Read Kambera NA RUKUDA DA PA-PAHURUNGU 27 Bible Online

NA RUKUDA DA PA-PAHURUNGU 27 - Kambera bible

NA RUKUDA DA PA-PAHURUNGU 27

¹Ba hàlaka pabota-ya ba lupangu malaku-maka bàdi nyuma la Italia pakata-danjaka, i Paulu dàngu ba mapira-ha da angu tahangu-na hawiangu lai Yuliuhu, na parawira pamba tanatara Roma, “Kalibaru Hanganji Bokulu,” ba wàdanja.

²Ka hei-manyaka la kapalu na ma-pawelingu la Àndaramatiumu, tunaka nu hadangu wàmanya-ka na kapalu nuna, ba mbàda rimangu-naka pa-palirungu hanggangu la ngia pa-palabungu la hau parai - hau paraingu la porupenihu Ahia. I Aritàruku tau Makandonia, na ma-pamaingu welingu la Tehalunika angu pa-lirungu-mbuma.

³Hadangu harii tàka-manyaka la Hindungu. I Paulu nangguma pahàmu-manya paraïna i Yuliuhu. Na-pahia-manya nyuna palua pa-tadalu-ha da anguna, ka pekuna ba dawua-nya ngga - nggàra na pa-kalana-na.

⁴Welingu lai nu paliru pangalangu-manyaka. Ba na-hanobaku ngilu pa-ndebukungu na kapalu, paliru pipitu pangalangu-manyaka la halinggi nuha Hipuru na ma-pakambelingu welingu la ngilu.

⁵Tunaka nu pàlaku-manyaka na tehiku na matuba-nya la Kilikia dàngu Papilia, hàla tàka-manyaka la Mira la tana Likia.

⁶Lai nu na parawira natoma-nya na kapalu na ma-pawelingu la Alikuhandaria na ma-paliru hanggangu la Italia. Ka paleli-na-nggama-ka la kapalu lai nu.

⁷Nda pira mbua lodu biama ba mangeri pa-lirungu ba dira endapu-kama, dàngu dira matiki-dupa hi mangu patàka hama tuna la parai Kanindu. Tunaka nu ba ndedi na hàmu-mapa na ngilu, nda peku paliru pangalangu-amapa la tuba ngia pahanggangu-ma làti. Ka pa-lirungu-manyaka la luru nuha Kareta làpahu-nya la Ngunju Hàlamoni, ka peku pa-hapindingu-ma lai nu welingu la ngilu.

⁸Dira matiki ba ma-paliru pipitu-ya na hingi nuha, lundu tàka-manyaka la hau pangia, la Pahiwi Manandangu wàdanya tamuna, nda nggi tuana marauna welingu la parai Lahia.

⁹La rehi nu làpahu-nanyaka na Lodu Remi Papeku[36] tau Yahundi. Pawàngu-mayaka na rehi pawàru-ma, hi lupa nda rehi-anapa la pa-paliru dàngu hàmungu. Jia-duyaka hi na-panamu hahanja nyuda paraïna i Paulu,

¹⁰“Angu dedi, tundunya na pa-kanandi-nggu nyungga, lalu pamburi wànguya jàka ta-paliru pangalangu. Nadangu-ma napa na rungginda, nda mbulungu biada da ngàndinda dàngu na kapalu-nda, tàka na lurinda nyutambu tau ta-yàmihu-ya,” wàna.

¹¹Tàka na parawira nawai niyapa na njurumudi dàngu na nakonda kapalu welingu la paniina i Paulu.

¹²Na pahiwi lai nu nda nahàmu-ma jàka da-paengangu lai nu da kapalu la wula maringu. Jia ba tuna nuduka hi dadangu da tau la kapalu da ma-orangu la pa-paliru pangalangu ka dunjaku-nya na pahiwi nuna nadu ka pamukarungu lundu tàka la Peniku ka ndàdiku lai nu ba talànga wula maringu-ya wàda. La Peniku jia-duyaka na pahiwi la Kareta na ma-hanobaku-ya la patama lodu mbara luru dàngu la patama lodu mbara dia.[37]

¹³La rehi nu tungu-nanyaka na ngilu mandangu weli lurungu. Da tau kapalu ba dareki-ya peku-naka ka hili pa-lirungu wàda. Ka wotu-danyaka watu labu hàla pa-lirungu-danyaka ba tundu pipitu-ya na nuha Kareta.

¹⁴Ndedi nggi mandaina tungu-nanyaka na ngilu làpuru — na Ngilu Timiru mbara dia ba wàdanya — na matungu welingu la mara,

¹⁵hi na-làndahu-ya na kapalu-ma. Ba nda peku paliru pangalangu-na na kapalu pa-hanobaku ngilu, jia-duyaka hi mapuli-maanya na kapalu ba namili ngàndiya ngilu.

¹⁶Ma-harangu pa-hapindingu hawutu ba ma-làpahu-nya la luru nuha Kaunda na makudu. Lai nu lundu dira-kama hi mamangu pamàka-nya na hakuhi kapalu-ma.

¹⁷Ba hàlaka pawotu-ya na hakuhi la kapalu, nuna na kapalu pa-kapingatu wànya kalorungu ba wàngu pawenda winggiru-nya. Paraï pa-mangàdatu pa-hanggetu la kabundu wara Hiriti na ma-kàrahu, da papuru-nja da liru hi puli-maanya na kapalu ba na-katundungu ngilu.

¹⁸Tungu pangalangu-mananya na ngilu, hi lupa hadangu harii pakiringu-danyaka pawàru-nja la tehiku da ngàndi kapalu.

¹⁹Hilu hadangu harii wàngu lima wikida nyudama da tau kapalu ba dawàru hàlanja la tehiku da pakaka - pakakahu la kapalu.

²⁰Pira mbua lo - lodu biama ba nda ma-itangu ndoku mata lodu dàngu kandunu, tàka na ngilu pa-nuangu-mananya pa-làndahungu. La malamiri nda ningu-apa monungu-ma la pamara.

²¹Pira mandai bia-naka da tau ba nda dangangu. Ka hadangu-nanyaka i Paulu hi na-ndolaku la padua-da, hi napanii, “Angu dedi! Làti jàka mitundu pàkunya na paniinggu ka àmbu ta-palirungu welingu la Kareta, nda tahunggu-a làti maruha dàngu mamburi tungu yia.

²²Tàka nàhu nyuna kukarai langatàka-kai ka peku pa-bokulu-minja da etimi. Nda ningua haàtu welingu lai nyimi Angu dedi majia meti, jiaya na kapalu jua-anda yiana na ma-wàrungu.

²³Nadu kamodu na papalewa welingu lai Ala na pa-maraku-nggu, nu i Ala na mamangu-ngga nyungga, namai lai nyungga.

²⁴Na papalewa napanii, ‘Àmbu mangàdatu-du Paulu! Nadu nyumu ba lupangu-ma bàdi mu-hurungu la Hanganji Bokulu. Dàngu paraï ruku hàmu etina i Ala lai nyumu, mbuu ndàbada da tau da ma-paliru karia-nggau napa damara hàla lumumu nyumu,’ wànangga.

²⁵Jiaya nu angu dedi, màtawa ka da-bokulu da etimi! Nadu nyungga ba kuwaiya i Ala, nuka mbuu ndàbana napa na-pajàngapungu hama tuna ba wànangga nyungga.

²⁶Na nyuna nyuta napa na-ndaiha-ta ngalingu la hingi tehiku hau nuha,” hi wàna.

²⁷Nu la rudungu pa-hakambulu patu wàna ba dàngu halindingu-ma la Tehiku Àndaria, ràkangu mandalora-yaka da tau kapalu dapàda-nya na kapalu ba lihingu-nanyaka mamara.

²⁸Jia hi da-dulurungu liku ningu watungu ba da-hukutu-ya na manjolungu-na na tehiku. Pi-danyaka lai nu na manjolungu-na ba mareni patu kambulu metiru-na. Tiangu-ki hakudu hilu hukutu-danyai, hàla pi-danyaka manjolungu-na lai nu ba mareni tailu kambulu metiru-na.

²⁹Da-mangàdatu, napa na kapalu hi na-hanggetu bia la watu mbuli wàda, jia hi da-papuru-nja ba patu mbuada da watu labu la kajia kapalu, hi da-monungu ka nalu mbaru àru wàda.

³⁰Dawàngu pa-kangunguhu da tau kapalu ba da-patikingu papalai welingu la kapalu. Da-papuru-nya na hakuhi beri papurungu-danya watu labu la hangga kapalu.

³¹Tàka i Paulu hi napanii-nya na parawira dàngu da panjuri la kapalu, “Yiada da tau kapalu jàka nda da-ndàdiku la kapalu, nyimi mbuu ndàbami angu dedi ndai mara-a,” wànanja.

³²Jia-duyaka da panjuri hi da-kàtahu-maaha da liku hakuhi, ka mili-nanyaka na hakuhi.

³³La rehi ba ndedi na-pabarahu, i Paulu nawànda-ha mbuu ndàbada la pangangu. Napanii i Paulu, “Mbàda hakambulu patu mbua lodu-mika angu dedi bai nedi - nedingu bia la dalu handuka ba nda nggàra pangami.

³⁴Nàhu nyungga ku-wànda-kai nu la pangangu hawutu, ka peku halangatu-kimi. Nadu nyimi Angu dedi mbuu ndàbami napa mimara dàngu nda nggàra ehimi,” wànanja.

³⁵Hàla papanii tuna nu i Paulu piti-nanyaka roti hi na-pamalangu-nya i Miri la hanggada nyuda mbuu ndàbada. Tunaka nu pabe - beri-nanjaka roti, hi nangangu.

³⁶Nyuda mbuu ndàbada da-màndungu beli da etida, hi dangangu-mbui duda.

³⁷Mbuu ndàbada da maninja la kapalu, ningu tau dua ngahu pihu kambulu nomuya[38] nggubulu-na.

³⁸Ba dahàla ndàbaka pangaa pa-mbihungu, wàru-danjaka da uhu nggàndumu ngàndi kapalu la tehiku ka peku halela-na na kapalu ba wàda.

³⁹Ba naharii-ka, ita-danyaka tau kapalu na mara, jia ba nda dapinya jàka nggàra tanaya. Daita-ya na hau njobu wai dàngu bulu warana. Jia hi da-patikingu pa-pahiwi-nya na kapalu lai nu, jàka pekuna.

⁴⁰Ka rata-danjaka da liku watu labu hi dapuli-nja pa-tandaningu la tehiku. Hili hama-manai nuna ba dangguli-ha da liku pahondu wànja da kamudi. Tunaka nu pahei-danjaka da liru ngora kapalu, ka peku hapuputu-nanya ngilu na kapalu ka hanàhu-na la hingi wara.

⁴¹Ba tuna na kapalu na-tumburu-ya na kabundu wara, ka pa-hinggatungu-nanyaka na ngorana na kapalu nda nahilu nggàduku, tàka la kamuri-na làjaru-nanyaka ba na-làndahu-nya ngali mbangatu.

⁴²Da panjuri la kapalu da-patikingu pa-pameti-ha da tau pa-tahangu, nadu ba da-mangàdatu napa hi ningu bia mangeni la mara hi dapalai wàda.

⁴³Tàka na parawira nabaka-ha da pawuku-da, nadu ka peku marana i Paulu ba wàna. Na-paràha hàlanja da tau da mapingu pangeni ka da-kamburu mbehangu mangilu dàngu ka dangeni la mara;

⁴⁴hawiangu màta ka da-pandutungu dàngu yàpada kapambalu dàngu kambera kapalu. Wàngu patuna nuduka hi mamara hàla tàka la mara.