Read Kambera NA RUKUDA DA PA-PAHURUNGU 16 Bible Online

NA RUKUDA DA PA-PAHURUNGU 16 - Kambera bible

NA RUKUDA DA PA-PAHURUNGU 16

¹I Paulu na-pangala-nya na lakuna la Ndembiru, hàlai la Litaru. Lai nu ninya na haàtu na ma-kikungu lai Yehu, na ma-tamungu Timutiu. Na inana kawini Yahundi-ya na mambàda pawai lai Yehu, tàka na amana tau Yunani-ya.

²La hongada da tau mapawai da ma-ngiangu la Litaru dàngu Ikuniumu, patanda-maya i Timutiu ba tau hàmuya.

³I Paulu na-mbuhangu pa-karia-nya i Timutiu, jia-duyaka hi nakàri-ya i Timutiu. Nu hi tuna nu, da tau Yahundi la ngaba lai nu dapi hàla-manya ba ana tau Yunani-ya nyuna i Timutiu.

⁴La parai - paraingu ngia pa-tadalu-da, da-patàka-nja da tau mapawai mbuu ndàbada da pabota - pabota da patiki-da da pa-pahurungu dàngu da liku uru la Yeruhali. Da-panau-nja da angu dedi da mambàda pawai ka datundu-nja nu da kalara - kalaratu.

⁵Ka manaü màndungu-naka na pawaida da kabunggu - kabungguru, dàngu nimbihu lodu bonja - bonjangu-nanyaka na danguda.

⁶Na Ngahuna i Ala nda na-pahia-nja i Paulu dàngu i Hila pa-bobaru-ya na puluna i Ala la porupinihu Ahia. Jia hi da-pangala-nya na àndada la ngaba Paringgia dàngu Nggalatia.

⁷Ba datàka-ka la padira Mihia, da-kamangu làti patama la porupinihu Mbitinia, tàka na Ngahuna i Yehu nahiri-nja patama lai nu.

⁸Tu-dunaka hi dali ningu[22] la Mihia bia, hi dapangalangu la Tarua.

⁹La rudungu la Tarua, na-itangu harii mata i Paulu. Nu la harii mata naita-ya na haàtu tau Makandonia na ma-ndolaku la hanggana na makarai pambana-ya ka nalua la Makandonia pandula-ha nyuda.

¹⁰Ba na-hàlaka paita-ya nuna na harii mata i Paulu, kanoma parenggangu-madua-manyaka palaku la Makandonia. Nadu la etima ba màndungu-mana-nyaka ba paràha-nanggama i Ala palua pa-bobaru-ya na Lii Mànangu la tau lai nu.

¹¹Ka dunjaku-manyaka la Tarua, hi ma-paliru pa-ngalangu la Hamutaraki, hadangu harii la Niapoli.

¹²Welingu lai nu la Pilipi-kamaka, na paraingu na kawunga nditiriku la Makandonia.[23] La Pilipi tana pa-pareta tau Romaya. Lai nu ma-engangu ana pira mbua lodu.

¹³La lodu Hangahu lua-manyaka la hingi luku la hambeli pindu bokulu paraingu, ba makaka-ya lai nu ningu ngia pa-hamayangu tau Yahundi. Hi ma-mandapu ba ma-pabanjaru dànja da kawini da ma-pauhi lai nu.

¹⁴La hongada nyuda ninya na haàtu na ma-danggangu tera mbaü, na ma-tamungu Lindia, welina la Tiatira. Nyuna nambuha-nya i Ala, jia-duyaka hi nakoda-nya na etina paraïna i Miri la pa-kataku-ya na pa-ajaru-nanya paraïna i Paulu.

¹⁵I Lindia dàngu da ihi uma-naka hi parunu-nja. Hàla pa-parunu-nja nawànda-kama, “Angu dedi, jàkai kakaya ba pawai langatàka-madu-nggunyaka lai Yehu, màlawa nu kai laku patodu ningu la umanggu,” wàna-nggama. Tàka hi na-dàhiku-kama la patundu-nya na pakarai-na.

¹⁶La hau lodu ba talànga lakuma la ngia pa-hamayangu, ma-tàbuku-ya na haàtu na tau kawini, nyuna tau ataya. Na kawini nuna na-huruku-ya wàndi akatu, hi peku nyura-nanya jàka nggàraya napa na manjadi. Ba nakàli nyura ura tau, dira ngalangu-ha utungu da mirina.

¹⁷Na kawini nuna ndàki-mananya i Paulu dàngu nyuma nàhu ba la - ladana, “Da tau yiada atana i Ala Mahupu janggaha! Maidanya papeka-nggai jàka nggiki hamana hi mingala-nya na mànangu wàda!” wàna-padua.

¹⁸Pi - pira mbua lodu biana na kawini nuna ba na-panua naingu pa-kaladaku tuna nu. Ka lupa nda nanoru-nyapa na etina i Paulu, nambaili hi napeka-nya na wàndi, “La tamuna i Yehu Karitu ku-pareta-kau, luhuwa welingu la kawini nana! wànggunggau,” wànanya. La rehi na nuna-madua-ka nu na wàndi ba na-dunjaku-nya nuna na kawini.

¹⁹Ba dapi-nyaka paraï da mirina ba nda hili ningu-apa pekuna la pa-ngalangu wàngu àmahu, yàpa-danjaka i Paulu dàngu i Hila hi dayila-ha pa-kadua-da la talora la hangga ma-katangu pareta.

²⁰Dangàndi-ha i Paulu dàngu i Hila la hangga ma-katangu pareta Roma, hi da-pakàla, “Da tau yiada tau Yahundi-ha. Da-pariwatungu yiahu la parainda.

²¹Da-bobaru-ya la pawànya na hau huri, na ma-pahilitu dàngu da ukunda nyuta tau Roma. Nyuta duta nda peku kataku-andanya dàngu nda peku tundu-andanya na huri tungu nu!” wàda.

²²Da tau dangu da-tundungu-mbu la pa-làndahu-nja i Paulu dàngu i Hila; da ma-katangu pareta dahi - hiraha da paki la ihida nuda da pa-pahurungu pa-kadua-da, hàla hi da-paràhangu paràmbahu-ha nyuda pa-kadua-da.

²³Ba dira jàra-haka ba ràmbahu-ha, puhi-dahaka la uma kapàtangu. Da-paràha-nya na kapala uma kapàtangu ka pa-mbànitu-ya ba mangganja.

²⁴Tundunya na pareta, napàtu-ha paraïna kapala uma kapàtangu, la kurungu mangia daluma ba dàngu puhi-daha la tangga da wihida.

²⁵Ba ràkangu mandalora-mayaka ba talànga hamayangu-da i Paulu dàngu i Hila dàngu ba dawunda-nya ludu wotungu i Ala. Da tau papàtu hawiangu patingi-madanja ba daludu.

²⁶Hi jia tungu biana na upungu ma-kanjupu mbangàtu, hi lupa na-kanggauhaku-mbu na lata uma kapàtangu. Mbuu ndàbada da pindu da-tabunggahu dàngu da nggili bàhi da pahondu wànja da tau papàtu da-pahàlangu ndàba.

²⁷Tàtaku wàna na kapala uma kapàtangu hi na-hadangu. Ba naita-haka tabungguhu-da da pindu uma kapàtangu, binjiru-nanyaka na hapanda-na ka ku-pameti wikinggu ba wàna, nadu ba nakaka-ya dapalai hàlaka duda da tau papàtu wàna bia.

²⁸Tàka hi nawara pako - kodungu i Paulu, “Àmbu pameti-du wikimu! Ni hàlama-nggamapa yia!” wànanya.

²⁹Karai-nanyaka palita na kapala uma kapàtangu hi napalai hu daa, ba dàngu nda - ndàndana na-maràbaku la hanggada i Paulu dàngu i Hila.

³⁰Tunaka nu hi na-karia-nja paluhu, hi napanii, “Umbu, nggàra wànggu-aka bàdi ka pamàna-ngga?” wàna.

³¹Dahema i Paulu dàngu i Hila, “Wai-yawa i Miri Yehu! Napa nyumu umànangu — nyumu dàngu mbuu ndàbada da tau la kuru umamu!” wàdanya.

³²Hàla i Paulu dàngu i Hila hi da-palara-nya na puluna i Miri na kapala uma kapàtangu dàngu mbuu ndàbada da tau da maninja la umana.

³³La mandalora nunama ba na-karia-nja paraïna kapala uma kapàtangu pa-paili-ha da manua-da. Nyuna dàngu mbuu ndàbada da tau da maninja la umana hi parunu mema-manja.

³⁴Tunaka nu karia-nanjaka i Paulu dàngu i Hila la umana hi nawua-nja pangangu. Nyuna dàngu da kalembi-naka lalu hàmuha da etida, nadu nàhu ba wai-danyaka i Ala.

³⁵Hadangu harii, da ma-katangu pareta Roma da-paràhangu palihi la uma kapàtangu la pa-patàka-nja pareta ka pahàla-ha i Paulu dàngu i Hila.

³⁶Na kapala uma kapàtangu napanii-nya i Paulu na rukuna nuna, “Umbu, da-wuangu-ka pareta da ma-katangu pareta la pa-pahàla-kai. Nàhu peku laku-mika. Laku mambiru-wa!” wànanja.

³⁷Tàka i Paulu hi napanii-nja da palihi, “Nyuma yia tau la banjaru Roma-kama. Bundu nda pa-rapatu-kama, da-ràmbahu bia-kama la hangga tau dangu, hi puhi-kama la uma kapàtangu. Tàka nàhu hi paràha kangunguhu biada-nggama palaku? Nda mabihu-a duma. Pekanja bàdi da ma-katangu pareta ka damai wikida pa-paluhu-kama,” wànaka.

³⁸Ka patàka-danyaka na rukuna nuna paraï da palihi la ma-katangu pareta Roma. Ba darongu-ka da ma-katangu pareta, ba tau la banjaru Romaha i Paulu dàngu i Hila, ka mangàdatu-danyaka.

³⁹Hàla lua-danyaka papeka lii malangu lai Paulu dàngu i Hila, tunaka nu hi da-karia-nja paluhu welingu la uma kapàtangu, hi dakarai-ha paluhu welingu la paraingu nuna.

⁴⁰Ka dunjaku-danyaka na uma kapàtangu i Paulu dàngu i Hila hi dalaku la umana i Lindia. Ba da-pahàmburu dànjaka da tau da mapawai lai nu, wua-danjaka pa-màndungu wàda da etida, hàla laku-danyaka i Paulu dàngu i Hila.