Read Kambera YUHANI 20 Bible Online

YUHANI 20 - Kambera bible

YUHANI 20

¹La lodu Minggu la mba - mbaru hada rudungu, lua-nanyaka la reti i Maria Mandalena. Naita-ya na watu ndàbi reti mbàda tanggihiru-naka welingu la ngaru reti.

²Ka ri - ringa-naka palua pahimbu-ha i Himungu Peturu dàngu na pa-panaungu pambuha-na i Yehu, hi napanii-nja, “Napiti-yaka tau welingu la reti i Miri, tàka nda kupi-anya jàka nggii dahili bànjalu niya,” wànanja.

³Ka lua-danyaka la reti i Himungu Peturu dàngu nu na pa-panaungu haàtu.

⁴Ka handàka nyanyaru-danyaka na nyuna narengga-pa na pa-panaungu haàtu welingu lai Peturu, hi natàka mangilu la reti.

⁵Na-kahinu hu daa la reti hi naita-ha da tera yubuhu pa-bànjalu lai nu tàka nda natama-a.

⁶Ka tàka pa-ndutungu-nanyaka i Himungu Peturu, hi ailulu pa-ngalangu-mananya hu daa la reti. Naita-ha da tera yubuhu da pa-bànjalu lai nu,

⁷na nyuna na tera pahondu la katiku-na i Yehu nda nianya la lihida da tera yubuhu, tàka pa-kulurungu meha-maya la hau pangia.

⁸Ba tunaka nu tama-mananyai duna na pa-panaungu na matàka mangilu la reti. Ba naita-haka nuda ka pawai-nanyaka. (

⁹Lundu la rehi nu ndedi-mapa da jàngapu-ya na pa-tulihu la Huratu Matua ba lupangu-ma na-hadangu welingu la meti, ba wàna.)

¹⁰Tunaka nu beli-danyaka.

¹¹Tàka i Maria Mandalena ndolaku-nanya la hangga reti ba dàngu hiina. Nu ba nahii na-kahinu hu daa la reti,

¹²hi naita-ha da madua da papalewa da mapaki mabara, da ma-mandapu la ngia pa-bànjalu-ya i Yehu, na haàtu la katiku-ya tàka na haàtu la wihiya.

¹³Ka paàrangu-danyaka nu da papalewa, “Ha ràmbu, ka nggikina hiu hii?” wàdanya. Nanapa-ya i Maria, “Ninguka mapiti-ya na Miringgu, tàka nda kupi-anya jàka nggi da-bànjalu niya,” wànanja.

¹⁴Ba nahàla-ka papanii tuna nu, hi nambaili la kajia ka ita-nanyaka i Yehu ba na-ndolaku lai nu. Tàka nda natanda-aya ba jiaya i Yehu.

¹⁵Ka paàrangu-nanyaka i Yehu, “Ha ràmbu, ka nggikina hiu hii? Nggamuya na pahimbu-mu?” wànanya. Tàka i Maria, làbu jiaya na madai woka duna wàna bia hi napanii, “Ai, màla àru Umbu, jàka nyumu ma-paleli-nya welingu lai yiahu, peka àru-ngganya làti jàka nggii ubànjalu niya, ka peku luanggu papiti-ya,” hi wànanya.

¹⁶Nanapa-ya i Yehu, “Maria!” wànanya. Ka mbaili-nanyaka i Maria lai Yehu hi napanii, “Rabbuni!” wàna la hilu Imbarani, (nu Umbu Ngguru! wàna duka).

¹⁷Tàka i Yehu, “Àmbu yàpa-duka,” wànanya, “nadu ba ndedia kuhei lai Ama. Na nyuna luawa papanii-nja da angunggu paluhu, ba hei-nggunyaka nàhu la Amanggu nu na Amami, la Alanggu nu na Alami,” wànanya.

¹⁸Ka laku-nanyaka i Maria papanii-nja da papanau-na i Yehu ba mbàda ita-nanyaka i Miri dàngu ba mbàda panii ndàba-nahaka nuda lai nyuna.

¹⁹La lodu Minggu nunama, ba na-rudungu-ka, pauhi-danyaka da papanau-na i Yehu la hau uma ba dàngu kabitangu-da da pindu, paraï pa-mangàdatu-nja da liku uru Yahundi. Hi jia mai biana pa-ndolaku i Yehu la padua-da, “Ipeku hàmuwa,” hi wànanja.

²⁰Ba nahàla-ka papanii tuna nu, paita-nanjaka da limana dàngu na karaha-na. Ka dira hawola-haka ba daita-yaka i Miri.

²¹Hi nahili paniinja paraïna i Yehu, “Ipeku hàmuwa,” hili wànanjai. “Hama tuna i Ama ba na-palewa-ka Nyungga, tuna numbu Nyungga ba kupalewa-kai nyimi,” wànanja.

²²Hàlaka nu hi nahapui-nja wàngu kayeku-na hi napanii, “Kataku-yawa na Ngahuna i Ala.

²³Jàkai jàmanya na njalana na haàtu tau, najàma-manya duna paraïna i Ala. Jàka ndai jàmanya na njalana na haàtu tau, nda najàma-mbunya duna paraïna i Ala,” wànanja.

²⁴Tàka i Tomahu (“i Ana Ndua,” ba wàdanya) na haàtu la honga ha-kambulu madua papanau-na i Yehu nda nianya ba namai i Yehu.

²⁵Da papanau-na hawiangu i Yehu dapanii-nya i Tomahu, “Mbàda ita-manyaka nyuma i Miri,” wàdanya. Na nyuna nahema i Tomahu, “Jàka ndedima kuita-ha da ruku paku la limana, hi kuràma wànja wua limanggu nu da ruku paku dàngu jàka ndedima kuràma wànya limanggu na karaha-na, nda jia pawai ànga-anggu,” wànanja.

²⁶Palàngangu hau minggu hili pa-màtungu-madanyai lai nu da papanau-na i Yehu, nimbunya i Tomahu la rehi nu. Pa-ràpitu ndàba-maha da pindu. Hi jia mai biana i Yehu pa-ndolaku la padua-da, “Ipeku hàmuwa,” hi wànanja.

²⁷Hàlaka nu hi napanii-nya i Tomahu, “Tàngaru-ha da limanggu, kau ràma wànja wua limamu. Pajola-nya nàmu na limamu kau ràmaya na karaha-nggu. Àmbu nahili mbili mbua dupa na etimu, tàka màtawa kau pawai,” wànanya.

²⁸Nanapa-ya i Tomahu, “Dou na Miringgu, dou na Alanggu duku,” wànanya i Yehu.

²⁹Tàka i Yehu, “Jia ba ngahamu paita-aka, tàka hiu pawai wàngguka?” wànanya. “Oha-adaka da tau da mapawai jiapa-kai ka nda daita-ka Nyungga!” wàna.

³⁰Dadangu-mapa hawiangu da pa-hangàtarungu pawunda-na i Yehu la hanggada da papanau-na, da panda tulihu la mbuku yiana.

³¹Na nyuna hi tulihu ndàbaha yiada, ka peku pawaimi[39] ba Hanganji Ma-pamànangu dàngu ba Ana Alaya i Yehu, dàngu ka peku ngalangu-mi luri rukuna bai pawai lai Nyuna.