Read Kambera NA RUKUDA DA PA-PAHURUNGU 13 Bible Online

NA RUKUDA DA PA-PAHURUNGU 13 - Kambera bible

NA RUKUDA DA PA-PAHURUNGU 13

¹La kabungguru la Atiokia ninja da wunangu dàngu da ngguru nu: i Mbàranamba, i Hamiungu, i Mitingu wàda-mbunya, i Lukiu welingu la Kireni, i Manahimu na angu duangu-na huhu na Hanganji Harondi,[18] lupa i Hauluhu.

²Ba talànga lumu-danya i Ala dàngu ba da-puaha, puru peka-nanjaka nyuda Ngahuna i Ala, “Pindiha i Mbàranamba dàngu i Hauluhu tunggu mehanggu nyungga, ka ku-paràma-nja paràma-ya na paràma na pambàda panduma-nggunja nyuda,” wàna.

³Ba da-hàlaka pa-puaha dàngu pa-hamayangu, pa-dambaku-danyaka lima i Mbàranamba dàngu i Hauluhu hi da-palewa-ha palaku.

⁴Ba na Ngahuna i Ala-maka na ma-palewa-ha, i Mbàranamba dàngu i Hauluhu laku-danyaka la Halukia. Dàngu welingu lai nu pa-lirungu laku-danyaka la Hipuru.

⁵Tàka la Halamihu, bobaru-danyaka na puluna i Ala la uma bunggu - uma bungguru tau Yahundi. I Yuhani Màruku pambapa dàma-nanja nàhu la ànda.

⁶Njada hàla-madanya na nggubulu-na na nuha nuna hi lupa datàka la Papuhu. Lai nu tàbuku-danyaka na haàtu na tau Yahundi, na tamuna Mbàru Yehuya. Nyuna tau mapingu kabeli mataya, wunangu-ka wàna ba napeka wikina.

⁷I Haranggiu Paulu, na nggumbunuru la nuha lai nu, angu lànggida dàngu nuna na mapingu kabeli mata. Nuna na nggumbunuru tau màhi dàngu tau manggàna-ya. Napaau-nja i Mbàranamba dàngu i Hauluhu, nadu ba na-mbuhangu parongu-ya na puluna i Ala.

⁸Tàka i Mbàranamba dàngu i Hauluhu na-ndubaku-ha paraïna i Elimàhu, na mapingu kabeli mata, nadu i Elimàhu (nuya na tamuna la hilu Yunani) nahimbu-nya wihu na nggumbunuru ka àmbu nawaiya i Yehu.

⁹Tàka i Hauluhu — i Paulu ba wàda-mbunya — kuaha-mananya paraï Ngahuna i Ala, hi na-kandura-ya na mapingu kabeli mata,

¹⁰hi napanii, “Ha mahupu kambàliku, ana akatu! Nyumu mamuhu-nya mbuu ndàbana na mahàmu. Nggikina dumu hi ndau jiaka pa-paruha-ya na pa-pakaka-na i Ala la pa-pamàna-nya na tau?

¹¹Nàhu kau tàngaru, napa huku-nanggauka i Miri! Na poki-munyaka naa, hi nda pira mbua lodu biamu ba ndau itangu harii mata lodu,” wànanya. Ndedi mbàdiku-na i Elimàhu pàda-madua-nanyaka na hambongu mitingu na ma-panggàbalu-nya na matana, hi lupa dàmangu - dàmangu-bia-naka ba nalaku ba nahimbu tau malonda-ya.

¹²Ba naita-yaka na matuna nu na nggumbunuru, wai-madua-nanyaka i Yehu nadu ba lalu maratangu-nanya na pa-ajaru rukuna i Miri.

¹³Welingu la Papuhu, i Paulu dàngu da anguna, palirungu-danyaka la Perungga la Papilia. Lai nu i Yuhani Màruku dunjaku-nanjaka nyuda, hi nabeli la Yeruhali.

¹⁴Welingu la Perungga pangala-danyaka na lakuda la Atiokia la Pihindia, tunaka nu la lodu Hangahu, lua-danyaka pa-mandapu la uma bungguru.

¹⁵Ba hàlaka pambaha-ha da mbukuna i Muha dàngu da mbukuda da wunangu-ka, da liku uru la uma bungguru paràha-danyaka na tau pa-paàrangu lai Paulu dàngu da anguna, “Angu dedi, jàka ningu nu lii panaungu-mi màlawa nu kai wuanya yiana na tau,” wàdanja.

¹⁶Ka hadangu-nanyaka i Paulu, hi na-pamaü wàngu limana, tunaka nu ka kareuku-nanyaka, “Angu dedi banjaru Ihirailu dàngu mbuu ndàbami angu dedi hawiangu lai yiahu ma-manundu lai Ala! Màla kai patingi-ngga:

¹⁷Na Ala banjaru Ihirailu napindi-haka da boku la mangilu-nda, hi na panjadi-ya banjaru bokulu yia na banjaru ba jiaya na ngiangu-da la Mehiru ba tau tàkaha. Tunaka nu nawàngu kuaha bokulu-na i Ala, na-karia-nja paluhu welingu la Mehiru.

¹⁸Nyuna ba na-patoru-nya na nggoda nggàduku-da nyuda[19] la maràda telangu patu kambulu ndaungu mandaina.

¹⁹Pihu banjaru-ya na pa-pambuta la tana Kanaàngu, hi na-paberi - berinya nuna na tana la banjaru Ihirailu ka peku màngi-danya nuna na tana.

²⁰Nu ba tuna mbuu ndàbada patu ngahu lima kambulu ndauna mandaina. Ba hàlaka i Ala pa-paberi-nya na tana Kanaàngu,[20] nawua-njaha nyunda da hakimu. Na hakimu na ma-malamiri dehi jiadu-yaka i Wunangu Hamuilu.

²¹Tunaka nu karai-danyaka haàtu hanganji. I Ala nawua-njaha nyuda i Haulu anana i Kihu kabihu Mbanyamingu na patuda hanganji-da patu kambulu ndaungu mandaina.

²²Ba na-pukalu-yaka paraïna i Ala welingu la ngia pa-mandapu-na, wotu-nanyaka i Ndautu paraïna i Ala hi da-hanganji-nya. Dàngu yiana-yaka na palana i Ala rukuna i Ndautu, ‘Kuhunggu-yaka i Ndautu anana i Ihai na malii hàmuya na etinggu. Nyunaka napa na ma-pahàra-nya na pambuha-nggu,’ wàna.

²³Welingu la wàlana i Ndautu nuna-duka i Ala na-payema-nya na banjaru Ihirailu haàtu Hanganji Pa-mànangu hama tuna na pambàda ràndina. Dàngu i Yehu nuna-duka nu na Hanganji Pa-mànangu.

²⁴Ba ndedi-pa na pakiri-nya na paràma-na i Yehu, mbàda wara-nanyaka na tau dangu la Ihirailu i Yuhani, ka da-panjilungu welingu la njalada ka parunu-nja.

²⁵Dàngu ba mareni njàpuna-ka na paràma-na, napanii-nja da tau i Yuhani, ‘Nggamuya wàmingga nyungga yia bai kakaka? Nyungga duku nda jia-aka na Tau na panedi napami. Namu-maya, taliu-nggu nyunggapa duna hi nàmunya nuna na Tau; jiapa la pangguli-ha da halapa-ana nyungga yia nda ràka-mbunggu,’ wàna.

²⁶Angu dedi wàlana i Ambarahàmu, dàngu mbuu ndàbami angu dedi hawiangu maninggai lai yiahu ma-manundu lai Ala! I Ala na-pangàndi-ndanyaka nuna na lii mànangu;

²⁷nadu da tau da maninja la Yeruhali dàngu da amabokulu-da nda datanda-aya Nyuna ba jiaya na ma-pamànangu. Nyuda nda da-jàngapu-aya na pa-ajaru-da da wunangu na pambaha la nimbihu lodu Hangahu, hi lupa dahuku-nya i Yehu. Tàka jia pàkuyai ba tudanya nu hi pa-deningu wàngu-nanyaka na panyura-da da wunangu.

²⁸Jiapa ka nda dahunggu-nya ana haumbu lai Nyuna ràka pa-hukungu wànya hukungu meti, ba tuna dakarai biaya i Pilatu ka pameti-ya.

²⁹Dàngu ba dahàla-ka pa-palundu ndàbanya na pambàda tulihu la Huratu Matua na rukuna Nyuna, papuru-danyaka na metina welingu la ai harikangu, hi da-bànjalu-ya daa la reti.

³⁰Tàka i Ala na-paluri beliya welingu la meti.

³¹Tunaka nu nda pira mbua lodu biana ba namai pa-paitangu wikina la tau da mamai karia-nya welingu la Nggalilia la Yeruhali. Nyuda-duka nàhu da hakahii-na Nyuna la banjaru Ihirailu.

³²Jia-duya nàhu nyuma hi ma-patàka-nggainya nuna na Lii Mànangu lai nyimi: Nggàraya na paràndi-na i Ala la bokunda,

³³nàhu na-palundu-nyaka lai nyuta, ba na-paluri beliya i Yehu welingu la meti. Nadu la Ludu Pamalangungu na padua wàna ninya na pa-tulihu, ‘Nyumu Ananggu-nggau, la lodu nàhu Nyungga Amamu-nggaka,’ na mawàna.

³⁴I Ala na-paluri beliya-ka welingu la meti. Nàhu nda jia hili ngalangu-anapa pameti daa la reti. Na rukuna nuna i Ala napanii-maka, ‘Napa Nyungga kuwua-nggaunya na ràndi matua ba jiangu napa pa-patutu-nya, na pambàda ràndi-nggunya i Ndautu,’ wàna.

³⁵Tumanai la ndalaru hawiangu ba napanii, ‘Nda jia pahia-amunya dumu na atamu na ma-tuturu pajia lujuru daa la reti,’ wàna.

³⁶I Ndautu mbàda meti-naka dàngu pa-taningu-mayaka dàngu anguda da boku la mangilu-na, nu ba na-hàlaka pa-panjàpu-ya na wai ngerana kau paloku-ya ba wànanya paraïna i Ala. Na metina i Ndautu na-làjaru pa-mbutangu-ka duna daa la reti.

³⁷Tàka i Yehu, na pa-paluri belina i Ala welingu la meti, i Yehu nuna nda na-làjaru pa-mbutangu-a duna.

³⁸Jia-duya nu Angu dedi, màtawa nyimi kai pinya, ba rukuna i Yehu hi bobaru-ya lai nyimi yiana na lii na pa-jàmangu wàda da njala, màta kai pinya nimbihu-na na tau na mapawai lai Nyuna ba pa-pahàla-ya welingu la njalana mbuu ndàbada, làti na panda peku podahu-na na pareta-na i Ala na pa-patàka-na i Muha.

³⁹

⁴⁰Jia ba tuna màta kai patanda pahàmu-nya, ka àmbu na-deningu lai nyimi[21] na papanii-da da wunangu,

⁴¹‘Patanda pa-hàmungu, ha nyimi tau ma-mbuhangu pa-paakangu! Napa nyimi mi-hangàtaru, hàla hi mimeti! Nadu la rehi nàhu ba talànga wunda-nggunya na pawunda-nggu nu na panda peku waiminya napa, jiapa ka ningu-kadu tau ma-pakaloka-nggainja! ba wàna,’ ” hi wànanja.

⁴²Ba da-dunjaku-nyaka na uma bungguru i Paulu dàngu i Mbàranamba, da tau lai nu la uma bungguru dakarai-ha ka dahili mai la lodu Hangahu na manàmu-nya, ka da-palara pangala-nja nudaka da papanii-da.

⁴³Ba da-pahewa-ka da tau welingu lai nu la uma bungguru, dadangu da tau Yahundi dàngu da banjaru hawiangu da mambàda tama la anggama Yahundi da matundu-nja i Paulu dàngu i Mbàranamba. Da pa-pahurungu da-panau-nja nyuda ka da-handera pangalangu la hàmuna i Ala.

⁴⁴La lodu Hangahu ma-pandàkingu, natika pamai hàla na ihi paraingu parongu-ya na puluna i Miri.

⁴⁵Ba daita-yaka na tau dangu tungu nu paraï da tau Yahundi, pakilitungu-danyaka da etida. Da-paaka-nya i Paulu dàngu da-ndubaku hàlaya na papanii-naka.

⁴⁶Tàka hili manaü toru mbeni-madua-daka i Paulu dàngu i Mbàranamba ba dapanii pa-lohangu. Dapanii, “Na puluna i Ala jiangu-maka bàdi ba patàka mangilu-nggainya nyimi. Tàka paraï ruku nda bihumi pa-kataku-ya, nu hukutu wiki-mami-nyaka ba nda ràkami nyimi la pa-kataku-ya na luri ma-palangatàkangu dàngu ma-palupangu. Tàka nàhu dunjaku-manggaika dàngu laku-manyaka duma la tau hau banjaru.

⁴⁷Nadu ba tuna yia na pareta-na i Miri lai nyuma; i Miri napanii, ‘Nyimi mbàda tu-nggunggaika harii ma-handaraku-nja da tau la banjaru hawiangu na nda Yahundi, kai patàka-nya pamàna wàngu la nggubulu pinu tana,’ wàna,” wàda.

⁴⁸Ba darongu-ka da tau la banjaru hawiangu da nda Yahundi, dira mbaha etiha, hi dawo - wotunya na puluna i Miri. Dàngu da tau da pambàda panduma-na i Ala la pangala-nya na luri na ma-langatàka dàngu na ma-palupangu, pawai-danyaka.

⁴⁹Na puluna i Miri kada ndàba-nanyaka la nggi - nggi la nggubulu ngabana lai nu.

⁵⁰Tàka da amabokulu la paraingu lai nu dàngu da kawini la kaloka tau bokulu da ma-mangàdatu-nya i Ala, darunda-ha paraï tau Yahundi. Nyuda nu da patumbu-ya na pa-muhungu hangganja i Paulu dàngu i Mbàranamba, hi dawàngga-ha pa-kadua-da welingu la ngabana lai nu.

⁵¹Nu da madua pa-pahurungu, kàmbahu-danjaka da aü la wihida la hanggada da tau nuda pa-panamu wànja, hàlaka laku-danyaka la Ikuniumu.

⁵²Da ma-kikungu la Atiokia kanjupu nggaüru-ha dàngu na-kuaha-ha Ngahuna i Ala.