Read Kambera ROMA 10 Bible Online

ROMA 10 - Kambera bible

ROMA 10

¹Oi angu dedi! Kanjupu rinju-manggunya ka pamara-ya na banjaru-nggu. Dàngu ku-hamaya weli etingu-ma lai Ala tungguda nyuda.

²Nda ku-kanodaru-a duku papanii-ya ba kanjupu ringgitu-ha palumu-nya i Ala. Na nyuna na ringgitu-da nda napalatangu-a la pingu ma-pawelingu lai Ala.

³Nda dapi-anya jàka nggiki hamana i Ala ba na-pahàmu beliya na papuingu-na na tau lai Nyuna. Tàka rukuna ba da-mbuhangu pa-namatu niya na pawàngu ba wàda nyuda, jia-duyaka hi nda danunju-ya na pawàngu ba wàna i Ala.

⁴Na uku anggama mbàda palundu-nanyaka paraïna i Karitu. Jia ba tuna nimbihu-na na tau mapawai lai Karitu, hàmu beli-nanyaka na papuingu-da dàngu i Ala.

⁵I Muha na-tulihu-ya, na tau na ma-pahàmungu beli dàngu i Ala palata-nya na uku anggama, napa naluri-ya rukuna ba nanunju-ya na uku anggama.

⁶Na nyuna na pawàngu, ka na-pahàmungu beli dàngu i Ala na tau palata-nya la pawaina lai Ala, tuna yia duna na papanii-na na Huratu Matua, “Àmbu jia panii-dumu la etimu, ‘Nggamu-aka napa na mahei la awangu?’ (nu, la pa-papuru-nya i Karitu, wàna-duka nu),

⁷jàka ndia, ‘Nggamu-aka napa na mapuru la pangia tau meti?’ (nu, la pa-padita-ya i Karitu welingu la pangia tau meti, wàna-duka nu)” wàna.

⁸Nu na pawuku-na tuna yia, “Nuna na lii langu welingu lai Ala, la li - lihima-àmunya; la ngaru-munya dàngu la eti-munya,” wàna-duka nu. Nunaya duna na lii langu na pa-bobaru-ma, lii langu, ba lupangu-ma bàdi napawai na tau.

⁹Nadu jàkau peka wàngu ngarumu ba “Miriya i Yehu” dàngu jàkau pawai la etimu ba mbàda paluri-nanyaka i Yehu welingu la meti paraïna i Ala, mànangu-munyaka napa.

¹⁰Nadu ba napawai wàngu etina na tau, hi na-kataku-ya paraïna i Ala ba tau ma-pahàmungu-yaka dàngu i Ala. Dàngu ba napeka wàngu ngaruna hi pamàna-nya.

¹¹Pa-tulihu-maya la Huratu Matua, “Na tau mapawai nda jia pahala-aya na etina,” ba wàna.

¹²Nuna nu, nanggàna ndàba-maya na tau, maa ba nda ningua pa-hilitu-da da tau Yahundi dàngu da tau la banjaru hawiangu. Nu i Ala kamehangu Miri ndàbana na tau-maya duna. Nawua ndàba-manya kanyuru mabundu làndangu na tau ma-kamahi-nya na pa-ndulangu-na.

¹³Pa-tulihu-maya la Huratu Matua, “Mbuu ndàbana na tau na mawara-nya i Miri napa na-mànangu,” ba wàna.

¹⁴Na nyuna nggiki wara-nakaka na tau lai Miri jàka ndedi-madu dapawai? Dàngu nggiki hama pawai-dakaka lai Miri jàka ndedi-madu darongu-ya na rukuna Nyuna? Hama-manai, nggiki hama rongu-danya-kaka na rukuna i Miri jàka nda ningu mapabobarungu?

¹⁵Dàngu nggiki hama ngàndi-nanya-kaka tau nu na lii langu jàka nda pa-paràhangu-ha? Daa la Huratu Matua tuna yia na pa-tulihu, “Ai kanjupu hàmu-aya na maida da tau da mangàndi-ya na Lii Mànangu welingu lai Ala!” ba wàna.

¹⁶Na nyuna nda mbuu ndàba-ana na tau na ma-kataku-ya nuna na Lii Mànangu. Nadu ba mbàda panii-naka i Yahaya, “Miri, nggamu-aka na mawaiya na-pabobarungu-ma?” wàna.

¹⁷Tuna nuduka hi kiri pawaina na tau rukuna ba darongu lii langu, dàngu hi kiri ronguya na lii langu rukuna ba ningu tau ma-bobaru-ya na rukuna i Karitu.

¹⁸Na nyuna paàrangu-nggunya: Deningu-mana ihu nu ba ndedi darongu-ya na lii langu? Jiangu-ma duna ba mbàda rongu-danya! Nadu ba tuna yia na pa-tulihu la Huratu Matua, “Na talia liida mbàda làngi-naka la nggubulu pinu tana, na kareuku-da mbàda tàka-naka la hupu tana,” wàna.

¹⁹Kuhili paàrangu: Ndedima ihu dapinya paraï tau Ihirailu? Màtawa ka nahema mangilu-ya paraïna i Muha na paàrangu yiana. Napanii i Muha, “Tuna yia na paniina i Ala, ‘Napa ku-pamalara-ha da etimi hanggangu la hau banjaru na nda banjaru-nggu dàngu napa ku-pakaraü-ha da etimi hanggangu la hau banjaru manduba,’ ” wàna.

²⁰Narihi toru mbenipa papanii i Yahaya, “Tuna yia na paniina i Ala, ‘Da tau da manda himbuka, mbàda hunggu-danggaka; dàngu ku-pawuwangu wikinggu lai nyuda, da manda paàra-nya na rukunggu Nyungga,’ ” wàna.

²¹Na nyuna rukuna na banjaru Ihirailu napanii i Yahaya, “Tuna yia na paniina i Ala, ‘Piti weli mbarungu lundu rudungu ba ku-pajola-nja da limanggu la hau banjaru ma-malihu dàngu na manda karadaku,’ ” wàna.