Read Kambera NA RUKUDA DA PA-PAHURUNGU 2 Bible Online

NA RUKUDA DA PA-PAHURUNGU 2 - Kambera bible

NA RUKUDA DA PA-PAHURUNGU 2

¹Ba toma-yaka na lodu Petakota, mbuu ndàbada da mapawai pauhi-danyaka la hau pangia.

²Hi jia rongu biada malingu welingu la awangu ba hama tunguna na ngilu mbangatu. Na uma ngia pa-mandapu-da da tau nuda nahibu hàla-nyaka malingu.

³Hàla ka ita-danjaka da làma ba hama roka epiha da ma-làmbatu lai nu - lai nu dàngu hi na-tunggulu màra haàtu-ha nyuda.

⁴Ka kuaha hàla-madua-nanjaka paraïna Ngahuna i Ala, hi da-pakiringu pa-kareuku wàngu hilu hangia - hangia. Ba da-kareuku nyuda tundu-danya na pawua-nanja Ngahu la pa-kareuku.

⁵La rehi nu dangu tau Yahundi welingu la hau tana - hau tana la pa-nggubulu awangu, da maninja la Yeruhali. Nyuda mbuu ndàbada tau ma-manundu lai Alaha.

⁶Ba rongu-yaka nu na malingu, dangu langatàka tau mamai pa-langgungguru. Nyuda mbuu ndàbada da-katàtaku ba darongu-ha da tau pawai ba da-kareuku la hiluda nyuda haàtu - haàtu.

⁷Dawàngu pa-hangàtaru dàngu maratangu ba dapanii, “Da tau da ma-kareuku yiada yia mbuu ndàbada tau Nggalilia-ha? wàngguka.

⁸Ka nggikina hi tarongu-haika ba da-kareuku wàngu hilu la tananda haàtu - haàtu?

⁹Nyuta tau ma-pawelingu la Pàratia, la Mendia, Elàmu, welingu la Mahupatamia, Yundia dàngu Kapandokia, welingu la Potuhu, dàngu Ahia,

¹⁰welingu la Paringgia dàngu Papilia, welingu la Mehiru dàngu ngabana la Limbia lihina la Kireni, ningu lai nyuta mamai welingu la Roma,

¹¹ningu tau Yahundi dàngu tau la banjaru hawiangu da matama la anggama Yahundi; ningumbu tau mawelingu la Kareta dàngu Arapu. Tarongu hàla-maha ba da-kareuku la hilunda nyuta haàtu - haàtu, ruku hangia - hangia da pa-hangàtarungu da pa-patumbu-na i Ala!” wàda.

¹²Pa-kariangu hangàtaru dàngu maratangu-da da pa-àrangu dàngga anguda, “Nggàra wànaka ihu yia?” wàda.

¹³Tàka ningu-madui ma-parikingu, “Ha, maüku-adanya dumu!” wàda.

¹⁴Ka hadangu-nanyaka i Peturu hamanai da pa-pahurungu hakambulu haàtu hawiangu, tunaka nu tungu-nanyaka kareuku-na la tau dangu. Na-pakodungu-ma ba napanii, “Angu dedi, tau Yahundi dàngu mbuu ndàbami ma-ngiangu la Yeruhali! Patingi pa-hàmungu, nadu na rukuna yiana ku-pakaloka-nya bàdi lai nyimi.

¹⁵Da tau yiada nda maüku-adanya, hama tuna bai kakaya; nàhu ba hina pàku njàmu hiwaya la mbaru.

¹⁶Tàka yiana mbàda peka-mana-nyaka paraïna i Ala la ngaruna i Wunangu Yoilu:

¹⁷Na puluna i Ala, ‘La njàpuna na rehi napa kuburi-ya na Ngahunggu la tauka mbuu ndàbana. Da anami mini dàngu da anami kawini napa da-bobaru-nggai nyimi ruku hangia - hangia na papeka-nggunja nyuda. Da bidi minimi napa da-itangu hangia - hangia da pa-paita-nggunja. Da ma-kaweda-mi napa da-manggadipangu rukuna na manggadipangu pawua-nggunja nyuda.

¹⁸Da ata-mbunggu — ka miniha ka kawini-hakai — , napa kuburi-nja na Ngahunggu la lodu - lodu nuda. Napa dapeka hangia - hangia da papeka-nggunja nyuda.

¹⁹Napa kutuu pahanga - ngàtarungu nu dita la awangu, dàngu hangia - hangia na manda ningu hamangu lai yiahu la pinu tana; napa ningu ria dàngu epi, ma-hangolungu dàngu ma-kutungu.

²⁰Na mata lodu napa na-kapàtangu, na wulangu napa narara hama tuna wai ria ba ndedi jiaya na Loduna i Miri, na lodu bokulu dàngu mangarangu na manàmu-nya.

²¹La rehi nuna, na tau na mawara-nya i Miri jiaya na pa-pamànangu,’ wàna.

²²Angu dedi tau Ihirailu! Ronguya yiana jàka nggàraya na papeka-nggunggai: Nu i Yehu tau Naharitu pa-wuangu wai ngera-mayaka paraïna i Ala ndumami nyimi. Nuna ita hàmu-manda-nyaka la pahanga - ngàtarungu dàngu hangia - hangia da manda ningu hamangu da paraï rukuna i Ala la ngaruna i Yehu. Nuna mbuu ndàbana pi hàla-mami-nyaka angu dedi.

²³Pa-namatu-nya na pambàda pakaka wiki-mana duna, bota-duna-nyaka la pa-pakata-nya i Yehu lai nyimi. Ba na-pakata-nggainyaka, pameti-minyaka bai pahia-nya na tau akatu la pa-harika-nya Nyuna.

²⁴Ba tuna na-paluri beli-yaka paraïna i Ala welingu la honga tau meti. Tubangu-ma ba na-kawàluku-nya meti, na nyuna na-pahàla-ya paraïna i Ala, ba nda peku-ana ka na-kuaha pangala-nya meti.

²⁵Na ngerana nu i Yehu, mbàda tiki-mana-nyaka paraïna i Ndautu, ‘Kuita mànuya nyungga i Miri la hangganggu; Nyuna na-karaha-ka, ka àmbu peku kàduku-nangga jiapa nda nggàraya.

²⁶Nuya na kirina hi na-nggaüru na etinggu, na ngarunggu nawunda-nya wotu hailangu: na taunggu yiana nedingu-na padua dàngu mànjaku-na daa la retinggu.

²⁷Nadu ba ndau pahia-anya dumu na hamangu-nggu pa-paengangu la parai mameti. Ndau pahia-anya dumu pa-làjaru dàngu pa-molungu na atamu na ma-tuturu.

²⁸Mbàda paita-munggaka ànda ma-hanggangu la luri ma-langatàka. Mbaha nda ukuya na etinggu nadu ba karia mànu-mamungga,’ wàna.

²⁹Angu dedi, pahia àrungga ka kupanii pangala lulunya na ngerana i Ndautu, na boku la mangilu-nda. Nyuna nameti-ka dàngu pa-taningu-mbuyaka; na retina ni-manyapa la padua-nda nyuta lundu nàhu.

³⁰I Ala naràndi-mayaka i Ndautu, ba nawàngu pa-harangu, na haàtu welingu la wàlana nawotu-ya napa pa-hanganji paraïna i Ala. Nyuna i Ndautu napinya nuna na pa-ràndingu dàngu ba haàtu wunangu-mbuya nyuna,

³¹napi-mbunya jàka nggàraya napa na pa-patumbu-na i Ala. Jia-duyaka hi nanyura-ya, nu na Hanganji Pamànangu na paràndi-na i Ala, ba naluri beliya napa welingu la meti. Na liina i Ndautu, ‘Nda papuli-anya nyuna pa-paengangu la parai mameti; nda na-làjaru dàngu nda na-molungu-a napa na tauna,’ wàna.

³²Jiaya i Yehu nuna-maka na pa-paluri belina i Ala welingu la meti. Nyuma-maka yia mbuu ndàbama ma-hakahii wikinya na rukuna nuna.

³³Pawotu-yaka Nyuna la ngia pa-mandapu-na na majangga dàngu nawua-nyaka kuaha paraïna i Ala, hi nangala-nya na Ngahuna i Ala na pambàda ràndina i Ama. Tàka nàhu na parongu-mi dàngu na pangita-mi, jia-mayaka na Ngahu nuna na paburi-nanggama Nyuna.

³⁴I Ndautu wiki nda naheia la awangu, tàka napanii-na, ‘I Miri napanii-nya na Miringgu:

³⁵Mandapu-wa la kawana-nggu,[3] hi lupa ku-pawiti-nja panyàku lai nyumu da muhumu!’ wànanya.

³⁶Nunaya na pakiri-na mbuu ndàbana na tau Ihirailu napi hàmu-manya bàdi, nu i Yehu na pa-harika-mi, jiaya i Yehu nuna-maka na pawotu-na i Ala màta ka Miriya dàngu ka Hanganji Pa-mànangu-ya!” wàna.

³⁷Ba darongu-yaka na rukuna nuna, bàrangu-danyaka da etida. Hi da-paàra-nya i Peturu dàngu da pa-pahurungu hawiangu, “Angu dedi, ka nggikina wàma-aka bàdi nyuma?” wàda.

³⁸Nahema i Peturu, “Manjaria-wa welingu la nja - njalami. Dàngu màtawa ka parunu màra haàtu-nggai la tamuna i Yehu Karitu, ka peku jàmanja da njala-mika. Tàka hi mingala-nya napa na Ngahuna i Ala na pawua juana i Ala.

³⁹Nadu nuna na paràndi-na i Ala ba tunggumi nyimi-maya dàngu da wàlami, dàngu tungguna mbuu ndàbana na tau la mamarau — nu mbuu ndàbana na tau na papaau-na i Ala Mirinda la pamai lai Nyuna,” wàna.

⁴⁰Tuna nuduka i Peturu ba na-pakaloka-nja nyuda. Dàngu dangu-mapa kareuku hangia - hangia ba na-panamu-nja ka peku butuhu-da wikida welingu la banjaru na ma-akatu da-pahuku-na napa i Ala.

⁴¹Nadangu na tau mawaiya na kareuku-na i Peturu, hàla hi parunu-nja. Nggubulu-na na tau na mapawai la lodu nuna, da-bonjangu-ka anguda tau tailu rata.

⁴²Pa-kunjangu-madanya pa-ajaru welingu la pa-pahurungu dàngu nuangu-mana ba da-pauhi ndàba. Nyuda da-mbulungu ba dangangu da-mbulungu ba da-hamayangu.

⁴³Dangu langatàka pa-hangàtarungu pawunda-da da pa-pahurungu, hi lupa na-maratangu dàngu na-mangàdatu hàla na tau.

⁴⁴Da tau da mapawai mbuu ndàbada mbulungu-maada, dàngu jàka nggàraha da pamangu-da maràngga wà hàla biada-nja.

⁴⁵Nyuda dadangga-nja da malanja-da dàngu da banda pawulu-da, hàla hi dapabe - berinja da nduida la hapa-anguda tundunya na pa-kalana haàtu - haàtu.

⁴⁶Hau lodu - hau lodu pauhi mànu-madanya la Umana i Miri; màlamai ba dangaa pa-matarungu dàngu nggaüru eti pa-kariangu wawa etida la hau uma - hau uma.

⁴⁷Nyuda dawotu mànunya i Ala dàngu nambuha hàla-manja paraï tauka mbuu ndàbana. Hau lodu - hau lodu bo - bonjangu-mananya na danguda, nadu i Miri ba wua-mananja nyuda tau pa-pamànangu.