Read Kambera NA RUKUDA DA PA-PAHURUNGU 14 Bible Online

NA RUKUDA DA PA-PAHURUNGU 14 - Kambera bible

NA RUKUDA DA PA-PAHURUNGU 14

¹I Paulu dàngu i Mbàranamba dahunggu-manyai na ma-hamangu la Ikuniumu. Dalua-madui la uma bungguru tau Yahundi dàngu hi dapanii lai nu; na-payila eti na paniida hi lupa nadangu na tau Yahundi dàngu nda Yahundi da mawaiya i Yehu.

²Tàka da tau Yahundi da manda pawai, darunda-ha da tau nda Yahundi hi lupa da-karaü-nja eti da tau da mapawai lai Yehu.

³Jia-duyaka i Paulu dàngu i Mbàranamba hi da-ndàdiku mandai lai nu. Dàngu wàngu toru mbenida ba dapanii-ya na rukuna i Miri. Nyuna duna i Miri na-wuangu mbuti ba ma-deningu-ya na lii pa-bobaru-da na ruku pa-namungu-na; nawuanja nyuda kuaha pa-patumbu pa-hangàtarungu dàngu hangia - hangia manda ningu hamangu.

⁴Tàka da tau da mangia-nya na paraingu da-pawàhingu dàngga anguda; ningu maangu-nja da tau Yahundi tàka hi ningui maangu-nja nuda da pa-pahurungu.

⁵Hàla da tau Yahundi dàngu da amabokulu-da da-pahamangu dàngu da tau nda Yahundi la pa-mayila-ha dàngu la pa-nahaku-nja watu da pa-pahurungu.

⁶Tàka da pa-pahurungu dapàda-manyaka ba ninya na matuna nu, hi da-lelingu pa-hinggilu la Litaru dàngu la Ndembiru, nu da paraingu la Likaonia, dàngu la ngaba winggiru-na.

⁷Lai nu hili bobaru-danya na Lii Mànangu.

⁸La Litaru ninya na haàtu na tau mini ma-kaliparu wihina welingu ba nadedi-maka, jia hi ndedi na-handàkangu-mapa duna pa-pangga, nadu ba lalu maluputu-ha da wihina.

⁹Na tau nuna na-mandapu lai nu, patingi-nanya i Paulu ba napanii. I Paulu naita-ya na tau nuna ba napawai, jia-duyaka hi pekuna nyuna la pa-pamàlaru-ya. Na-kanàndaru-ya

¹⁰hi nawàngu pa-pakodungu i Paulu ba napanii, “Hadangu kau ndolaku pa-hamungu!” wànanya. Lumbatu wàna-madua-ka na tau nuna hi napangga.

¹¹Ba naita-yaka tau dangu nuna na pa-patumbu-na i Paulu, ka warangu-madua-danyaka la hilu Likaonia, “Mbàda puru-daka la pinu tana da marapu ba da pahada taungu,” wàda.

¹²Hàla i Mbàranamba datunya tamuna Njeu wàdanya, tàka i Paulu Herimihu wàdanya, ba nyuna na matanggu kareuku.

¹³Na ratu Marapu Njeu, na uma lumungu-na luaya la ngaru pindu paraingu, namai ngàndiha da hapi mini dàngu da wàla ai la pindu bokulu paraingu. Nyuna kikungu-nanya la tau dangu la pangàndi-nja kameti maraku da pa-pahurungu.

¹⁴Ba darongu-ka i Mbàranamba dàngu i Paulu jàka nggàraya na pawuku-da da tau nuda, bàriku-danjaka da pakida hi dapalai tomaha da tau dangu dàngu warada,

¹⁵“Ha ka nggikina hi timi nu? Nyuma yia tauma-kama hama tuna nyimi! Hi kiri ninggama lai yiahu bobaru-manya na Lii Mànangu lai nyimi, ka pekuna kai dunjaku-nya na hangia - hangia na manda lingu tungu yia, kai mai lai Ala na ma-padika-nya na awangu, na tana, na tehiku dàngu mbuu ndàbana na maninya lai nu.

¹⁶La rehi na ma-làpahu i Ala napuli-njapa da ba - banjaru ba dawàngu pawuku wikida.

¹⁷Tàka nda na-marombangu-a la pa-wuangu mbuti na ruku wikina Nyuna ba nawunda mànu mahàmu. Ba nawua-nggai urangu welingu la awangu dàngu da ihi tana toma la rehina. Nawua-nggai pangangu dàngu ba na-pa-nggaüru etikai,” wàda.

¹⁸Ba tuna ba da-kareuku tuda nu na-harui-mapa la pa-pabeta-nja da tau da mangàndi-nja kameti maraku.

¹⁹Ba mapi - piraha da tau Yahundi da mamai la Litaru welingu la Atiokia la Pihindia dàngu welingu la Ikuniumu, da-titiru-ya na tau dangu hi daangu ninja nyuda. Ka nàhaku-danyaka watu i Paulu, hàla hi dayila-ya la hambeli paraingu. Ba dakaka-ya meti-nanyaka wàda bia,

²⁰tàka ba da-ndolaku winggiru-nyaka paraï da tau mapawai lai nu, hadangu-nanyaka hi natama beli la paraingu. Hadangu harii laku-nanyaka la Ndembiru anguda i Mbàranamba.

²¹La Ndembiru i Paulu dàngu i Mbàranamba da-bobaru-ya na Lii Mànangu hi nadangu na tau lai nu na mapawai lai Yehu. Hàlaka nu beli-danyaka la Litaru, hàla la Ikuniumu, welingu lai nu dalaku la Atiokia la Pihindia.

²²La nimbihu paraingu nuda da-pamàndu-nja da etida da ma-kikungu lai Yehu, dapanau-nja ka da-padaingu la pawaiya i Yehu, “Nyuta nadangu-mapa bàdi na mayila-nda, hina hi tapàda-nya na mànjaku hàmu la Pinu Tana Bidina i Ala,” wàda da pa-pahurungu ba da-ajaru-ha da ma-kikungu lai Yehu la paraingu nuda.

²³Nu la nimbihu kabungguru, i Paulu dàngu i Mbàranamba dawotu tau liku uru la kabunggu - kabungguru nuda. Ba dawàngu pa-hamayangu dàngu ba da-puaha, da-pakata-nja lai Miri nuda da liku uru da pamonu-da

²⁴Hàlaka patuna nu i Paulu dàngu i Mbàranamba pangala-danyaka na lakuda, da-pànggatu-ya la ngaba Pihindia hi datàka la Papilia.

²⁵Dàngu ba dahàla-ka pa-bobaru-ya na puluna i Ala la Perungga, laku-danyaka la Atalia.

²⁶Welingu lai nu hi da-palirungu beli la Atiokia. Nuna-duyaka na paraingu na ngia pa-pakata-danja àmangu la màjangu-na i Ala, ka peku ràma-danya na paràma na pambàda palundu-da nàhu.

²⁷Ba datàka-ka la Atiokia, pauhi-danyaka na tau la kabungguru lai nu, hàla hi da-wàlahu hàlaya na pambàda wundana i Ala rukuda nyuda. Da-wàlahu-mbuya jàka nggikina i Ala ba na-bunggahu-ya na ànda ka peku pawaida lai Yehu da tau nda Yahundi.

²⁸Da mandai-mapa la paraingu lai nu i Paulu dàngu i Mbàranamba ba da-ndàdiku danja da tau mapawai.