Read Kambera YUHANI 12 Bible Online

YUHANI 12 - Kambera bible

YUHANI 12

¹Nomu mbua lodu ba ndedi jiaya na Lodu Remi Paha, lua-nanyaka la Mbetani i Yehu. Lai nuya na-ngiangu ningu i Laharu na pambàda pahada-na welingu la meti.

²Lai nu dangaa pambabu dànya i Yehu, i Màrata jiaya na ma-payema-nja pangangu. I Laharu dàngu da ariyaa da-mandapu dànya pangangu i Yehu.

³Tunaka nu nàmu-nyaka i Maria ba dàngu ngàndina mina mbii kati narawàtu ma kanjupu mbotu wili, ràkangu paradua litaru-na. Naburi-ya na mina mbii kati la wihina i Yehu, hi namangu pa-kanguli wànya ruu lunggina. Ka hambungaru-nanyaka na mina mbii kati ba nawàngu pahibu-nya na uma.

⁴Tàka i Yundahu Ihikariu na haàtu papanau-na i Yehu — na ma-kaleka-nya napa — napanii,

⁵“Ka nggikina duna hi nda padangga bianya ni na mina mbii kati, ka ngalangu tailu ngahu àmahu bara[27] wilina, tàka nu da àmahu ka wuanja da tau mamila?” wàna.

⁶Hi kiri panii tuna nu i Yundahu nda jia-aha da tau mamila da pa-pangàda-na, tàka jiaya ba tau bohuya. Nakàli piti winingu àmahu welingu la kanai àmahu mbulungu-da na pa-pahàmu-na nyuna.

⁷Tàka i Yehu, “Màta-nyaka naa na kawini! Nawunda-ya yiana ndumana na lodu taningga.

⁸Da tau mamila ni mànu-manja la hongami, tàka Nyungga ndia-a,” wàna.

⁹Nadangu na tau Yahundi marongu-ya ba ninya la Mbetani i Yehu, hi dalua lai nu. Nda mbulungu biana rukuna i Yehu hi kiri luada, tàka ka ita wànya i Laharu-mbu na pambàda pahada-na welingu la meti, wàda.

¹⁰Tuna nuduka ka pameti-mbuya i Laharu hi kiri wàda da ratu pangora;

¹¹maa ba rukuna nyunadu hi nadangu na tau Yahundi ma-tanggalara-nja nyuda, tàka hi lundu pawaida lai Yehu.

¹²Hadangu harii rongu-nanyaka na tau dangu na mambàda mai ka mbabunya na Paha, ba nàmunya la Yeruhali i Yehu.

¹³Ka piti-danyaka ruu wola hi dalua pa-tàbuku-ya, ba dàngu kayaka-danya, “Wotunya i Ala! Na-mànjaku maringu-wa na mamai wànya na tamuna i Miri. Na-mànjaku maringu-wa na Hanganji Ihirailu!” wàda.

¹⁴Na-ngalangu heu kamboka kalandai i Yehu hi na-kaliti-ya. Ka hàrangu-nanyaka na pa-tulihu la Huratu Matua:

¹⁵“Àmbu mangàdatu, ha bidi kawini Hiungu! Tàngaru-ya nàmunya na Hanganji-mu, na-kaliti heu kamboka kalandai!” ba wàna.

¹⁶La rehi nu ndedi dapi ndàba-anya yiana da papanau-na i Yehu. Na nyuna ba pa-mangunju-yaka wàngu metina i Yehu, hina duka hi danamu-ya, na pawunda-na na tau hanggangu lai Nyuna, ba pambàda tulihu-mayaka la Huratu Matua na rukuna Nyuna.

¹⁷Da tau da maninja ba jiaya napaau-nanya paluhu welingu la reti i Laharu ba na-pahada-nya welingu la meti paraïna i Yehu, jiaha da ma-hakahii pangala-nya na rukuna nuna.

¹⁸Tuna nuduka hi nalua lai Yehu na tau dangu ba darongu duka ba Nyuna na mambàda wundaya nu na pa-hangàtarungu.

¹⁹Ka panii-danyaka dàngga anguda da tau Parihi, “Nda nggikina wànda-apa! Tàngaru biaya, nàhu ndàba-nyaka na ihi pinu tana palua pakiku-nya Nyuna!” wàda.

²⁰La honga tau malua la Yeruhali la pa-lumungu la rehi mbabu, nimbunja da tau Yunani da manda pirada.

²¹Damai lai Pilipu hi dapanii, “Ai, màla làti umbu, jàka pekuna ka pa-hàmburu dànya i Yehu wàma làti,” wàda. (I Pilipu tau welingu la Mbetuhaida la tana Nggalilia-ya.)

²²Ka lua-nanyaka i Pilipu papanii-nya i Andaria na rukuna nuna. Hàla lua kariangu-danyaka pa-patàka-nya i Yehu.

²³Ka panii-nanjaka paraïna i Yehu, “Jia-yaka na rehi pa-mangunju-ya na Ana Tau.

²⁴Langatàka ma-padeningu-maya yia na paniinggu: Jàka nda patondu-nya la tana ka nameti na hau karohu uhu nggàndumu, pa-daingu-mananya ba hau karohu-na. Na nyuna jàka nameti nu na hau karohu uhu nggàndumu, jiaya hi nadangu na uhu nggàndumu ba natuu wuana.

²⁵Na tau na ma-aïya na lurina napa na-yàmihu-ya na lurina. Na nyuna na tau na manda aïya na lurina la pinu tana yiana, napa na-àrapu-ya nduma luri na ma-langatàka dàngu na ma-palupangu.

²⁶Na tau na ma-etingu la palumu-ngga Nyungga nakiku-mangga bàdi; màta ka peku angu-nangga na ma-lumungga la ngia paningga. Na tau na ma-lumungga Nyungga napa natembi-ya paraïna Amanggu,” wàna.

²⁷“Na-mangginggitu na etinggu; nggikina wànggu-aka bàdi nàhu? ‘Ou Ama, pamara àruka welingu la rehi yiana!’ wàngguka bàdi? Na nyuna ba jiaya nuna pàkudui làti hi kumai ka kudeni-nya na rehi mayila yiana.

²⁸Ou Ama pa-mangunju-yawa na tamumu!” wàna. Nu hi jia ningu bia lii parongu welingu la awangu, “Mbàda pa-mangunju-manggu-nyaka, dàngu kuhili pa-mangunju-mayaipa napa,” na mawàna.

²⁹Na tau dangu na maninya lai nu, darongu-ya nu na lii, hi dapanii, “Kangguruku-ya,” wàda. Tàka nimanyai hawiangu na mapanii, “Ndia-a! Panii dànanya papalewa!” wàda.

³⁰Ka panii-nanyaka i Yehu, “Hi ronguya nuna na lii, nda lumunggu Nyungga-a, tàka lumumi nyimi dimi, wànanja.

³¹Nàhu jia-mayaka na rehi patanda-nya ngerana na pinu tana; nàhu pa-kunggulungu-yaka na makata-nya na pinu tana.

³²Tàka Nyungga duku, jàka pa-pajangga-kaka welingu la pinu tana, napa ku-kameni ndàbaya na tau lai Nyungga,” wàna.

³³Hi panii tuna nu pa-hakubu-nanya jàka nggiki hama metina napa.

³⁴Ka panii-nanyaka na tau dangu lai Nyuna, “Pa-namatu-nya la Mbuku Ukuma, na Hanganji Ma-pamànangu duna naluri-ya lundu nu - nu. Nggiki hamana lupangu pajangga-maya bàdi na Ana Tau la pinu tana hi wamui Nyumu? Ka nggamuya duna nu na Ana Tau?” wàdanya.

³⁵Nanapa-ya i Yehu, “Nda nggii tuana-pa ba ninya na hambila lai nyimi. Ba tuna, kandàkuku-wa ba ni-i-nyapa na hambila, ka àmbu na-panggàbalu-nggai kapàtangu. Na tau na ma-kandàkuku la kapàtangu nda napi-anya na ngia pa-hanggangu-na.

³⁶Miwai-yawa na hambila, ba talànga ni-i-nyapa nu na hambila lai nyimi, màta ka ana hambila-kai,” wànanja. Ba nahàla-ka papanii tuna nu, yilangu-nanyaka i Yehu welingu lai nu dàngu nda na-pawuwangu-apa wikina lai nyuda.

³⁷Jiapa kai ka mbàda danguda da pa-hangàtarungu pawunda-na i Yehu la hanggada nyuda, nda dapawai-a lai Nyuna.

³⁸Ka hàrangu-duna-nyaka na papanii-na i Wunangu Yahaya, “Miri, nggamu-aka na mawaiya na lii pa-bobaru-ma? Lai nggamu-aka na ngia pa-pajiliku-nya na mbihana i Miri?”

³⁹Tuna nuduka hi nda peku pawaida, maa ba mbàda panii-mbunaka i Yahaya, “Napanii I Ala,

⁴⁰‘Ku-papoki-ha da matada nyuda, ku-patongguru-ha da etida; ka àmbu dangita da matada, ka àmbu dalua-ya la jàngapu na kanandingu-da. Ka àmbu da pa-mbelingu lai Nyungga, tàka hi ku-pamàlaru-ha,’ ba wàna,” wàna.

⁴¹Hi panii tuna nu i Yahaya ba mbàda ita-duna-nyaka na mangunju-na i Yehu, hi napanii-ya na rukuna.

⁴²Jiapa-kai ba tuna, nadangu na tau lai nyuda, lupa da liku uru Yahundi-mbu da mapawai lai Yehu. Tàka nda datoru mbenia papeka pa-habola-nya na pawaida, nadu ba da-mangàdatu-nja da tau Parihi, jàka dahiri bianda-ka patama la uma bungguru ba wàda.

⁴³Darihi mbuha ni-manyapa natembi-nanja tau welingu la tembi-naha paraïna i Ala.

⁴⁴Ka wara-nanyaka i Yehu, “Na tau mapawai lai Nyungga nda Nyungga-a pawaina, tàka wainanya Nyuna na ma-palewa-ka.

⁴⁵Dàngu na tau na maita-ka Nyungga, ita-nanya Nyuna na ma-palewa-ka.

⁴⁶Na mainggu la pinu tana yiana màta ka maharii-ka Nyungga wànggu, ka àmbu na-ngiangu la kapàtangu mbuu ndàbana na tau mapawai lai Nyungga.

⁴⁷Na tau na marongu-ha da pa-pekangu-nggu, tàka hi nda nunju bia-nanjai, — nda Nyungga-a duku mahuku-nya. Nadu na mainggu ka hukunya na pinu tana nda wànggua, tàka ka pamàna-nya wànggu duku.

⁴⁸Na tau na ma-tulaku-ka Nyungga, hi nda na-patingi-nja da pulunggu, ni-manyaka duna na ma-patanda-nya ngerana. Na pulungu pa-patàka-nggu, jiaya duna na ma-patanda-nya ngerana la Lodu Hupu Njàpuna.

⁴⁹Nadu ba nda wàngu-nggunya eti wiki-anggu duku ba kupanii; i Ama na ma-palewa-ka, jiaya duna na mahupu liingganya, jàka nggàraya bàdi na papanii-nggu, dàngu na pa-patàka-nggu.

⁵⁰Dàngu kupi-manya duku ba jiaya na hupu liina Nyuna, na ma-wuangu-ya na luri na ma-langatàka dàngu na ma-palupangu. Tàka hi jiaya na pa-papeka-nangga i Amama duku na pa-patàka-nggu,” wàna.