Read Kambera NA RUKUDA DA PA-PAHURUNGU 19 Bible Online

NA RUKUDA DA PA-PAHURUNGU 19 - Kambera bible

NA RUKUDA DA PA-PAHURUNGU 19

¹Ba talànga ninya la Korinitu i Apolu, i Paulu njada-nanya la handàdiku ditana lai nu, hi lupa natàka la Epihu. Lai nu pa-hàmburu dàna-njaka da tau da mambàda pawai lai Yehu.

²Hi na-paàra-nja, “Màla angu dedi, mbàda ngalangu-mika Ngahuna i Ala ba jiaya na pawaimi lai Yehu?” wàna. Dahema nyuda, “Ndedia! Màlai ndedi-mapa duma ma-handàkangu parongu rukuna ba ningu Ngahuna i Ala,” wàda.

³“Jàka tuna nu nggàra pa-runungu-yaka na pa-parunungu wàngukai?” hi wàna i Paulu. “Na pa-runungu-na i Yuhani,” hi wàda nyuda.

⁴Hàla i Paulu hi napanii-nja, “Ba na-parunungu tau i Yuhani pa-lohangu wànanya ba pa-mbelingu-danyaka da tau nuda welingu la nja - njalada. Tàka ba talànga tuna nu i Yuhani napanii-nja da tau Ihirailu, nu nyuda ba dawaiya bàdi na Tau na manàmu-nya na ma-malamiri-nya nyuna, nu i Yehu,” wàna.

⁵Ba darongu-yaka nuna, hi parunu-nja nyuda la tamuna i Miri Yehu.

⁶Tàka ba talànga pa-dambàku-nanja lima paraïna i Paulu, ka kuaha-nanjaka paraï Ngahuna i Ala, pakiringu-danyaka pa-kareuku wàngu hilu - hilu panda tanda dàngu da-patàka-nya na lii welingu lai Ala.

⁷Nggubulu-da nyuda ningu tau hakambulu madua-ha.

⁸Tailu mbua wulangu mandaina i Paulu ba wàngu toru mbenina ba na-pangalangu papanii dànja da tau la uma bungguru dàngu ba na-patayaku dànja ka dapi hàmunya rukuna jàka nggikina i Ala ba na-pareta ba Hanganji-ya.

⁹Tàka ninja ba tau mapira-ha da anguda nyuda da ma-katiku watu da manda pawai. La hanggada mbuu ndàbada da tau da ma-pauhi lai nu da-paaka-nya na pa-ajaru rukuna na pa-pakaka-na i Ala la pa-pamàna-nya na tau rukuna i Yehu. Jia-duyaka i Paulu hi na-dunjaku-nja nyuda, hi nalaku karia-nja da ma-kikungu lai Yehu la kuru ngia pa-ajaru-na i Tiranu. Lai nu hau lodu - hau lodu na-pakanuturu dànja da tau.[26]

¹⁰Wàngu mànu - mànu-madua-naka nu lupa dàmbu ndauna, mbuu ndàbana na tau na ma-ngiangu la porupinihu Ahia, ka tau Yahundi-ya ka tau hau banjaru-yakai, mbàda rongu ndàba-danyaka na puluna i Miri.

¹¹I Ala nawunda-ha da pa-hangàtarungu da panda hamangu rukuna i Paulu.

¹²Da haputanga-na jàka ndia da tera borungu da pambàda pakina i Paulu, jàka ngàndiha la tau mahidu damanda memangu da hiduda dàngu da wàndi akatu-mbu daluhu memangu welingu la tau.

¹³Ninja ba mapira-ha da tau Yahundi da mapingu kabeli mata da malaku lai nu - lai nu pawàngga-ha da wàndi akatu welingu la tau. Nu da tau mapingu kabeli mata da-kamangu-mai duda pawànya na tamuna i Miri Yehu la pawàngga-ha da wàndi akatu. Dapanii-nja da wàndi akatu, “Lumuna na tamuna i Yehu na pa-bobaru-na i Paulu, luhukau wànggunggau!” wàna.

¹⁴Tau mapihu-ha da anana mini na ratu kapala, na ma-tamungu Hakewa, da mawunda-ya na matuna nu.

¹⁵Tàka napanii na wàndi akatu lai nyuda, “Kupinya i Yehu dàngu i Paulu-mbu kupinya, tàka nyimi na nggamukai?” wànanja.

¹⁶Tàka na tau na pa-huruku wàndi nahada lumbatu-nja dàngu hi na-ràkapu-ha wàngu mbàringu-na, ka palai-danyaka welingu la uma lai nu dàngu manua-da ba dàngu kaluluda, nadu da pakida ba na-bàriku-duhaka welingu la ihida.

¹⁷Mbuu ndàbada da tau Yahundi dàngu da tau hau banjaru da maninja la Epihu da marongu-ya na rukuna nuna, lalu mangàdatu-haka. Ka manaü wotu-madua-nanyaka tau na tamuna i Miri Yehu.

¹⁸Nadangu na tau na mambàda waiya i Yehu da mamai papeka-ha da pawunda - pawunda-daka la rehi na ma-làpahu.

¹⁹Dàngu nyuda da makàli yàpa kabeli mata, pauhi-danjaka da mbuku kabeli matada hi datunu-ha la hangga tau dangu. Da wilida da mbuku nuda jàka dihaha nggubulu-da ràkangu lima kambulu rata àmahu bara[27] -da.

²⁰Tuna nu na mbangatu-na na puluna i Miri[28] ba na-tanyalangu dàngu ba na-kapànduku na rukuna.

²¹Ba na-hàlaka nuda patumbu, bota-nanyaka i Paulu[29] palaku la Makandonia dàngu la Akaya hàla hi pangalangu la Yeruhali. “Kuhàla-ya lai nàhu, lupa kulua-mbu bàdi la Roma,” wànaka i Paulu.

²²Hi na-paràha-nja da tau madua da ma-pambapa dànya, nu i Timutiu dàngu i Eràtuhu palua la Makandonia; tàka nyuna ndàdiku-nanyapa ana pira mbua lodu la porupinihu Ahia.

²³Ràkangu la rehina nuna-duka ba natumbu na riu raü bokulu la Epihu karia-na na pa-ajaru rukuna i Yehu.

²⁴Nadu la paraingu lai nu ninya na haàtu na matuku àmahu bara, na ma-tamungu Ndemitiriu, na matuku ana uma marapu kudu ndumana na marapu Àratemihu. La paràma nuna da-ngalangu padangu wundada da tau da maràma lai nyuna.

²⁵Jia-duyaka ba tuna nu hi na-pauhi-nja da anguna paràma da-papohungu ndàba da maràma la matuku àmahu bara hawiangu, hi napanii-nja, “Angu dedi! Mipinya na paràma yiana ba jiaya na pa-ngalangu wànda.

²⁶Nàhu nyuna angu dedi, ita-mami-nyaka dàngu rongu wiki-mami-nyaka jàka nggàra ulana i Paulu. Nyuna ba napanii da marapu pa-pandoi wàngu lima tau nda marapu-aha wàna. Dàngu nangala padangu-maka tau mawaiya na pa-ajaru-na, nda mbulungu yiahu bia la Epihu, tàka tika patuu ndàba-mana la nggubulu Ahiambu.

²⁷Na pa-hanggàmaru wàngu jiaya ba naruha wànyaka na tamuna yiana na pa-paloku-nda. Dàngu nda jia biaya nuna, tàka napa na uma marapu Àratemihu-mbu nda na-kawela-anyapa tau dàngu napa na bokulu-na nalapi-yaka; làti duna nyuna ba marapu palumu hàlana na tau la Ahia dàngu la nggubulu pinu tana!” wàna.

²⁸Narongu-yakaka nuna paraï da nuda da tau, mbana wàngu-madua-danyaka da etida, hi dawara, “Ma-bokulu-ya i Àratemihu na marapu tau Epihu!” wàda.

²⁹Ka pariu raüngu hàla-nanyaka mbuu ndàbana na paraingu. Tunaka nu da ma-pakapulingu pa-pariwatungu yàpa-danjaka i Nggayuhu dàngu i Aritàruku, tau Makandonia da mamai karia-nya i Paulu nàmu la ànda, hàla hi dayila-ha la talora ngia pa-imingu la paraingu lai nu.

³⁰Ka kutama karia-nja wàna làti i Paulu, tàka dahiri-nya tau lai nu da mapawai lai Yehu.

³¹Ba tau mapira-ha da tau bokulu la porupinihu Ahia, da ma-ariya-nya i Paulu da-paràhangu tau papanii-nya i Paulu, ka àmbu na-pawuwangu wikina la talora ngia pa-imingu.

³²Ba talànga tuna nu pa-riwatu pakiu kaüngu-madua-danyaka da tau ma-pauhi la talora ngia pa-imingu. Ningu mawara tuna ni, ningu mawara tuna nu, nadu ba dadangu lai nyuda da manda pinya na pa-pauhi wàngu lai nu.

³³Hawiangu welingu lai nyuda làbu jiaya i Alihandaru duna na ma-patitiru wàda bia, nadu ba nyuna na pa-jukaru-da la hangga paraï da tau Yahundi. Ka pa-maüngu wàngu-nanyaka lima i Alihandaru ba nakarai manggawangu la pa-wuangu lii kaloka la ngera wikina la hangga tau dangu.

³⁴Tàka ba daita-yaka nyuna ba tau Yahundi-ya, handàka wara pakodungu-madua-daka, “Ma-bokulu-ya i Àratemihu na marapu tau Epihu!” wàda.

³⁵La malamiri-na na panitera paraingu-ka na mamàka pa-kamàndalu-ya na tau dangu. Napanii, “Ha tau Epihu! Mbuu ndàbana na tau napinya ba la Epihu na ma-tanara-ya na uma marapu Àratemihu dàngu na watu hàri na ma-kanabu welingu la awangu.

³⁶Nda ningua haàtu matara pa-pandia-ya nuna. Jiaya nu kamàndalu, àmbu jia nda pananjarungu-mi, jàka nggàraya na pawunda-mi.

³⁷Yiada da tau bai ngàndiha yiahu nda ruku rambangu-danya la uma marapu jàka ndia nda ruku paaka-danya na marapu-nda.

³⁸I Ndemitiriu dàngu da angu ràmana jàka ningu hau pa-pakàla wàda hanggangu la haàtu, màta ka dangàndi-ya na palakara-da la rapatu. Na rapatu na-tabunggahu mànu la matungu nu dàngu da ma-katangu pareta ni mànu-manja.

³⁹Tàka jàka hilu ningu hangia na pa-karuhi-mi, màta ka botaya la rapatu nggubulu mangaba-nya na matungu nu.

⁴⁰Nadu jàka nggàraya na matumbu nàhu peku panjala wànguya. Peku-mbuna ba nakàla-ta tau, kawutaru-danya hi da-pariu raüngu wàdanda, nadu ba nda ningu latana na ngia pa-padeni-ndanya na pa-riwatungu yiana,” wàna.

⁴¹Ba hàlaka pa-wàlahu ndàbaya nuna, paràha-nanyaka pabeli na tau dangu paraïna na panitera paraingu.