Read Kambera YUHANI 5 Bible Online

YUHANI 5 - Kambera bible

YUHANI 5

¹Tunaka nu ba jia-yaka na rehi mbabu tau Yahundi lua-nanyaka la Yeruhali i Yehu.

²Nu la lihina la “Pindu Mbimbi” la Yeruhali ninya na hau ngia paihu,[10] Mbatendàhu[11] wàdanya la hilu Imbarani. Lai nu lima mbuada da kawindu-na.

³Nadangu lai nu na tau mahidu ma-tanggunggulu la kawindu - kawindu-na; ningu mapoki, ningu ma-kanjiku, dàngu ningu ma-kaliparu. [Nyuda mbuu ndàbada patia-danya na kanggàbuku-na na wai.

⁴Nadu talànga handàka-na napuru na papalewa-na i Miri la ngia paihu hi na-kunggalu-nya na waina. Tàka na tau mahidu na mapuru mangilu la ngia paihu ba talànga kanggàbuku-na na wai, na-màlaru-ma duna jiapa ka nggàra hiduna-kadu.]

⁵Lai nu ninya na haàtu tau mini na mambàda tailu kambulu walu mbua ndauna pahidu.

⁶Naita-ya tanggunggulu-na lai nu paraïna i Yehu, dàngu napi-manya ba dira mandai-manaka pahidu; hi na-paàra-nya paraïna i Yehu, “Màla umbuhangu dumu pa-màlaru?” wànanya.

⁷Nahema na tau mahidu, “Umbu, nda ningua tau yiahu mapuhi-ka la ngia paihu jàka na kanggàbuku na waina. Tàka ba talànga hanàhu-nggu la ngia paihu, mbàda mangilu-nanggaka tau hawiangu patama,” wànanya.

⁸Ka panii-nanyaka i Yehu, “Hadangu-wa, dandanja da topumu kau laku,” wànanya.

⁹Ka màlaru memangu madua-nanyaka hi nadanda-nja da topuna hi nalaku. Nu lodu Hangahu-ya.

¹⁰Ba tuna ka panii-danyaka da liku uru Yahundi, “Ka ni hi lodu Hangahu-ya nàhu, nda ukua làti pangàndi-ha da topumu,” wàdanya.

¹¹Tàka hi nahema nu na tau, “Na tau ma-pamàlaru-ka ni kawai na ma-paràha-ngga padanda-nja da topunggu la palaku,” wànanja.

¹²“Ka nggamuya duna nu na tau na ma-paràha-nggau pa-dandangu topumu la palaku?” wàda na paàra-danya.

¹³Tàka nu na tau na ma-màlaru nda napi-anya jàka nggamuya nu na tau, maa ba mbàda pa-kambelingu-naka i Yehu la honga tau dangu.

¹⁴La hambeli-na nu na-jàngapu-ya nu na tau paraïna i Yehu la Umana i Miri, hi napanii-nya, “Nàhu màlaru-munyaka, àmbu hili wunda-dupa manjala, ka àmbu nanggàna-kau marihi mbotu,” wànanya.

¹⁵Ka lua-nanyaka nu na tau papanii-nja da liku uru Yahundi ba i Yehu na ma-pamàlaru-ya.

¹⁶Tuna nuduka hi kiri wuku-danya ka pa-handuka-ya i Yehu, rukuna ba na-pamàlaru tau la lodu Hangahu.

¹⁷Ka panii-nanjaka paraïna i Yehu, “Na Amanggu ràma pangalangu-mananya duna lundu nàhu, tuumbuna Nyungga ba kuràma,” wànanja.

¹⁸Rukuna na kareuku nuna-duka hi da-parukangu da liku uru Yahundi pahimbu-nya wihuna ka pameti-ya i Yehu ba wàda. Hi kiri tudanya nu nda mbulungu biana ba napangga-ya na kalaratu anggama rukuna na lodu Hangahu, tàka jia-mbuya, Ama-nggunya i Ala ba wàna; nu pa-hamangu-duna-nyaka wikina dàngu i Ala, wàdanya.

¹⁹Tuna nu ba nahema-ha nuda da tau paraïna i Yehu, “Langatàka ka kupeka-nggai, nda peku-ana la pawàngu eti wikina i Ana la pawunda ngga - nggàra. Na paita-na la pawunda-na na Amana, jia-aya duna na pawunda-na. Nadu jàka nggàraya na pawunda-na i Ama, tuna numbu na pawunda-na i Ana.

²⁰Nadu ba nambuha-nya i Ana paraïna i Ama, hi na-paita-nya mbuu ndàbada da pawunda wikina. Jiapa na-paita-mbunyaipa napa da pawunda-na da marihi-nja yiada, hi lupa ihangàtaru nyimi.

²¹I Ama na-pahadangu mameti, hi nawua-nja luri na ma-langatàka dàngu na ma-palupangu; tuna numbu i Ana ba nawua-nja luri ma-palupangu da tau da pa-wuangu luri ba wàna.

²²Nyuna wiki i Ama nda haàtu-a duna pa-patanda-na wai ngera. Na kawaha la pa-patandangu wai ngera, mbàda pakata hàla-nanyaka la Anana.

²³Hi tuna nu i Ama màta ka natembi ndàbaya tau i Ana, hama tuna ba datembi-ya i Ama, wàna. Na tau manda tembiya i Ana, nda tembi-mbunanya i Ama na ma-palewa-ya i Ana.

²⁴Langatàka ma-deningu-maha da papanii-nggu: Na tau na maeti wànja da papanii-nggu, dàngu na mawaiya nu na Mapalewa-ka, mangu-nanyaka duna na luri na ma-langatàka dàngu na ma-palupangu. Nda pahuku-anyapa; pahàlangu-nanyaka duna welingu la meti hi na-ngalangu luri.

²⁵Langatàka-manggunya: Napa ningu rehina — dàngu rehi-mana-nyaka nàhu — da tau da mameti napa darongu-ya na talia liina na Anana i Ala. Tàka da tau da marongu-ya napa daluri.

²⁶Nadu hama tuna i Ama wiki ba ngia paweli luriya, tunanya numbu ba natuya i Ana ka ngia paweli luriya.

²⁷Mbàda pawai ngaba-nanyaka na Anana la pa-patandangu wai ngera, maa ba Ana Tau-duya.

²⁸Àmbi hangàtaru-du bai ronguya yiana, nadu ba ningu rehina napa, mbuu ndàbana na tau na mambàda meti ba darongu-ya na talia liina,

²⁹hi daluhu welingu la reti. Da tau da mambàda wunda mahàmu hadangu dànya la luri. Tàka da tau da mambàda wunda ma-akatu hadangu-danya ka hukunja,” wànanja.

³⁰“Nda nggàra-a duku pawunda-nggu la pambuha eti wikinggu. Ba ku-patandangu wai ngera, pa-namatungu-nggunya la hupu liina i Ala-ma-a. Tàka na botangu-nggu namola, nadu ba nda ku-namatu niaya duku na pambuha wikinggu, ba jiaya na pambuha-na i Ama-ma-a duku na ma-palewa-ka.

³¹Ngera hama tuna jàka ku-hakahiingu wikinggu nda peku-ana la pawaiya nu na pa-hakahiingu-nggu.

³²Na nyuna nimanya duna na haàtu na ma-hakahii-nya na rukunggu Nyungga, dàngu kupi-manya duku ba ma-deningu-maya na pa-hakahiingu-na.

³³Mbàda paràhangu-mika tau palua lai Yuhani, tàka mbàda hakahii-nanyaka na rukunggu Nyungga la ma-padeningu.

³⁴Hi kiri panii-nggunya yiana, keha ka na-hakahii-ngga tau nda wànggua, tàka màta ka peku pamàna-nja nyuda wànggunggai.

³⁵I Yuhani hama palita maroka-ya na ma-handarakungu hambila-na. Nda nggi tuana mandaina bai mbaha etinya na hambila-na.

³⁶Tàka narihi-pa duku na pa-hakahiingu-nggu Nyungga welingu la pa-hakahiingu-na i Yuhani. Da pawunda-nggu nàhu, nu da paràma ba wànangga i Ama, jiaha da mbuti ba i Ama na mambàda palewa-ka.

³⁷Tàka i Ama na ma-palewa-ka na hakahii-mbunya na rukunggu Nyungga. Ndedi ihandàkangu-a nyimi parongu-ya na talia liina jàka ndia paita-ya na matana.

³⁸Da papanii-na ndai pakàpa-aya la etimi, maa ba ndai wai-duka Nyungga papalewa-na Nyuna.

³⁹Mimanginjiru-ya na Huratu Matua rukuna nakaka-minya ba tunda nu jiaya na pangala wàndanya na luri na ma-langatàka dàngu na ma-palupangu, ba wàmidui. Tàka jiaya na Huratu Matua-maka làti na ma-hakahii-nya na rukunggu Nyungga.

⁴⁰Ba tuna ndai bihua pamai lai Nyungga la pangala-nya na luri ma-palupangu.

⁴¹Keha ka natembi-ka tau nda wànggua.

⁴²Kutanda-makai. Kupi-manggai ba ndai mbuhanya i Ala daa la etimi.

⁴³Mai ngàndi-nggunya na kawaha-na na Amanggu, tàka ba tuna ndai yema-aka. Na nyuna jàka ningu tau hawiangu na mamai ngàndi kawaha wikina, jia niyai na payema-mi.

⁴⁴Nggiki hama pawai-mika, keha ka natembi-ta angunda jàka wàmi, tàka hi ndai pamukarungu ka natembi-kai paraïna i Ala Kamehangu?

⁴⁵Àmbi kaka duya ba Nyungga napa makàla-kai la hanggana i Ama. Hi jiaya i Muha duna na makàla-kai, nu i Muha na pamonu-mi.

⁴⁶Jàka iwaiya làti i Muha, jiangu-ma làti bai waika Nyungga, maa ba jiaya na rukunggu Nyunggadu na pa-tulihu-na.

⁴⁷Tàka jàka ndai wai-maduha da pa-tulihu-na i Muha, nggiki hama wai-mihaka da papanii-nggu Nyungga?” wànanja.