Read Kambera YUHANI 7 Bible Online

YUHANI 7 - Kambera bible

YUHANI 7

¹Hàlaka nu njada-nanyaka la Nggalilia i Yehu. Nda nabihu-a palua la tana Yundia, nadu ba wuku-danya pa-pameti-ya Nyuna paraï da liku uru Yahundi lai nu.

²Nu mareni-mana-nyaka na Lodu Remi Maü Ma-paraungu.

³Ka panii-danyaka i Yehu paraï da anguna paluhu, “Hadangu-wa weli yiahungu kau laku la Yundia, màtawa da paràma-mu ka daita-mbuha paraï papanau-mu.

⁴Nda ningua duna tau ma-kawiningu paràma-na, keha ka ku-kawulangu jàka wàna. Jàkau wundaha da matungu nu, nakada hàla-manya bàdi yia la pinu tana,” wàdanya. (

⁵Nadu da anguna paluhu wiki nda dapawai-mbu lai Nyuna.)

⁶“Ndedi rehi-ananya duku,” wànanja paraïna i Yehu, “tàka nyimi rehi mànu-maminya dimi.

⁷Nda jia karaü-ananggai eti paraïna yia na pinu tana. Tàka Nyungga karaü-manangga eti paraïna pinu tana, maa ba naingu panii-nggunya na pinu tana ba na-akatu na pawunda-na.

⁸Ilua meha bia duna nyimi la remi. Nda kulua-a Nyungga[16] ba ndedi rehi-ananya duku,” wànanja.

⁹Tuna nu napanii-nanja i Yehu da anguna paluhu, ka ndàdiku duna-nyaka Nyuna la Nggalilia.

¹⁰Ba taliu-daka nu palua la mbabu da anguna paluhu, laku kangunduhu meha-nanyaka i Yehu dàngu nda pi-nanya madangu.

¹¹Nu la mbabu himbu-madanya paraï da liku uru Yahundi, “Nggii-yaka Nyuna,” wàda ba dakàli paàrangu.

¹²Nadangu na tau na mapanii kangunguhu na rukuna Nyuna, “Tau hàmu maya,” wàna hawiangu. Tàka hawiangu, “Ndia-a, na panyonga tau dangu,” wàdanya.

¹³Na nyuna nda haàtu-a matoru mbeni papanii paloha-nya na rukuna Nyuna, paraï pa-mangàdatu-nja da liku uru Yahundi.

¹⁴Ba padua mbabu-yaka, tama-nanyaka i Yehu la Umana i Miri, hi na-papekangu tau.

¹⁵Dira hangàtaru-ha da liku uru Yahundi hi dapanii, “Nggiki hama biana ihu na tau yiana hi dira danguya na papina, tàka nda na-hakola-ai làti?” wàda.

¹⁶Nanapa-ya i Yehu, “Na pa-papekangu wànggu nda lii pa-pekangu-nggu Nyungga-aya, tàka lii papekangu-na Nyunaya duna na ma-palewa-ka.

¹⁷Na tau na ma-mbuhangu pakiku-nya na pambuha-na i Ala, napii-manya duna jàka welina lai Ala na lii pa-pekangu-nggu, jàka ndia hi welina la wikinggu.

¹⁸Na tau na ma-papeka wànya na lii pa-pekangu wikina keha-nanya na tembi la nduma wikina. Na nyuna na tau na makeha-nya na tembi ndumana na ma-palewa-ya, tau pa-deningu-maya, nda ningua duna kaputingu-na.

¹⁹Ka nda mbàda wua-ana-nggaiha nyimi i Muha da hupu liina i Ala? Tàka nda haàtu-a lai nyimi makiku-nja nuda. Ka nggikina ka pameti-ya hi wàmingga?” wànanja.

²⁰Nahema na tau dangu, “Katoba-munya ihu! Ka nggamu dumu ka pameti-ya na mawàna-nggau?” wàdanya.

²¹Nanapa-ya i Yehu, “Hau-ana na paràma na pawunda-nggu la lodu Hangahu, tàka hangàtaru-ma-aminya.

²²I Muha nawua-nggainya na kalaratu kàri — jiapa ka nda welina lai Muha-a nu na kàri, tàka welina la boku la mangilu duna ba ndedipa i Muha. Tuna nuduka, tàka hii kàrimbu tau nyimi la lodu Hangahu.

²³Jàkai wundaya nuna keha ka àmbu panggaya na kalaratu-na i Muha rukuna na kàri ba wàmi, ka nggikina nyimi hii mbeningga Nyungga rukuna ba ku-pahàmu hàlaya na ihi daana na tau la lodu Hangahu?

²⁴Àmbi ratanya ngerana na tau palata-nya la paita wàngu mata, tàka palata nimanya duna la mamola” wànanja.

²⁵Tunaka nu ninja da manda pirada da tau Yeruhali da mapanii, “Ka nda jiaya yiana yia na tau na pahimbu mànu ka pameti-ya ba wàda?

²⁶Tàngaru-ya wàngu eti pàku-ananya papanii la hangga madangu, tàka hi nda nggàra wàda bianya! Pi-mada-nyaka ihu da liku urunda, ba jiaya Nyuna ni na Hanganji Ma-pamànangu?

²⁷Na nyuna jàka namaiya nu na Hanganji Ma-pamànangu, nda haàtu-a duna mapinya jàka nggiya na ngia paweli-na. Tàka na tau yiana tapi bianya na ngia paweli-na,” wàda.

²⁸Tunaka nu, ba talànga pa-pekangu-na tau i Yehu la Umana i Miri, wara pa-kodungu-nanyaka, “Kai pingga dimi nyimi jàka nggamuka Nyungga, dàngu jàka nggiya na ngia paweli-nggu? Nda wàngu-nggunya eti wiki anggu duku ba kumai. Na maningu wai ngabangu la pa-palewa-ka, jiaya duna na ma-palewa-ka Nyungga, tàka na-padeningu-ma duna Nyuna. Tàka nyimi dimi ndai tanda-aya Nyuna.

²⁹Nyungga duku kutanda-maya Nyuna, ba welinggu lai Nyunadu, dàngu ba Nyunama na ma-palewa-ka Nyungga,” wànanja.

³⁰La rehi nu ka-tayàpa-ya i Yehu wàdaka làti, tàka nda ningua matoru mbeni pa-palua-nya lima, ba ndedi jiaya na rehina.

³¹Nadangu na tau la hongada nyuda da mapawai lai Nyuna, da mapanii, “jàka namaiya napa na Hanganji Ma-pamànangu, na-ngalangu-du ihu pawunda pa-hangàtarungu marihi dangu welingu la pawunda-na tau yiana?” wàda.

³²Mbàda rongu-nanyaka tau Parihi na panii kamemihu-na na tau dangu na rukuna i Yehu. Tuna nuduka, ba wàngu pa-hamangu-da dàngu da ratu pangora da palewa-ha da tau madai la Umana i Miri palua payàpa-ya i Yehu.

³³Napanii i Yehu la tau dangu la Umana i Miri, “Nda pira-anapa ba ningga la pahiku la hongami. Hàlaka nu beli-nggunyaka duku napa la Ma-palewa-ka.

³⁴Napa nyimi ihimbuka Nyungga, tàka ndai hunggu-aka; nadu ba nda peku tàka-ami la ngia paningga,” wànanja.

³⁵Ka panii-danyaka dàngga anguda da liku uru Yahundi, “Nggi nalaku ningu ihu na tau yiana hi nda peku hunggu-ndanya? Lua toma-naha da tau Yahundi la tana hau nanggara la honga tau Yunani ihu, pa-papekangu tau Yunani?

³⁶Nggàraya ihu na pawuku-na la paniina, ba nda tahunggu-aya napa ba tahimbu-ya Nyuna, dàngu ba nda ta-ngalangu-a patàka la ngia paninya Nyuna?” wàda.

³⁷La lodu njàpuna na mbabu, nu na lodu ma-paihikungu halawàla, ndolaku-nanyaka i Yehu la Umana i Miri hi nawara, “Na tau mamadau màtawa ka namai lai Nyungga, ka na-ngunungu.

³⁸“Jàka jia-yaka na tau mapawai lai Nyungga, ninya na pa-tulihu la Huratu Matua: ‘Weli dalungu la etina da-lulungu-ha da lukuna na wai paluri wàngu,’ ba wàna,” wàna.[17] (

³⁹Nu i Yehu panii wànanya na Ngahuna i Ala, na pangala-da napa da tau mapawai lai Nyuna. Nadu la rehi nu ndedi pa-wuangu-aya na Ngahuna i Ala; ba ndedi pa-bunjuku-duyapa i Yehu wàngu metina.)

⁴⁰Nadangu na tau na marongu-ya na paniina i Yehu, nu la hongada nyuda ningu mapanii, “Jia langatàka-mayaka na Wunangu[18] na tau yiana!” wàda.

⁴¹Hawiangui duda, “Jiaya yiana na Hanganji Ma-pamànangu-maka!” wàda. Tàka ningumai mapanii, “Màlaka, jia welina la Nggalilia-kaka nu na Hanganji Ma-pamànangu?

⁴²Hi ninya na pa-tulihu la Huratu Matua, ba wàlana i Ndautu-ya duna na Hanganji Ma-pamànangu, dàngu napa namaiya welingu la Mbetulehimu duna, nu na kotaku talora-na i Ndautu,” wàda.

⁴³Hupu hàla luana ka pa-lumungu-danyaka da tau rukuna i Yehu.

⁴⁴Ningu ma-mbuhangu payàpa-ya, tàka nda haàtu-a ma-palua-nya lima.

⁴⁵Ba dabeli-ka da tau da madaiya na Umana i Miri nu da papalewa palua payàpa-ya i Yehu, paàra-danjaka paraï da ratu pangora dàngu da tau Parihi, “Ka nggikina hi ndai ngàndi memaya nàmu?” wàdanja.

⁴⁶Dahema da tau madai, “Ai ha, ndedi ninguma tau mapanii hama tuna Nyuna!” wàda.

⁴⁷Danapa-ha da tau Parihi, “Ka mbàda panyonga-mbuna-nggaika nyimi?” wàdanja.

⁴⁸Ka ningu nu liku urunda dàngu tau Parihi mapawai lai Nyuna?

⁴⁹Tàka yia na tau dangu, nda dapi-anya na ukuna i Muha, jiapa-kai ka nggi - nggikida, pambàda ràtungu-mahaka duda,” wàdanja.

⁵⁰Na haàtu la hongada nu da tau Parihi jiaya i Nikundemu, nu na mambàda mai àmangu lai Yehu. Napanii i Nikundemu la tau Parihi hawiangu,

⁵¹“Pa-namatu-nya na uku nda peku-ana la pahuku-nya na haàtu tau jàka ndedima parongu-ya na palakara-na dàngu jàka ndedi pa-pareha-ya na pawunda-na,” wànanja.

⁵²“Ka welimu la Nggalilia-mbui dumu nyumu?” wàdanya i Nikundemu. “Ma-nginjiru biaya la Huratu Matua! Napa kau itaya ba nda ningua wunangu ma-pawelingu[19] la Nggalilia,” wàdanya. [

⁵³Hàlaka nu beli ndàba-nanyaka la uma na tau.