Read Kambera ROMA 1 Bible Online

ROMA 1 - Kambera bible

ROMA 1

¹Angu dedi mbuu ndàbami pambuha-na i Ala la Roma dàngu pambàda paauna i Ala panjadi banjaru-na. Mbàda pindi-nanggaka dàngu mbàda wotu-nanggaka nyungga i Ala, hi na-patuki-ngga la pa-bobaru-ya na Lii Mànangu welingu lai Ala.

²Nu na Lii Mànangu mbàda njànji-mana-nyaka paraïna i Ala welingu la handàka-na la ngaruda da wunangu-na dàngu pambàda tulihu-yaka la Huratu Matua.

³Nu na Lii Mànangu jiaya na rukuna na Ana Ala, nu na Mirinda i Yehu Karitu. La hada tauna, wàlana i Ndautu-ya Nyuna,

⁴na nyuna la hada Alana, Ana Ala-maya duna. Na mbutina nuna, jiaya na mbihana na manda ningu hamangu, nu la hadangu-na welingu la meti.

⁵Lai Nyuna, nu i Karitu nawua ningganya paraïna i Ala na manggàna la panjadi pa-pahurungu ka màtawa nyungga — la patembi wànya i Karitu — kukapipiha da tau welingu la mbuu ndàba banjaru ka dapawai dàngu ka da-manundu.

⁶Mbuu ndàba banjaru ba wàna jiakai nyimimbu maninggai la Roma; pambàda paaungu-mbukaika nyimi panjadi banjaru-na i Yehu Karitu.

⁷Tuna nuduka hi ku-tulihu-nggai huratu. Màla àruki ka na-paliri-nggainya na mànjaku maringu dàngu na peku na hàmu paraïna i Ala na Amanda dàngu i Miri Yehu Karitu na Mirinda.

⁸La kawu - wungana kupali-nya lai Yehu Karitu, na pa-malangu-nggunya i Ala lumumi nyimi mbuu ndàbami angu dedi, nadu ba narongu ndàbaka na pinu tana ba kanjupu pawaikai nyimi lai Karitu.

⁹Ku-pangàda mànu-manggai duku la hamayangu-nggu. Jiaya i Alama na hakahii-nggu ba ma-deningu-maya yiana na papanii-nggu. Jiaya Nyuna-maka na Ala na palumu-nggu wàngu mbulungu etinggu ba kuwàngu pa-bobaru-ya na Lii Mànangu rukuna na Anana.

¹⁰Kukarai pambana-ya i Ala, ka na-pamàja àrukingga palua pa-tadalu-kai nyimi.

¹¹Nadu ba rinjungu halawàla-manggunya duku la paita matakai nyimi ka peku padaü-nggunggainya na pawua juana na Ngahuna i Ala paundungu wàna na pawaimi.

¹²Yiana-ya duku na pawuku-nggu, mulana ba angu pawai-ndaka lai Karitu, peku-manaka ba ta-maràngga pa-undungu pawainda dua wikinda.

¹³Angu dedi! Màta ka dapinya wànggu-nggai ba mbàda pahau dangu-mangguka ka kulua pa-tadalu-ha nyuda ba wànggunggai, tàka ni - ningu bia ma-paratahungu. Na pa-rinjunggu màta ka ningumbu ruku paràma-nggu la hongada nyuda wànggunggai, hama tuna ba ningu rukuna na paràma-nggu la honga tau nda Yahundi la hau pangia - hau pangia.

¹⁴Nadu ba ningu wai ngeranggu la mbuu ndàbana na banjaru-ka: na mambàda lànyapu huri lawiti-na dàngu na mandedi-kai, na ma-hakola dàngu na mandedi-kai.

¹⁵Nuna-duyaka na ma-pawitingu hi kiri rinjungu-nggu pa-bobaru-ya na Lii Mànangu lai nyimimbu ma-ngiangu la Roma.

¹⁶Kumonu hàmu-manya duku na Lii Mànangu, nadu ba jiaya na mbihana i Ala la pa-pamàna-nya mbuu ndàbana na tau pa-waika; la kawunga-na na tau Yahundi, hi mangu pa-banjaru hawiangu-mbu.

¹⁷Nadu ba na-paloha wànya Lii Mànangu paraïna i Ala, jàka nggàra àndaya na pawàngu ka nahàmu beli na papuingu-na na tau dàngu i Ala; nu na ànda na pawàngu jiaya ba wàngu papawai lai Ala welingu la pakiri-na lundu hupu njàpuna. Nuna nu hama tuna na pa-tulihu la Huratu Matua, “Na tau na mapawai lai Ala hi nahàmu beli na papuingu-na lai ala, jiaya duna napa na maluri!”[1] ba wàna.

¹⁸Welingu la awangu na-paloha-nya paraïna i Ala na hànggana la mbuu ndàbanaka na njala dàngu na akatu-na na tau, nadu ba jiaya na akatu-maka na ma-paratahu-nya na tau la patanda-ya na lii papekangu na ma-tubangu rukuna i Ala.

¹⁹Jàka nggàraya na ràka papina na tau na rukuna i Ala mbàda lohangu-manaka duna la eti daluna na tau, nadu ba i Ala wiki-maka duna na mambàda paloha-nya nuna la tau.

²⁰Piti welingu ba na-padika-nya na tana i Ala, da hembana i Ala da panda ita, nu na hada Alana dàngu na mbihana na ma-palupangu, mbàda peku jàngapu-mana-nyaka paraï tau ba ita ndàbaha da pa-padika-naka. Nu ba tuna nda ningu ndoku-apa pelu pakangu-na na tau la pa-pamànangu wàngu wikina.

²¹Na tanda-maya tau i Ala, na nyuna nda date-mbiaya pa-namatu-nya na mandapu Alana dàngu nda da-pamalangu-mbunya. Tàka manda lingu-ma-aya na pa-kanandi-da; kapà-tangu-mada-nyaka da etida.

²²Manggàna-manya wàda bia la pakaka etida, tàka làti wàmu nduba-madanya.

²³Nda jiaya na Ala ma-palupangu-a na palumu nida, tàka kahala hadaha mahama hadanja da ruku limana i Ala da malua-ya la meti; nu la hada tau, la hada ma-hawurungu, la hada banda ma-kapatu mbungungu wihi dàngu la hada banda mabei.

²⁴Nuna-duyaka hi kiri puli-nanja paraïna i Ala ka na-kawaha-ha parinju etida la pawunda ma-iraku, tàka hi dawunda ma-iraku la dua wikida.

²⁵Na Ala langatàka, da-pahilu wànya kamàla ala. Nda jiaya na Mapadi-kangu-a na pa-marubuku-da, tàka pa-padikangu-ya na pa-marubuku-da dàngu na palumu-da. Tàka làti wàmu jiaya na Ma-padikangu duna na ràka pa-wotungu lundu nu - nu! Amingu.

²⁶Ba tuna nu na pawunda-na na tau, ka puli-nanjaka paraïna i Ala ba da-namatu niya na nda roputu-da wikida na maànga. Da kawini-da nda da-mangànjilungu-apa mini hama tuna na pakàli ndàmana na tau, tàka da-mangànjilu ninja da anguda pa-kawini.

²⁷Hama-madai da tau minida, nda dana-matu ni-ayapa na pakàli ndàmangu ba mahuru angungu kawini, tàka dambana ningu la anguda pamini. Da tau mini dawunda-ya na pa-makia wàngu la anguda pamini, hi dangalanya na ràka limbana na pawunda-da na ma-akatu.

²⁸Rukuna ba nda nabihu na tau patanda-ya i Ala, ka puli-nanjaka paruha da kana-ndinguda paraïna i Ala, hi lupa dawunda-ha da ràka panda wundada làti.

²⁹Da etida da-hulungu wàngu mbuu ndàba ma-akatu-ka manda pa-deningu; dahulu-nja malumbangu, kajàliku dàngu malara eti; da-mbumbaru-nja patikingu la pa-pameti tau, pahànggangu, pa-lapingu dàngu pawuta wuyangu. Da wai ilunya na pulu wàngu tau hawiangu,

³⁰dawai ilunya na-paruha tamu tau hawiangu, da-ngànjangu dàngu da-katadaku, da-karaü-nya eti i Ala[2] dàngu dawai ilunya na abungu. Damàhi la pahimbu wulu aka mabidi ka wunda ma-akatu. Da-ndubaku-ha da inada da amada;

³¹nda da-pangàdangu ngera anguda, nda da-tuturu dàngu nda da-paaïngu.

³²Da-pimanya, pa-namatu-nya na Ukuna i Ala, ba pa-hukungu metiya na tau na mawunda ndàbaha nuda. Jiapa-kai ba tuna, jiangu bia ba dawunda-ha nuda; dàngu da-patunju-mbuyaipa na tau hawiangu na mawunda-ha nuda.