Read Kambera NA RUKUDA DA PA-PAHURUNGU 7 Bible Online

NA RUKUDA DA PA-PAHURUNGU 7 - Kambera bible

NA RUKUDA DA PA-PAHURUNGU 7

¹Na ratu bokulu na-paàra-nya i Hitipanu, “Màla na papanii-da da tau nuda na-padeningu?” wànanya.

²Nahema i Hitipanu, “Angu dedi dàngu Ama mbuu ndàbami! Màla kai patingi-ngga nyungga! Ba ndedipa na-lelingu na bokunda i Ambarahàmu la Haràngu, la rehi nu ba la Mahupatamia-yapa, namai i Ala ma-mangarangu lai nyuna,

³hi napanii-nya, ‘Dunjaku-nyawa na tanamu dàngu da nua kalembi-mu. Lakuwa la tana na pa-paita-nggunggau napa,’ wànanya.

⁴Ka dunjaku-nanyaka na tana Kàhandimu i Ambarahàmu, hi na-lelingu la Haràngu. Ba nameti-ka na amana i Ambarahàmu, paleli-nanyaka i Ambarahàmu paraïna i Ala la tana yiana, na ngia pa-ngiangu-mi nyimi nàhu angu dedi dàngu ama mbuu ndàbami.

⁵La rehi nu nda ana ha-kadipu-mbu tana la tana yiana na pawua-na i Ala lai Ambarahàmu ka namangu-nya paraïna i Ambarahàmu, mili ana ha-tàbalu-aka ndiambu. Tàka i Ala na-paràndingu, napa nawua-nya i Ambarahàmu la pamangu-nya dàngu wàla wuana. La rehi nu nyuna i Ambarahàmu nda ningua anana.

⁶Ba tuna yiana-yaka na papanii-na i Ala lai nyuna, ‘Da wàla wuamu napa da-ngiangu la tana tau hangàdangu hama tuna na tau tàka. Napa na-panyàku-ha paraï tau la tana lai nu wàngu mbana etida lundu patu ngahu ndaungu mandaina.

⁷Tàka napa nyungga kuhuku-nya na banjaru na maata-nja nyuda, dàngu napa daluhu welingu la tana lai nu hi da-maraku-ngga napa la tana yiana,’ wàna.

⁸Ba na-hàlaka papanii tuna nu, kawuku-nanyaka nu na pa-ràndingu paraïna i Ala ba na-pakata-nya na lii kàri. Jia-duya ba nadedi-ka i Ihàku na anana i Ambarahàmu hi nakàri-ya ba walu mbua lodu-naka ngalana padedi. Tunaka nu i Ihàku duna hi nakàri-ya i Yakupu na anana. Dàngu i Yakupu-mbu hi nakàri-ha da anana da tau hakambulu madua, nu jia-duhaka da boku la mangilu-na na banjaru Yahundi.

⁹Da bokunda la mangilu da-kapihi-nya i Yuhupu, hi lupa dadangga-nya panjadi ata la tana Mehiru. Tàka i Ala duna ndutu-nanya-padua,

¹⁰hi na-pahàla-ya welingu la handuka - handuka-naka. Nawua-nya kaminaku manggàna paraïna i Ala ba na-hurungu la hanggana i Piraüngu hanganji Mehiru, hi lupa natuya nggumbunuru la Mehiru na ma-kuaha-ya na uma hanganji Piraüngu.

¹¹Tunaka nu ka tungu-nanyaka na rimba bokulu la nggubulu tana Mehiru dàngu tana Kanaàngu, hi lupa na-mayila langatàka na tau. Da boku la mangilu-nda nda da-ngalangu pangangu.

¹²Ba narongu-ka i Yakupu ba ningu uhu nggàndumu la Mehiru, paràha-duna-njaka da anana, nu da boku la mangilu-nda, palua lai nàhu, na kawunga luada.

¹³Ba da-panduangu wànguka palua, napeka-nja da anguna paluhu nyuna i Yuhupu, ba Yuhupu-ya nyuna. Hina-duka la rehi nu hi napinya paraïna hanganji Mehiru da nua nituna i Yuhupu.

¹⁴Tunaka nu i Yuhupu, pangàndi-nanyaka langu na amana, nu i Yakupu, hi nakarai-ya nyuna dàngu kuru umana ka da-lelingu la Mehiru — mbuu ndàbada tau pihu kambulu malima-ha.

¹⁵Lelingu-nanyaka la Mehiru i Yakupu dàngu lai nuduka nameti ningu hamanai da boku la mangilu-nda.

¹⁶La lodu malamiri da ngàndi beliha da metida la Hikimu, hi taninja la reti na pambàda kei wàna hau dangu àmahu paraïna i Ambarahàmu welingu la kabihu banjaru Hemuru la Hikimu.

¹⁷Ba na-marenika na rehi pa-jàngapu-nanya na paràndi-na i Ala lai Ambarahàmu, na banjaru-nda la Mehiru mbàda bonjangu-naka padangu.

¹⁸La malamiri katangu-nanyaka pareta la Mehiru na haàtu hanganji manda tandaya i Yuhupu.

¹⁹Nuna na hanganji na-pajulu wànya na banjaru-nda dàngu mbana etina hanggangu la boku la mangilu-nda. Na-pambana-ha la pawàru-nja da anarara-da da mabidi dedi ka àmbu ihili-nja dàngu ka dameti.

²⁰La rehi nuna-duka i Muha ba nadedi; bai anarara manandangu-ya Tailu mbua wula-ana ba kulipu-ya la uma amana,

²¹tàka ba wàru-nyaka, piti-nanyaka paraïna anana kawini i Piraüngu, hi na-kabida-nya ba hama tuna ana wiki-nanya.

²²Mbuu ndàbada da papingu wàngu tau Mehiru pa-ajarungu-ya nyuna, hi lupa nanjadi tau ma-kanjupu kuaha-ya la kareuku-na dàngu la pawunda-na.

²³Ba patu kambulu ndau-naka na ndau lurina i Muha, tumbu-nanyaka na rinjungu la etina palua pa-tadalu-ya na banjaru-na na tau Ihirailu jàka nggàra ehina.

²⁴Hi naita-ya na haàtu welingu lai nyuda na pa-pajàra paraï haàtu tau Mehiru; ka kahiri-nanyaka na tau pa-pajàra ba nawàngu pa-pameti-ya na tau Mehiru.

²⁵Ba nakaka-ya i Muha napa datanda-ya paraï banjaru-na ba nyunaka papindi-na i Ala la pa-pahàla-ha nyuda. Tàka nda dapi-anya duda.

²⁶Hili hau lodu naita-ha da tau madua tau Ihirailu da ma-pahànggangu, hi na-patikingu làti pa-papeku-ha. Napanii, ‘Nyimi tau ma-paangu dedikai. Nggikina hi mi-pahànggangu?’ wànanja.

²⁷Tàka na tau na mapalu-ya na anguna, na-jukaru-maanya i Muha la hingi, hi napanii, ‘Nggamu na mawotu-kau nyumu la paliku uru dàngu la pa-hakimu-nggama nyuma?

²⁸Màla ka ku-pameti-mbuya nyuna wàmu-nggaka hama tuna bau pameti-ya na tau Mehiru kangeu?’ wàna.

²⁹Ba narongu-yaka nuna i Muha na papanii-na nuna na tau, ka palai-nanyaka i Muha welingu la Mehiru, laku hi na-engangu la Mindiangu. Lai nu na-ngalangu ana tau madua.

³⁰Patu kambulu ndaungu ma-palàngangu ninya na haàtu na papalewa na mamai lai Muha la maràda telangu la lihina la Palindi Hinai. Na papalewa namai la wuku rii madàka na maroka.

³¹Na-hangàtaru i Muha ba naita-ya na rukuna nuna, hi nalua palihi-nya ka kupinya hi nggàraya wàna. Hi narongu-ya na liina i Miri na mapanii,

³²‘Nyungga yia Alada da boku la mangilu-mu; Nyungga Alada i Ambarahàmu, i Ihàku dàngu i Yakupu,’ wànanya. Ka ta - tàta-naka i Muha ba na-mangàdatu, nda natoru mbeni-apa pa-tàngaru-ya nuna na wuku rii madàka.

³³Tunaka nu ka hilu panii-nanyaka i Miri, ‘Àlinja da halapa la wihimu, nadu nana na tana ngia pa-ndolaku-mu ba tana matua-ya.

³⁴Kuita-mayaka dàngu kueti-wa-manyaka na mayila mbanana na banjaru-nggu la Mehiru. Kurongu-mahaka na pangiba-da, ka puru-dunggu-nyaka la pa-pahàla-ha. Nàhu, màla! Ka ku-paràha-nggau pabeli la Mehiru,’ wànanya.

³⁵I Muha yiana yia, jia-mayaka i Muha na panda mbuha banjaru Ihirailu dàngu ba da-jukaru wànya na kareuku yiana, ‘Nggamu na mawotu-kau nyumu la paliku uru dàngu la pa-hakimu-nggama?’ ba wàdanya. Tàka jia bia-yaika nyuna na pa-paràha-na i Ala panjadi liku uru dàngu ma-pamànangu, ba nandula-ya paraï na papalewa na mamai lai nyuna la wuku rii madàka na maroka.

³⁶Jiaya i Muha yiana-maka na mairu ngàndiya na banjaru Ihirailu paluhu welingu la Mehiru, ba nawàngu pa-patumbu màtu - màtu pa-hangàtarungu dàngu panda ita hamangu la Mehiru, la Tehiku Rara dàngu la maràda telangu patu kambulu ndaungu mandaina.

³⁷Nyuna-maka i Muha na mapeka-nya na banjaru Ihirailu: ‘Napa i Ala nawua-nggai haàtu wunangu na papindi welingu la hongami nyimi wiki, hama tuna ba na-pindika nyungga,’[7] wànanja.

³⁸I Muha-maka la honga banjaru Ihirailu la maràda telangu na mali padua-nya na papalewa na mapanii dànya la Palindi Hinai dàngu da bokunda. Nyuna na ma-kataku-ya welingu lai Ala na lii luri la pa-patàka-nda nyuta.

³⁹Jiapa ka tuna nu da boku la mangilu-nda nda dabihu pa-karàda lai nyuna. Da-jukaru-maanya hi da-patikingu pabeli la Mehiru.

⁴⁰Dapanii-nya i Harungu, ‘Pandoi-nggama marapu da matanggu iru ngàndi-kama. Nadu ba nda mapi-anyapa nyuma jàka nggiki-naka na ngerana i Muha na mairu ngàndi-kama paluhu welingu la Mehiru,’ wàdanya.

⁴¹Tàka la rehi nu pandoi-duda-nyaka hau kahala hada ana hapi, tunaka nu hi dangàndi-nya kameti maraku nuna na kahala hada ana hapi dàngu hi da-patumbu remi ba dawotu-nya nu na pa-pandoi wàda lima wikida.

⁴²Ka taluru-nanjaka nyuda paraïna i Ala hi napuli-nja pa-maraku-nja da kandunu la awangu. Nuna jàngapu-nanyaka na pa-tulihu la mbukuda da wunangu, ‘Ha tau Ihirailu! Nda lumu-mingga Nyungga-a bai rupu bai wotu kameti maraku banda la dalu patu kambulu ndaungu la maràda telangu.

⁴³Jiaya na maü terana i Moluku dimi na pangàndi mànumi, hamanai da kahala hada kandunu da pa-marapu-mi, nu i Repàngu; nunaya na kahala hada pa-pandoi-mi na palumu-mi. Nu jia-duyaka napa hi kuwàru pamarau-kai hu papa la parai Mbambilu,’ wàna.

⁴⁴Na maü ngia pamaina i Miri la tau nimanya la boku la mangilu-nda la maràda telangu. Nuna na maü ba wuluya, tundunya na pareta-na i Ala lai Muha, dàngu tundunya na ngerangu na pa-paita-nanya i Muha paraïna i Ala.

⁴⁵Tunaka nu dangàndi pangala-nya nuna na maü paraï da boku la mangilu-nda ba da-kariangu dàngu i Yuhua ba dalua pawàhi-ya yiana na tananda welingu la kuaha-da da banjaru da pawàngga-na i Ala la hanggada nyuda. Nuna na maü ni-manyapa lai nu lundu toma la rehina i Ndautu.

⁴⁶I Ndautu na-pahàmu etiya i Ala dàngu nakarai-ya ka na-pahia-nya pawulu-nya uma ndumana i Ala na pa-maraku-na i Yakupu.[8]

⁴⁷Ba tuna i Halomu-ka duna na ma-pahada-nya na uma ndumana i Ala.

⁴⁸Na nyuna i Ala Mahupu mangunju nda na-ngiangu-a duna la uma pawulu tau; nadu la huratu wunangu ba ni-manyaka na pa-tulihu,

⁴⁹‘Na awangu ngia pa-mandapu-nggunya, na pinu tana lata wihi-nggunya. Nggàra uma-yaka nu na pawulu-mingga? Nggi-yaka na ngia pa-hangahu-nggu?

⁵⁰Ka nda Nyungga nu ma-padika-nya mbuu ndàbana?’ wàna i Ala.

⁵¹Lalu mbana katiku watukai nyimi angu dedi dàngu lalu tangguru-kai nyimi la patundu-nya i Ala! Mi-kawanga-nya kahilu na puluna i Ala! Hama-maminja da boku la mangilu-mi, bai lawa mànunya na Ngahuna i Ala!

⁵²Màla ningu nu wunangu da panda pa-mayila-da da boku la mangilu-mi? Da-pameti-ha da tau papalewa-na i Ala, da mambàda bobaru-ya weli ndaingu ba nàmunya na Atana i Ala na ma-padeningu. Tàka nyimi nàhu mi-kaleka-nya dàngu mi-pameti-ya nuna na Atana i Ala.

⁵³Da papalewa awangu mbàda patàka-mada-nyaka na pareta-na i Ala lai nyimi, tàka nyimi ndai tundu-anya!” wànanja.

⁵⁴Ba darongu hàla-yaka nu na papanii-na i Hitipanu paraï da angu Batangu Anggama, mbumbaru-nanyaka na mbenida paraï pakaraü-nya eti.

⁵⁵Tàka i Hitipanu duna ba kuaha-mananya Ngahuna i Ala, na-tangara la awangu. Naita-ya na mangunju-na i Ala dàngu i Yehu ndolaku-mananya la ngia pa-kuaha-na la kawana-na i Ala.

⁵⁶“Tàngaru,” wàna i Hitipanu, “kuita-ya na awangu na ma-tawanggahu dàngu na Ana Tau ba na-ndolaku la kawana-na i Ala!” wàna.

⁵⁷Da ma-batangu ba dàngu warada da-pandàbi-maanja da kahilu-da hi handàka hadumbalu-ma-adanya i Hitipanu.

⁵⁸Da-ruruhu-ya la hambeli paraingu, hàla hi da nàhaku-nya watu. Da tau da ma-hakahii-nya nuna na manjadi da-pakata-nja da pakida la haàtu bidi mini, na ma-tamungu Hauluhu.

⁵⁹Ba talànga nàhaku-danya i Hitipanu, wara-nanyaka i Hitipanu, “Dou Miri Yehu, kataku àruya na ndewanggu,” wàna.

⁶⁰Ka patika-nanyaka hi nawara pakodungu, “Miri, àmbu pabuku àrunya na njala yiana lai nyuda!” wàna. Ba nahàla-ka papanii tuna nu, meti-madua-nanyaka.