Read Kambera NA RUKUDA DA PA-PAHURUNGU 18 Bible Online

NA RUKUDA DA PA-PAHURUNGU 18 - Kambera bible

NA RUKUDA DA PA-PAHURUNGU 18

¹Hàlaka patuna nu i Paulu dunjaku-nanyaka la Atena hi nalaku la Korinitu.

²Lai nu na-tàbuku-ya na haàtu na tau Yahundi, ma-tamungu Àkuwila, paweli-na la Potuhu. I Àkuwila bidi tàka-ana welingu la Italia, dàngu i Perikila na papaha-na. Hi da-pamaingu nyuda la Korinitu nadu i Hanganji Bokulu Kalaundiu ba na-paràha-dunyaka mbuu ndàbana na tau Yahundi paluhu welingu la Roma. I Paulu nalua pa-tadalu-ha nyuda,

³ka ndàdiku dàna-njaka lai nu dàngu naràma pambapa dànja nyuda, nadu ba na-pahama na paràma-da dàngu i Paulu la ngera himbu luri, nu la pawulu uma tera.

⁴Tàka la nimbihu lodu Hangahu, nalua la uma bungguru i Paulu pa-pabanjaru dànja da tau Yahundi ka pekuna da tau Yahundi hamanai da tau Yunani ka dawaiya i Yehu ba wàna.

⁵Ba datàka-ka i Hila dàngu i Timutiu welingu la Makandonia, nda ningu-apa pànjangu-na i Paulu pa-bobaru-ya na lii welingu lai Ala la tau Yahundi, ba jia-yaka na Hanganji Pa-mànangu i Yehu na paràndi-na i Ala.

⁶Tàka ba naingu biana na-rawaku-danya dàngu na-paaka-danya i Paulu, ka kàmbahu-nanjaka da aü la pakina, ba hau tandaya pa-panamu wànanja da njalada nyuda. Napanii, “Jàka mi-hanggàmaru dimi, panjala wiki-maminya! Nyungga duku pahàlangu-nggunyaka limanggu! Piti welingu nàhu laku-nggunyaka duku la tau nda Yahundi,” wàna.

⁷Hàla dunjaku-nanjaka nyuda paraïna i Paulu hi nalaku pa-ndàdiku la papa uma bungguru. Na uma nuna uma haàtu tau nda Yahundi-ya, tàka nalumu-nya i Ala. Na tamuna na tau nuna Titiu Yutuhu-ya.

⁸Ba tuna i Karipu, na kapala uma bungguru dàngu nggubulu-da da kalembi-na dapawai lai Miri Yehu. Dàngu nadangu-mbu na tau hawiangu la Korinitu na ma-patingi-nya na lii pa-patàka-na i Paulu, dàngu hi dawaiya i Yehu hi parunu-nja.

⁹La hau rudungu la hau harii mata, i Miri napanii-nya i Paulu, “Àmbu mangàdatu! Kareuku pangalangu bia dàngu àmbu kandii.

¹⁰Nadu Nyungga ba ndutu-manggunggau. Nda ningua haàtu mapeku pawulu akatu lai nyumu, nadu ba nadangu na tau la paraingu yiana na taunggu Nyungga,” wànanya.

¹¹Jia-duyaka ba tuna nu i Paulu hi na-paengangu la Korinitu, hau ndau ha-kawita-na, hi na-ajaru-nja puluna i Ala lai nyuda.

¹²Ba nggumbunuru-ya i Nggaliu la Akaya, da tau Yahundi da-pahamangu la pa-papanya i Paulu hi dangàndi-ya la rapatu.

¹³Da-jakaru-nya na pakàla wàdanya, “Na tau yiana na-titiru-ya na tau dangu la palumu-nya i Ala wànya na huri na ma-pandubakungu dàngu na ukuna i Muha!” wàda.

¹⁴Ka kuhema ba wànaka làti i Paulu, panii-ma-ananya i Nggaliu la tau Yahundi, “Ha nyimi tau Yahundi! Na pa-pakàla wàmi jàka era ningu papangga-na jàka ndia pa-akatu-na, ràkana jàka ku-patoru-nya la pa-patingi-nggai bai pakàla.

¹⁵Tàka yiana jia biaya bai palumu-nja da panii, da tamu dàngu da uku wikimi! Jia ba tuna mi-panjàpu wiki biaya dimi! Nambotu na etinggu nyungga la patimba-nja da ngga - nggàra da matuda nu!” wàna.

¹⁶Ka wàngga-nanjaka paluhu paraïna i Nggaliu.

¹⁷Ka yàpa-danyaka i Hohuteni, na kapala uma bungguru hi dapalu-ya la hangga menja rapatu. Tàka nyuna i Nggaliu nda nangguma-mbuanya na matuna nu.

¹⁸Hàlaka patuna nu namandai-mapa i Paulu ba na-engangu la Korinitu. Tunaka nu pabeli-nanjaka langu da tau da mapawai lai nu, hàla pa-lirungu-danyaka anguda i Perikila dàngu i Àkuwila la Hiria. La Kengikaria, na lunggina i Paulu na pambàda pulina pamalai nangguti-nya, nadu ba ningu panjanji-na lai Miri.[25]

¹⁹Ba datàka-ka la Epihu, dunjaku-nanjaka i Perikila dàngu i Àkuwila, hi natama la uma bungguru, hi da-panjonjangu kanandingu dàngu da tau Yahundi lai nu.

²⁰Dakarai-ya ka na-ndàdiku mandai dakinja nyuda, tàka nyuna nda nabihu.

²¹Na nyuna ba tuna, la rehi lakuwa ba wànaka, panii-nanyaka, “Jàka napuli-dungga i Ala, jiangu-madu napa ba kuhili beli lai yiahu,” wànanja. Nahàla-ka papanii tuna nu, laku-nanyaka welingu la Epihu.

²²Ba napuruka la Kaiharia, nalua-pa la Yeruhali la pa-patàka-nya lii malangu na kabungguru lai nu, hàla pangalangu-nanyaka la Atiokia.

²³Ba namandai-kika pa-ngiangu lai nu, hilu laku-nanyaka pa-tadalu-ya la ngaba Nggalatia dàngu Paringgia la pa-pamàndu-nja da pawaida da tau mapawai lai nu.

²⁴Ba talànga tunaka nu tàka-nanyaka la Epihu na haàtu na tau Yahundi na madedi la Alikuhandaria, na ma-tamungu Apolu. Nyuna namàhi pa-kareuku dàngu na-manyàmu-nya na ihi Huratu Matua,

²⁵dàngu pa-pandàmangu-mayaka la papinya na pa-ajaru rukuna i Yehu. Wàngu mbumbaru-na na patikingu-na lalu ma-nihiku-ya ba na-ajaru tau na rukuna i Yehu, jiapa ka jia-ayapa na pa-runungu-na i Yuhani na papina.

²⁶Lalu toru mbeniya i Apolu ba na-kareuku la uma bungguru, dàngu ba darongu-yaka na pa-ajaru-na paraïda i Perikila dàngu i Àkuwila, karia-danyaka nyuna la uma. Lai nu da-palara padeni-nya na rukuna na pa-pakaka-na i Ala la pa-pamàna-nya na tau rukuna i Yehu.

²⁷Tunaka nu pa-tikingu-nanyaka i Apolu palua la Akaya. Da tau da mapawai lai Yehu la Epihu da-tulihu-nja huratu da angu dedi da mapawai la Akaya ka danggepi-ya i Apolu. Dàngu ba na-tàkaka i Apolu la Akaya, na palingu langatàka na pa-ndulangu-na lai nyuda da tau da mbàda pawai lai Yehu paraï ruku mila etina i Ala.

²⁸Ba wàngu pa-mahumbarungu-ya i Apolu, na-pa-kamàndalu-ha da tau Yahundi da ma-patayaku dànya la hangga madangu. Dàngu na-paloha-nja da mbuti la nda - ndalaru la Huratu Matua ba jiaya i Yehu na Hanganji Pa-mànangu na paràndi.