Read Kambera YUHANI 6 Bible Online

YUHANI 6 - Kambera bible

YUHANI 6

¹Ndedi nggi tuna mandaina ma-palàngangu laku-nanyaka i Yehu la hapapa Tàma Nggalilia, na Tàma Timbiria ba wàda-mbunya.

²Ba natàka-ka lai nu, nadangu na tau na matundu-nya Nyuna ba daita-duhaka da pa-hangàtarungu ba na-pamàlaru-ha da tau mahidu.

³Hei-nanyaka la palindi i Yehu, hi na-mandapu lai nu dàngu da papanau-na.

⁴La rehi nu mareni-nanyaka na Lodu Remi Paha tau Yahundi.

⁵Ba na-pawilikungu-ka matana i Yehu, naita-ya na tau dangu na mapaju - jurungu pamai lai Nyuna. Hi napanii lai Pilipu, “Nggii-aka takei ningu pangangu, ka nangangu ndàba yiana na tau?” wànanya. (

⁶Napi-manya duna i Yehu jàka nggàraya taï na pawunda-na, na nyuna hi panii tuna nu ka kukama wànya i Pilipu wàna.)

⁷Nanapa-ya i Pilipu, “Roti ma-wilingu dua ngahu àmahu bara[12] nda natoma-mbu ndumana yiana na tau, jiapa ka da-maràngga hakudu kadu,” wànanya.

⁸Hi napanii na haàtu papanau-na, nu i Andaria anguna paluhu i Himungu Peturu,

⁹“Ninya yiana na anakeda mini na maningu rotingu lima mbua dàngu dua ngiu iyangu. Tàka nggi tuda-kaka ni nduma tau dangu tungu yia?” wàna.

¹⁰“Paràha-nya pa-mandapu na tau,” wàna i Yehu. Nadangu rumbana lai nu, hi na-mandapu la rumba na tau — ràkangu 5000-ya na mini.

¹¹Tunaka nu piti-nanjaka da roti i Yehu, hi na pamalangu-nya i Ala. Hàlaka nu hi napabe - berinja da roti la tau dangu. Tumbuna ba napabe - berinja da iyangu, ka ngangu-danyaka lundu hodada.

¹²Ba dangangu ndàbaka lundu mbihuda, napanii i Yehu la papanau-na, “Pauhi-nja da pangangu da marihi, ka àmbu ningu ma-dimangu,” wànanja.

¹³Ka pauhi-danjaka, ha-kambulu dàmbu mbola mbinuda da pangangu da marihi welingu la lima mbua roti da pangana nu na tau dangu.

¹⁴Ba naita-yaka tau dangu nu na pa-hangàtarungu pawunda-na i Yehu, panii-danyaka, “Ai, langatàka-ma jiaya Nyuna-maka yiana na Wunangu[13] na pa-nedingu na mamai yia la pinu tana ba wàda,” wàda.

¹⁵Napinya paraïna i Yehu ba mai-danya pahàni-ya la pa-hanganji ba wàdanya. Tuna nuduka hi na-hinggilu ningu la ngaba ma-patandulangu.

¹⁶Ba na-malingu-ka, puru-danyaka la tàma da papanau-na i Yehu.

¹⁷Hi dahei la tena hi dapala hanàhu-da la Kapinaumu. Nu kapàtangu-mana-nyaka, tàka ndedimbu namai tomaha paraïna i Yehu.

¹⁸Nu ba tuna tungu-nanyaka na ngalingu la tàma paraï pa-mbangatu na ngilu.

¹⁹Ba ràkangu lima nomu kilu-daka marauda ngalada pa-palirungu, ita-danyaka ba nàmunya i Yehu la pinu wai ba namaiya la tena. Dira mangàdatu bia-haka.

²⁰Ka panii-nanjaka paraïna i Yehu, “Àmbi mangàdatu-du, hi jiaka Nyungga yia,” wànanja.

²¹Hi dayema mbaha etiya la tena, nu hi tàkama-a-nanyai duna na tena la ngia pa-hanggangu-da.

²²Hadangu harii pi-danjaka tau dangu da manii-injapa la hapapa tàma, ba hauana na tena na maninya lai nu kangeu. Dapi-mbunya ba hambàda-haka la tena nuna da papanau-na i Yehu, tàka nda nahei karia-anja nyuda i Yehu.

²³Tunaka nu nàmunjai duda ba nda pira mbuada da tena welingu la paraingu Timbiria, hi dahiwi ningu la lihi ngia pangangu-na roti na tau dangu ba nahàla pamalangungu i Miri.

²⁴Ba napi-nyaka tau dangu ba nda nianya lai nu i Yehu, hamangui da papanau-na, hei madanyai duda la tena nuda hi dapala la Kapinaumu palua pahimbu-ya i Yehu.

²⁵Ba da-jàngapu-yaka i Yehu la hapapa tàma paraï da tau dangu, paàra-danyaka, “Ka pirangu tàkamu yiahu Umbu Ngguru?” wàdanya.

²⁶Nanapa-ya i Yehu, “Langatàka-ma, nahimbu-mingga Nyungga nda jia-aya ba mbàda jàngapu-mihaka da ihida da pa-hangàtarungu pawunda-nggu, tàka jiaya ba mbàda ngangu lundu mbihu-mika.

²⁷Àmbi ràmadu keha ka ngalangu wàngu pangangu da malua-ya la njàpu dàngu la muhungu. Tàka màtawa kai ràma keha ka ngalangu wàngu pangangu manda luaya la muhungu dàngu na ma-wuangu-ya na luri na ma-langatàka dàngu ma-palupangu. Napa na Ana Tau nawua-nggainya na pangangu nuna, maa ba mbàda katua-nanyaka paraïna i Ala Ama.”

²⁸Ka paàra-danyaka, “Nggàraka bàdi pawunda-ma ka ma-pahàra-nya na pambuha-na i Ala?” wàdanya.

²⁹Nanapa-ya i Yehu, “Yiana-ya na parinju-na i Ala welingu lai nyimi: miwai-yawa na papalewa-na i Ala,” wànanja.

³⁰Danapa-ha nyuda, “Jàka tuna nu nggàra mbuti-yaka na pawua-munggama Umbu, ka peku ita-manya dàngu ka mawaikau Nyumu? Nggàra-yaka napa na pawunda-mu?

³¹Da boku la mangilu-ma[14] dangangu màna la maràda telangu, hama tuna na pa-tulihu la Huratu Matua, ‘Nawua-nja pangangu roti welingu la awangu,’ ba wàna,” wàdanya.

³²Hi napanii-nja paraïna i Yehu, “Langatàka manggunggai: Nda nyuna-a i Muha na mawua-nggai,[15] tàka jiaya na Amanggu na mawua-nggainya na roti langatàka welingu la awangu.

³³Nadu na roti na pawua-na i Ala, jiaya Nyuna na mapuru welingu la awangu, dàngu na mawua-nya luri na tau la pinu tana,” wànanja.

³⁴“Ai, Umbu wua mànu-nggamanya làti na roti nuna,” wàdanya.

³⁵“Jiaka Nyungga-maka na roti na ma-wuangu-ya na luri,” wànanja paraïna i Yehu. “Na tau na mamai lai Nyungga nda nahili manjuu-apa lundu nu. Dàngu na tau na mawaika Nyungga nda nahili madau-apa lundu nu,” wàna.

³⁶“Na nyuna hama tuna na pambàda panii-nggunggai, jiapa ka mbàda ita-mingga-kai, tàka ndai pawaia.

³⁷Mbuu ndàbana na tau na pawua-nangga i Ama, namaima duna napa lai Nyungga. Nggamuya-kadu na mamai lai Nyungga nda jia jukaru-anggunya duku napa.

³⁸Nadu hi kiri purunggu welingu la awangu, nda jia-aya ka ku-namatu niya na pambuha wikinggu Nyungga, tàka jiaya na pambuha-na Nyuna duna na mapalewa-ka Nyungga.

³⁹Tàka yiana-ya na pambuha-na Nyuna na ma-palewa-ka Nyungga: ka àmbu haàtu du ma-mbulangu welingu la mbuu ndàbada da pawua-nangga Nyungga; tàka ka lupa ku-pahada belinja napa la Hupu Njàpuna.

⁴⁰Maa ba yiana-ya na parinju-na na Amanggu: màtawa mbuu ndàbana na tau na ma-tàngaru-ya i Ana hi napawai lai Nyuna ka namàngi-nya na luri na ma-langatàka dàngu na ma-palupangu, dàngu ku-pahada belinya napa la Hupu Njàpuna,” wànanja.

⁴¹Ka pakiringu-danyaka pa-kambunguku-nya i Yehu da tau Yahundi rukuna na paniina, “Nyungga jiaka na roti na mapuru welingu la awangu,” ba wàna.

⁴²Ka panii-danyaka, “Ka nda jiaya ni i Yehu anana i Yuhupu? Da inana da amana matanda-maha! Ka ni purunggu welingu la awangu hi jia wàna bia?” wàda.

⁴³Tàka i Yehu, “Àmbi kambunguku-du,” wànanja.

⁴⁴“Nda jia ningua haàtu ma-ngalangu pamai lai Nyungga, jàka nda namai ngàndi-ngganya paraïna i Ama na ma-palewa-ka; tàka na tau na mamai lai Nyungga, ku-pahada-nya napa la Hupu Njàpuna.

⁴⁵Tuna yia na pa-tulihu la huratu-da da Wunangu: ‘Napa mbuu ndàbada na papeka-nja paraïna i Ala,’ wàna. Ba tuna mbuu ndàbana na tau na marongu-ya i Ama dàngu na ma-papekangu lai Nyuna, jiaha da mamai lai Nyungga.

⁴⁶Nu ba tuna mbàda ninguka maita-ya i Ama nda wànggua, mbulungu na ma-welingu lai Ala-a duna na mambàda itaya i Ama.

⁴⁷Màtawa kai pinya: Na tau mapawai namangu-nya na luri na ma-langatàka dàngu na ma-palupangu.

⁴⁸Nyungga yia jiaka na roti na ma-wuangu-ya na luri.

⁴⁹Da boku la mangilu-mi dangangu màna la maràda telangu, tàka meti-bia-danyai.

⁵⁰Tàka nda tuna-a duna na roti na mapuru welingu la awangu; na tau na manganya nuna na roti nda jia meti-ana.

⁵¹Nyungga yia jiaka na roti na mapuru welingu la awangu — na roti na ma-wuangu-ya na luri. Na tau na manganya na roti yiana napa naluri lundu nu. Na roti na pawua-nggu napa nduma lurina na tau la pinu tana jiaya na tolunggu,” wànanja.

⁵²Ba darongu-yaka nuna pa-lumungu-danyaka dàngga anguda da tau Yahundi, “Nggiki hama biana ba nawua-ndanya na toluna yia na tau yiana ka tanganya?” ba wàda.

⁵³Hi napanii-nja paraïna i Yehu, “Langatàka-ma ka kupeka-nggai: Jàka ndai ngamanya na toluna na Ana Tau, dàngu jàka ndai unu-manya na wai riana, nda jia luri langatàka-ami.

⁵⁴Na tau na manganya na tolunggu dàngu na mangunu-nya na wai rianggu, namàngi-nya na luri na ma-langatàka dàngu na ma-palupangu dàngu ku-pahada-nya napa la Hupu Njàpuna.

⁵⁵Nadu ba pangangu langatàka-maya na tolunggu, dàngu ba pa-ngunungu langatàka-maya na wai rianggu.

⁵⁶Na tau na manganya na tolunggu dàngu na mangunu-nya na wai rianggu, pa-daingu mbulungu-mana dàngu Nyungga, hamangui duku Nyungga pa-daingu mbulungu-manggu dàngu nyuna.

⁵⁷I Ama na maluri na-palewa-ka Nyungga, tàka Nyungga duku kuluri welingu lai Ama. Tuna numbu na tau na manganya na tolunggu ba naluri napa welingu lai Nyungga.

⁵⁸Yiana-ya duna na roti na mapuru welingu la awangu: na roti yiana nda hama tuana na pangada da boku la mangilu-mi. Nadu ba dahàlaka panganya na roti nuna, meti bia-danyai. Tàka na tau na manganya na roti yiana napa naluri lundu nu - nu,” wànanja.

⁵⁹Mbuu ndàbada nuda napanii-ha i Yehu ba jiaya na-papekangu-na tau la uma bungguru la Kapinaumu.

⁶⁰Ba darongu-yaka nu na paniina i Yehu, dadangu da papanau-na da mapanii, “Lalu mbotuya na kareuku yiana. Nggamu ma-ngalangu pa-kataku-ya!” wàda.

⁶¹Napi-manya paraïna i Yehu, ba da-kambunguku da papanau-na rukuna nuna. Ka panii-nanyaka, “Na-handuka wàmanya nu na etimi rukuna na kareuku nuna?

⁶²Wàngu panggiki bia-mika napa jàkai itaya hei belina na Ana Tau la ngia panii memanya?

⁶³Na ma-paluri-ya na tau jiaya na Ngahuna i Ala. Na àtalu-na na tau nda ningua linguna. Na kareuku papanii-nggunggai yiana kareuku-na na Ngahuna i Alaya dàngu kareuku ma-wuangu luriya.

⁶⁴Jiapa-kai ba tuna nimanjai hawiangu la hongami nyimi da manda pawai,” wànanja. (Mbàda pi-mananya duna welingu la kawunga-na paraïna i Yehu jàka nggamuha da manda pawai, dàngu jàka nggamuya napa na ma-kaleka-nya Nyuna.)

⁶⁵Hi nahili panii i Yehu, “Nuduya hi kiri peka-nggunggainya, ba nda haàtu-a ma-ngalangu pamai lai Nyungga, jàka nda na pa-kalongga-nya paraïna i Ama,” wànanja.

⁶⁶Piti welingu la rehi nu dadangu da papanau-na da ma-pambelingu welingu lai Nyuna, dàngu nda dabihu-apa patundu-nya Nyuna.

⁶⁷Ka paàra-nanjaka paraïna i Yehu da papanau-na da ma-hakambulu madua-da, “Màla nyimi, pa-mbelingu wàmimai dimi?” wànanja.

⁶⁸Tàka i Himungu Peturu, “Miri,” wàna, “lai nggamuipa malaku ningu?” wàna. “Na kareuku-mu Nyumu Miri jiaya na pa-ngalangu wàngu luri na ma-langatàka dàngu na ma-palupangu.

⁶⁹Nyuma duma mbàda wai-manyaka dàngu màndungu mana-nyaka la etima, ba jiakau Nyumu-maka ma-matua na papalewa-na i Ala,” wànanya.

⁷⁰Nanapa-ya i Yehu, “Ka nda tau ha-kambulu madua-akai ba kupindi-kai? Na nyuna ba tuna na haàtu la hongami, hetangu-ya,” wànanja.

⁷¹Nu napala-na i Yehu jiaya i Yundahu anana i Himungu Ihikariu. Nadu jiapa-kai ka haàtu pa-panaungu-ya i Yundahu la honga ha-kambulu madua papanau-na i Yehu, napa nyuna na-kaleka-nya i Yehu.