Read Kambera NA RUKUDA DA PA-PAHURUNGU 26 Bible Online

NA RUKUDA DA PA-PAHURUNGU 26 - Kambera bible

NA RUKUDA DA PA-PAHURUNGU 26

¹I Ànggaripa napeka-nya i Paulu, “Nyumu pa-pahiangu-kau ka la pa-kahiri wikimu,” wànanya. Ka wulaku-nanyaka limana i Paulu ba nawunda-ya na pa-kahiri wàna wikina,

²“Tamu umbu Ànggaripa Ma-pangarangu! Nàhu wangu langatàka-manaka duku lai nyungga wànggu, ba peku wunda-nggunya na kahiri-nggu wikinggu jia pàku-yai la hanggamu nyumu Tamu umbu, na ruku kàla-dangga da tau Yahundi,

³ri - rihi nyumu bau pinya na uku hidana dàngu na nggoda nggàduku-na na tau Yahundi. Jiaya nu màla àru Tamu umbu kau patoru-nya la pa-patingi-nya na taranga-nggu.

⁴Mbuu ndàbada da tau Yahundi dapi-manya jàka nggikina na luringgu ba pabidi minika. Dapinya piti welingu ba bidi minika, luri weli-mangguka la honga banjaru wikinggu la Yeruhali.

⁵Mandai-maka ba dapingga nyungga. Dàngu jàka da-mbuhangu peku-mana nyuda la pa-hakahii-ngga nyungga, welingu la wunga-manaka duku ba kuluri hama tuna na tau Parihi ba kutundu-nja da kalaratu da marihi pa-jorutungu la anggama-ma nyuma.

⁶Tàka nàhu hi ku-ndolaku lai yiahu la pa-rapatu-ka jiaya ba kuwaiya na pa-ràndingu na-patura-na i Ala dàngu da boku la mangilu-ma.

⁷Jiaya na pa-ràndingu nuna-maka na panedi napada da hakambulu dàmbu kabihu banjaru Ihirailu, hi kiri lumu-danya i Ala rudungu lodu. Tàka jia pàkuyai na wainggunya nuna na pa-ràndingu, Tamu umbu ma-pangarangu, hi panjala wa biada-ngga da tau Yahundi.

⁸Nggikina da angu dedi tau Yahundi hi nda dawaiya i Ala ba na-paluri beliya na tau na mameti?

⁹Àmangu nyungga wikimbu kuwa-manyapa nuna ba ma - màtu palinggu ka ku-ndubaku wànya i Yehu welingu la Naharitu ba wànggu làti.

¹⁰Jia-mayaka nuna na pawànggu la Yeruhali. Ba kuwàngu huratu kuaha-da da ratu kapala, dadangu da tau ma-tuturu lai Ala papuhi-nggu la uma kapàtangu. Màlai ku-tundungu-mbu pa-patunju-ya ba pa-panggàna-nja hukungu meti.

¹¹Pambirangu bia nyungga ba ku-pamayila-ha la uma bunggu - uma bungguru, ba pambana-ha ka da-kanduli-nya nuna na pawaida. Lalu mbana mbanaya na etinggu hanggangu lai nyuda, hi lupangu la hau parai - hau paraingu kulua-mbu pakeha-nja nyuda,” wàna.

¹²“Jia-mayaka nuna na pawuku-nggu hi kungàndi huratu kuaha welingu la ratu kapala ba kulaku la Ndamàhiku.

¹³Tàka nàhu la padua ànda, la tidu lodu, Tamu umbu ma-pangarangu, hi jia ita bianggunya na kajilaku welingu la awangu, na harii hipu-yapa na matalodu. Na kajilaku nuna na-tapanjiru winggiru-ngga dàngu na-winggiru-nja da karia-nggu.

¹⁴Pàha wàma hàla madua-ka la tana. Hàla rongu-nggu-nyaka lii mapanii dàngga la hilu Imbarani, ‘Hauluhu, Hauluhu! Nggikina nyumu hiu pa-mayila mànuka? Napa nyumu wiki ma-katiu, jàkau nutakungu la palawa-nya na pa-irungu-na Nyuna na pamirimu,’ wàna.

¹⁵Ka paàra-nggunyaka, ‘Ka nggamukau Miri?’ hi wànggunya. Tàka nahema i Miri, ‘Ka Nyunggadu Yehu na pa-mayila-mu.

¹⁶Hadangu-wa kau ndolaku! Hi ku-pajilikungu wikinggu lai nyumu na pawuku-nggu màta ka kuwotu-ya la palumu-ngga Nyungga wànggunggau. Màta kau bobaru-ya la tau hawiangu nggàraya na paita-mu la lodu nàhu rukunggu Nyungga[35] dàngu rukuna jàka nggàraya napa na pa-paitangu-kau la rehi na manàmu-nya.

¹⁷Napa Nyungga ku-pahàla-kau welingu la banjaru Ihirailu dàngu welingu la ba - banjaru nda Yahundi. Napa Nyungga ku-palewa-kau palua lai nyuda

¹⁸la pa-pabula-nja da matada, ka peku luhuda welingu la kapàtangu dàngu ka datama la maharii; ka peku pahàla-da welingu la limana i Kambàliku, ka na-kuaha-ha paraïna i Ala. Paraï ruku waidangga Nyungga napa da njalada pa-jàmangu-ha dàngu nyuda napa angu-daka na kabungguru-na i Ala na papindi,’ wànangga,” wàna.

¹⁹“Jia-duya nu, Tamu umbu Ànggaripa, nyungga duku ku-pamukarungu mànuma la pa-manundu la paita-nggu welingu lai Ala.

²⁰Nyungga ku-paailulu-maanja ba kupeka-nja da tau, ba da-pambelingu-ma bàdi nyuda welingu la njalada dàngu ka da-pajàmangu wikida lai Ala màlai ka da-paitangu la lurida nyuda ba tau ma-pambelingu-haka welingu la njalada. Nyungga ku-bobaru-ya nuna la kawunga-na la Ndamàhiku, hàla la Yeruhali dàngu la nggubulu Yundia, dàngu la hongada da tau nda Yahundi.

²¹Lumuna nuna-duka da tau Yahundi hi dayàpa-ka la Umana i Miri dàngu hi da-patikingu pa-pameti-ka.

²²Ba tuna lundu la rehi nàhu mangga-nangga padua paraïna i Ala, hi lupa peku ndolaku-nggu lai yiahu la pa-hakahii-nya la tau mbuu ndàbana — la ma-bokulu la makudu. Nggàraya na papanii-nggu yiana nda hili hau-aya welingu na pambàda nyurada da wunangu dàngu i Muha;

²³nu na Hanganji Pa-mànangu na paràndi-na i Ala ba lupangu bàdi na-mayila, dàngu ba jiaya Nyuna na ma-kawunga hadangu beli ba nahàla pameti; nu ba tuna nu hi pekuna ba na-pakada-nya na harii — nu na mànangu — ka la tau Yahundi-kai màlambui la tau nda Yahundi,” hi wàna.

²⁴Ba talànga wunda-nanyaka nu i Paulu na pa-kahiri wàna wikina, wara-nanyaka i Petuhu, “Katoba-munyaka na Paulu! Na pingumu na malalu danguna, jia-yaka na ma-pakatoba-kau!” wànanya.

²⁵Tàka nahema i Paulu, “Nda katoba-anggunya ma-pangarangu. Da pulungu da pawunda-nggu deningu-mada dàngu luhuna welingu la kanandingu hàmu-manggu.

²⁶Nyuna wiki i Tamu umbu Ànggaripa napi hàmu-manja da rukuda nuda. Jia-mayaka nuna hi kutoru mbeni pa-kareuku pa-ailulungu la hanggana nyuna i Tamu umbu. Ba kupi hàmu-manya welingu nudaka nda ningua panda pina i Tamu umbu, nadu nuda mbuu ndàbada nda ningua manjadi la ma-kawiningu.

²⁷Tamu umbu Ànggaripa Ma-pangarangu, màla muwaiha wàngguka da papanii-da da wunangu? Kupi-manya bau waiha nyumu Tamu umbu!” wàna.

²⁸Hàla i Ànggaripa napanii-nya i Paulu, “Bau rekiya namuda wàmu bia la pa-panjadi-ka nyungga tau Karitu la rehi na ma-dànggitu yiana?” wàna.

²⁹Nahema i Paulu, “La rehi na ma-dànggitu-kai jàka ndia la rehi mamalai-kai, hamayangu-manggunya duku lai Ala ka pekuna nyumu Tamu umbu hamanai yiada mbuu ndàbada da umbu - umbu da marongu-ka nyungga la lodu nàhu, ka dahama-ngga nyungga wànggu — hinggilu-da da nggili bàhi yiada nyuna ndia!” hi wàna.

³⁰Tunaka nu i Tamu umbu hanganji, na nggumbunuru dàngu i Mberiniki hamanai mbuu ndàbada hawiangu hadangu-danyaka.

³¹Ba ninjaka la hambeli, panii-danyaka dàngga anguda, “Na tau nina nda nggàra ndoku hau paruku-na na ràka pa-hukungu wànguya hukungu meti jàka ndia patama la uma kapàtangu,” wàda.

³²Hàla i Ànggaripa hi napanii-nya i Petuhu, “Na tau nina peku-mana jàka pahàla-ya, làti jàka nda na-karuhi katimba-nya na palakara-na la rapatu Hanganji Bokulu,” wàna.