Read Kambera NA RUKUDA DA PA-PAHURUNGU 10 Bible Online

NA RUKUDA DA PA-PAHURUNGU 10 - Kambera bible

NA RUKUDA DA PA-PAHURUNGU 10

¹La Kaiharia ninya haàtu-na na tau mini, na ma-tamungu Koruneliu. Nyuna jiaya na kàpatengu-da da tanatara “kalibaru Italia”.

²Nyuna tau mangàdatu lai Alaya hamanai nggubulu ndàbada da tau la kuru umana dalumu-nya i Ala. Dangu tau Yahundi mamila pandula-na nyuna dàngu hamayangu mànu-mananya duna lai Ala.

³La hau lodu ràkangu njàmu tailu-yaka la maringu lodu i Koruneliu naita lohanya la harii mata na haàtu papalewa-na i Ala na mamai lai nyuna hi napanii dànya, “Koruneliu” wànanya.

⁴I Koruneliu na-kanàndaru-ya na papalewa dàngu mangàdatu-na, “Nggàraya Miri?” hi wàna. Nahema na papalewa, “Na hamayangu-mu dàngu na màjangu etimu na-kataku-yaka paraïna i Ala dàngu i Ala nanamu-makau.

⁵Nàhu paràhangu-wa tau la Yopi kau paaunya i Himungu, i Himungu Peturu-ya jàka tiki ndàbaya na tamuna.

⁶Nyuna toduna la umana i Himungu, na mandongu manulangu, na ma-ngiangu la hingi wara,” wànanya.

⁷Ba nalaku-ka na papalewa na mapanii dànya i Koruneliu, paau-nanjaka da atana da tau madua, dàngu haàtu tanatara makàli karaha-ya na ma-manundu.

⁸I Koruneliu na-wàlahu-nja jàka nggàraya na matumbu kawai, hi na-paràha-nja palua la Yopi.

⁹Hadangu harii, ba la ànda-ihapa dàngu ba mareni-danyaka la Yopi, hei-nanyaka i Peturu la uma dita pa-hamayangu.

¹⁰Lalu manjiuya hi na-patikingu pangangu. Ba talànga paloku-daka pangangu, ninguka paita-na la harii mata.

¹¹Naita-ya na awangu na ma-tawanggahu dàngu ninya ba hama hinggi mbàlaru-ya na pa-dulurungu la pinu tana, pa-kawuku-ha da patu mbua kabihu-na.

¹²Nu daa màtu ndàbada da banda kapatu mbungungu wihi, da banda da mabei dàngu da ma-hawurungu matàmba.

¹³Ka ninguka lii matàka-nya, “Peturu, hadangu! Rupuwa kau ngangu!” wànanya.

¹⁴Nahema i Peturu, “Ndia-a Miri! Ndedi ku-handàkangu-ma duku pangangu ngga - nggàra manda hida dàngu ma-iraku,” wàna.

¹⁵Tàka na lii nuna hilu panii-mananyai, “Nggàraya na mauku ba wàna i Ala, àmbu hilu panda ukuhai dumu nyumu,” wànanya.

¹⁶Nuna na harii mata na-pandailu wundangu pawuwa, tunaka nu dita-nanyaka duna nuna na hinggi la awangu.

¹⁷Mbingu-nanyaka i Peturu ba na-pangàda-nya àndana nuna na harii mata. Ba talànga pangàda - ngàda-nanyaka nu, da tau papalewa-na i Koruneliu hunggu-danyaka na umana i Himungu dàngu ni-manjaka la ngaru pindu.

¹⁸Ka paaungu-danyaka tau hi da-paàrangu, “Màla ninya yiahu na ariyaa na matodu, na ma-tamungu Himungu Peturu?” wàda.

¹⁹Ba talànga pangàda-mana-nyapa nu i Peturu na àndana na paita-na, na Ngahuna i Ala napuru pekanya, “Ha Peturu, ninja da tau madua haàtu[12] da mahimbu-kau.

²⁰Puru parenggangu hu waa dàngu àmbu kanodaru-du palaku karia-nja, nadu ba nyunggama mapalewa-ha,” wànanya.

²¹Ka puru-nanyaka i Peturu hi napanii dànja nuda da tau, “Jiaka nyungga-maka pahimbu-mi. Nggàra maimi nu angu dedi?” wànanja.

²²Dahema nyuda, “Na Kàpatengu Koruneliu na mapalewa-kama pamai lai yiahu. Nyuna tau hàmu-maya dàngu na-mangàdatu-nya i Ala, dàngu kanjupu tembi-danya paraï tau Yahundi. Na haàtu na papalewa-na i Ala, na-paràha-nya ka nakarai-kau nyumu la pamai la umana, nadu ba hema-nanyaka na hamayangu-na paraïna i Miri, jia hi na-paràha-nya la pa-patingi-nya napa na papanii-munya,” wàdaka.

²³Ka kamahi-nanjaka nyuda i Peturu la patama dàngu la patodu pàku lai nu. Hadangu harii laku karia-nanjaka i Peturu da tau nuda. Da manda pirada da tau mapawai la Yopi da-tundungu-mbu.

²⁴Palàngangu hau lodu tàka-danyaka la Kaiharia. Lai nu patia-madanja paraïna i Koruneliu dàngu da nua kalembi-na hamanai da angu lànggina da padunda-na.

²⁵Ba natàka-ka i Peturu, lua-nanyaka i Koruneliu pa-hàmburu-ya, hi na-patika ba namarubukunya.

²⁶Tàka i Peturu hi na-wulaku-ya ba na-pahada-nya, “Hadangu! Nyungga duku hama tau-manda,” wànanya.

²⁷Ba dàngu kareuku dànanya i Koruneliu, tama-nanyaka i Peturu la uma. Lai nu ita-nanjaka da tau dangu da ma-pauhi.

²⁸Hi napanii dànja, “Angu dedi mipi-manya nyuma tau Yahundi ba nda uku la anggama-ma la pa-panjuluru jàka ndia la pa-panggolu dàngu tau la banjaru hawiangu. Tàka i Ala na-paita-nggaka nyungga ka àmbu kukaka tunggunya nu jiapa nda nggamuya ba ma-iraku-ya jàka ndia ba manda hidaya.

²⁹Jia-duyaka umbu mai ba wàmungga hi nda kumbotu la pa-hadangu. Jiaya nu nàhu ka kupinya wànggu jàka nggàraya, mai hi wàmungga,” wàna.

³⁰Nahema i Koruneliu, “Tailu mbua lodu na ma-làpahu, ràkangu rehi tuna nimaka, talànga hamayangu[13] -nggu nyungga la malingu njàmu tailu. Hi jia ndumuru biana na haàtu na tau mini. Da pakina dawàngu pa-kalilangu.

³¹Napanii, ‘Koruneliu! I Ala na-kataku-haka da hamayangu-mu dàngu nanamu-maha da ruku màjangu etimu.

³²Jia ba tuna paràhangu-wa tau la Yopi ka da-ngàdalu-ya i Himungu Peturu. Nyuna toduna la umana i Himungu na mandongu manulangu, la hingi tehiku-ya na pangia-na,’ wànangga.

³³Nuya na pakiri-na hi ku-paràha parenggangu tau palua pa-ngàdalu-kau umbu. Dàngu tau hàmu eti-makauka nu umbu bau mai yiahu. Nàhu nyuma mbuu ndàbama hi ma-pauhini la hanggana i Ala ka ta-patingi-nya mbuu ndàbana jàka nggàra wànanggau i Ala na papanii-mu-nggama nyuma,” wàna.

³⁴Ka panii-nanyaka i Peturu, “Nàhu nyungga pi hàmu-manggu-nyaka i Ala ba hama-maana ba nalumu-nya na tauka mbuu ndàbana.

³⁵Na tau na ma-mangàdatu-nya i Ala dàngu ba na-padeningu na paraï rukuna, nanggepi-maya paraïna i Ala, nda na-tàngaru niaya jàka nggàra banjaru-ya.

³⁶Angu dedi, nyimi mipi-manyaka na ihina na lii na pa-patàka-na i Ala la tau Ihirailu, nu jiaya na Lii Mànangu-duka na papeku wàngu rukuna i Yehu Karitu, na Miri ndàbana na tau.

³⁷Nyimi mipi-manyaka jàka nggàraya na madedi la pa-nggubulu Yundia, nu na ma-pakiringu welingu la Nggalilia la hambeli pa-runungu, na pa-bobaru-na i Yuhani.

³⁸Nyimi mipi-manyaka i Ala ba mbàda pindi-nanyaka i Yehu tau Naharitu. Dàngu nawua-nya Ngahuna i Ala dàngu kuaha. Mipi-mbunyaka Nyuna i Yehu ba nalaku lai nu - lai nu la pawunda mahàmu, na-pamàlaru ndàbaha da tau da pa-huruku wàndi nadu i Ala ba ndutu-mananya.

³⁹Nyuma yia jiama-kamaka maita wikiya mbuu ndàbada da paruku-na la tana tau Yahundi dàngu la Yeruhali. Jiapa ka tuna nu da-harika-nya dàngu da-pameti-ya.

⁴⁰Tàka la lodu patailu wàna i Ala na-paluri beli-yaka welingu la meti, hi na-pawuwa-ya Nyuna la tau,

⁴¹nda la ta - taua mbuu ndàbana, tàka mbulungu lai nyuma na pambàda pindi hahana i Ala, la patu-kama hakahii-na. Nyuma mangangu ma-ngunungu pera dànya nu ba naluri belika welingu la meti.

⁴²Dàngu Nyuna na-palewa-kama la pa-bobaru-ya nuna na Lii Mànangu la mbuu ndàbana na tau dàngu la pa-hakahii-nya ba Nyuna na pawotu-na i Ala la panjadi Hakimu-na na tau na maluri-pa dàngu na mambàda meti.

⁴³Mbuu ndàbada da wunangu-ka dapanii-ya na rukuna Nyuna. Dapanii, ba pa-jàmangu-ha napa da njalada mbuu ndàbada da tau mawaiya Yehu, wàngu kuaha welingu lai Yehu,” wàna.

⁴⁴Ba talànga panii-inapa i Peturu, puru-nanyaka na Ngahuna i Ala hi na-kuaha ndabàba-ya na tau na marongu-ya na lii nuna.

⁴⁵Da tau Yahundi da mapawai lai Yehu dàngu da matundu-nya i Peturu welingu la Yopi, da-hangàtaru hàla ba daita-ya nawua-mbunjaka Ngahuna paraïna i Ala da tau la banjaru hawiangu na nda banjaru tau Yahundi.

⁴⁶Nadu ba darongu-duhaka nuda da tau ba da-kareuku wàngu hilu hangia - hangia dàngu ba dawotu hailanya na mangunju-na i Ala. Hàla hi napanii i Peturu,

⁴⁷“Màla tàngaru-ha, da tau yiada mbàda ngalangu-daka Ngahuna i Ala hama tuna nyuta. Jia ba tuna peku-napa ihu na tau la pahiri-nya yiada yia ka àmbu parunu wànja wai?” wàna.

⁴⁸Ka paràha-nanjaka nyuda i Peturu ka parunu-nja la tamuna i Yehu Karitu. Hàlaka nu karai-danyaka i Peturu ka na-ndàdiku dakinja ana pira mbua lodu.