Read Kambera YUHANI 19 Bible Online

YUHANI 19 - Kambera bible

YUHANI 19

¹Tunaka nu tama beli-nanyaka i Pilatu hi na-paràhangu tau pa-ràmbahu-ya i Yehu.

²Da panjuri da kalipa-nya hau tubuku welingu la lai rii madàka, hi da-patàngapu-nya la katiku-na i Yehu, hi da pahaunya kalembi malai hundara-ngga,

³hi da-tiangu huru - tiangu hurungu lai Nyuna, “Oha-amuka dumu ou Hanganji tau Yahundi!” wàdanya. Ba tunaka nu ka tàba-danyaka.

⁴Hàlaka nu hili luhu-nanyaka i Pilatu hi napanii-nya na tau dangu, “Tàngaru-ya ba kuluhu ngàndi-nggainya, ka peku piminya ba nda kuhunggu-anya njalana,” wànanja.

⁵Ka luhu-nanyaka i Yehu dàngu tubuku rii madàka-na dàngu kalembi malai hundarangga. Hi napanii-nja paraïna i Pilatu, “Tàngaru-ya yia na tau,” wànanja.

⁶Ba daita-yaka i Yehu paraï da ratu pangora dàngu da matanggu dai, ka kabàtingu-danyaka, “Harika-nya! Harika-nya!” wàda. Nanapa-ya i Pilatu, “Ipiti biaya, kai harika wiki-minya, nda ana haua njala pahunggu-nggu lai Nyuna,” wànanja.

⁷Dahema da tau Yahundi, “Pa-namatu-nya na ukuma nyuma lupangu na-hukungu metima bàdi, Ana Alaka ba wànadu,” wàda.

⁸Ba narongu-haka panii tuda nu paraïna i Pilatu, pa-rukangu-nanyaka pa-mangàdatu.

⁹Ka tama beli-nanyaka la uma i Pilatu, tàka ba datama ngàndi-yaka i Yehu, ka paàra-nanyaka paraïna i Pilatu, “Nggiya dumu na ngia paweli-mu?” wànanya. Tàka nda nahema-a i Yehu.

¹⁰Ba tuna nahili panii i Pilatu, “Ndau bihua papanii dàngga nyungga? Kau pinya, ningu kawaha-nggu la pa-pahàla-kau, dàngu ningu kawaha-nggu la pa-harika-nggau!” wànanya.

¹¹Nanapa-ya i Yehu, “Jàka nda nawua-nggaunya nuna na kawaha paraïna i Ala, nda ana nggàra-a kawaha-mu lai Nyungga. Jia ba tuna na tau na ma-pakata-ngga lai nyumu, narihi bokulu-pa na njalana welingu lai nyumu,” wànanya.

¹²Ba narongu-yaka nuna i Pilatu himbu-nanyaka ànda ka pahàla-ya i Yehu, ba wàna. Na nyuna da tau Yahundi nutakungu-madanya pa-kabàtingu, “Jàkau pahàla-ya Nyuna, nda kandua-ana-nggaupa na Hanganji Bokulu! Na tau na mapeka hanganji-ka na mawàna, muhuna na Hanganji Bokulu-ya!” wàdanya.

¹³Ba narongu-yaka nuna i Pilatu, luhu ngàndi-nanyaka i Yehu la hambeli hi na-mandapu la kanjàka timbangu. Bangga watu ba wàdanya. (La hilu Imbarani Nggambata, wàna.)

¹⁴La rehi nu mareni njàmu ha-kambulu dua-yaka, lodu hawanjiru-ya ba yemaya na Paha. Tàka i Pilatu, “Tàngaru-ya yia na Hanganji-mi,” wànanja da tau Yahundi.

¹⁵Ka kaba - bàtingu-danyaka, “Pameti-ya! Pameti-ya! Harika-nya!” wàda. Ka paàrangu-nanyaka i Pilatu, “Ku-harika bianya na Hanganji-mi?” wànanja. Dahema da ratu pangora, “Didi-ma-aya na Hanganji Bokulu duma na hanganji-ma!” wàda.

¹⁶Ka puli-nanyaka i Yehu paraïna i Pilatu ka da-harika-nya. Nu ka piti-danyaka i Yehu, hi dalaku ngàndiya.

¹⁷Luhu-nanyaka i Yehu ba dàngu duku wiki-nanya na ai harikangu-na ba nalaku la hau pangia, “Pangia Kaba Kotu,” ba wàdanya. (La hilu Imbarani Nggolunggota, wàdanya.)

¹⁸Ka harika-danyaka lai nu dàngu da tau madua da angu harikangu-na; haàtu la kalai, haàtu la kawana, tàka i Yehu la padua-ya.

¹⁹Tàka i Pilatu na-paràhangu patunya tulihu-na la ai harikangu, nu na pa-tulihu tuna yia, “I Yehu tau Naharitu na Hanganji tau Yahundi,” wàna.

²⁰Nadangu na tau Yahundi madiha-ya nu na pa-tulihu, nadu ba nda namarau-a welingu la paraingu na ngia pa-harika-nya i Yehu. Nu na pa-tulihu, pa-tulihu wàngu hilu Imbarani, hilu Latina, dàngu hilu Yunani-ya.

²¹Dapanii da ratu pangora lai Pilatu, “ ‘Hanganji tau Yahundi’, àmbu wàmu-dunya na pa-tulihu, wàdanya. ‘Hanganji tau Yahundi-ka, wàna na tau yiana,’ wàmu bianya,” wàdanya.

²²Na nyuna nanapa-ya i Pilatu, “Na pambàda tulihu-nggu, nda pa-pahilu-anya,” wànanja.

²³Ba dahàla-ka pa-harika-nya i Yehu paraï da panjuri piti-dahaka da pakina, hi da-paberi kapatu-nja, maràngga ndu - nduma-mada haàtu - haàtu. Dapiti-mbuya na kalembi dalu malaina. Nuna na kalembi nda pawàngu pautu-aya, — patinu pa-nuangu-ma-aya weli ditangu lundu hu waa.

²⁴Ka panii-danyaka dàngga anguda da panjuri, “Àmbu takadi - dipu-duya yiana na kalembi. Màla ka tawàngu paundi bia ka tapinya jàka nggamu mangala-nya,” wàda. Nu hi tuna ka peku hàrangu-na na pa-tulihu la Huratu Matua, “Dapabe - berinja da pakinggu, hi da-paloku-nya undi na kalembi malainggu,” ba wàna. Tàka tuna numa na pawunda-da panjuri.

²⁵La lihi ai harikangu-na i Yehu, ndolaku-danya na inana i Yehu, na anguna kawini na inana, i Maria papaha-na i Kalopa, dàngu i Maria Mandalena.

²⁶Ba naita-haka ndolaku-da lai nu paraïna i Yehu nu na inana dàngu na papanau-na na pambuha-na, panii-nanyaka la inana, “Ina, nanaya na anamu,” wànanya.

²⁷Hàla hi napanii la papanau-na, “Nanaya na inamu,” wànanya. Piti welingu la rehi nu karia-nanyaka na inana i Yehu pa-ndàdiku la umana paraïna nu na pa-panaungu.

²⁸La rehinu pi-mananya i Yehu ba lundungu ndàba-danyaka, tàka ka peku hàrangu-na na pa-tulihu la Huratu Matua, ka panii-nanyaka, “Madau-nggunya,” wànaka.

²⁹Lai nu ninya na maku na mambinu wàngu wai angguru mayilu. Ka hàbu-danyaka lumutu la wai angguru mayilu, hi datuya la hupu karàngga hi da-pajola-nya la ngaruna i Yehu.

³⁰Ba na-kapàliku-nyaka nu na wai angguru, panii-nanyaka, “Lundungu-nanyaka,” wàna. Nu ba tunaka nu, miulu wàna-madua-ka na katiku-na hi nambota na kayeku-na.

³¹Nda dabihu-a da liku uru Yahundi ka jiapa-ha kawihiku-da la lodu Hangahu, da metida da tau pa-harikangu, tàka ri - rihi na lodu Hangahu nu, lodu Hangahu pa-mbabungu-ya. Nadu na lodu harika-nya i Yehu, na-hanggànangu la lodu na mandutu-ya na lodu Hangahu nuna; ka lua-danyaka da tau Yahundi pakarai-ya i Pilatu, ka palu pataha da wihida da tau pa-harikangu, dàngu ka papuru-nja da metida welingu la ai harikangu.

³²Ka lua-danyaka da panjuri hi dapata mangilu-ha da wihida da tau madua da angu harikangu-na i Yehu.

³³Ba datàka-nyaka i Yehu, daita-ya ba mbàda meti-naka. Ba tuna nda dapalu pata-ahapa da wihina.

³⁴Na nyuna nahàka wànya nimbu na karaha-na i Yehu paraïna haàtu panjuri; ka luhu-nanyaka na wai ria dàngu wai.

³⁵Na tau na maita-ya nuna jia-maya na mapeka-ya nuna, ka peku pawai-mbumi[38] nyimi. Tàka ma-deningu-maya nu na hakahii-nanya, dàngu napi-manya ba ma-deningu-maya nuna.

³⁶Nu hi tuna ka peku hàrangu-na na pa-tulihu la Huratu Matua, “Nda jia hapungu-a riina papata napa,” ba wàna.

³⁷Pa-tulihu-mbuya la Huratu Matua: “Napa nyuda da-tàngaru-ya na pakoja-da,” ba wàna.

³⁸Hàlaka nu lua-nanyaka i Yuhupu tau la Arimatia pakarai-ya i Pilatu ka na-pamàja-nya la papiti-ya na metina i Yehu. (Nyuna yiana i Yuhupu papanau-na i Yehuya, tàka nawàngu pa-kangunduhungu paraï pa-mangàdatu-nja da liku uru Yahundi.) Ba na-pamàjangu-ka i Pilatu, lua-nanyaka papiti-ya na metina i Yehu.

³⁹I Nikundemu na malua wàngu rudungu àmangu lai Yehu, nalua karia-mbunya i Yuhupu. Nangàndi mbii kati muru dàngu homa nyuna i Nikundemu, nggubulu-da ràkangu tailu kambulu kiluda mbotuda.

⁴⁰Ka papuru-danyaka na metina i Yehu paraï da nyuda pa-kadua-da, hi da-payubuhu wànya tera yubuhu, lupa nuda da mbii kati pa-namatu-nya na huri taningu tau Yahundi.

⁴¹La lihi ngia pa-harika-nya i Yehu ninya na woka ngia pambawa. Lai nu la woka ninya na reti bidi, ndedi ninguma tau pa-taningu lai nu.

⁴²Ba na-mareni na reti, tàka hi pa-kiringu-ama-naka na lodu Hangahu, ka tani-danyaka i Yehu lai nu.