Read Kambera YUHANI 8 Bible Online

YUHANI 8 - Kambera bible

YUHANI 8

¹Tàka i Yehu laku-nanyaka la Tandula Haitungu.

²Hadangu la mbaru hili lua-nanyaka la Umana i Miri, nadangu na tau na mamai lai Nyuna. Ka mandapu-nanyaka i Yehu hi na-papeka-nja.

³Nu ba tuna tàka-danyaka da ngguru anggama dàngu da tau Parihi, da mangàndi-nya haàtu tau kawini na pa-tomangu la njuraku. Da-paràha-nya nu na kawini pa-ndolaku la padua,

⁴hi dapanii-nya i Yehu, “Umbu Ngguru,” wàda, “yia na kawini pa-tomangu-ya ba na-njuraku.

⁵La ukuna i Muha ninya na kalaratu, na kawini tungu yia nàhaku-nya watuma bàdi ka lundu nameti. Màla nàhu nggikina wàmuka Nyumu Umbu Ngguru?” wàdanya.

⁶Hi kiri paàra tudanya nu ka ta-kahili wànya, ka peku panjala-ndanya wàda. Tàka karuduku bia-nanya duna i Yehu, hi na-tulihu wàngu wua limana la tana.

⁷Ba dada - dàhiku-yaka pawula-nanyaka hi napanii-nja, “Na tau manda ningu njalangu la hongami nyimi, màtawa ka na-mangilu pa-nàhaku-nya watu nana na kawini,” wànanja.

⁸Hàlaka nu karuduku beli-nanyaka i Yehu, hi nahili tulihu la tana.

⁹Ba darongu-yaka panii tuna nu i Yehu, yilangu mara haàtu - haàtungu danyaka welingu lai nu piti welingu la mama-aya. Ka lundu didi-kiyaka i Yehu lai nu dàngu na kawini ba jiapa-ya ndolaku-na la pangia-na.

¹⁰Ka pawula-nanyaka i Yehu hi napanii-nya na kawini, “Nggini-haka nyuda mbuu ndàbada? Ka nda ningua mahuku-nggau?” wànanya.

¹¹“Nda ningua Umbu,” wàna na hemana. “Hàmu,” wàna i Yehu. “Nyungga nda kuhuku-mbunggau. Beliwa nàhu, àmbu hili wunda-dupa manjala,” wànanya.][20]

¹²Nahili panii i Yehu la tau dangu, “Nyungga hambila pinu tanaka wàna. Na tau makiku-ngga Nyungga nda jia liana la kapàtangu, tàka namangu-nya na hambila luri,” wàna.

¹³Tàka da tau Parihi, “Nàhu hakahiingu-munya wikimu,” wàda, “Nda na-padeningu-a na pa-hakahii-mu,” wàdanya.

¹⁴Nanapa-ya i Yehu, “Jiapa-kai ka hakahiingu-nggunya wikinggu, na-padeningu-ma duku na pa-hakahiingu-nggu; nadu ba kupi-manya duku na ngia paweli-nggu dàngu na ngia pa-hanggangu-nggu. Nyimi ndai pianya na ngia paweli-nggu dàngu na ngia pa-hanggangu-nggu.

¹⁵Nyimi bai patanda-nya ngerana na tau, pa-namatu-minya na huri toluma-a; Nyungga duku nda haàtu-a pa-patanda-nggu ngerana.

¹⁶Na nyuna ngera hama tuna jàka pa-tandangu-nggunya ngera tau, namola-ma duku na rata-nggunya, ba nda didi meha-aka; i Ama na ma-palewa-ka naangu-mangga duku.

¹⁷Ba tuna yia na pa-tulihu la Ukuna i Muha: Na pa-hakahiingu na ma-padeningu, jiaya na pa-hakahiingu-da da tau madua wàna.

¹⁸Da ma-hakahii-nya na wikinggu dadua — Nyungga dàngu i Ama na ma-palewa-ka,” wànanja.

¹⁹Tàka nyuda, “Ka ngginiya na Amamu?” wàdanya. Nanapa-ya i Yehu, “Ndai tanda-aka Nyungga, hamanai na Amanggu ndai tanda-mbuya. Ngera hama tuna jàkai tandaka làti, jiangu-ma bai tanda-mbuya na Amanggu,” wànanja.

²⁰Mbuu ndàbada nuda napanii-ha i Yehu, ba na-papekangu la Uma Ala la lihida da pàti hunggu maraku. Tàka nda haàtu-a mayàpa-ya ba ndedi jia-aya na rehina.

²¹Nahili paniinja nyuda i Yehu, “Napa kulaku, tàka nyimi hii himbuka, na nyuna napa imeti ngàndi njalami nyimi. La ngia palaku-nggu Nyungga, ndai ngalangu-a patàka nyimi lai nu,” wànanja.

²²Ka panii-danyaka da liku uru Yahundi “Ka kuhuda wikinggu jàka wàna bia, hi napanii, ‘La ngia palaku-nggu Nyungga, ndai ngalangu-a patàka nyimi lai nu’ hi kiri wàna,” wàda.

²³Hi napanii-nja nyuda i Yehu, “Nyimi dimi weli wawami; tàka Nyungga duku weli ditanggu. Nyimi welimi la pinu tana; Nyungga nda welinggu la pinu tana-a.

²⁴Tuna nuduka hi kiri paniinggu, napa imeti ngàndiha da njalami ba wànggunggai. Dàngu langatàka-ma bai meti ngàndi-maha napa da njalami, jàka ndai waiya ba jiaka ‘Nyungga-maka daa na patiki NYUNGGA NINGGA’[21] ba wàna,” wànanja.

²⁵“Nggamu langatàka kau dumu Nyumu?” wàda na paàra-danya. Nanapa-ya i Yehu, “Ka nggàra lingu-naka hi kuhili panii dànggai nyimi,”[22] wànanja.

²⁶Nadangu-mapa làti na rukumi nyimi na papanii wàngu dàngu na pa-patandangu wàngukai. Tàka Nyuna nu na ma-palewa-ka Nyungga pa-monungu-maya duna. Nyungga duku kupeka-nya na pinu tana na parongu-nggu lai Nyuna,” wànanja.

²⁷Nda dapi-anya ba jiaya na rukuna i Ama na papanii-nanja.

²⁸Tuna nuduka hi napanii-nja paraïna i Yehu, “Napa jàkai pajangga-yaka na Ana Tau, hina-duka hii pinya ba jiaka ‘Nyungga-maka daa na, patiki, NYUNGGA NINGGA’ ba wàna, dàngu hii pinya ba nda nggàra-a pawunda-nggu wàngu eti wikinggu. Jiaya na pa-papeka-nangga i Ama-ma-a duku na papanii-nggu.

²⁹Tàka nu na Ma-palewa-ka angu-manangga. Ndedi na handàkangu-ma papuli mehangga, nadu ba wunda mànu-manggunya na maliya na etina,” wànanja.

³⁰Ba napanii hàla-haka nuda i Yehu, nadangu na tau na mapawai lai Nyuna.

³¹Tunaka nu panii-nanyaka i Yehu la tau Yahundi da mambàda pawai lai Nyuna, “Jàkai luri nunjuya na pa-pekangu-nggu, nu papanau langatàka-nggunggaika,

³²Tàka hii tandaya i Ala ma-padeningu, dàngu rukuna nu hi pa-marandeka-kai,” wànanja.

³³Danapa-ha nyuda, “Nyuma yia ana umbuku-na i Ambarahàmu-kama. Ndedi handàkangu-ma duma ba na ata-nggama tau! Nggàraya nu na pawuku-mu, ‘Napa pa-pamarandeka-kai,’ ba wàmu?” wàdanya.

³⁴Nanapa-ya i Yehu, “Langatàka ma-deningu-maya yiana na paninggu,” wànanja. “Da tau da mawunda njala, ata njala-maha.

³⁵Tàka na haàtu ata nda jia pa-daingu lupa-ana la kuru uma, tàka na ana jiaya duna na mapadai pangalangu la kuru uma.

³⁶Tuna nuduka, jàka na-pamarandeka-kai paraïna i Ana, marandeka langatàka-dimi-nyaka.

³⁷Kupii-manggai ba ana umbuku-na i Ambarahàmu-kai. Tàka ba tuna, ka ta-pameti-ya wàmi biangga, rukuna ba ndai bihu pa-kataku-ya na lii papekangu-nggu.

³⁸Na paita-nggu la Amanggu, jiaya duku na papanii-nggu. Tàka nyimi dimi miwunda-ya na pa-papeka-nanggai amami,” wànanja.

³⁹Danapa-ha nyuda, “I Ambarahàmu jiaya na amama,” wàdanya. Tàka i Yehu, “Jàka langatàka ba anana i Ambarahàmu-kai, jiangu-ma bai wundaha[23] làti da pawunda-na i Ambarahàmu.

⁴⁰Nyungga duku ku-patàka-nggainya na ma-deningu na parongu-nggu welingu lai Ala, tàka nyimi ka pameti-ya wàminggai. Nda nawunda-a duna matungu nu i Ambarahàmu!

⁴¹Nyimi dimi, wunda-minya na pawunda ama wiki-mami,” wànanja. Danapa-ha nyuda, “Nda ana wuku rumba-akama duma. Na Amama haàtu-ma-ana, nu i Ala,” wàdanya.

⁴²Tàka i Yehu, “Jàka Ama-minya làti i Ala, jiangu-ma làti bai mbuhangga, maa ba welinggu lai Aladu. Nda wàngu eti-anggu duku ba kumai, Nyuna duna na ma-palewa-ka.

⁴³Nggikina hi ndai jàngapu-ya na paniinggu? Maa ba ndai torungu-du parongu-ya na pa-pekangu-nggu.

⁴⁴Jiaya i Kambàliku duna na amami, tàka nyimi imbuhangu pakiku-nya na pambuha-na na amami. Weli mulangu-maka ba ma-pameti tauya i Kambàliku. Ndedima duna napalai kariangu ma-padeningu, maa ba nda ningua pa-deningu-na nyuna. Jàka na kambàliku, ràka-mana, maa ba tuna numaka na hurina. Ma-kambàliku-ya nyuna dàngu ngia paweli ndàbana na kambàliku-ya.

⁴⁵Tàka Nyungga duku panii-nggunya na ma-padeningu, tuna nuduka hi ndai pawai lai Nyungga.

⁴⁶Nggamuya nu la hongami nyimi nàhu na ma-ngalangu papeka mbuti ba ningu njalanggu Nyungga? Jàka kupanii-ya na ma-padeningu, ka nggikina hi ndai pawai lai Nyungga?

⁴⁷Na tau na maweli-na lai Ala, na-patingi-nja da puluna i Ala. Tàka nyimi nda welimi lai Ala-a, tuna nuduka hi ndai bihu pa-patingingu,” wànanja.

⁴⁸Nu ka hema-danyaka i Yehu paraï da tau Yahundi, “Ka manda tubangu-ya nu, tau Hamaria pa-huruku wàndiya Nyuna ba wàmanggau?” wàdanya.

⁴⁹Nanapa-ya i Yehu, “Nda huruku-nangga wàndia. Tembi-nggunya na Amanggu duku, tàka nyimi paaka bia-mingga, wàna ba nahema-ha.

⁵⁰Nyungga duku, keha ka natembi-ka tau nda wànggua, Ninya na haàtu duna na mawuku-ya, keha ka natembi-ya tau ba wànangga, dàngu Nyunama na ma-patandangu ngera.

⁵¹Langatàka ba ma-deningu-maya yiana na paniinggu, na tau na manunju-ya na paniinggu, nda jia meti-ana lundu nu - nu,” wànanja.

⁵²Tàka hi dapanii da tau Yahundi, “Pi-manggauka nàhu ba huruku langatàka-mananggau wàndi. I Ambarahàmu duna mbàda meti-naka, hamangui da wunangu-ka mbuu ndàbada. Tàka nyumu, ‘Nda nameti-a lundu nu - nu, na tau na manunju-ya na paniinggu, wamui,’ wàdanya i Yehu.

⁵³Jàka mbàda meti-naka i Ambarahàmu, dàngu da wunangu-ka mbuu ndàbada, ka nggàra-makauka Nyumu na? Jia rihi-munya-kaka pa-bokulu i Ambarahàmu na amama?” wàdanya.

⁵⁴Nanapa-ya i Yehu, “Keha ka natembi-ka tau jàka wànggu làti, nda ningua linguna nu natembi-nangga tau. Ka ba jiaya na Amanggu duku na matembi-ka nu na Alanda ba wàmi nyimi.

⁵⁵tàka hi ndai tanda biayai. Tàka Nyungga kutanda-maya duku. Ngera hama tuna, nda kutanda-aya jàka jia wànggu bia, ma-kambàliku-dukaka nu, hama tuna nyimi. Kutanda-maya duku Nyuna dàngu hi kununju-ya na paniina.

⁵⁶Dira hàmuya na etina i Ambarahàmu na amami, ita-ki-nggunyaka duku napa na loduna ba wànangga. Tàka mbàda ita-mana-nyaka hi dira hàmuya na etina!” wànanja.

⁵⁷Ka panii-danyaka da tau Yahundi, “Ndedi lima kambulu mbuna na ndaungu lurimu, mbàda ita bia-munya i Ambarahàmu?”[24] wàdanya i Yehu.

⁵⁸Nanapa-ya i Yehu, “Langatàka ka kupeka-nggai: ba ndedi nadedi i Ambarahàmu, hi mbàda ni-manggaka duku,” wànanja.

⁵⁹Nu ka piti-madua-danyaka watu da tau Yahundi ka ta-nàhaku-nya ba wàda; tàka hi na-pahangindingu wikina i Yehu, hi namangu paluhu welingu la Umana i Miri.