Read Kambera YUHANI 4 Bible Online

YUHANI 4 - Kambera bible

YUHANI 4

¹Mbàda rongu-daka da tau Parihi ba darihi dangupa da pa-panaungu pangala-na dàngu da pa-parunu-na i Yehu welingu lai Yuhani. (

²Nda Nyuna wikia duna làti i Yehu na ma-parunungu tàka jiaha da papanau-ana.)

³Ba napii-nyaka paraïna i Yehu ba mbàda rongu-daka da tau Parihi na rukuna nuna, ka laku-nanyaka welingu la tana Yundia hi nabeli la tana Nggalilia.

⁴Nu ba nalaku lupangu-ma nalii ningu la Hamaria.

⁵Ka tàka-nanyaka i Yehu la hau paraingu la Hamaria na ma-tamungu Hikàru, nda namarau-a welingu la tana pawua-na i Yakupu la handàka-na lai Yuhupu anana.

⁶Lai nu ninya na humuru-na i Yakupu. Ba njili halawàla-mananya nàmu la ngarangia i Yehu, mandapu-nanyaka la lihi humuru. Nu ràkangu njàmu hakambulu dua-yaka la tidu lodu.

⁷Tàka da papanau-na i Yehu hambàda-haka la paraingu, palua pakei pangangu. Tunaka nu nàmu-nyaka na haàtu kawini Hamaria, mainanya pataku wai. Napanii i Yehu, “Màla ràmbu, peku duna hiana ka kukarai pa-ngunungu?” wànanya.

⁸

⁹Nanapa-ya na kawini Hamaria, “Ka ni hi tau Yahundi-kau ni Umbu, tàka nyungga hi tau Hamaria-ka duku; ka nggikina hiu karaika wai pa-ngunungu?” wànanya. (Nadu na tau Yahundi ba nda na-panggolu-a dàngu tau Hamaria.)[8]

¹⁰Nanapa-ya i Yehu, “Jàkau pinya làti na pawua-na i Ala dàngu jàka nggamuya na makarai-kau wai pa-ngunungu, jiangu-ma làti bau karai pa-ngunungu lai Nyuna, tàka hi nawua-nggau wai luri,” wànanya.

¹¹Tàka na kawini, “Ba nda ninguki pataku wàmu ni Umbu, tàka lalu manjolungu-ya yiana na humuru. Ka nggii biaka ungalangu ningu wai luri?

¹²I Yakupu na boku la mangilu-ma duma, na mawua-nggamanya nyuma[9] yiana na humuru. Nyuna wiki lai yiahu-ma nataku ningu wai pa-ngunungu; hamanai da anana dàngu da bandana. Bau kakaya ka jia rihi-munya-kaka i Yakupu?” wànanya.

¹³Tàka i Yehu, “Na tau na mangunu-nya na wai yiana nahili madau-mapa napa,” wàna.

¹⁴“Tàka na tau na mangunu-nya na wai na pawua-nggunya napa, nda nahili madau-apa lundu nu - nu. Nadu na wai na pawua-nggunya nu napa, napa nanjadi-ya mata wai la wikina na ma-tapanjiru hi nawua-nya luri na ma-langatàka dàngu na ma-palupangu,” wànanya.

¹⁵Nanapa-ya na kawini, “Ai màla àru Umbu, wua-ngganya làti nu na wai, ka àmbu kuhili madau, dàngu ka àmbu kuhili mai pataku wai lai yiahu,” wànanya.

¹⁶“Lua wa, kau paaunya na leimu, kau mangu pamai beli yiahu,” wàna i Yehu.

¹⁷“Nda ningua duku leinggu,” wàna na kawini. “Deningu manai nyuna ba wàmu,” wàna i Yehu.

¹⁸“Nadu ba mbàda pa-limangu-muka pa-mangoma, tàka na mini na ma-kanoma-kau nàhu nda lei-amunya,” wànanya.

¹⁹“Pi-nggunyaka nàhu ba wunangu kau, Umbu,” wàna na kawini.

²⁰“Da boku la mangilu-ma duma da-hamaya-nya i Ala la palindi yiana, tàka na banjaru-mi nyimi, dapanii ba Mbulungu la Yeruhali-a duna na ngia pa-hamayangu lai Ala, wàda,” wàna na kawini.

²¹“Langatàka nàhu wànggunggau,” wàna i Yehu. “Napa ninya na rehina, jàka na-hamayangu lai Ama na tau, nda jia-ayapa la palindi yiana dàngu nda la Yeruhali-mbupa.

²²Nyimi dimi tau Hamaria hamaya-minya na panda tandami, tàka nyuma duma tau Yahundi, hamaya-manya Nyuna na patanda-mama duma, nadu na pa-mànangu wàngu ba welina la tau Yahundi-du.

²³Na nyuna ninya napa na rehina, dàngu rehi-mana-nyaka nàhu na tau ba wàngu àtalu-na na Ngahuna i Ala, da hamaya-nya i Ama ba Ala ma-padeningu-ya, hama tuna na pambuha-na i Ama.

²⁴Maa ba Ngahu-duya i Ala, dàngu ba mbulungu wàngu àtalu-na na Ngahuna i Alama-a hi pekuna na tau pa-hamaya-nya i Ama, pa-namatu-nya ba Ngahuya.”

²⁵Nanapa-ya na kawini, “Kupi-manya-duku ba nàmunya napa na Hanganji Ma-pamànangu (na Karitu ba wàda). Jàka natàka-ka, napa napeka-ndanya mbuu ndàbana,” wàna.

²⁶Nanapa-ya i Yehu, “Ka ni hi jia madu-kaka mapanii dànggau nàhu,” wànanya.

²⁷Nu la rehi nu, ni beli-njaka da papanau-na i Yehu. Ka hangàtaru-danyaka ba daita-ya panii dànguna tau kawini i Yehu. Tàka nda haàtu-a la hongada nyuda ma-paàra-nya nu na kawini, “Nggàra pahimbu-mu ràmbu,” mawàna-nya, jàka ndia ma-paàra-nya i Yehu, “Ka nggikina Umbu hiu panii dànya nina na kawini?” mawàna-nya.

²⁸Ka dunjaku-madua-nanyaka na wuru waina hi na-nyanyaru la paraingu nu na kawini, hi napanii-nja da tau lai nu,

²⁹“Mai kai ita dàndanya na tau na mapeka hàla-ngganya mbuu ndàbana na pawunda-ngguka. Talànga wanguna jiaya ihu ni na Hanganji Ma-pamànangu!” wànanja.

³⁰Ka luhu-danyaka welingu la paraingu nuda da tau hi dalua lai Yehu.

³¹Nu ba tuna, karai-danyaka i Yehu paraï da papanau-na ka nangangu, “Nganguwa làti Umbu Ngguru,” wàdanya.

³²Nanapa-ya i Yehu, “Ninguma duku pangaanggu, na panda pimi nyimi,” wànanja.

³³Ka paàrangu-danyaka dàngga anguda da papanau-na, “Ningu ihu tau mangàndi-nya pangangu kawai?” wàda.

³⁴Tàka i Yehu, “Na pangaanggu duku jia ba kununju-ya na pambuha-na Nyuna na ma-palewa-ka, dàngu la pa-palundu-nya na paràma pawua-nangga.

³⁵Nyimi dimi ‘Patu mbua wula-kinaka na rehi muti’ wàmi. Tàka Nyungga duku, ‘Tàngaru-ha ni da woka da mambàda ma-rarangu, ràka pamuti-mahaka, wànggunggai,’ wànanja.

³⁶Da tau da mamuti ngalangu-danyaka duda wundada, ka pa-uhingu-danyaka ihi paraï nduma luri na ma-langatàka dàngu na ma-palupangu. Ka da-maràngga hawola da ma-hàbarungu dàngu da mamuti.

³⁷Na pa-deningu-ma yiana na lara lii, ‘Na haàtu natanggu hàbarungu, tàka na haàtui natanggu muti,’ ba wàna.

³⁸Paràha-nggunggai palua pamuti la woka panda pokami; mbàda ràma-naka na tau hawiangu lai nu, tàka tanggu utungu-minyaka nyimi welingu la paràma-da nyuda,” wànanja.

³⁹Nadangu na tau Hamaria lai nu la paraingu na mapawai lai Yehu, ruku paniina nuna na kawini, ‘Napeka hàla-ngganja mbuu ndàbada na pawunda-ngguka,’ ba wànanja.

⁴⁰Ba datàka-ka lai Yehu da tau Hamaria, pamanda-danyaka i Yehu ka na-ndàdiku-ki lai nyuda. Nu ba tuna ndàdiku-nanyaka lai nu i Yehu dàmbu lodu mandaina.

⁴¹La hambeli-na nu narihi dangu-mapa na tau na mapawai lai Yehu ruku panau wiki-nanja paraïna i Yehu.

⁴²Ka panii-danyaka nuna na kawini, “Nàhu hi mapawai, nda rukuna na paniimu nyumu-apa, tàka rukuna ba rongu wiki-mama-nyaka Nyuna, dàngu pi-manyaka ba jiaya Nyuna-maka na Ma-pamàna-nya yia la pinu tana,” wàdanya.

⁴³Ba dàmbu lodu-naka la Hikàru laku-nanyaka la Nggalilia i Yehu.

⁴⁴Mbàda panii wiki-manaka i Yehu, “Na haàtu wunangu nda patembi-aya la parai wikina,” mbàda wànaka.

⁴⁵Tàka ba natàka-ka la Nggalilia nayema mbaha etiya tau lai nu, maa ba nimanja nyuda la Yeruhali la Lodu Remi Paha, dàngu daita hàla-mahaka mbuu ndàbada da pawunda-na i Yehu lai nu.

⁴⁶Tunaka nu beli-nanyaka i Yehu la Kana la tana Nggalilia na ngia pa-pambeli-nanya wai angguru na wai. La paraingu lai nu ninya na haàtu panggawi ma-pareta, hidu-nanya na anana la Kapinaumu.

⁴⁷Ba narongu ba mbàda ninyaka i Yehu la Nggalilia welingu la Yundia, lua-nanyaka lai Yehu pakarai-ya ka nalua la Kapinaumu pa-pamàlaru-ya na anana ba meti-ama-naka.

⁴⁸Napanii i Yehu nu la panggawi ma-pareta, “Jàka ndai itaha da pa-hangàtarungu, ndai pawaia,” wànanya.

⁴⁹Nanapa-ya nu na panggawi, “Ai, parenggangu àru làti Umbu, ba ndedi nameti na ananggu,” wànanya.

⁵⁰Tàka i Yehu, “Lakuwa nyuna, màlaru-nanyaka na anamu,” wànanya. Nu na tau nawaiya na paniina i Yehu, hi nalaku.

⁵¹Nàhu ba la ngarangia-ya, mai-danyaka da tau la umana papanii-nya, “Mbàda màlaru-naka na anamu umbu,” wàdanya.

⁵²Hi na-paàra-nja jàka njàmu piraya ba na-màlaru nu na anakeda. Danapa-ha nyuda, “Ràkangu njàmu hauyaka la tidu lodu kangeu, ba na-pànjangu na mbana ihina,” wàdanya.

⁵³Ka namu-nanyaka paraïna na amana na anakeda, ba jiaya la rehi nu napanii-nanya paraïna i Yehu, “Màlaru-nanyaka na anamu,” ba wànanya. Ka pawai-danyaka lai Yehu, nyuna wiki dàngu mbutana na ihi uma-naka.

⁵⁴Nuna-duyaka na pa-hangàtarungu na pa-panduangu wàna na pawunda-na i Yehu la Nggalilia la hambeli belina welingu la Yundia.