi napanii, “Miri, jàka ninggau yiahu làti yia nana, Nda tuana Miri ka nameti na ana mininggu,” wànanya.

³³Ba naita-yaka hiina i Maria paraïna i Yehu, dàngu ba dahiimbu da tau Yahundi mamai karia-nya i Maria, hawina-nanyaka dàngu dira mila mumuhu-ya na etina ba itaya.

³⁴Ka paàra-nanjaka, “La ngginiya na ngia pa-bànjalu-minya,” wànanja. “Mai kau tàngaru-ya Miri,” wàdanya.

³⁵Ka hii-nanyaka i Yehu.

³⁶Hi dapanii da tau Yahundi, “Ai, tàngaru-ya kanjupu namu-nanya i Laharu,” wàda.

³⁷Na nyuna ninyai hawiangu na mapanii, “Nyuna ni na ma-pabula-nja da mata tau mapoki, ka ni hi nda na-paratahu-nya ka àmbu nameti i Laharu?” wàda.

³⁸Nu kahili mila mumuhu-nanyaika na etina i Yehu, hi nalua la reti. Nu na reti liangu pa-pandàbingu watu bokulu-ya.

³⁹“Pa-hinggilu-ya na watu,” wàna i Yehu. Nanapa-ya i Màrata ana winina na mameti, “Ai, Miri, mbàda patu mbua lodu-naka la reti. Jàmu wau-manaka duna!” wànanya.

⁴⁰Napanii i Yehu lai Màrata, “Ka ni hi mbàda panii-madu-nggunggauka: Jàkau pawai, napa uitaya nggi tuna na mbihana i Ala ba wànggu!” wànanya.

⁴¹Ka pa-hinggilu-danyaka na watu. Ba tunaka nu, tangara-nanyaka la awangu i Yehu hi napanii, “Màlangu-mu, ou Ama,ba mbàda tingi tanaü-munggaka.

⁴²Kupi-manggau ba nua naingu-mana natingi tanaü-mungga, na nyuna hi kupeka-ya yiana, lumuda yiada da tau, ka peku pawaida ba Nyumu ma-palewa-ka Nyungga,” wàna.

⁴³Ba nahàlaka papanii tuna nu, wara pa-kodungu-nanyaka i Yehu, “Ha Laharu, luhukau nàmu!” wàna.

⁴⁴Ka luhu-nanyaka nu na mameti. Da wihi limana pa-yubuhu wàngu tera yubuhu-mahapa, tàka na matana na pa-làmbaru-nya tera tamalingu. Tàka i Yehu, “Ngguliya na yubuhu-na ka peku lakuna,” wànanja da tau lai nu.

⁴⁵Nadangu na tau Yahundi na mamai pa-tadalu-ya i Maria, da mapawai lai Yehu ba daita-yaka nu na manjadi.

⁴⁶Na nyuna ninja hawiangu la hongada nyuda da malua papanii-ya la tau Parihi nu na pawunda-na i Yehu.

⁴⁷Tuna nuduka hi kiri pauhi-da da tau Parihi, da ratu pangora dàngu na Bata Bokulu Anggama ba da-batangu. Hi dapanii, Nggikina wànda-aka? Ba dangu-mada-nyaka da pa-hangàtarungu pawunda-na na tau nuna.

⁴⁸Jàka tamàta bianya ba tu mànuna nu napawai ndàbaka napa na tau lai Nyuna. Ka lundu mai-danyaka napa da ma-pareta la Roma hi da-nyungguru-ya na Umana i Miri dàngu hi da-weharu-ya na banjaru-nda nggubulu-na.

⁴⁹Nu ka panii-nanyaka na haàtu la hongada nyuda na ma-tamungu Kayapàhu, na Ratu Bokulu la ndaungu nu, “Nda nggàrama nyimi yia papimi.

⁵⁰Ka nda ana miripu-mana nu la kanandingu-mi ba narihi hàmu ningupa, jàka nameti na haàtu tau lumuna i madangu welingu ba na-talàpu ndàba nggubulu-na yia na banjaru?” wàna.

⁵¹Hi kiri panii-nanya nuna i Kayapàhu, nda kanandingu wiki-ananya. Jia-aya ba ngaha pa Ratu Bokulu-ya la ndaungu nuna, hi nanyura-ya ba lumuna na banjaru Yahundi-ya napa na pameti wàna i Yehu.

⁵²Dàngu nda lumu mehana na banjaru Yahundi bia, tàka jia-mbuya ka pauhi-nja dàngu ka kahaunja da ana Ala da ma-tanyalangu.

⁵³Piti welingu la lodu nu pa-hamangu-danyaka da liku uru Yahundi ka pameti-ya i Yehu.

⁵⁴Tuna nuduka hi nda na-pawuwangu wikina la madangu la tau Yahundi i Yehu. Hadangu-nanyaka welingu la Yundia, hi nalaku la paraingu Epuraïmu la lihi maràda telangu. Lai nuya na-ndàdiku ningu dàngu da papanau-na.

⁵⁵Nu mareni-nanyaka na Lodu Remi Paha Yahundi. Nadangu na tau welingu la nde - ndeha da mambàda laku la Yeruhali ka pahàra hahanya na kalaratu hawari wiki ba ndedi jiaya na lodu mbabu.

⁵⁶Dahimbu-ya i Yehu. Tàka ba da-pauhi-ka la Umana i Miri, da maràngga paàrangu dàngga anguda, “Màla nggikina wàmu nyumu? Talànga wanguna nda namaia ihu la mbabu nàhu?” wàda.

⁵⁷Hi panii tuda nu, jiaya ba mbàda wuangu-daka pareta da ratu pangora dàngu da tau Parihi, na tau na mapinya na ngia paninya i Yehu, lupangu-ma na-patàkangu kareuku ka peku yàpa-ndanya ba mbàda wàda-duka.