Read Kambera YUHANI 9 Bible Online

YUHANI 9 - Kambera bible

YUHANI 9

¹Nu ba talànga lakuna i Yehu, naita-ya na haàtu tau na mapoki welingu la kambu.

²Ka paàra-danyaka i Yehu paraï da papanau-na, “Màla Umbu Ngguru, ka nggikina duna na tau yiana hi nadedi mangu pokingu? Ruku njala wiki-mana ihu jàka ndia ruku njala inana amana?” wàdanya.

³Nanapa-ya i Yehu, “Nda ruku njala wiki-ana dàngu nda ruku njala ina ama-mbuna hi kiri pokina, tàka màta ka peku ita-nanya tau na paràma-na na mbihana i Ala lai nyuna.

⁴Ba naharii-ipa, taràma-maha bàdi da paràma-na Nyuna na ma-palewa-ka Nyungga. Maa ba nàmunya na rudungu, hi nda peku ràma-anapa na tau.

⁵Ba ninggapa la pinu tana, jiaka Nyungga paharii wàna na pinu tana,” wànanja.

⁶Ba nahàla-ka papanii tuna nu, pangànji-nanyaka la tana i Yehu, hi na-haüru-nya tana na wai pangànji-na. Hàlaka nu hi naperi-nya nuna na tana la wua matana nuna na tau,

⁷hi napanii-nya, “Luawa kau baha matamu la Ngia Paihu Hiluamu,” wànanya. (Hiluamu ba wàna na ‘Papalewa’ wànda la hilunda.) Ka laku-nanyaka pabaha matana nuna na tau. Ba nabeli-yaka, mbàda ita-naka.

⁸Da angu kotaku-na dàngu da tau matanda-ya ba nakarai pa-ndemangu, dapanii ndàba, “Ka nda jiaya yia na tau na makàli mandapu ba nakarai pandemangu?” wàda.

⁹“Jia-mayaka” wàda hawiangu. Tàka hawiangui, “Ndia-a, nda jia-aya pahama mata-adanya,” wàda. Tàka napanii wikina nuna na tau, “Jia-makaka,” wàna.

¹⁰“Nggiki hama biana hi jia ita biamu?” wàdanya.

¹¹Nanapa-ya nyuna, “Na tau na ma tamungu Yehu, na-uraku hakudu kapihaku, hi naperi-nja da wua matanggu. ‘Luawa kau baha matamu la Ngia Paihu Hiluamu,’ wànangga. Tàka hi kulaku. Tàka nu ba kubaha-ka matanggu, peku ita-ngguka,” wàna.

¹²“Nggiya nu na tau?” wàda na paàra-danya. “Nda kupi-anya,” wàna ba nahema.

¹³Nu lodu Hangahu-ya ba jiaya na-haüru-nanya tana na wai pangànji-na i Yehu pa-pabula wànja da matana nu na tau mapoki. Tàka nu na tau na mapoki da-karia-nya la tau Parihi.

¹⁵Da-paàra-mbunya paraï da tau Parihi jàka nggiki hama biana hi kiri itana. Nanapa-ya nyuna, “Natunja kapihaku da wua matanggu hàla hi kubaha-ha tàka hi kuita,” wànanja.

¹⁶Dapanii hawiangu da tau Parihi, “Nda jia welina lai Ala-a nu na tau na mawunda-ya yiana, maa ba nda na-wàrihu-duya na lodu Hangahu,” wàda. Tàka dapanii hawiangu, “Nggiki hama pekuna-kaka na tau na manjala pawunda-ha da pa-hangàtarungu tungu yia?” wàdai. Ka tumbu-duna-nyaka na pahili kanandingu dua wikida.

¹⁷Ka hili paàra-danyaka nuna na tau paraï da tau Parihi, “Màla nggikina wàmuka nyumu rukuna nu na tau na ma-pamàlaru-kau hi peku itamu?” wàdanya. “Wunangu-ya, wànggu,” wàna nu na tau.

¹⁸Tàka da liku uru Yahundi, nda dawai-aya ba napoki làti hi na-pabulangu nàhu. Tuna nuduka hi dapaau-nja da inana da amana,

¹⁹hi da-paàra-nja, “Deningu-na dimi ba jiaya na anami yiana na madedi ngàndi pokina ba wàmi? Nggiki hama biana hi naita nàhu?” wàdanja.

²⁰Dahema da inana da amana, “Deningu-mana, jia-maya duma yiana na anama; dàngu poki welina ba nadedi-maka.

²¹Tàka jàka nggiki hamana hi jia ita biana nàhu, nda mapi-anya duma. Dàngu jàka nggamu ma-pamàlaru-ya hi naita, nda mapi-mbunya. Paàra bianya nyuna, ba matua-madu-nanyaka; peku hema wiki-mana duna,” wàda.

²²Hi kiri panii tuda nu da inana da amana, mangàdatu-danja da liku uru Yahundi; nadu ba mbàda pa-hamangu-madaka, na tau na mapeka ba Hanganji Ma-pamànangu-ya i Yehu, àmbu natama-dupa la uma bungguru, mbàda wàda-maka.

²³Tuna nuduka hi kiri paniida da inana da amana nu na tau, “Matua-mana-nyaka; paàra bianya nyuna,” hi kiri wàda.

²⁴Ka hili paau-danyaka na tau na mapoki la wungana, hi dapanii-nya, “Harangu-wa nàhu bau wàngu ma-padeningu la kareuku-mu taï. Mapi-manya ba tau njalaya nuna na tau,” wàdanya.

²⁵“Jàka nanjala jàka ndia, nda kupi-anya duku,” wàna na hemana nuna na tau. “Na nyuna hangia-na na papinggu; làti kupoki, tàka nàhu kuita-ka,” wànanja.

²⁶Ka hili paàra-danyaka nuna na tau, “Wàngu panggiki-nanggau? Nggiki bia-nanja da matamu hiu ita,” wàdanya.

²⁷Nahema nu na tau, “Mbàda panii-madu-nggunggai-nyaka, tàka ndai bihua parongu. Ka nggikina hii hili mbuhangu parongu-ya nàhu? Ka mbuhangu-minya ihu panjadi papanau-mbuna?” wànanja.

²⁸Ka pa-iraku-danyaka hi dapanii, “Nyumuka dumu ka papanau-nanggau; nyuma duma ndia-a. Papanau-na i Muha-kama duma.

²⁹Mapii-manya ba mbàda panii-naka i Ala lai Muha. Tàka na tau nuna, nda mapi-anya jàka nggi ngia paweli-na,” wàdanya.

³⁰Nahema nu na tau, “Ai, ku-hangàtaru-nggai nyimi yia ba ndai pinya na ngia paweli-na, tàka hi mbàda pahàmu pàku-nangga hi kuita.

³¹Tapi-manya ba nda narongu niaya na tau njala duna i Miri, mbulungu-ana na tau na matembi-ya i Ala dàngu na ma-pahàra-nya na pambuha-na.

³²Weli mulangu ndedi parongu-a ba ningu tau ma-pahàmu mata tau madedi poki hi naita.

³³Jàka nda welina lai Ala na tau nuna, nda ana nggàra-a pawunda-na,” wàna.

³⁴Tàka nyuda, “Nggàra wàmu?” wàda. “Yii nyumu pàku naa ma bundungu njalamu piti welingu bau dedi, ka ku-papeka-nja wàmu-nggamaka nu?” wàdanya. Nu ba tuna piti welingu la rehi nu dahiri-nya nyuna patama la uma bungguru.

³⁵Ka rongu-nanyaka i Yehu ba mbàda hàpi-danyaka na tau nuna welingu la uma bungguru. Ka himbu-nanyaka hi napanii-nya, “Uwai-duya na Ana Tau?” wànanya.

³⁶Nahema nu na tau, “Nggamuya nu, Umbu? Peka àru-ngganya làti Umbu ka kuwaiya,” wànanya.

³⁷Nanapa-ya i Yehu, “Mbàda ita mamu-nyaka. Jiaya Nyuna-maka na mapanii-danggau nàhu,” wànanya.

³⁸“Kupawai-ma duku ou Miri,” wàna nu na tau, hi na-marubuku la hanggana i Yehu.

³⁹Tàka i Yehu, “Namainggu la pinu tana yiana jiaya la pa-patandangu ngera; màtawa na tau na mapoki ka naita, tàka na tau na maita ka napoki,” wàna.

⁴⁰Da tau Parihi da manda pirada lai nu darongu-ya ba panii tuna nu i Yehu, ka paàra-danyaka, “Dapoki-mbu nyuda wàmu-nggamaka nu?” wàdanya.

⁴¹Nahema i Yehu, “Ngera hama tuna jàka poki-minya làti, nda ningua njalami. Na nyuna rukuna na paniimi, ‘Maita-ma duma’ ba wàmi pa-daingu dimi-nyapa la njala,” wànanja.