Read Kambera NA RUKUDA DA PA-PAHURUNGU 9 Bible Online

NA RUKUDA DA PA-PAHURUNGU 9 - Kambera bible

NA RUKUDA DA PA-PAHURUNGU 9

¹Ba talànga tunaka nu i Hauluhu pangalangu-mananya la pa-pangàdu-nya dàngu la pa-pameti-ha da ma-kikungu lai Miri Yehu. Nalua la ratu bokulu,

²pakarai huratu kuaha la palua ngàndinja da amaboku - amabokulu la uma bungguru tau Yahundi la Ndamàhiku, jàka era hungguna lai nu tau mawaiya i Yehu, ka peku yàpa-naha ka ngàndiha la Yeruhali.

³Ba talànga hanggangu-naka la Ndamàhiku, ba na-mareni-nyaka na paraingu, hi jia tapanjiru winggiru bia-nanya ma-kajilaku welingu la awangu i Hauluhu.

⁴Ka pàngi wàna madua-ka la tana, hi narongu lii mapanii dànya, “Hauluhu, ha Hauluhu! Nggikina hiu pa-mayila-ka?” wànanya.

⁵“Ka nggamukau Miri?” hi wàna i Hauluhu. Napaya na mangu liingu, “Nyunggadu, Yehu, na pa-mayila-mu.

⁶Tàka nàhu hadangu-wa kau tama la paraingu. Lai nu napa ka panii-nggauka jàka nggàra ula-muka napa,” wànanya.

⁷Da tau da malaku karia-nya i Hauluhu, da-katàtaku hi lupa nda dahilu pingu pa-kareuku; nadu darongu-ya na lii nuna tàka nda ningu haàtu paita-da.

⁸Ka ndolaku-nanyaka i Hauluhu hi na-pabula-nja da matana, tàka nda nggàrapa paita-da da matana. Ka yàpa-danyaka na limana, hi dalonda-ya patama la Ndamàhiku.

⁹Tailu mbua loduna ba nda peku ngitana, nu ba mandai tuna nu nda nangangu nda na-ngunungu-a.

¹⁰La Ndamàhiku ninya na haàtu na tau na ma-kikungu lai Miri Yehu, na ma-tamungu Anania. La harii mata naita-ya i Miri ba napanii dànya, “Anania!” wànanya. Nahema i Anania, “O Miri!” wàna.

¹¹I Miri napanii, “Hadangu-wa nu. Kau lua la umana i Yundahu la Ànda Kunduhu. Kau paàra-nya lai nu na tau na ma-tamungu Hauluhu na ma-pawelingu la paraingu Tàruhu. Nyuna nu talànga hamayangu-na,

¹²nu la harii mata naita-mayaka na tau, na ma-tamungu Anania, na mamai lai nyuna hi na-padambaku-nya lima ka peku ngita belina,” wànanya.

¹³Nahema i Anania, “Miri, dangu-maka parongu-nggu nyungga rukuna na tau nuna ri - rihi na ruku pa-mayila-nanya na kabungguru-mu la Yeruhali.

¹⁴Tàka nàhu mai-nanyaka lai Yehu paraï ruku pulingu-da da ratu kapala la payàpa hàlaya na tau na mapawai lai Nyumu,” wàna.

¹⁵Tàka nanapa-ya i Miri, “Luawa nyuna na! Nadu jàka jiaya nyuna ba pindi-manggu-nyaka la palumu-ngga Nyungga, ka na-bobaru-ya na rukunggu Nyungga la ba - banjaru hawiangu na manda katangu anggama Yahundi dàngu la hanganji - hanganji hamanai la banjaru Ihirailu-mbu.

¹⁶Dàngu napa Nyungga wikima ma-paita-nya na mayila na pa-hambeta-na lumungga Nyungga,” wàna.

¹⁷Ka lua-nanyaka i Anania la uma nuna hi na-padambaku-nya lima i Hauluhu, “Angu dedi Hauluhu,” wànanya, “i Miri Yehu na paita-mu la padua ànda bau pa-maingu nàmu, Nyuna na ma-palewa-ka pamai ka peku ita belimu dàngu ka peku kuaha-nanggau na Ngahuna i Ala, wàna,” hi wànanya.

¹⁸Ndedi mbàdiku-na la rehi nuna-ma-duaka ba hama nepi iyangu-ya na ma-kawàraku welingu la matana i Hauluhu, ka ita beli-madua-nanyaka. Hadangu-nanyaka hi parunu-nya.

¹⁹Ba nahàla-ka pangangu, àtalu beli-nanyaka. I Hauluhu na-ndàdiku dànja la Ndamàhiku da ma-kikungu lai Yehu ràkangu ana pira mbua loduna.

²⁰Ka hàngu laku-ma-ananya la uma - uma bungguru hi na-pakiringu pa-bobaru-ya nu i Yehu ba Ana Alaya.

²¹Da-hangàtaru hàla ba da-ronguya i Hauluhu. Dapanii, “Ka nda jiaya ni la Yeruhali na ma-pameti hàlaya na tau na mapawai lai Yehu? Hi namai lai yiahu ba jiaya nuna-madui ka yàpaha dàngu ka ngàndiha la ratu - ratu kapala wàna!” wàda.

²²Tàka i Hauluhu parukangu-mananya pa-pangaru. Dangu ma-paihikungu pa-wàlahu-na na ma-pakaràngi-ya na rukuna i Yehu ba Hanganji Pa-mànangu-ya, hi lupa nda peku pandia-danya paraï da tau Yahundi da maninja la Ndamàhiku.

²³Palàngangu-ka pi - pira mandaina, pahamangu-danyaka da tau Yahundi la pa-pameti-ya i Hauluhu.

²⁴Tàka nuna na pa-pakaka-da nalu pinya. Rudungu lodu dadaiya na pindu bokulu ka pameti-ya ba wàda.

²⁵La hau na rudungu da tau da makiku-nya i Hauluhu, da-pahama dànya hi da-papuru wànya katanga la hambeli kangeli paraingu.

²⁶Ka laku-nanyaka i Hauluhu la Yeruhali, lai nu hi na-pamukarungu pa-pakorungu lai nyuda da ma-kikungu lai Yehu. Tàka nyuda da-mangàdatu-nya, nadu ba nda datika pawaiya nyuna ba ma-kikungu langatàka-yaka lai Yehu.

²⁷Tunaka nu namai tomaya paraïna i Mbàranamba, hi na-karia-nya la pa-pahurungu. Ka wàlahu-nanyaka i Mbàranamba lai nyuda na rukuna i Hauluhu ba naita-ya i Miri la padua ànda dàngu nggiki hamana ba napanii dànya paraïna i Miri. Dàngu na-wàlahu-mbuya na rukuna i Hauluhu ba natoru mbeni etina la Ndamàhiku pa-ajaru wànya na tamuna i Yehu.

²⁸Ka pa-engangu-nanyaka i Hauluhu lai nyuda, dàngu natoru mbeni pa-pabobarungu la nggubulu Yeruhali na tamuna i Miri.

²⁹Na-kareuku dàngu na-parawaku dànja da tau Yahundi da mahilu Yunani, ba tuna da-patikingu la pa-pameti-ya nyuna.

³⁰Ba dapi-nyaka na rukuna nuna paraï da tau mapawai hawiangu, ka karia-danyaka i Hauluhu la Kaiharia, tunaka nu hi da-paràha-nya la Tàruhu.

³¹Ka ngudu-nanyaka na kabungguru la nggubulu Yundia, Nggalilia dàngu Hamaria. Ruku pa-ndulangu-na na Ngahuna i Ala, ba dàngu mangàdatu-danya i Miri, da kabunggu - kabungguru lai nu parukangu-danyaka pa-kapànduku dàngu pa-bonjangu.

³²I Peturu nalaku lai nu - lai nu pa-tadalu-ha da kabunggu - kabungguru. Handàka la hau lodu i Peturu nalua pa-tadalu-ya na kabungguru-na i Miri na maninya la Lida.

³³Lai nu na-pahàmburu dànya na haàtu na tau mini, na ma-tamungu Enia, na ma-kaliparu, nda na-hadangu-mapa welingu la ngia pa-katuda-na, walu mbua ndau-manaka ba tuna nu.

³⁴I Peturu napanii dànya i Enia, “Ha Enia, i Yehu Karitu na-mapamàlaru-kau. Hadangu-wa kau paloku-ya na ngia pa-katuda-mu,” wànanya. Ndedi mbàdiku-na hadangu-nanyaka i Enia.

³⁵Mbuu ndàbada da ma-ngiangu la Lida dàngu la Harungu daita-ya i Enia, nu ka wai-madua-danyaka i Miri.

³⁶La Yopi ninya na haàtu na tau kawini, na ma-tamungu Tambita. Nyuna tau mapawai lai Miri Yehuya. (Na tamuna la hilu Yunani Ndòrukàhu, la hilunda nyuta ruha, wàna.) Nyuna nawunda mànu mahàmu la anguna dàngu nandula tau mila.

³⁷La rehi nu nahidu, hi nameti. Ba daihu-yaka hi da-bànjalu-ya la kuru dita.

³⁸La Yopi nda nggi tuana marauna welingu la Lida. Jia ba tuna ba darongu-ka da ma-kikungu lai Yehu la Yopi ba ninya i Peturu la Lida, palewa-danyaka tau madua mangàndi-nya lii yiana, “Lu mai parenggangu nàmu,” wàdanya.

³⁹Ka ailulu hadangu-madua-nanyaka i Peturu hi natundu-nja nyuda. Ba natàka-ka lai nu, hei karia-danyaka la kuru dita. Mbuu ndàbada da kawini meti lei lai nu da-langgungguru-nya i Peturu dàngu hiida, ba da-paita-nya da kalembi kudu kalembi bokulu pautu-nanja paraïna i Ndòrukàhu ba naluri-pa.

⁴⁰I Peturu na-paràha hàlanja paluhu. Hàla patika-nanyaka ba na-hamayangu. Hàlaka nu hi nahangga-nya na metina i Ndòrukàhu, “Tambita, hadangu!” wànanya. Ka bunggahu-nahaka da matana i Ndòrukàhu, ba naitaya-ka i Peturu, uhuku-nanyaka.

⁴¹Tàka i Peturu hi nayàpa-ya na limana, hi nandula-ya la pa-ndolaku. Tunaka nu i Peturu hi napaau-nja da tau mapawai dàngu da kawini meti lei da maninja hi na-pakata-nya i Ndòrukàhu lai nyuda ba luri-nanyaka.

⁴²Na lii rukuna nuna nakada hàlanya tau la Yopi, hi lupa nadangu na tau na mapawai lai Yehu ba Hanganji Pa-mànangu-ya.

⁴³I Peturu na-ndàdiku-pa lai nu ana pira mbua lodu la umana na haàtu na tau na mandongu manulangu, na ma-tamungu Himungu.