Read Kambera YUHANI 15 Bible Online

YUHANI 15 - Kambera bible

YUHANI 15

¹Nahili panii i Yehu, “Nyungga jiaka na pingi angguru langatàka, tàka na Amanggu jiaya na mangu wokangu.

²Nimbihu-da da kahanga lai Nyungga da manda tuu wuada, na-kàtahu-ha, tàka nimbihu-da da kahanga da matuu wuada, na parowa-nja da ruuda hi na pa-habola-ha, ka da-parukangu padangu da wuada.

³Nyimi mbàda ili-mika rukuna na lii pa-pekangu pawua-nggunggai.

⁴Màtawa kai pa-daingu pa-pambulu dàngga Nyungga, ka ku-padaingui duku pa-pambulu dànggai nyimi. Nda na-ngalangu-a na kahanga patuu wikina wuana, hinggilu-na jàka na-padaingu la pingina. Tuna numbu nyimi, jàkai pa-daingu pa-pambulu daa-angga bàdi hina hii ngalangu patuu wuami.

⁵Pingi angguru-ka Nyungga, nyimi kahanga-nanggai. Na tau na ma-padaingu pa-pambulu dàngga Nyungga, tàka hi ku-padaingu Nyungga pa-pambulu dànya nyuna, napa natuu padangu wuana; nadu jàka nda Nyungga nda ana nggàra-a pawunda-mi.

⁶Na tau na manda pa-daingu pa-pambulu dàngga Nyungga, pa-wàrungu-ya napa hama tuna na kahanga, hi namàdu. Da kahanga da matuda nu pa-pauhingu-ha hi wàrunja la epi, hi tunuha.

⁷Jàkai pa-daingu pa-pambulu dàngga Nyungga, hii pakàpa-ha la etimi da lii pa-pekangu-nggu, karai bia lai Ama jàka nggàra pambuha-mi; nawua-manggai-nya duna na pakarai-mi.

⁸Jàkai wua padangu, jia-duyaka na pa-mangunju wànya na Amanggu; tuna nuduka hi papanau langatàka-nggunggai.

⁹Hama tuna ba nambuha-ngga i Ama, tuna numbu Nyungga ba kumbuha-nggai nyimi. Màtawa ka na-lohangu mànu la lurimi ba tau pambuha-nggunggai.

¹⁰Jàkai pahàra-nja da hupu liinggu, tuturu pa-daingu-dimi-nyaka nu la mbuha-nggunggai, hama tuna Nyungga ba pa-daingu tuturu-nggu duku la mbuha-nangga i Ama, rukuna ba ku-pahàra-nja da hupu liina.

¹¹Hi kupanii ndàba-nggaiha yiada, ka peku ninya na hawola-nggu Nyungga la etimi nyimi, hi na-lànyapu na hawola-mi.

¹²Yiana-ya na hupu liinggu: màtawa kai maràngga pa-mbuhangu dàngga angumi, hama tuna Nyungga ba kumbuha-nggai nyimi.

¹³Na tau na mawua-ya na lurina lumuda da angu lànggina, jiaya duna na mambuha halawàla-nja da angu lànggina.

¹⁴Nyimi kuangu làngginggai, jàkai pahàra-nja da hupu liinggu lai nyimi.

¹⁵Ataha nda wànggu-anggaipa, nadu na ata ba nda napi-anya duna na paràma-na na mirina. Angu lànggi-ngguha mbàda wànggu-nggaika, nadu mbuu ndàbada da parongu-nggu lai Ama mbàda panii-ngguhaka lai nyimi.

¹⁶Nda nyimia mapindi-ka Nyungga, Nyungga mapindi-kai nyimi, hi ku-paràha-nggai palaku kai tuu padangu wuami — da wua manda molungu. Tàka i Ama hi nawua-nggai jàka nggàra biaya na pakarai wàminya na tamunggu lai Nyuna.

¹⁷Yiana-ya na hupu liinggu lai nyimi: Maràngga pa-mbuhangu-wa dàngga angumi,” wànanja.

¹⁸“Jàka na-karaü-nggai eti na pinu tana, namuya ba mbàda karaü mangilu-nangga eti Nyungga.

¹⁹Jàka mangu pinu tanakai làti, jiangu-ma nambuha-nggai pinu tana ba mangu-nanggai. Tàka mbàda pindi-nggunggaika welingu la pinu tana, hi nda mangu pinu tana-akaipa. Tuna nuduka hi na-karaü-nggai eti pinu tana.

²⁰Nandi-manya na pambàda panii-nggunggai, ‘Na ata nda jia rihi-ananya na mirina,’ ba wànggunggai. Jàka mbàda pa-mayila-madu-danggaka Nyungga, jiangu-mbu napa da pa-mayila-kai nyimi. Jàka da-panamatungu la lii pa-pekangu-nggu, jiangu-mbu ba da-panamatungu la lii pa-pekangu-mi nyimi.

²¹Dawunda ndàbaha nuda lai nyimi, rukuna ba papanau-nggunggai, maa ba nda datanda-duya Nyuna na Ma-palewa-ka Nyungga.

²²Làti jàka nda kumai dàngu jàka nda kupanii ndàbaha nuda lai nyuda, nda ningua njalada làti. Tàka nàhu nda ningua pelu pakangu-da la njalada.

²³Na tau na ma-karaü-ngga eti, karaü-nanya eti na Ama-mbunggu.

²⁴Làti jàka nda kuwunda-ha la hongada nyuda nu da pandedi wunda tau hawiangu, nda ningua njalada làti. Na nyuna nàhu mbàda ita-dahaka nuda da pawunda-nggu, tàka hi karaü-bia-dangga eti hamangui na Amanggu.

²⁵Na nyuna ràka-mana ba tuna nu, ka peku hàrangu-na na pa-tulihu la Mbuku Ukuda nyuda, ‘Da-karaü-ngga eti bundu nda ningu kiringu,’ ba wàna.

²⁶Napa ku-palewa-nggainya i Ma-pandulangu na ma-pawelingu lai Ama. Nyuna nu jiaya i Ngahu na mapeka-ya na ma-padeningu rukuna i Ala. Jàka namai-yaka, napa na-hakahii-nya na rukunggu Nyungga.

²⁷Tàka lupangu-maka bàdi nyimii hakahii-nya na rukunggu Nyungga, maa ba mbàda ni-manggaika lai Nyungga welingu la pakiri-na.