Read Kambera YUHANI 2 Bible Online

YUHANI 2 - Kambera bible

YUHANI 2

¹Pa-làngangu dàmbu lodu ningu mambabu nika la paraingu Kana la tana Nggalilia, ninya lai nu na inana i Yehu.

²Pa-dundangu-mbuya la mbabu nuna i Yehu dàngu da papanau-na.

³Ba nanjàpu-ka na wai angguru, napanii-nya i Yehu paraïna inana, “Nanjàpu-njaka ni wai angguru,” wànanya.

⁴Nanapa-ya i Yehu, “Àmbu paràha-dungga ina, ndedi jia-aya duku na rehi pa-lohangu-nggu wikinggu,” wànanya.

⁵Tàka na inana i Yehu napanii-nja da ma-paloku, “Nunju biaya jàka nggàraya na papanii-nanggai, ai!” wànanja.

⁶Lai nu ninja ba nomu mbuada da mbàlu da pa-payemangu ka baha wàngu wihi pa-namatu-nya na huri Yahundi. Ràkangu hangahu litaru ihida nimbuhu-da.

⁷Napanii-nja da ma-paloku i Yehu, “Tunja ihida nida da mbàlu,” wànanja. Ka paihi-danjaka wai lundu dambinu.

⁸Hi napanii-nja paraïna i Yehu, “Takunya hakudu na ngora mbabu kai ngàndinya,” wànanja. Ka ngàndi-danyaka nu na wai la ngora mbabu

⁹tàka hi na-tupuku-ya nu na wai na mambàda pambeli-ya wai angguru. (Nda na pianya jàka nggi weli nina nuna na wai angguru, mbulungu da ma-paloku, da ma-paihi-nja da mbàlua da mapiinya.) Tàka na ngora mbabu hi nalua lihinya na bidi papa mini,

¹⁰hi napanii-nya, “Na pakàli wànguma duna làti, wua mangilu-nyapa duna wai angguru mahàmu halawàla na ariyaa, jàka hoda-daka pa-unungu, hina duka hi mangu pawua-nya wai angguru maràka-ana. Tàka nyumu dumu pahàmu bia-munyai lundu nàhu na wai angguru na mahàmu halawàla!” wànanya.

¹¹Nunaya na pa-hangàtarungu na pa-kawunga wundana i Yehu. Nuna nu la Kana nawunda niya la tana Nggalilia. Na tanda nuna jiaya na pa-pajiliku wànanya na mangunju-na. Ka pawai-danyaka lai Nyuna da papanau-na.

¹²Hàlaka nu laku-nanyaka la Kapinaumu i Yehu dàngu na inana, da anguna paluhu, hamangui da papanau-na. Nda pira mbua lodu-ada ba da-ndàdiku lai nu.

¹³Ba na-mareni-ka na Lodu Remi Paha tau Yahundi, lua-nanyaka la Yeruhali i Yehu.

¹⁴Ka toma-nanjaka la Umana i Miri la Yeruhali da ma-danggangu hapi, mbimbi dàngu kulundiha; hamanai da manjepa àmahu da ma-mandapu lai nu.

¹⁵Ka puti-nanyaka liku ràmbahu i Yehu, hi nawàngga ndàbaha nuda da banda welingu la Umana i Miri, nu da mbimbi hamangui da hapi. Na-kabeli-ha da menjada da manjepa àmahu hi da-tanyalangu la nggi - nggi da àmahu-da.

¹⁶Hi napanii-nja da ma-danggangu kulundiha, “Ngàndi hàlaha yiada welingu lai yiahu. Àmbi tuya ngia pabili batu na Umana na Amanggu!” wànanja.

¹⁷Ka namu-danyaka paraï da papanau-na na maninya la Huratu Matua, “Nambuha-nggunya na Umamu, ou Ala, na-hajiuru-ya na etinggu,” na mawàna.

¹⁸Da liku uru Yahundi da-ndubaku-ya i Yehu, “Kamangu nu kau wunda pa-hangàtarungu, ka jiaya na tanda ndumama nyuma ba ningu wai ngabamu Nyumu la patumu nu,” wàdanya.

¹⁹Nanapa-ya i Yehu, “Nyungguru-ya yiana na Uma, napa ku-pahada belinya la tailu mbua lodu,” wànanja.

²⁰Hi dapanii, “Patu kambulu nomu mbua ndaungu mandaina ba pahada-nya yiana na Umana i Miri. Tàka Nyumu pàku dumu ka ku-pahada belinya la tailu mbua lodu, wàmu?” wàdanya.

²¹Na nyuna na Umana i Miri na palaana i Yehu, jiaya na wikina duna.

²²Ba tuna la lodu malamiri, ba pahada beli-nyaka i Yehu welingu la meti, namu-danyaka paraï da papanau-na, ba mbàda panii-nanyaka nuna. Ka wai-danyaka nu na pa-tulihu la Huratu Matua dàngu nu na papanii-na i Yehu.

²³Ba la Yeruhali-ya i Yehu, nu ba Mbabunya na Paha, nadangu na tau na mawaiya Nyuna rukuda da pa-hangàtarungu pawunda-na.

²⁴Tàka nda na-pajia-aha paraïna i Yehu, nadu ba natanda ndàba-maya duna na tauka.

²⁵Nda nggàra naihi wàngua tau ma-kaloka-nya Nyuna rukuna na tau, ba pi wiki-mananya duna na wini eti tau.