Read Kambera YUHANI 18 Bible Online

YUHANI 18 - Kambera bible

YUHANI 18

¹Ba nahàla-ka pa-hamayangu tuna nu i Yehu, laku-danyaka dàngu da papanau-na la hapapa Luku Kindurungu. Lai nu ninya ba hauna na woka ngia pambawa, hi datama lai nu i Yehu dàngu da papanau-na.

²I Yundahu na ma-kaleka, napinya lai nu; ba mbàda pauhi mànu-daka lai nu i Yehu dàngu da papanau-na.

³Ka lua-nanyaka lai nu i Yundahu ba na-kariangu hapamba tanatara Roma dàngu da tau da matanggu dai la Umana i Miri, da papalewa-da da ratu pangora dàngu tau Parihi. Dangàndi madàka, epi lanutera dàngu hulu.

⁴Pi ndàba-mananya paraïna i Yehu na manjadi napa la wikina. Nu ba tuna lua toma-nahaka nuda da tau hi na-paàra-nja, “Nggamuya na pahimbu-mi?” wànanja.

⁵“I Yehu tau Naharitu,” wàda na hemada. “Jiaka Nyungga-maka yia,” wàna i Yehu. Nu i Yundahu na ma-kaleka ndolaku dànanja nyuda lai nu.

⁶Jiaka Nyungga-maka-yia ba wàna-njaka i Yehu, kandulingu-danyaka hi pàha wàda la tana.

⁷Hi nahili paàra-nja paraïna i Yehu, “Nggamuya na pahimbu-mi?” hili wànanja. “I Yehu tau Naharitu,” wàda na hemada.

⁸“Jiaka Nyungga-maka yia mbàda wànggu-nggaika,” wàna i Yehu. “Tàka jàka Nyungga madu pahimbu-mi, màta ka dalaku yiada hawiangu,” wànanja. (

⁹Nu ba panii tuna nu i Yehu hàrangu-nanyaka na pambàda paniina la mangilu i Yehu: “Ama, welingu la tau da pawua-mungga, nda haàtu-a ma-mbulangu,” ba wàna.)

¹⁰I Himungu Peturu na-binjiru-ya na hapanda pangàndi-na, hi na-làndahu-nya na atana na Ratu Bokulu, nahàpu-maya na kahilu kawana-na. Na tamuna nuna na ata, Màluku-ya.

¹¹Tàka i Yehu, “Patiku belinya na hapanda-mu!” wànanya i Peturu. “Bau kakaka nu, Nda jia unu-anggunya na kaba wai mayila na pawua-nangga i Ama, wàmu?” wànanya.

¹²Ka yàpa-danyaka i Yehu hi da hondu-ya paraï da tanatara Roma dàngu na kimunda-da dàngu da tau Yahundi da matanggu dai la Umana i Miri.

¹³Dangàndi mangilu-yapa i Yehu la hanggana i Hanàhu, ama yerana i Kayapàhu. I Kayapàhu jiaya na Ratu Bokulu la ndaungu nuna.

¹⁴Jiaya nyuna-maka na mambàda panaunja da liku uru Yahundi ba narihi hàmu ningu-mapa jàka nameti na haàtu tau ndumana na banjaru nggubulu-na, na mawàna.

¹⁵I Himungu Peturu dàngu na haàtui na pa-panaungu da kikunya i Yehu. Nu na pa-panaungu haàtu natanda-ya paraïna Ratu Bokulu; jia duyaka hi natama karia-nya i Yehu la talora umana na Ratu Bokulu,

¹⁶tàka i Peturu patiangu-nanya la hambeli la pindu. Tunaka nu luhu-nanyaka la hambeli nu na pa-panaungu haàtu hi napanii danya na ata kawini na madaiya na pindu, hi namangu patama karia-nya i Peturu hu daa.

¹⁷Tàka nu na ata kawini na madaiya na pindu, “Yi ha, ka nda jia-mbukau nyumu haàtu la papanau-na na tau nina?” wànanya i Peturu. “Ndia-a duku,” wàna na hemana i Peturu.

¹⁸La rudungu nu lalu maringu-ya. Jia ba tuna mbàda padukulu-daka epi pa-lawarangu da matanggu paloku dàngu da matanggu dai hi dadiru epi lai nu. Lua-nanyaka i Peturu lai nu hi na-ndolaku padiru dànja epi.

¹⁹Na Ratu Bokulu na-paàra-nya i Yehu rukuna da papanau-na dàngu rukuna da pa-pekangu-na.

²⁰Nanapa-ya i Yehu, “Naingu-mana ba kupanii pa-habolangu la hangga-na i madangu. Naingu-mana na pa-pekangu-nggu tau la uma bunggu - uma bungguru dàngu la Uma Ala, ngia pakàli pauhi-na na tau Yahundi. Ndedi ku-handàkangu-ma papanii ngga - nggàra la ma-kawiningu.

²¹Ka nggikina umbu hiu paàra ningga Nyungga? Paàra bianja nyuda da mambàda ronguka ba ku-papekangu tau. Jiangu-ma duda dapinya jàka nggàra papanii-nggu,” wànanya.

²²Ba panii tunaka nu i Yehu, na haàtu na matanggu dai lai nu natàba-ya i Yehu, “Utoru mbeni pàku Nyumu papanii tumu nu la Ratu Bokulu!” wàna.

²³Nanapa-ya i Yehu, “Jàka nanjala na papanii-nggu, panii-yawa nàhu jàka nggàraya na manjala! Tàka jàka ma-deningu bi-duaya nu na papanii-nggu, ka nggikina hiu tàbaka?” wàna.

²⁴Tunaka nu paràhangu-nanyaka tau i Hanàhu pangàndi mangu hondunya i Yehu lai Ratu Bokulu Kayapàhu.

²⁵Ndolaku-mana-nyapa i Himungu Peturu padiru epi lai nu. Tàka da tau lai nu, “Ka nda papanau-mbunanggau dumu na tau nina?” wàdanya. Ka pahiningu-nanyaka i Peturu, “Ndia-a duku,” wàna.

²⁶Ka panii-nanyaka na haàtu na atana na Ratu Bokulu, nu na kalembi-na na tau pahàpu-na kahilu i Peturu, “Ka nda kuita-akau dumu la woka dàngu Nyuna?” wànanya.

²⁷Ka hili pahiningu-mananyai i Peturu, “Ndia-a” wàna — nu pàku nu, hakuku-nanyaka na manu.

²⁸La mba - mbaru ngàndi-danyaka i Yehu la Uma Nggumbunuru welingu la umana i Kayapàhu. Da tau Yahundi wiki nda datama-a la uma Nggumbunuru ka àmbu ta-iraku ba wàda, maa ba mbuhangu-danya panganya na pangangu Paha.

²⁹Tuna nuduka hi naluhu tomaha paraïna i Pilatu hi na-paàra-nja, “Nggàraya na pakàla wàminya na tau yiana?” wànanja.

³⁰Danapa-ha nyuda, “Jàka nda ningu njalana, nda jia ngàndi-amanya la hanggamu umbu Nggumbunuru,” wàdanya.

³¹Tàka i Pilatu, “Pitiya kai patanda-nya ngerana pa-namatu-nya na uku wiki-mami dimi,” wànanja. Ka hema-danyaka da tau Yahundi, “Nda peku-ama duma la pa-hukungu pameti tau,” wàda. (

³²Nu hi tuna ka na-hàrangu na papanii-na i Yehu jàka nggiki metina Nyuna.)

³³Tama beli-nanyaka i Pilatu hi napaau-nya i Yehu, hi na-paàra-nya, “Deningu-na dumu ba Hanganji tau Yahundi-kau?” wànanya.

³⁴Nanapa-ya i Yehu, “Welina lai nyumu wikima yiana na paàrangu, jàka ndia hi ningu tau hawiangu mapanii-nggaunya na rukunggu Nyungga?” wànanya.

³⁵Nanapa-ya i Pilatu, “Ka tau Yahundi-ya nyuna wàmungga? Hi na banjaru wiki-mamu dumu dàngu da ratu pangora da ma-pakata-nggau lai nyungga. Nggàraya na pambàda wundamu?” wànanya.

³⁶Nanapa-ya i Yehu, “Na pa-hanganji-nggu nda welina la pinu tana-a. Ngera hama tuna jàka welina la pinu tana, dambeni hanggangu-ka làti da taunggu, ka àmbu pakata-ngga la liku uru Yahundi. Tàka nda paweli-na yia la pinu tana-a duku na pa-hanganji-nggu,” wànanya.

³⁷Ka paàra-nanyaka paraïna i Pilatu “Jàka tuna nu, ka Hanganji-kau dumu Nyumu?” wànanya. Nanapa-ya i Yehu, “Hanganji ba wàmu-madu-nggaka. Ninguma pawuku, hi kiri dedinggu dàngu hi kiri mainggu la pinu tana, nu ka ku-hakahii-nya na ma-padeningu. Na tau na ma-pawelingu la ma-padeningu marongu-ka Nyungga,” wàna.

³⁸Na-paàranya paraïna i Pilatu, “Nggàraya nu na ma-padeningu, ba wàmu?” wànanya. Ka hili luhu-nanyaka welingu la uma i Pilatu hi napanii-nja da tau Yahundi, “Nda ana haua njala pahunggu-nggu lai Nyuna.

³⁹Na nyuna pa-namatunya na pakàli ndàmami, ku-pahàla-mànuma haàtu tau pa-tahangu la Lodu Remi Paha. Màla imbuhangu-du ka ku-pahàla-nggainya na Hanganji tau Yahundi?” wànanja.

⁴⁰Ka hema-danyaka ba dawàngu pakaba - bàtingu, “Ndia-a, àmbu Nyunadu, i Mbaramba wàma duma,” wàda. (I Mbaramba tau rambangu-ya.)