Read Kambera NA RUKUDA DA PA-PAHURUNGU 21 Bible Online

NA RUKUDA DA PA-PAHURUNGU 21 - Kambera bible

NA RUKUDA DA PA-PAHURUNGU 21

¹Ma-kawàra pa-belingu langu dàngu da amabokulu kabungguru welingu la Epihu, tunaka nu dunjaku-manjaka. Ka paliru pangalangu-manyaka la nuha Kohu, hadangu harii tàka-manyaka la nuha Ronduhu. Welingu lai nu paliru pa-ngalangu-manyaka lundu tàka la pahiwi Patara.

²La Patara matoma-nya na kapalu na malaku la Pinihia. Ka hei-manyaka la kapalu nuna, hi malaku,

³dàngu pa-lirungu-manyaka hi lupa maita-ya na nuha Hipuru la patu kalaima; ba tuna ma-paliru pangalangu hanggangu la Hiria. Mapuru la Tiruhu, ba lai nudu na kapalu paheima na-papurungu ningu ngàndina.

⁴Lai nu malua pa-tadalu-ha da tau da mapawai lai Yehu, hi ma-ndàdiku dànja nyuda, hau mingguma. Ruku pa-jujungu-na na Ngahuna i Ala dapanau-nya i Paulu, ka àmbu nalua la Yeruhali.

⁵Tàka ba nanjàpu-ka na rehi patuma la pa-ndàdiku lai nu, dunjaku-manjaka nyuda hi ma-pangala-nya na lakuma. Nyuda mbuu ndàbada dàngu ana papaha-da dalua hàla pa-kareni-nggama la hambeli paraingu. Lai nu la hingi tehiku, mbuu ndàbama ma-patika hi ma-hamayangu.

⁶Hàlaka nu kawàra patambi-manyaka, hàla hei-manyaka la kapalu dàngu nyudai duda beli-danyaka la uma.

⁷Paliru pa-ngalangu-manyaka welingu la Tiruhu tàka la Patolumaï. Lai numbu malua pa-tadalu-ha da angu dedi da mapawai, la pa-patàka-nja lii malangu lai nyuda, hi ma-ndàdiku hau lodu lai nyuda.

⁸Hadangu harii hili hadangu-manyaka, hi matàka la Kaiharia. Lai nu lua-manyaka lai Pilipu na mangàndi Lii Mànangu, hi matodu la umana. Nyuna jia-duyaka na haàtu welingu la tau mapihu da papindi la Yeruhali.

⁹Da anana kawini ba tau mapatu-ha nawua-manjaka pamàka wàngu paraïna i Ala la pa-bobaru-ya na lii welingu lai Ala.

¹⁰Ba pira mbua lodu-naka na mandaima lai nu, tàka-nanyaka welingu la Yundia na haàtu na wunangu, na ma-tamungu Anggambu.

¹¹Nyuna namai lai nyuma, hi napiti-ya na boru bànggina i Paulu. Na boru bànggi nuna nahondu wànja da wihina da lima wikina, hàla hi napanii, “Yiana-ya na puluna na Ngahuna i Ala: Na mamangu boru bàngginya yiana napa pahondu-ya hama tuna yiana la Yeruhali parai da tau Yahundi, dàngu hi pakata-nya la tau nda Yahundi,” wàna.

¹²Ba marongu-yaka nuna, nyuma dàngu mbuu ndàbada da angu dedi da maninja la Kaiharia nda uku kamahi-manya i Paulu ka àmbu nalua la Yeruhali.

¹³Tàka nanapa-ya nyuna, “Nggàra linguna nyimi angu dedi bai hii timi nu hi lupa na-làjaru wànya na etinggu? Nyungga duku wai rehingu-manggu-nyaka nda jia bia ka yàpaka lai nu, tàka la pameti-mbu lumuna i Miri Yehu,” wàna.

¹⁴I Paulu nda na-patingi-a-nggama nyuma, ka pànjangu-manyaka pahiri-nya, “Na pambuha-na i Miri biaka duna na manjadi,” wàma-maaka.

¹⁵Ba mamandai-kika lai nu, paloku-manjaka da ngàndima, hàla hadangu laku-manyaka la Yeruhali.

¹⁶Tau mapira-ha da angu dedi la Kaiharia dalaku karia-mbu-nggama ba dalua patu-kama la umana i Manahungu,[33] nadu ba la umana nyunadu napa matodu ningu. (I Manahungu tau Hipuru-ya, mandai kikungu-manaka duna lai Yehu.)

¹⁷Ba matàka-ka la Yeruhali, da angu dedi lai nu danggepi hàmu eti-ma-kama.

¹⁸Hadangu harii lua kariangu-manyaka i Paulu pa-tadalu-ya i Yakombu; mbuu ndàbada da liku uru kabungguru nimbunja lai nu.

¹⁹Ba mahàla-ka pa-patàka-nja lii malangu, i Paulu na-wàlahu-nja nyuda mbuu ndàbada da pawunda-na i Ala rukuna nyuna la tau nda Yahundi.

²⁰Ba darongu-yaka na papeka-na i Paulu, nyuda mbuu ndàbada wotu-danyaka i Ala. Hàlaka nu hi dapanii-nya i Paulu, “Angu dedi Paulu! Màta kau pinya ba nda pira ra - rata biaya-ka na tau Yahundi na mawaiya i Yehu. Nyuda mbuu ndàbada tau tuturu-ha la patundu-nya na ukuna i Muha.

²¹Tàka nàhu darongu-makauka bau ajaru hàlaya na tau Yahundi da maninja la honga tau hau banjaru ka da-pahàla-nya na ukuna i Muha. Nyumu mupanau-nja nyuda ka àmbu dakàri-ha da anada jàka ndia la patundu-nya na huri lumungu Yahundi.

²²Nàhu da tau Yahundi da mapawai darongu-maka duda ba ninggauka lai yiahu. Nàhu nggikina wàndaka?

²³Nahàmu nu kau wànya na panaungu-ma nyuma. Ninja lai yiahu ba tau mapatu-ha da maningu njanjida lai Miri.

²⁴Màtawa kau patumbu lii hawari, kau hawari wikimu dàngu nuda da tau, kau tanggu mbayaru-nja ba dangguti-nja da lunggida.[34] Ba tumu nu wuwa wàngu-duna-nyaka la tau mbuu ndàbana, jàka nggàraya na parongu-da na rukumu nyuma ba nda na-patubangu, nadu nyumu wiki ba nunju-madu-munyai dumu da ukuna i Muha.

²⁵Tàka na ngerada da tau nda Yahundi da mapawai lai Yehu, mbàda pangàndi-mama-njaka huratu rukuna na pabota-ma: ka àmbu dangangu pangangu pambàda mangejingu la marapu, ka àmbu dangangu ria, jàka ndia tolu banda mameti kabuta; dàngu ka àmbu dawunda ma-iraku nu na njuraku wàmanja,” wàdanya.

²⁶Ka lua-nanyaka i Paulu dàngu nuda da tau mapatu hi da-patumbu lii hawari wikida hadangu harii. Tunaka nu tama-danyaka la Umana i Miri la papeka ba pira mbua lodu-manapa hi mangu pa-panjàpu-ya nuna na lii hawari dàngu kameti ndumada haàtu - haàtu da pa-maraku wàda.

²⁷Ba mareni njàpu-ama-naka na rehi pa-kawuku pihu mbua lodu, ninja ba tau ma-piraha da tau Yahundi welingu la Ahia daita-ya i Paulu daa la Umana i Miri. Ka runda-madua-danyaka na tau dangu hi dayàpa-ya i Paulu,

²⁸ba dàngu kaladaku-da, “Wuu tau Ihirailu, pa-ndulangu! Yiana-yaka na tau na malaku lai nu - lai nu pa-ajaru hàlaya na tau la pa-papanya na banjaru Ihirailu, la pa-papanya na ukuna i Muha dàngu la pa-papanya yiana na Umana i Miri. Tàka nàhui nyuna na-karia-nja da tau nda Yahundi patama la Umana i Miri dàngu ba na-pairaku-mbuya yiana na pangia matua!” wàda. (

²⁹Hi dapanii tuda nu nadu ba daita-ya i Torupimu tau Epihu la paraingu karia-na i Paulu, ba dakaka-ya na-karia-manyaka duna i Paulu la Umana i Miri, wàda.)

³⁰La nggubulu paraingu pariu raüngu-nanyaka, dàngu mbuu ndàbana na tau palai - lai-nanyaka pa-langgungguru. Ka yàpa-danyaka i Paulu hi dayila-ya paluhu welingu la Umana i Miri. Ndedi mbàdiku-na bita-madua-danyaka na pindu Umana i Miri.

³¹Ba talànga pa-kakangu-daka la pa-pameti-ya i Paulu paraï da tau da ma-pariwatungu, patàka-danyaka lii na kimunda tanatara Roma ba kanyaüru hàla-nanyaka la nggubulu Yeruhali, wàdanya.

³²Ka manyamalu piti-nanjaka ba mapira-ha da parawira dàngu da panjuri paraïna kimunda hi dapare - renggangu palaku la pangia mapariu raüngu. Nu da tau dangu ba daita-yaka na kimunda dàngu da pambana, jiaka-danyaka papalu-ya i Paulu.

³³Ka lua-nanyaka na kimunda payàpa-ya i Paulu, hi na-paràhangu tau patunya nggili bàhi. Tunaka nu paàrangu-nanyaka na kimunda jàka nggàmuya i Paulu dàngu jàka nggàra ulana.

³⁴Hawiangu na tau dangu nahema tuna ni, tàka hilu hawiangui nahema tuna nu. Nu ba tuna nu na-kanyaüru-na ka lupa nda napingu-pa na kimunda pa-karuma-ya jàka nggàra langatàka-ya na madedi. Jia-duyaka ba tuna nu hi na-paràhangu palaku ngàndiya i Paulu la katindi tanatara.

³⁵Nu ba dalaku ngàndi-yaka tàka la panongu ka hambutalu-danyaka pa-panyara, nu da tau ma-pariwatungu mambana ailulu-ha, hi lupa dawàngu paduku-ki-ayaka i Paulu paraï da panjuri.

³⁶Ndàki-madanya welingu la kajia paraï da ma-kapuli pa-pariwatungu, ba da-warangu, “Pametiya!” ba wàda.

³⁷Ka tamawa hu daa la katindi ba wàdaka, paramihi-nanyaka i Paulu la kimunda, “Pekuna nu umbu ka kupanii danggau?” wàna. “Kau pingu nyumu hilu Yunani?” hi wàna na kimunda ba na-paàrangu.

³⁸“Jàka tuna nu ka nda jia-akau na tau Mehiru yia nana na ma-pakunggalungu, ba napalai ngàndiha da tau patu rata mambinu madàka-da la maràda telangu?” wànanya.

³⁹Nahema i Paulu, “Nyungga tau Yahundi-ka, tau ihi paraingu la Tàruhu-ka, paraingu ma-kawulangu la tana Kilikia. Màla àru kau pahia-ngga papanii dànya yiana na tau dangu,” hi wàna.

⁴⁰Ba na-pahia-nyaka i Paulu la pa-kareuku, ka ndolaku-nanyaka i Paulu la panongu, hàla hi na pamaü wàngu limana. Na-kamàndalu hàla na tau. Tunaka nu ka panii-nanyaka i Paulu la hilu Imbarani. Tuna yia na paniina i Paulu,