Read Kambera YUHANI 21 Bible Online

YUHANI 21 - Kambera bible

YUHANI 21

¹Hàlaka nu nahili pa-wuwangu wikina i Yehu la pa-panaungu-na la Tàma Timbiria. Tuna nu la rehi nu:

²La hau na lodu pauhi-danya i Himungu Peturu, i Tomahu i Ana Ndua ba wàdanya, i Natanaïlu na ma-pawelingu la Kana la tana Nggalilia, da anana i Hambandiu dàngu da madua da pa-panaungu hawiangu.

³Tàka i Himungu Peturu, “Lua-nggunya payàpa iyangu nyungga,” wànanja da anguna. “Malua-madui duma nyuma,” wàdanya. Ka lua-danyaka ba dawàngu pali la tena. Tàka nu la rudungu lundu mbàkahu wàna paharii nda ana nggàrama pangala-da.

⁴Ba na-mareni hungaka na lodu, ndolaku-nanyaka i Yehu la hingi tàma, tàka nda da tanda-aya ba jiaya Nyuna.

⁵Hi napanii dànja, “Màla hiana, ningudu pangala-mi anakeda,” wànanja. “Ndia-a,” wàda na hemada.

⁶Tàka i Yehu, “Walaya na njeringu-mi la patuu kawana, napa ingalangu-ma duna,” wànanja. Hi dawala-ya na njeringu, tàka nda damàka-a payila beliya paraï padangu iyangu-na.

⁷Tàka na pa-panaungu pambuha-na i Yehu, “Ha, jiaya i Miri, ni,” wànanya i Peturu. Ba narongu-ka i Himungu Peturu ba jiaya i Miri, hau-nanyaka na kalembi-na (maa ba nda nahau-a kalembi) hi na-linjungu la wai.

⁸Tàka da pa-panaungu hawiangu la tenaha da-pandutungu la mara, ba dàngu yila-danya na njeringu mambinu iyangu-na. Nda nggi tuana marauda welingu la mara, ràkangu hangahu metiru-ana.

⁹Ba dapuru-ka welingu la tena, daita-ya lai nu na epi pa-lawarangu maningu iyangu-na dàngu rotina.

¹⁰Tàka i Yehu, “Màla ngàndinda hawutu nàmu iyangu pabidi yàpami,” wànanja.

¹¹Hei-nanyaka la tena i Himungu Peturu, hi nayila-ya na njeringu-na la mara. Nambinu-nya iya bokulu nuna na njeringu; hangahu lima kambulu tailu ngiuda nggubulu-da. Jiapa kai ba tuna nu danguda, nda na-kahira-a na njeringu-na.

¹²Tàka i Yehu, “Maiwa ka ngangu,” wànanja. Nda haàtu-a la hongada matoru mbeni pa-paàra-nya, “Nggamukau Umbu?” na mawàna-nya. Maa ba pii-mada-nyaka ba jiaya i Miri.

¹³Tunaka nu ndàharungu-nanyaka i Yehu, hi napiti roti, hi na-paberi-nja nyuda. Tunanja numbu da iyangu.

¹⁴Jiaya yiana-duka na pa-pandilungu wàna ba na-pawuwangu wikina i Yehu la pa-panaungu-na ba hàla pa-pahada-nya welingu la meti.

¹⁵Ba dahàla-ka pangangu, napanii i Yehu lai Himungu Peturu, “Ha Himungu anana i Yona, urihi-njapa nyuda yiada la pambuha-ngga Nyungga?” wànanya. Tàka i Peturu, “Deningu-mana Miri,” wàna “Bau pi-madungga Miri ba kumbuha-nggau Nyumu,” wànanya. Nanapa-ya i Yehu, “Opanja da ana mbimbinggu,” wànanya.

¹⁶La pa-panduangu wàna na-paàra-nya paraïna i Yehu, “Ha Himungu anana i Yona, umbuha-dungga Nyungga?” wànanya. “Deningu-mana, Miri,” wàna i Peturu. “Bau pi-madungga Miri ba kumbuha-nggau Nyumu,” wànanya. Nanapa-ya i Yehu, “Opanja da mbimbinggu,” wànanya.

¹⁷La pa-ndilungu wàna na-paàra-nya paraïna i Yehu, “Ha Himungu Anana i Yona, umbuha-dungga Nyungga?” wànanya. Ka hawina wàngu-nanyaka i Peturu ba lundu na-pandilu wundangu-ma pa-paàra-nya paraïna i Yehu. Ka hili hema-nanyaka i Peturu, “Miri, upi hàlamanya dumu mbuu ndàbana. Upi-mangga Miri ba kumbuha-nggau Nyumu,” wànanya. Tàka i Yehu, “Opanja da mbimbinggu, wànanya.

¹⁸Ma-langatàka-maya yiana na paniinggu: Ba bidi mini-kaupa, nyumu wikima dumu ma-borungu, hiu laku la ngia pambuha etimu. Na nyuna napa jàkau kaweda-ka, upajola-nja da limamu, tàka hi haàtu-ka matanggu paboru-nggau, hi dangàndi-kau la ngia panda mbuhamu,” wànanya.

¹⁹(Ba panii tuna nu i Yehu pa-hakubu-nanya jàka nggiki hama metina napa i Peturu ba na pa-mangunju-ya i Ala.) Hàlaka nu ka panii-nanyaka i Yehu lai Peturu, “Tundu-nggawa,” wànanya.

²⁰Ba nambaili-ka i Peturu, naita-ya la kajia-na na pa-panaungu pambuha-na i Yehu. (Jiaya nyuna-maka na ma-mandapu lihinya i Yehu ba dangangu dàngu na ma-paàra-nya, “Miri, nggamuya duna Miri na ma-kaleka-nggau?” na mawàna.)

²¹Ba naita-yaka nyuna, paàrangu-nanyaka i Peturu lai Yehu, “Màla Miri, nggiki-naika duna nyuna ni napa?” wànanya.

²²Nanapa-ya i Yehu, “Ngera hama tuna màta ka naluri lundu tàkanggu jàka wànggunya, nda ngera-amunya la pa-paàra wànya. Na nyuna nyumu dumu utundu biangga Nyungga,” wànanya.

²³Nu ka kada-danyaka da pa-panaungu-na i Yehu ba nda nameti-a napa nuna pa-panaungu. Tàka làti duna, nda nameti-a napa nuna na pa-panaungu nda wàna-a duna i Yehu, tàka, “Ngera hama tuna, màta ka naluri lundu tàkanggu jàka wànggunya, nda ngera-amunya la pa-paàra wànya,” wàna-a duna.

²⁴Jiaya na pa-panaungu nuna-maka na ma-hakahii-nja yiada da manjadi. Tàka nyunamai na ma-tulihu-ha. Dàngu tapi-manya ba ma-padeningu-maha da papanii-na.

²⁵Dadangu-mapa hawiangu da pawunda-na i Yehu. Na nyuna ngera hama tuna jàka tulihu ndàbaha màra hau - màra haunja, ba kuwangu pakaka-aya nda ningua pangia la pinu tana mawotu ndàbaha nuda da mbuku da pa-tulihu.