Read Kambera NA RUKUDA DA PA-PAHURUNGU 15 Bible Online

NA RUKUDA DA PA-PAHURUNGU 15 - Kambera bible

NA RUKUDA DA PA-PAHURUNGU 15

¹Ba mapira-ha da tau welingu la Yundia damai la Atiokia hi da-ajaru-ha da tau pawai la Atiokia, ba nda peku pamànaanja jàka nda pakari-ha tundunya na ukuna i Muha.

²I Paulu dàngu i Mbàranamba da-rawaku langatàka-ya nuna na pandolaku wàda da tau nuda. Tunaka nu kawari-danjaka i Paulu dàngu i Mbàranamba dàngu ba mapira-ha da anguda welingu la Atiokia palua la Yeruhali la pabata-ya na rukuna nuna dàngu da pa-pahurungu hamanai da liku uru - liku uru lai nu.

³Na kabungguru la Atiokia da-kareni-nja nyuda lupa tàka la hambeli paraingu, hàla nu ba dalaku dalii ningu la Pinihia dàngu Hamaria. Lai nu da-wàlahu-ya jàka nggikina da tau nda Yahundi ba da-pajàmangu wikida lai Ala. Na rukuna nuna kanjupu pa-hawola-naha da tau mapawai lai nu.

⁴Ba datàka-ka la Yeruhali, da-kataku hàmu etiha parai kabungguru, dàngu paraï da pa-pahurungu hamanai da liku uru - liku uru. Hàla wàlahu-danyaka mbuu ndàbana na pambàda wundana i Ala rukuda nyuda.

⁵Tàka ba mapira-ha welingu la kalibaru Parihi da mambàda pawai, da-hadangu hi dapanii, “Da tau hau banjaru da mambàda pawai kàri-maha bàdi dàngu màta ka datundu-nya na ukuna i Muha,” wàda.

⁶Ka pauhi-danyaka da pa-pahurungu dàngu da liku uru - liku uru la pabata-ya na rukuna nuna.

⁷Dira mandaiha ba panjonjangu kanandingu. La malamiri ndolaku-nanyaka i Peturu hi napanii, “Angu dedi! Pi wiki-mami-nyaka nyimi ba ndedi pira nggi mandaina ba napindi-ka nyungga i Ala la pa-bobaru-ya na Lii Mànangu la tau nda Yahundi, ka peku ronguda dàngu ka peku pawaida.

⁸Tàka i Ala na matanda eti tau mbàda pa-itangu-naka ruku ba na-kataku-ha nyuda; na-paitangu-ya nuna ba nawàngu pawua-nja nyuda Ngahuna i Ala hama tuna na pambàda wua-nanda nyuta.

⁹Nda naheka-anda i Ala nyuta dàngu nyuda. Na-pamatua-ha da etida, rukuna ba dapawai.

¹⁰Nu, nggiki-naika dimi nàhu hi milawa-nya i Ala bai wuanja wai ngerada mambotu yiada da ma-kikungu, jiapa-kingu da boku la mangilu-nda dàngu nyuta wikimbu nda talupa màka pa-palaku-ya?

¹¹Tàka duna làti, nyuta hi tapawai dàngu hi pamàna-nda ruku mila etina i Miri Yehu; tumbunai duda nyuda,” wàna.

¹²Ka kamàndalu hàla-nanyaka na tau na ma-pauhi lai nu. Tunaka nu ka patingi-danjaka i Mbàranamba dàngu i Paulu ba da-wàlahu beliya mbuu ndàbana na pa-hangàtarungu dàngu na hangia - hangia na manda ningu hamangu na pambàda wundana i Ala rukuda nyuda la honga tau la banjaru hau nda Yahundi.

¹³Ba nanjàpu-ka na kareuku-da, panii-nanyaka i Yakombu, “Angu dedi! Patingi-nggai duku nyungga.

¹⁴Bidi hàla-ana i Himungu pa-palara-nya jàka nggikina la kawunga-na ba na-patanda-nja ngerada da tau nda Yahundi paraïna i Ala, na pawuku-na pindi-nanya welingu lai nyuda tau hawiangu manjadi banjaru-na.

¹⁵Nuna jàngapu-mana-nyaka na panyura-da da wunangu. Nadu ba ninya na pa-tulihu tuna yia,

¹⁶‘Hàlaka nu napa Nyungga kuhili mai,’ wàna i Miri, ‘Napa Nyungga kuhili pahada belinya na umana i Ndautu na mambàda njoru, hi ku-pahàmu beliya na ma-tanyànggaru, hàla hi ku-pandolaku beliya;

¹⁷ka màtawa mbuu ndàbada da tau da marihi ka dahimbu-ya i Miri, anguda mbuu ndàbada da banjaru hawiangu da manda Yahundi da pambàda paaunggu ka kumangu-nya,’ wàna. Nuya na puluna i Miri,

¹⁸na mambàda pekaya na rukuna nuna weli nungu,” wàna.

¹⁹“Jia-duya ba ku-patanda-nya nyungga,” wàna i Yakombu, “Àmbu ta-pahanduka-ha da tau nda Yahundi da ma-pajàmangu wikida lai Ala.

²⁰Na nyuna ta-tulihu-nja huratu bàdi nyuda ka tapanau-nja ka àmbu dangangu pangangu ma-iraku da pambàda marakungu la marapu, jàka ndia la pangangu tolu banda mameti kabuta, jàka ndia la pangangu ria. Dàngumbu ka da-pamaraungu wikida welingu la pawunda - pawunda ma-iraku.

²¹Nadu na ukuna i Muha ba piti weli ndaingu-maka ba mbahaya la nimbihu lodu Hangahu la uma bunggu - uma bungguru, dàngu ba bobaru-ya la paraingu-ka mbuu ndàbana,” wàna.

²²Da pa-pahurungu dàngu da liku uru - liku uru, hamanai mbuu ndàbana na kabungguru-ka dabota-ya la papindi tau mapira welingu lai nyuda, ka palewa-ha napa la Atiokia karia-nja i Paulu dàngu i Mbàranamba. Ka pindi-danjaka i Hila dàngu i Yundahu, i Mbàrahamba ba wàda mbunya. Da tau madua nuda tau la ngoraha la honga tau pawai la Yeruhali.

²³Karia-da nuda da tau papalewa da-pangàndi-mbunja hawàla huratu, na matuna yia na linguna, “Tàka tomaha mbuu ndàbada da angu dedi welingu la ba - banjaru hawiangu nda Yahundi, da maninja la Atiokia, Hiria dàngu Kilikia. Tambi welingu lai nyuma, pa-pahurungu dàngu liku uru - liku uru, angu dedimi.

²⁴Marongu-maka ba ninja da tau mapira-ha welingu lai nyuma da malua lai nyimi pa-kubaru-kai dàngu ma-pambingu wànggai pa-ajaru-da. Làti duna nda nyumambu duma ma-paràha-nja la patuda nu.

²⁵Kirina nuna-duka hi ma-batangu dàngu hi ma-pahamangu ndàba la papindi tau papalewa-ma lai nyimi. Napa nyuda da-karia-nja da angu dedinda i Mbàranamba dàngu i Paulu da pambuha-ma.

²⁶Da tau madua yiada nda daaï wikida la palumu-nya na Mirinda i Yehu Karitu.

²⁷Jia-duya hi ma-palewa-ha i Yundahu dàngu i Hila lai nyimi angu dedi. Nyuda napa da ma-patàka wànggai ngaru na lii na pa-tulihu la huratu yiana-mbu.

²⁸Na Ngahuna i Ala na patunju-mayaka — hamanai nyumambu — ka àmbu pabuku-nggai wai ngerami marihi mbotu, hinggilu-da yiada-a da ma-paihikungu:

²⁹àmbi ngangudu pangangu pambàda mangejingu la marapu; àmbi ngangudu ria, àmbi ngangudu tolu banda mameti kabuta, dàngu kai pa-maraungu wikimi welingu la pa-njuraku. Jàka mimarau-madu-njaka nu da matungu nu, wunda-minya mahàmu-maka nu. Ta-banjalu-ya angu dedi! Peku hàmuwa,” wàna.

³⁰Ba da-maràngga pa-belingu-ka langu, laku-danyaka da tau papalewa la Atiokia. Lai nu paau hàla-danjaka da angu kabungguru pa-pauhi hi da-patàka-nya nu na huratu.

³¹Ba dahàla-ka pambaha-ya nuna na huratu paraï da angu kabungguru, hàmu nda ukuha da etida, nadu na ihina na huratu ba na-panggaüru-duha da etida.

³²I Yundahu dàngu i Hila ba wunangu-mahai, damandai-ma ba da-pabanjaru dànja da angu dedi da mapawai la Atiokia, ba da-titiru-ha dàngu ba da-patoru mbeniha.

³³Ba da-harangu mandaika pa-ndàdiku lai nu nyuda i Yundahu dàngu i Hila, puli-danjaka pabeli paraï da tau pawai la Atiokia hi dakarai-ha ka da-patàka-nya la ma-palewa-ha na lii malangu welingu lai nyuda. [

³⁴Tàka nyuna i Hila nabota-ya la pa-paengangu la Atiokia.]

³⁵Jia-mayai duda i Paulu dàngu i Mbàranamba da-ndàdiku mandai-maipa duda la Atiokia. Lai nu ajaru-danya dàngu bobaru-danya na puluna i Miri dàngu dadangu-ma da anguda hawiangu.

³⁶Ndedi nggi tuna mandaina napanii i Paulu lai Mbàranamba, “Màla ka tabeli pa-tadalu-ha da angu dedi da mapawai lai Yehu la mbuu ndàbada da paraingu da ngia pa-bobaru-ndanya na puluna i Miri, ka taita-ha nggi - nggiki-daka na lurida,” wàna.

³⁷I Mbàranamba na-mbuhangu pa-karia-nya i Yuhani Màruku,

³⁸tàka la pakaka-na i Paulu nda nahàmu ba karia-nya i Màruku, nadu ba nda na-mbuhangu paràma dànja nyuda, hi nalaku wàrunja la Papilia.

³⁹Diraha ba da-palumungu i Paulu dàngu i Mbàranamba hi kiri pa-ihangu-da: i Mbàranamba na-karia-nya i Màruku hi da-palirungu la Hipuru.

⁴⁰I Paulu napindi-ya i Hila hi dalaku kariangu, nu ba da-hàlaka da angu dedi la Atiokia pa-pakata-nja nyuda la pa-namungu-na i Miri.

⁴¹Da-winggiru-nya la Hiria dàngu Kilikia, lai nu da-pamàndu-nja da kabungguru.