Read Kambera NA RUKUDA DA PA-PAHURUNGU 17 Bible Online

NA RUKUDA DA PA-PAHURUNGU 17 - Kambera bible

NA RUKUDA DA PA-PAHURUNGU 17

¹I Paulu dàngu i Hila da-pangala-nya na lakuda, da-pàlaku-ya la Àmupipoli dàngu la Apolunia, ka tàka-danyaka la Tehalunika. Lai nu ningu uma bungguru tau Yahundi.

²Ka lua-nanyaka i Paulu nu la uma bungguru — hama tuna na pakàli wàna jàka ningu uma bungguru tau Yahundi — hi da-panjonjangu kanandingu dàngu da tau lai nu rukuda da ndalaru la Huratu Matua. Tuna nu mànuma la tailu mbua lodu Hangahu mapandu - ndutungu.

³Palata-nja da ndalaru Huratu Matua na-palara-nja dàngu napeka-nja mbuti rukuna na Hanganji Pa-mànangu na paràndi-na i Ala ba na-pàdangu-ma bàdi mayila dàngu ba naluri beli welingu la metina. “I Yehu na pa-bobaru-nggunggai jia-mayaka na Hanganji Pa-mànangu na paràndi,” wàna i Paulu.

⁴Ba mapira-ha da tau dalua-ya papawai hi datundu-nja i Paulu dàngu i Hila; tuna numbui ba dangu tau Yunani da ma-mangàdatu-nya i Ala, dàngu dadangu-mbui da kawini welingu la kaloka tau bokulu.

⁵Tàka da tau Yahundi da-pakilitungu. Dapaau-nja da tau lindingu la ànda, hi da-pakapulingu la pa-pariwatungu. Ka pariu-raüngu-danyaka la nggubulu paraingu, hi da-parumbakungu patama la umana na haàtu na tau mapawai, na ma-tamungu Yahungu, himbu-danja i Paulu dàngu i Hila, ka ruruhu-ha la hangga tau dangu wàda làti.

⁶Tàka ba nda da hunggu-hapa i Paulu dàngu i Hila, ruruhu-danyaka i Yahungu dàngu ba tau mapira-ha da mapawai hawiangu dangàndi-ha la ma-katangu kuaha lai nu la paraingu. Da-warangu, “Da tau yiada da-pakuwaru la nggi - nggini! Nàhu mai-mbudanyai la paraingu-nda nyuta,

⁷dàngu i Yahungu na ma-kataku-ha la umana. Nyuda mbuu ndàbada dapangga-ha da kalaratu-na na Hanganji Bokulu Roma, nadu dapanii: ba ninyaipa na haàtu na hanganji, na ma-tamungu Yehu,” ba wàda.

⁸Da kareuku nuda da-pawiti wànya na kangguhuku tau dangu hamanai da ma-katangu kuaha la paraingu nuna.

⁹Tàka da ma-katangu kuaha da-paràha-nja i Yahungu lupa da angu pawaida hawiangu la pa-mbayaru àmahu katindi-da. Hàlaka nu hinaka hi pahàla-ha.

¹⁰La rudungu nuna da tau pawai la paraingu Pilipi da-paràha-nja i Paulu dàngu i Hila palaku la Mbaria. Datàka-ka lai nu, lua-danyaka la uma bungguru Yahundi nyuda i Paulu dàngu i Hila.

¹¹Da tau la Mbaria darihi hawewa matapa welingu la tau Tehalunika. Da-patingi hàmu eti-manya na rukuna i Yehu, hau lodu - hau lodu da-manginjiru-ya padua na Huratu Matua ka pinya deningu-na na pa-ajaru-na i Paulu ba wàda.

¹²Dangu la anguda nyuda da mapawai lai Yehu, dàngu nda hakudu biada da tau Yunani da ma-pangora da mapawai, kawini mini.

¹³Ba darongu-ka da tau Yahundi la Tehalunika, ba na-bobaru-mbuyaka na puluna i Ala la Mbaria i Paulu, mai-danyaka la Mbaria parunda-ya na tau hi kiri ridu wànguna na tau lai nu.

¹⁴Ka manyamalu madua-danyaka da angu dedi lai nu pa-karia-nya i Paulu la hingi wara, tàka i Hila dàngu i Timutiu jiapa-hapa la paraingu lai nu.

¹⁵Ba dalua karia-nyaka i Paulu tàka la Atena, beli-danyaka da angu dedi la Mbaria, dàngu ngàndi-danya na kareuku-na i Paulu ka dandàki parengga-ngga i Hila dàngu i Timutiu ba wàna.

¹⁶Ba talànga patia-nanja i Hila dàngu i Timutiu la Atena i Paulu, na-hawina na etina ba naita-ya na paraingu nuna ba nambinu wàngu marapu.

¹⁷Jia-duyaka ba tuna nu hi da-panjonjangu kanandingu i Paulu dàngu da tau Yahundi dàngu da tau hawiangu da malumu-nya i Ala lai nu. Tuna numbu la paha - pahangu hau lodu - hau lodu da-panjonjangu kanandingu dàngu nimbihu-na na tau na maninya lai nu.

¹⁸Da ngguru la kalibaru Epikuru dàngu kalibaru Hatua da-patayaku dambunya nyuna. Ba tau mapira-ha da anguda nyuda da panii, “Nggàra papina na tau yiana? Ana hawutu ada da papina tàka nadangu na ngaruna,” wàda. Ninjai hawiangu da mapanii, “Talànga wanguna bobaru-nanya ruku marapu banjaru hawiangu dumu,” wàda. Hi dapanii tuda nu, nadu i Paulu ba bobaru-nanya na rukuna i Yehu dàngu rukuna na luri beli ba hàla pameti.[24]

¹⁹Hàla karia-danyaka i Paulu la ngia pa-pauhi la Tandula Areupanggu. Lai nu hi dapanii-nya, “Ma-mbuhangu nyuma làti papinya na lii bidi na pa-bobaru-mu.

²⁰Nadu da papeka-mu nyumu ba hau ailulu-duha la kahilu-ma nyuma. Jiaya nu hi ma-mbuhangu papinya àndana,” wàdanya. (

²¹Nadu mbuu ndàbana na tau Atena dàngu na tau weli nàmungu na maninya lai nu nda nggàra ihi ula haua-na jàka na-manggawangu, jia-ma-a la pa-patingi-nja jàka ndia papanii wànja da lii bidi.)

²²Ba na-ndolaku-ka i Paulu la hanggada da tau da ma-pauhi la Areupanggu, panii-nanyaka, “Ha dimi tau Atena! Nyungga ba kuwàngu paita-akai la nggàra bia la mbuu ndàbana kanjupu lumu-minya na anggama-mi.

²³Nadu ba jiaya na wenangu-nggu ba ku-winggiru-nya na paraimi dàngu ba kuita-ha da pangia ngia pa-hamayangu-mi, kuita-ya na hau na ngia pa-mangejingu-mi, ninya na pa-tulihu lai nu, ‘Ndumana i Ala na panda tanda,’ wàna. Nu, jiaya na Ala na palumu-dimika na panda tandami, jiaya Nyuna-duka nàhu na pa-bobaru-nggu lai nyimi.

²⁴I Ala na ma-padika-nya na pinu tana yiana dàngu mbuu ndàbana na ihi-naka, Nyuna Miri awangu tanaya. Nyuna nda nangia-anja da uma marapu da pawulu tau.

²⁵Nyuna nda na-monungu-a pa-ndulangu-na na tau, nadu ba Nyuna-madui na ma-wuangu-ya na luri dàngu na kayeku dàngu mbuu ndàba-naka la tau.

²⁶Welingu la haàtu tau nawulu-ya mbuu ndàbana na banjaru, hi na-patunggu-nya pangia-na la nggubulu pinu tana. Nyunambu na ma-kawuku-ya weli mulangu jàka pirangu dàngu jàka nggi daluri ningu.

²⁷Nu hi tuna nu Nyuna i Ala, màta ka peku himbu-danya Nyuna. Mili àru làti ka da-hàmburu-ya nu la rehi himbu manyàra-danya. Làti duna i Ala nda namarau-mbunda nyuta haàtu - haàtu.

²⁸Hama tuna na pakàli panii wàna na tau, ‘Nyuta hi taluri dàngu hi tanggoda dàngu hi ninda la pinu tana yiana paraï ruku kuaha-na Nyuna,’ ba wàna. Hama-mbuna na pawunda-da da mini luluku-mi, ‘Nyuta yia anana Nyuna-mata,’ ba wàda.

²⁹Nu ba tuna, ba ana Ala-maduta nyuta, àmbu ta-pakaka-dunya i Ala ba hama kahala hada marara-ya, mabaraya dàngu watuya na pa-pandoi tundunya na màhi limana na tau.

³⁰Na rehi ndubanda nyuta mbàda palànga-nanyaka mata paraïna i Ala, tàka nàhu paràha ndàba-nanyaka na tau la nggubulu pinu tana ka da-panjilungu welingu la nja - njala-daka.

³¹Nadu ba mbàda kawuku-nanyaka na hau rehi na rapa patanda-nanya ngera wàngu mamola na ihi nggubulu pinu tana. Na wai ngera nuna napa na-palaku-ya paraï na haàtu na pambàda pindina i Ala ndumana nuna. Dàngu ka peku pi hàmu-nanya tau mbuu ndàbana na rukuna nuna, i Ala na-paluri beli-yaka na tau nuna welingu la meti!” wàna.

³²Ba darongu-ka nuda da tau na ruku luri beli ba hàla pameti, ninja welingu lai nyuda da mariki-nya i Paulu. Ningu-madui mapanii, “Ma-mbuhangu pahili rongukau kau paniiya na rukuna nuna,” wàdanya.

³³Hàla i Paulu dunjaku-nanyaka na pauhi nuna.

³⁴Tàka ningu welingu la anguda nyuda da mapulu angunya i Paulu dàngu da mawaiya i Yehu, hama tuna: i Ndiunihiu, na angu batangu Areupanggu, dàngu na haàtu na kawini, na ma-tamungu Ndamarihu, dàngu ni - ni-manjapa da anguda.