Read Kambera NA RUKUDA DA PA-PAHURUNGU 6 Bible Online

NA RUKUDA DA PA-PAHURUNGU 6 - Kambera bible

NA RUKUDA DA PA-PAHURUNGU 6

¹Da tau ma-kikungu lai Yehu bonja - bonjangu-madanya padangu. La rehi nu da tau Yahundi da mawàngu hilu Yunani, dapulu-nja da tau Yahundi memangu. Na paniida da mawàngu hilu Yunani, “Da kawini lai nyuma da mameti leida nda da-ngalangu-a ndumada paluri wàda hau lodu - hau lodu na pa-paberi-nya na tau,” wàda.

²Jia-duyaka da hakambulu madua pa-pahurungu hi da-pauhi ndàbanya na tau ma-kikungu, hi dapanii-nja, “Nda nahàmu-a jàka ma-pànjangu nyuma pa-bobaru-ya na puluna i Ala, paraï pa-paloku-ya na ngera pangangu.

³Jia batuna angu dedi, nahàmu kai pindi la hongami nyimi tau mapihu, mahàmu tamuna, na pa-kuaha-na na Ngahuna i Ala dàngu na ma-manggàna, ka ma-patanggu-nja la pa-paloku-ya na matuna nu;

⁴nadu màta nyuma ka ma-hamayangu dàngu ka ma-bobaru-ya na puluna i Ala-a,” wàda.

⁵Mbuu ndàbada da tau daora-nya nuna na palibu-da da pa-pahurungu. Hàla pindi-danyaka i Hitipanu, haàtu tau mapawai langatàka lai Yehu, dàngu na-kuaha-ya paraïna Ngahuna i Ala. Dapindi-mbuha: i Pilipu, i Porukoru, i Nikanuru, i Timungu, i Pàrumenahu dàngu i Nikulaü welingu la Atiokia; nyuna nda tau Yahundi-aya tàka natama-ka la anggama Yahundi.

⁶Nuda da tau mapihu da-huharu-nja la pa-pahurungu, hàla da pa-pahurungu hi da-hamayangu dàngu hi dakarai-nja kanyuru welingu lai Miri.

⁷Tuna nuduka na lii welingu lai Ala ba na-parukangu pa-hamboka dàngu da ma-kikungu lai Yehu la Yeruhali da-parukangu-mbu pa-pabonjangu na danguda. Dàngu dadangu-mbu da ratu da mapawai lai Yehu.

⁸I Hitipanu lalu pakanyuru-nanya paraïna i Ala, hi lupa dadangu da pa-hangàtarungu dàngu da panda ita hamangu da pa-patumbu-na la padua tau dangu.

⁹Tàka ningu tau da ma-ndubaku-ya nyuna; nyuda jiaha da anggota uma Hamayangu Tau Mbembahu.[6] Da anggota uma hamayangu nuna jiaha da tau Yahundi ma-pawelingu la Kireni dàngu Alikuhandaria. Nyuda dàngu da tau Yahundi welingu la Kilikia dàngu Ahia da pa-rawaku dànya la panii i Hitipanu.

¹⁰Tàka nyuda nda damàka patunya papana na kareuku-na i Hitipanu, nadu ba Ngahuna i Ala duna mawua-nya kaminaku manggàna la pa-kareuku.

¹¹Jia hi dawua pa-runungu la tau da manda pirada la patanggu kareuku, “Marongu-mayaka nyuma na tau nuna ba na-paaka-nya i Muha dàngu i Ala!” wàda.

¹²Tuda nu ba darunda-ya na tau dangu, dàngu da amabokulu Yahundi, lupa da ngguru anggama. Hàla lua-danyaka payàpa-ya i Hitipanu, tunaka nu hi dangàndi-ya la hangga Batangu Anggama.

¹³Dàngu da-karia-mbunja da hakahii da ma-wuangu taranga manda pa-deningu rukuna i Hitipanu. Da hakahii dapanii, “Na tau yiana, naingu-mana ba na-paaka-nya na Umana i Miri na ma-matua dàngu ba na-paaka-nja da pareta-na i Ala da pa-patàka-na i Muha.

¹⁴Dàngu marongu-mayaka ba napanii, ba nyànggaru-nanya napa yiana na Umana i Miri paraïna i Yehu welingu la Naharitu, hi na-panjilu hàlanja da uku huri da pa-papuru-nanda nyuta i Muha!” ba wàna.

¹⁵Mbuu ndàbada da tau da maninja la rapatu Batangu Anggama da-kanundaru-ya i Hitipanu. Ba itaya la rehi nu na matana i Hitipanu jiangu-ma na mata papalewa-ya.