Read Kambera NA RUKUDA DA PA-PAHURUNGU 4 Bible Online

NA RUKUDA DA PA-PAHURUNGU 4 - Kambera bible

NA RUKUDA DA PA-PAHURUNGU 4

¹Ba talànga kareuku-idapa nu i Peturu dàngu i Yuhani la tau dangu, tàka-danyaka da ratu kapala[5] dàngu na kimunda manggangu la Umana i Miri hamanai da tau Handuki, damai tomaha i Peturu dàngu i Yuhani.

²Dambeni, nadu ba dapanii i Peturu dàngu i Yuhani, ba naluri belika i Yehu welingu la meti. Nuna nu mbuti-duyaka ba naluri beli napa na tau meti.

³Ka yàpa-danjaka nuda da pa-pahurungu tau madua, hi da-patama-nja la oka. Dàngu ba rudungu-mbuyaka, ka pàtu pangala-danjaka lai nu lundu hadangu harii.

⁴Tàka da tau da mambàda ronguya na pa-ajaru-da da pa-pahurungu, dadangu da mapawai. Ka bonjangu-nanyaka na danguda hi lupa ràkangu tau lima rata-yaka.

⁵Hadangu harii da ma-pangora la Batangu Anggama, da amabokulu Yahundi dàngu da ngguru anggama pauhi-danyaka la Yeruhali.

⁶Dalua tomaya na Ratu Bokulu Hanàhu, lupa i Kayapàhu, i Yuhani, i Alihandaru dàngu mbuu ndàbada da nua kalembi-na na Ratu Bokulu.

⁷Dangàndi-ha i Peturu dàngu i Yuhani pa-hurungu lai nyuda, hi da-paàra-nja, “Nggiki wàminya nyimi bai pamàlaru-ya na tau kaliparu? Nggi màka weli ninguya jàka ndia nggamu kuaha-nanya bai wundaya nuna?” wàdanja.

⁸I Peturu, ba harua-mananya paraïna Ngahuna i Ala, nahema, “Mbuu ndàbami umbu liku uru banjaru dàngu mbuu ndàbami umbu matama la batangu!

⁹Nyuma yia bai rapatu-kama la lodu nàhu rukuna na hàmuma la pandula-ya na haàtu na tau kaliparu, dàngu rukuna bai mbuhangu papinya jàka nggikina ba pamàlaru-ya na tau nuna.

¹⁰Nuya umbu mbuu ndàbami, màta kai pinya hamanai mbuu ndàbana na banjaru Ihirailu, nàhu na tau yiana ndolaku dàngu hayandalu ihina la hanggami nyimi, ruku màkana dàngu kuaha-na i Yehu Karitu tau Naharitu-maka. Nyimi-maka ma-harika-nya nuna i Yehu, tàka i Ala duna na-paluri beli-yaka.

¹¹Jiaya i Yehu nuna-maka na pawuku-na na ha-ndalaru daa la Huratu Matua, ‘Na watu na panda ingami nyimi tukangu wulu uma, nalua-yaka panjadi watu mahupu marihi,’ wàna.

¹²Mbulungu pelu wànya i Yehu bàdi na tau hi pamàna-nya. Nadu la honga tau la pa-nggubulu awangu nda hili ningu-apa haàtu tau ma-ngalangu kuaha welingu lai Ala la pa-pamàna-nda nyuta tau,” wànanja.

¹³Da angu Batangu Rapatu da-hangàtaru ba daita-ha toru mbenida i Peturu dàngu i Yuhani, màlai ba dapi-dunja nu da madua pa-pahurungu ba ana tau tuda nua manda lalu ningu pàku papida. Ba tuna, pi-danyaka ba tau ma-kikungu lai Yehuha nu da madua pa-pahurungu.

¹⁴Tàka nda ana nggàra-apa pa-kareuku wàda, nadu na tau na pambàda pamàlaru-da nimanya lai nu ba na-ndolaku la hanggada nyuda anguda i Peturu dàngu i Yuhani.

¹⁵Ka paràha-danjaka da madua pa-pahurungu paluhu welingu la kuru ngia pa-batangu, hi da-pahamangu.

¹⁶“Nggikina wànda-njaka bàdi yiada da tau? Mbuu ndàbana na tau na maninya la Yeruhali mbàda pi ndàba-danyaka, yiana na pa-hangàtarungu na manda ningu hamangu, ba pa-patumbu-da yia-daha da tau madua. Nda peku pahini-anda-nyapa nyuta.

¹⁷Tàka ka àmbu natika pa-hamboka na rukuna yiana la tau dangu, màla ka ta-pangàdu-nja nyuda da madua, ka àmbu dahili panii wà-dunyapa jiapa la haàtu kadu nuna na tamuna i Yehu, ka wànda,” wàdaka.

¹⁸Ka paau-danjaka nuda da madua da pa-pahurungu patama beli, hi dapeka-nja ka àmbu dahili tikiya jàka ndia ka àmbu dahili ajaru wà-dunyapa na tamuna i Yehu.

¹⁹Tàka dahema i Peturu dàngu i Yuhani, “Pangàda wiki bianya nggàraya na ma-deningu la hanggana i Ala: matundu-nya na pareta-mi nyimi jàka ndia matundu-nya na pareta-na i Ala.

²⁰Nadu nyuma duma nda peku pànjangu-ama papanii wànya na rukuna na pambàda ngitama dàngu na parongu wikima,” hi wàda.

²¹Ba hapa jiaha da ma-batangu nda dahunggu hau lata la pahuku-nja i Peturu dàngu i Yuhani. Jia hi dawàngu pa-pangàdu bianja nu da madua da pa-pahurungu, hàla hi da-pahàla-ha pa-kadua-da, nadu mbuu ndàbana na tau ba wotu pàku-danya i Ala rukuna nuna na matumbu.

²²Na tau pa-pamàlaru nuna na pa-hangàtarungu, mbàda patu kambulu ndau rihi-naka na ndau lurina.

²³Ba pahàla-haka i Peturu dàngu i Yuhani, beli-danyaka la anguda, hi da-wàlahu hàlaya na papanii-da da ratu kapala dàngu da amabokulu Yahundi lai nyuda.

²⁴Ba darongu-yaka nuna paraï da anguda, ka kahau etingu-madua-danyaka pa-hamayangu lai Ala, “Dou Miri, Nyumu ma-padika-nya na awangu dàngu na tana dàngu na tehiku hamanai na ihi-naka.

²⁵Paraï rukuna na Ngahumu mbàda panii-muka la ngaruna na bokuma i Ndautu, na atamu, ‘Nggikina na tau na manda tandaya i Miri hi dambeni; nggikina da banjaru dangu hi da-pakaka-nya na manda lingu?

²⁶Da hanganji-ka la pinu tana da-rimangu la pa-pabera, dàngu da liku uruka da-pahamangu palawa-nya i Miri dàngu na Hanganji Pa-mànangu,’ wàna.

²⁷Nadu i Harondi dàngu i Putihu Pilatu ba tuba batangu-daka dàngu da tau da manda tandaya i Miri hamanai da tau Ihirailu la paraingu yiana. Da-pahamangu la palawa-nya i Yehu na Atamu na ma-matua, na pambàda wotumu ka Hanganji Pa-mànangu-ya ba wàmu.

²⁸Da-pahamangu la pawunda-ya mbuu ndàbana na pambàda patiki mangilu-mu, ba jiangu-ma na-pajàngapungu ba wàmu. Dàngu Nyumu ma-kawuku-ya nuna ruku kuaha-mu dàngu pawuku wiki-mamu dumu.

²⁹Nàhu, Miri, tàngaru-ha ba da-pangàdu-nggama. Dàngu puli àru-nggama atamu, ka ma-wewaru-nya na liimu dàngu nda mangàdatu-ma.

³⁰Wua àru-nggamanya na pa-ndulangu-mu ka pekuna na mahidu ka na-màlaru dàngu da pahangà - ngàtarungu hamanai da hangia - hangia da panda hamangu ka datumbu ruku kuaha-na dàngu mbihana na tamuna i Yehu na Atamu na ma-matua,” wàda.

³¹Ba dahàla-ka pa-hamayangu, nggàduku-madua-nanyaka na ngia pa-pauhi-da. Mbuu ndàbada na-kuaha-ha paraïna Ngahuna i Ala, ka toru mbeni wàngu-madua-danyaka la pa-kareuku wànya na lii welingu lai Ala.

³²Ba daluri mbuu ndàbada da tau mapawai, daeti ha-kahaungu dandewa ha-kaàtungu. Nda ningu haàtu welingu lai nyuda na makaka-ya la etina da manguna ba mangu meha-mananja. Mbuu ndàbada da maninja lai nyuda da-kawàra wà ndàba bianja.

³³Wàngu kuaha bokulu da pa-pahurungu da-hakahii-nya ba mbàda luri beli-naka i Yehu. Kanjupu pa-kanyuru-nanja nyuda paraïna i Ala.

³⁴Nda ningua haàtu la anguda nyuda maningu pa-kalana-na ngga - nggàra. Nadu nyuda da maningu tanangu jàka ndia umangu, dadangga-nja da tanada jàka ndia da umada, hàla da àmahu wilida hi dangàndi-ha

³⁵pa-pakata-nja da pa-pahurungu. Tunaka nu nuda da àmahu hi dapabe - berinja la haàtu - haàtu tutu ràka pa-kalana-na.

³⁶Tuna numbu nyuna i Yuhupu. Nadangga-nya na tana manguna nyuna, hàla da àmahu wilina nangàndi-ha hi nawotu-ha la pa-pahurungu. Yiana i Yuhupu tau la wàlana i Lewiya welingu la Hipuru; datunya tamu paaungu-na paraï da pa-pahurungu, Mbàranamba, wàdanya, la hilunda nyuta ‘Ma-panggaüru’ wàna-duka.