Read Kambera NA RUKUDA DA PA-PAHURUNGU 1 Bible Online

NA RUKUDA DA PA-PAHURUNGU 1 - Kambera bible

NA RUKUDA DA PA-PAHURUNGU 1

¹Teupilu ma-manggàna, Na mbukunggu la kawunga-na ku-wàlahu hàla-nggaunya na pa-paloku-na dàngu na pa-ajaru-na i Yehu, piti welingu ba hina na-pakiri-nya na paràma-na,

²lupa tomaya na lodu padita-ya Nyuna la awangu. Ba ndedi nadita-ya la awangu, wànya na kuaha-na na Ngahuna i Ala nawua-nja lii panaungu da pa-pahurungu da papindi-na.

³La hambeli metina, patu kambulu loduna mandaina ba nakàli paita kamiripungu wikina la pa-pahurungu, hi dapinya ba luri langatàka-mananya. Daita-maya Nyuna, dàngu napanii dàmanja nyuda jàka nggi - nggikina i Ala ba na-pareta ba Hanganji-ya.

⁴Dàngu ba jiaya na-pauhi dànanja nyuda,[1] nawua-nja pareta, “Àmbi yilangu-du welingu la Yeruhali. Patiangu lai nu ka lupa nawua-nggai i Ama na pambàda ràndina, nu na pambàda peka-nggunggai nyimi àmangu.

⁵Nadu i Yuhani ba na-parunungu wàngu wai, tàka nda nggi mandai-anapa pa-parunungu-kai nyimi wàngu Ngahuna i Ala,” wànanja.

⁶Ba jiaya na pauhi-da da pa-pahurungu dàngu i Yehu, paàra-danyaka, “Miri, pahada beli-munya nàhu na Pareta la banjaru Ihirailu?” wàdanya.

⁷Nahema i Yehu, “I Ama wikima duna na ma-kawuku-ya na loduna dàngu na rehina. Nuna nda papimi nyimi-aya dimi, nadu nuna ba hàkuna i Amaya duna.

⁸Ba tuna napa mi-ngalangu nyimi kuaha, jàka natàka-nggaika Ngahuna i Ala. Dàngu nyimika napa matanggu hakahii-ngga la Yeruhali, la pa-nggubulu Yundia, la Hamaria dàngu lupa la hupu tana,” wànanja.

⁹Ba nahàla-ka papanii tuna nu i Yehu, pa-padita-yaka Nyuna la awangu la hangga matada nyuda, tàka na karumangu na-panggàbalu-nya Nyuna welingu la peku ita-danya.

¹⁰Ba talànga tangara-idapa la awangu, ba padita-ya i Yehu, hi jia ni bianja da tau madua da mapaki mabara da ma-ndolaku la lihida nyuda,

¹¹“Ha tau Nggalilia,” wàda nuda da tau madua, “nggikina hi mi-ndumuru-padua lai hiana bai tangara la awangu? I Yehu na paita-mi ba nadita la awangu la hanggami nyimi, napa tuna numai ba hili nàmu belinya, hama tuna na paita-mi ni kawai,” wàdanja.

¹²Tunaka nu beli-danyaka da pa-pahurungu la Yeruhali welingu la Palindi Haitungu. Nuna na palindi ràkangu hau kilu marauna welingu la Yeruhali.

¹³La Yeruhali dalaku la uma ngia patodu-da, hi dahei la kurungu mangia dita. Da pa-pahurungu ba wànda, jia-duhaka: i Peturu dàngu i Yuhani, i Yakombu dàngu i Andaria, i Pilipu dàngu i Tomahu, i Mbàratolumiu dàngu i Matiu, i Yakombu anana i Àlapiu, i Himungu Kahiri paraingu dàngu i Yundahu anana i Yakombu;

¹⁴mbuu ndàbada hau eti mànu-maha ba da-pauhi la pa-hamayangu. Nu ba da-hamayangu angu ndàba-mada da tau kawini, nimbunya i Maria inana i Yehu, dàngu lupa da angu dedina i Yehu.

¹⁵La hau lodu, ba talànga pauhi-da — ràkangu tau hangahu dua kambulu-ya na maninya — hadangu-nanyaka i Peturu pa-kareuku. Napanii,

¹⁶“Angu dedi! Nggàraya na pa-tulihu la Huratu Matua jiangu-ma bàdi na-patutungu. Àmangu la ngaruna i Ndautu, mbàda nyura-nanyaka paraïna na Ngahuna i Ala na rukuna i Yundahu, na mairu ngàndiya na tau payàpa-ya i Yehu.

¹⁷I Yundahu haàtu angunda nyutaya, dàngu papindi-mbuyaka pa-kikungu la paràma angunda nyuta,” wàna. (

¹⁸Nyuna nu i Yundahu ninguka tana pangia retina wilina na wunda kaleka-na na ma-akatu. Nyuna na-kanabu, hi nameti ba nawàngu pa-tambàriku na kambuna hi na-hàbaru ndàbanya na ihi kambuna.

¹⁹Mbuu ndàbana na tau na ma-ngiangu la Yeruhali napi hàlanya na rukuna nuna. Nuya na pakiri-na na tana nuna Akilundama, hi wàdanya la hiluda nyuda, ‘Tana Ria,’ wàna-duka la hilunda nyuta.)

²⁰“Nadu la Huratu Ludu Pamalangungu ninya na pa-tulihu, ‘Màtawa na ngia pa-ngiangu-na ka na-malinggitu; àmbu hili ningu-dupa ma-ngiangu lai nu,’ wàna. Nimbunya ba tuna yia na pa-tulihu, ‘Màtawa na mandapu-na ka napiti-ya tau haàtu,’ wàna.

²¹Jiaya nu, ningu bàdi haàtu na ma-karia mànunda nyuta na ma-hakahii, ba mbàda luri beli-naka i Miri Yehu welingu la meti. Na tau nuna màta ka jiaya la hongada da tau da ma-karia mànunda ba takiku-nya i Miri Yehu la nggi - nggini, piti welingu ba na-pakiringu pa-parunungu i Yuhani[2] lupa tomaya na rehi padita-ya la awangu i Yehu welingu la padua-nda nyuta,” wàna.

²³Nu da tau da mamàtu datuha la ngaba da tau madua, i Yuhupu, i Mbàrahamba wàda-mbunya (dàngu i Yutuhu kàli wàda-mbunya), dàngu i Matia.

²⁴Ka hamayangu-danyaka, “Miri, Nyumu mupinya na etina na tau mbuu ndàbana. I Yundahu na-kanabu-ka welingu la wai ngaba ba pa-pahurungu-ya dàngu mbàda metina-ka. Jia-duya patuji-nggama-wa, nggamu welingu yiada da tau madua na papindi-mu na pa-wuangu wai ngera hiluna i Yundahu,” wàda.

²⁶Hàlaka nu tu-danjaka la undi da tamuda nuda da madua, hi nanggàna-ya i Matia. Ka nyunaka na pawotu la pa-pahurungu, anguda da tau hakambulu haàtu da pa-pahurungu hawiangu.