Read Kambera NA RUKUDA DA PA-PAHURUNGU 5 Bible Online

NA RUKUDA DA PA-PAHURUNGU 5 - Kambera bible

NA RUKUDA DA PA-PAHURUNGU 5

¹Tàka ninya na haàtu na tau mini na ma-tamungu, Anania. Nyuna dàngu i Hapira na papaha-na, dadangga-manyai duda na hau lobaku na tana manguda.

²Da àmahu wilina hawiangu dapàtu-ha nduma wikida, tàka hawiangu da-wotuha la pa-pahurungu. Ba tuna nu nyuna angu pi-madanya dàngu papaha-na.

³Ka panii dàna-nyaka paraïna i Peturu, “Ha Anania, nggikina hiu pahia-nya i Kambàliku pa-kuaha-ya na etimu, hi lupa mu-kambàliku-nya na Ngahuna i Ala, bau pàtu kangunduhu-nja nduma wikimu hawiangu da ndui wili tana na padangga-mu?

⁴Na tana, tana-mamunya ba ndedi mudangga-nya. Dàngu bau hàla padangga-nya da àmahu wilina jiamaya ba àmahu-munja. Jia nggikina hi mu-harawuku-ya la etimu la patumu nu? Nda tauaya na pa-kambaliku-mu nyumu, tàka i Ala!” wànanya.

⁵Ba narongu-yakaka na panii nuna i Anania, wàlahu wàna-madua-ka, hi metima-ananya. Mbuu ndàbana na tau na marongu-ya nuna na matumbu, namangàdatu hàla.

⁶Ka tàka-danyaka da bidi mini hi da-payubuhu-nya na metina i Anania, hi dangàndi-ya la hambeli la patani-nya.

⁷Ràkangu ningu tailu mbua njàmu ma-palàngangu, tama-nanyaka na papaha-na. Nda napi-anya jàka nggàraya na mabidi tumbu.

⁸I Peturu napanii dànya, “Màla kamangu kau paniingga: Na tana na padangga-mi dàngu leimu, jia-ma-ahaka yiada yia da wilina?” wànanya. “Tubana, jiama-aha da wilina,” hi wàna na papaha-na i Anania.

⁹Tàka i Peturu hi napanii-nya, “Nggikina nyimi dàngu leimu hi mi-pahamangu pàku la pakama-nya na Ngahuna i Miri? Rongu! Da tau da maweli patani-nya na leimu ninjaka. Napa nyuda ngàndi-madanggaui dumu nyumu la hambeli,” wànanya.

¹⁰Ndedi mbàdiku-na wàlahu wàna-madua-ka na papaha-na i Anania, hi nameti la hanggana i Peturu. Dàngu ba datama-ka da bidi mini, datàka-nya mbàda meti-naka. Ka ngàndi-danyaka la hambeli hi datani-nya la karaha-na na leina.

¹¹Mbuu ndàbada da tau pawai dàngu da tau hawiangu, ba darongu-yaka nuna na matumbu, mangàdatu wàngu-danyaka.

¹²Paraï ruku lumungu-da da pa-pahurungu dangu pa-hangàtarungu dàngu hangia - hangia panda hamangu matumbu la honga tau dangu. Hau eti-aha da mapawai ba da-pauhi la Kawindu Halomu la Umana i Miri.

¹³Dàngu na tau la hambeli nda ningu matoru mbeni pamai la pa-pauhi dànja da tau mapawai. Ba tuna da tau mapawai kanjupu tembi-nanja paraï tau dangu.

¹⁴Dàngu ngeri manaü bonjangu-ma-anaka na tau na mapawai lai Miri — mini-yakai kawini-yakai.

¹⁵Màlai ba tunaka nu, hi lupa da tau hidu datuha la nggala jàka ndia la topu, hi dangàndi-ha la ngarangia, ka pekuna mili ana hawutu-a ba nanggàna-ya ninuna i Peturu, era lina lai nu wàda.

¹⁶Dapaju - jurungu da tau da mamai welingu la parai - paraingu la winggiru-na la Yeruhali. Dangàndi-ha da tau hidu dàngu da pa-huruku wàndi akatu. Da tau nuda pa-pamàlaru ndàba-maha.

¹⁷La malamiri na ratu bokulu dàngu da makiku-nya mbuu ndàbada, nu da kalibaru tau Handuki, pakiringu-danyaka pa-kukutungu, nadu ba kapihi-danya.

¹⁸Dayàpa-ha da pa-pahurungu, hi da-patama-nja la uma kapàtangu.

¹⁹Tàka nu la rudungu, na haàtu na papalewa-na i Miri na-bunggahu-maaha da pindu uma kapàtangu, hi na-paluhu-ha la hambeli da pa-pahurungu. Na papalewa napanii-nja da pa-pahurungu,

²⁰“Lakuwa kai ndolaku la Umana i Miri kai pekanya na tauka na ngerana yiana na luri bidi,” wànanja.

²¹Ka tundu-danyaka na papeka-na na papalewa paraï da pa-pahurungu. La mbaru hada rudungu laku-danyaka la Umana i Miri hi da-papekangu lai nu. Ba talànga tunaka nu na ratu bokulu dàngu da ngara makiku-nya mai-danyaka, hi datama pa-pauhi la batangu dàngu da ngara amabokulu Yahundi. Tunaka nu hi daparàhangu tau palua papiti-ha da pa-pahurungu welingu la uma kapàtangu ka-karia-nja la hanggada nyuda.

²²Tàka ba datàka-ka da tau pa-paràha-da la uma kapàtangu, nda datoma-anjapa da pa-pahurungu lai nu. Jia hi dabeli, hi da-wàlahu-ya na rukuna nuna la batangu.

²³“Ba matàka-ka la uma kapàtangu,” wàda la batangu, “na pindu pakuhi pa-hàmungu-mayapa, tàka da ma-manggangu dai-madanya na pindu. Tàka ba ma-bunggahu-yaka na pindu, nda haàtu-apa patoma-ma nu daa,” wàda.

²⁴Ba darongu-ka da parawira manggangu la Umana i Miri dàngu da ratu kapala na pa-patàka-da da tau pa-paràha-da, mbingu-danyaka rukuda nuda da pa-pahurungu dàngu da-mangàdatu hi nggàra-yaka nyuna tiangu na matumbu ba wàda.

²⁵Tunaka nu tàka-nanyaka na haàtu na tau na mangàndi lii, “Rongu! Da tau da papàtu-mi la uma kapàtangu, nàhu talànga ajaru-danya na tau dangu la Umana i Miri!” wàna.

²⁶Nu ka lua-nanyaka na parawira manggangu Umana i Miri hamanai da angu manggangu-na papiti-ha da papahurungu pabeli. Na nyuna nda dawàngu ma-hanggàritu, nadu ba da-mangàdatu-nya na tau dangu; napa da-làndahu-dunda watu ba wàda.

²⁷Ka karia-danjaka da pa-pahurungu la hangga batangu. Hàla ka pareha-nanjaka paraï na ratu bokulu.

²⁸“Ka ni ba malara mbana eti madu-nggaika ka àmbi hili ajaru wànya na rukuna nuna na Tau. Tàka nàhu nggàra ulami-ka! Parukangu bia-minya nyimi pa-pakada-nya nuna na pa-ajaru-mi la nggubulu Yeruhali, màlai bai panjala-kama ba nyuma ma-pawiti-nya na metina na Tau nuna,” wàna.

²⁹Nahema i Peturu dàngu pa-pahurungu hawiangu, “Lupangu-ma duma ma-tundungu lai Ala-a, nda ma-tundungu-a la tau.

³⁰I Yehu, na pa-harika-mi, mbàda paluri beli-nanyaka welingu la meti paraïna i Ala na Ala boku la mangilu-nda.

³¹Dàngu i Ala mbàda wua-nanyaka wai ngaba dàngu kuaha bokulu, ba Nyuna-duka na Liku uru dàngu na Ma-pamànangu; ka nawua-nya ngia papeku-na na banjaru Ihirailu la pa-manjaria welingu la njalada hi dangala-nya na jàmangu njala.

³²Nyuma hakahii-kamaka la rukuna nuna mbuu ndàbana — nyuma dàngu na Ngahuna i Alambu na pawua-na i Ala la tau na matundu-nya na pareta-na,” wàda.

³³Ba darongu-ka da angu Batangu Anggama, kanjupu mbeniha, hi da-pahamangu la pa-pameti-ha da pa-pahurungu.

³⁴Tàka la hongada da angu batangu ninya na haàtu na tau Parihi, na matamungu Nggamalialu. Nyuna ngguru anggama-ya na patembi langatàka-na na tau mbuu ndàbana. Na-ndolaku, hi na-paràhangu tau paluhu ngàndiha la hambeli hawutu da pa-pahurungu.

³⁵Tunaka nu panii-nanyaka la Batangu Anggama, “Angu deditau Ihirailu! Kanandi pahàmu pàkunya ngerana na pawunda-mi hangganja nuda da tau.

³⁶Nadu handàkangu àmangu nawuwa i Tiundàhu, na makaka wikina ba tau bokulu-ya, hi lupa ningu tau patu ngahuya na makiku-nya nyuna. Tàka hi pameti-ya, ka paihangu hàla-danyaka da makiku-nya, ka mau-nanyaka na pa-kodangu-na.

³⁷Hinggilu-na nuna, ba palaku-ya na diha nggubulu, hilu wuwa-nanya i Yundahu, tau welingu la Nggalilia. Ruku pangaru-na, dangu tau makiku-nya. Tàka nyunambu pa-pameti-ya, dàngu mbuu ndàbada da makiku-nya hau iha - hau iha-daka.

³⁸Jia-duya nàhu na rukuna yiana, na panaungu-nggu nyungga: àmbi nggi - nggiki diminja da tau nuda, puli bianja. Nadu na pa-ajaru-da dàngu na nggàduku-da jàka pawuku tauaya, napa na-molungu-ma duna.

³⁹Tàka na rukuna nuna jàka ma-pawelingu lai Alaya, ndai ngalangu-a nyimi napa patalu-ha. Màlai talànga wanguna napa na-lohangu ba lawa-minya i Ala,” wànanja. Nuna na panaungu-na i Nggamalialu na-kataku-ya paraï batangu.

⁴⁰Ka paau-danjaka da pa-pahurungu, hi da-ràmbahu-ha, tunaka nu hi dalara-nja la pahilu ajaru wànya na rukuna i Yehu. Hàlaka nu, pahàla-danjaka.

⁴¹Dàngu nggaüru eti-mada da pa-pahurungu ba da-dunjaku-nya na Batangu Anggama, nadu ba ràka ma-pàdangu makia-ha rukuna i Yehu ba wàna-dunja i Ala.

⁴²Dàngu nimbihu lodu la Umana i Miri dàngu la uma - uma tau, panua naingu-madanya pa-ajaru dàngu pa-bobaru-ya na Lii Mànangu rukuna i Yehu ba Nyuna na Hanganji Pa-mànangu na pambàda ràndi.