Read Kambera YUHANI 3 Bible Online

YUHANI 3 - Kambera bible

YUHANI 3

¹Ninya na haàtu ngora anggama welingu la kaloka tau Parihi na ma-tamungu Nikundemu.

²La hau na rudungu namai lai Yehu hi napanii, “Umbu Ngguru,” wàna, “mapinggau ba papalewa-na i Ala-makau Nyumu Umbu. Nadu ba nda haàtu-a ma-ngalangu pawunda pa-hangàtarungu hama tuna da pawunda-mu Nyumu, jàka nda naori-ya paraïna i Ala,” wànanya.

³Nanapa-ya i Yehu, “Langatàka ka kupeka-nggau, nda jia haàtu-a manjadi ana banjaru-na i Ala, jàka nda pa-paana belinya,”[5] wànanya.

⁴Tàka i Nikundemu, “Nggiki hama peku biana la pa-paana belinya na tau na mambàda matua,” wànanya i Yehu. “Jia pekuna-kaka patama beli la kambu inana hi mangu pa-paana belinya?” wànanya.

⁵Nanapa-ya i Yehu, “Langatàka ma-deningu-maya yiana na paniinggu: jàka nda pa-paana-nya na tau welingu la wai dàngu welingu la Ngahuna i Ala, nda jia peku-ana panjadi ana banjaru-na i Ala na tau nu.

⁶La ngera tolu na tau nadedi-ya welingu la ina amana, tàka la ngera ngahu duna nadedi-ya welingu la Ngahuna i Ala.

⁷Àmbu hangàtaru-dunya: lupangu-ma pa-paana belinggai[6] bàdi mbuu ndàbami, jàka wànggu.

⁸Wàngu-nanya eti-mana duna jàka nggiya na-hanggangu ningu ba na-hapuputu na ngilu; tarongu maya nyuna na kanduuna, tàka nda papi-anya na ngia paweli-na dàngu na ngia pa-hanggangu-na. Tuna numbu na tau pa-paana-na na Ngahuna i Ala,” wàna.

⁹“Nggiki hama peku biana nu?” wàna ba na-paàrangu i Nikundemu.

¹⁰Nanapa-ya i Yehu, “Ka ni, hi ngguru-madukau la Ihirailu, wàngguka? Ndau pi-mbunya nu?

¹¹Langatàka-ma ka kupeka-nggau: Nyuma duma jiaya na papi-ma-ama na papanii wàma dàngu jiaya na paita-ma-ama na pa-hakahii-ma; tàka nyimi ndai kataku-aya na pa-hakahii-ma.

¹²Ndai pawai-a ba ku peka-nggainya na rukuna la pinu tana; nggiki hama pawai-mika, jàka ku peka-nggainya na rukuna la awangu?

¹³Nda ningua tau na mambàda heiya la awangu, hinggilu-na Nyuna na mambàda puruya la pinu tana, nu na Ana Tau.

¹⁴Hama tuna i Muha ba nawotu pajangga-ya la hupu ai na kataru wudu la maràda telangu, tuna numbu ba lupangu pajangga-maya bàdi na Ana Tau,

¹⁵màtawa mbuu ndàbana na tau mapawai lai Nyuna, ka nangala-nya na luri na ma-langatàka dàngu na ma-palupangu,” wànanya.

¹⁶Nadu ba kanjupu mbuha-nanya yia na tau la pinu tana i Ala, hi kiri wuangu-nanya na Ana Kamehangu-na, màtawa nimbihu-na na tau mapawai lai Nyuna ka àmbu na-molungu, tàka màta ka nangala-nya na luri na ma-langatàka dàngu na ma-palupangu.

¹⁷Nadu hi kiri pangàndi-nanya na Anana paraïna i Ala, nda jia-aya ka patanda-nya ngerana yiana na pinu tana, tàka na nyuna ka pamàna-nya wàna duna.

¹⁸Na tau mapawai lai Nyuna nda pahuku-anya. Tàka na nyuna na tau manda pawai, mbàda huku-nanyaka duna paraïna i Ala, ba nda nawai-duya na Ana Kamehangu-na i Ala.

¹⁹Yiana-ya na latana hi ratanya hukungu-na: Mbàda mainaka na harii la pinu tana, tàka na tau pinu tana narihi mbuha ninyapa na kapàtangu welingu la harii, maa ba na-akatu-du na pawunda-da.

²⁰Nimbihu-na na tau na mawunda ma-akatu, na-karaü-nya eti na harii; nda nabihu-a pa-ndàharungu la harii, ka àmbu peku wuwana na pawunda-na na ma-akatu.

²¹Tàka na tau na mawunda-ya na pambuha-na i Ala, na-ndàharungu la harii ka peku wuwada nu da pawunda-na ba pa-namatungu-nanya la pambuha-na i Ala.

²²Tunaka nu laku-nanyaka la tana Yundia i Yehu dàngu da papanau-na. Hi na-harangu ndàdiku dànja lai nu, hi na-parunungu tau.

²³La rehi nu ndedi natama-a la uma kapàtangu i Yuhani. Parunungu-nanya tau la Ainungu la lihina la Halimu, maa ba nadangu-du na wai lai nu. Damai tomaya tau hi na-parunu-nja.

²⁵Da manda pirada da papanau-na i Yuhani da-payàmaku la kareuku dàngu tau Yahundi[7] rukuna na kalaratu paili.

²⁶Dalua lai Yuhani hi dapanii-nya, “Umbu Ngguru unamu-duyapa na tau namamai lai nyumu la hapapa Luku Yorundangu, na pa-hakahii-munggama yianana? Parunungu-mananyai duna nàhu, hi nalua ndàba na tau lai Nyuna!” wàdanya.

²⁷Nanapa-ya i Yuhani, “Nda jia peku-ana na tau la paningu ngga - nggàrana, jàka nda nawua-nya paraïna i Ala.

²⁸Mbàda rongu wiki-mami-nggaka ba kupanii, ‘Nyungga yia nda jia-aka duku na Hanganji Ma-pamànangu. Tàka pa-palewa-ka la pa-mangilu-nya Nyuna,’ ba wànggu.

²⁹Na bidi papa kawini tangguna na bidi papa miniya. Na kandua-na na bidi papa mini ndolaku pera daa-ananya duna lapa-patingi-nya, hi na-hawola jàka na rongu-yaka na talia liina na bidi papa mini. Tuna numbu duku nyungga. Nàhu kanjupu hawola-kaka duku.

³⁰Na-parukangu-maka bàdi Nyuna pandudu, tàka nyungga ku-parukangu pa-kawawaku,” wàna.

³¹Na mapuru weli ditangu nalànga ndàbanya. Na mamai welingu la pinu tana padiha pa-pohungu-ya la tau pinu tana, dàngu ruku pinu tanaya duna na papanii-na. Nyuna duna na mapuru weli ditangu nalànga ndàbanya.

³²Na pambàda itana dàngu na pambàda ronguna jiaya duna na papanii wàna, tàka nda haàtu-a mawaiya na pa-hakahii-na.

³³Na tau ma-kataku-ya na pa-hakahii-na, peka-nanya ba ma-padeningu-ya i Ala.

³⁴Nadu na tau papalewa-na i Ala jiaya na puluna i Alama duna na pa-patàka-na, maa ba nabundu làndangu-du na Ngahuna i Ala na pambàda wuangu-ya.

³⁵I Ama nambuha-nya na Anana, dàngu mbàda wua ndàba-nanyaka na kawaha lai Nyuna.

³⁶Na tau na mawaiya i Ana napa nangala-nya na luri na ma-langatàka dàngu na ma-palupangu. Tàka na tau na manda karadaku-nya i Ana nda na-ngalangu-a luri. Nahuku-nya paraïna i Ala lundu nu - nu.