Read Kambera NA RUKUDA DA PA-PAHURUNGU 12 Bible Online

NA RUKUDA DA PA-PAHURUNGU 12 - Kambera bible

NA RUKUDA DA PA-PAHURUNGU 12

¹Jiaya la rehi nunamai i Hanganji Harondi[16] ba na-pakiringu panoku-nja da angu kabungguru.

²Paraï ruku pareta-na, i Yakombu anguna paluhu i Yuhani da-pameti wànya hapanda.

³Ba naita-yaka i Harondi ba nahàmu wànya na eti tau Yahundi rukuna nu na pawunda-na, hili wunda-mana-nyapa na matuna nu; na-paràhangu tau payàpa-ya i Peturu-mbu. Nuna nu na-hàrangu la lodu Remi Roti Nda patai wolungu.

⁴Ba dayàpa-yaka i Peturu, patama-danyaka la uma kapàtangu. Patu pambaha da tanatara da pa-patanggungu la padaiya i Peturu lai nu — hapamba - hapamba tau mapatu-ha da tanatara. Jàka nanjàpu-ka na reminya na Paha, hinaka napa i Harondi hi na-rapatu-ya i Peturu la hangga madangu.

⁵Jia-duya hi tahanya i Peturu la uma kapàtangu; na nyuna da angu kabungguru pa-nuangu-madanya pa-hamaya weli etingu lai Miri ndumana i Peturu.

⁶Nu la rudungu ba ndedi na-rapatu-ya i Peturu paraïna Harondi la hangga madangu, katuda-nanya i Peturu ba dàngu hondu-danya wàngu dua walangu nggili bàhi la pahiku tau madua tanatara madaiya. La pindu uma kapàtangu, dai-madanya na uma kapàtangu da tanatara hawiangu.

⁷Hi jia ndumuru biana na papalewa-na i Miri lai nu, hi ningu ma-kajilaku na ma-handaraku hàlanya daa la kuru uma kapàtangu. Nyuna na papalewa nakàdu - kàduku-nya i Peturu hi lupa na-hadangu. Napanii na papalewa, “Ha, hada parenggangu!” wànanya. La rehi nu ma-a wàraku wàda-madua-ka da nggili bàhi welingu la limana i Peturu.

⁸Hàlaka nu, “Pakiha da pakimu, honduha da liku halapamu,” hi wàna na papalewa. Ka paki-nanjaka da pakina i Peturu hi na-honduha da liku halapa-na. Tunaka nu nahili panii na papalewa, “Hauya na kalembi bokulu-mu, kau tundungga nyungga,” wànanya.

⁹Ka tundu-nanyaka na papalewa i Peturu ba daluhu welingu la uma kapàtangu. Ba tuna nyuna i Peturu nda hawutu pi-mananya, nu na pawunda-na na papalewa, ba manjadi langatàka-ya. Ba nakaka-ya nuna i Peturu harii mataya duna wàna bia.

¹⁰Ba dalàpahu-nyaka na ngia padai wungangu dàngu na padua wàna, tàka-danyaka la pindu bàhi, na ma-hanggangu la paraingu. Nuna na pindu na-tabunggahu wiki-maana, ka luhu-danyaka hi dalaku li la hau kanjilitu. Hi jia munangu biana na papalewa ba na-dunjaku-nya i Peturu.

¹¹Hàlaka nu ka hinaka hi napi hàmunya i Peturu jàka nggàra-yaka na mambàda njadi lai nyuna, ka panii-nanyaka, “Nàhu pi-nggunyaka, i Miri langatàka-maka na ma-paràha-nya na papalewa-na la pa-pahàla-ka welingu la kuaha-na i Harondi dàngu welingu la mbuu ndàbana na pawunda-na napa na tau Yahundi lai nyungga,” wàna.

¹²Ba napi-nyaka nuna, laku-nanyaka i Peturu la umana i Maria, inana i Yuhani, i Màruku ba wàda-mbunya. Lai nu dangu tau ma-pauhi ba dàngu hamayangu-da.

¹³Natundu-nya na pindu la hambeli i Peturu, hi namai pa-bunggahu pindu na haàtu na anakeda kawini ma-paloku, na ma-tamungu Rondi.

¹⁴Ka ailulu tanda-nanyaka na nggoruna i Peturu. Paraï pa-nggaüru na etina manyamalu tama beli-ma-ananya dàngu ndedi bunggahu-nanya na pindu, hi napeka-nja da tau da ma-pauhi ba ninyaka lua i Peturu la hambeli.

¹⁵“Katoba-munya,” hi wàdanya. Tàka i Rondi nda nangàdu-mai duna ba jia langatàka-ya i Peturu. Napaha nyuda, “Papalewa-nanya duna!” wàda.

¹⁶Nu ba pa-nutakungu-mananyai i Peturu duna patundu-nya na pindu. Ba da-bunggahu-yaka na pindu, ita-danyaka i Peturu, ka dira hangàtaru-ha.

¹⁷I Peturu na-pamaü wànja limana, ka da-kawànaru ba wàna, tunaka nu wàlahu-nanyaka rukuna jàka nggikina i Miri ba naluhu ngàndi-ya nyuna la hambeli welingu la uma kapàtangu. Hàla panii-nanyaka i Peturu, “Pekanya na rukuna yiana i Yakombu dàngu da angu dedi hawiangu-mbu,” wàna. Hàla dunjaku-nanyaka paraïna Peturu na pa-ngiangu lai nu, hi nalaku la hau pangia.

¹⁸Hadangu harii tumbu-nanyaka na pa-riwatungu la hongada da tanatara da madai. Mbingu nda ukuha rukuna nuna na manjadi la ngerana i Peturu.

¹⁹Hàla paràhangu-nanyaka tau i Harondi pahimbu-ya i Peturu, tàka nda dahunggu-ayapa. Jia ba tuna na-wuangu pareta i Harondi la pa-kandàharu-ha da madai hàla hi pameti-ha. Hàlaka patuna nu laku-nanyaka i Harondi welingu la Yundia hi na-ndàdiku ba pi - pira mandaina la Kaiharia.

²⁰I Harondi dira mbeni-nanja da tau Tiruhu dàngu Hindungu. Rukuna nuna-duka hi da-pa-kariangu pamai pa-hurungu lai nyuna. La kawunga-na da-pamanda-nya i Balàtuhu, na ma-kapala la umana na Hanganji Harondi, hi lupa nawai angunja. Tunaka nu hurungu-danyaka lai Harondi, hi dakarai la pa-papeku, nadu na tanada nyuda ba da-monungu pangangu welingu la tanana i Harondi-du.

²¹La hau lodu na pambàda kawuku, wotu-nanjaka da ngaü pa-hanganji wàna i Harondi, hi na-mandapu la kanjàka pareta dàngu hi na-pakiringu patungu lii la hangga rayatu dangu.

²²Ba darongu-yaka rayatu na kareuku-na warangu-danyaka, “Yiana talia nggoru marapu-ya nda talia nggoru tauaya,” wàda.

²³La rehi nuna-madua-ka ba natàba-ya i Harondi paraïna papalewa-na i Ala, nadu ba nda na-maraku-nya i Ala. Nga-ma-ananya ngeli i Harondi hi nameti.

²⁴Ka parukangu-madua-nanyaka la pa-hamboka na puluna i Ala dàngu la pa-kapànduku.

²⁵Ba da-palundu-nyaka na wai tangguda i Mbàranamba dàngu i Hauluhu, beli-danyaka welingu la[17] Yeruhali, hi da-karia-nya i Yuhani Màruku.