Read Kambera ROMA 11 Bible Online

ROMA 11 - Kambera bible

ROMA 11

¹Nàhu paàrangu-nggunya: Wàru-mana-nyaka ihu i Ala na banjaru wikina? Jiangu-ma ba ndia-a! Nyungga wiki ana umbuku-na i Ambarahàmu-maka welingu la kabihu Mbanyamingu.

²Ndia-a! Nda nawàru-anya duna i Ala na banjaru-na na pambàda pindina welingu la kawunga-na. Ipi-manya nyimi angu dedi na pa-tulihu la Huratu Matua na rukuna i Elia, ba napanii wànya na banjaru Ihirailu lai Ala. Napanii i Elia,

³“Miri, da-pameti-haka tau da wunangu-mu, dàngu da-nyungguru-ha da pangia ngia pawotu-nggau maraku. Didi meha-ma-akaka nyungga dàngu ka pameti-ya wàda-manggaka,” wàna.

⁴Nggikina wàna nahema-nanya i Elia i Ala? Nahema i Ala, “Tau 7000-mayapa duku na pabiingu nduma wikinggu. Ndedima duda nyuda da-marubuku la marapu Mbaàlu,” wàna.

⁵Tuna numbu la rehi nàhu. Ninja da ma-ana nda pirada da tau pambàda pindina i Ala ruku pa-namungu-na.

⁶Nu ba napindi-ha na-palata-nya la pa-namungu-na, nda na-palata nianya la pawunda-da. Nadu jàka na-palata ninya nu na pindina i Ala la pawunda tau, ka nda pa-namungu langatàka-ayapa nu na pa-namungu-na i Ala.

⁷Jia ba tuna, nggiki hama-naka nu? Na banjaru Ihirailu nda dangala-anya na pahimbu-da. Jiaha da ma-ana nda pira-ma-ada da pambàda pindina i Ala, da mangala-nya. Hawiangu da-malihu ndàbanya na paaungu-na i Ala.

⁸Maa ba tuna yia na pa-tulihu la Huratu Matua, “Na-panduba-ha da etida, da kanandingu-da paraïna i Ala; lundu nàhu nda daita-a da matada dàngu nda darongu-a da kahilu-da,” wàna.

⁹I Ndautu napanii-mbu, “Màtawa da mbabuda ka danjadi-ha oka kahili nduma wikida, dàngu ka danjadi-ha lambongu, ngia pa-kanabu-da hi damija!

¹⁰Màtawa ba da-tàngaru ka na-kapàtangu hàla ka àmbu daita; dàngu màtawa ka dabunggu lundu nu - nu,” wàna.

¹¹Nàhu kuhili paàrangu: Nu ba da-kanabu da tau Yahundi, ka lupangu da-talàpu wàna-maka ihu nu, hi lupa tuna nu? Nda hidama! Na nyuna rukuna ba danjala, tàka hi pamàna-nyai duna na banjaru hawiangu, hi lupa da-malara wàngu da etida da tau Yahundi hangganja da banjaru hawiangu.

¹²Rukuna ba nanjala na banjaru Yahundi dàngu ba nda danunju-ya na pambuha-na i Ala, ka pa-kanyuru-nanjaka da banjaru hawiangu paraïna i Ala. Ri - rihi-amaka jàka nahàmu belika na papuingu-da da tau Yahundi dàngu i Ala; ka manaü rihi-naipa duna ngeru na kanyuru na pawua-na i Ala!

¹³Tàka nàhu màtawa ka kupanii la angu dedi da nda banjaru Yahundi! Lundu nàhu ku-pamanàra-maya duku na wai ngabanggu, ba pa-pahurungu-ka ndumada da banjaru nda Yahundi.

¹⁴Na pamonu-nggu, jiaya ka peku pa-malara àru-nggunya eti na banjaru wikinggu wànggu; nu ba tuna nu ka peku pamàna-nggunja hawiangu lai nyuda wànggu.

¹⁵Rukuna ba na-tulaku-ha paraïna i Ala, ka hàmu beli-nanyaka na papuingu-na na pinu tana dàngu i Ala; ka wàngu panggiki bia-naka jàka na-kataku beliha paraïna i Ala! Jiangu-maka duna ba hama tuna tau meti maluri beliya!

¹⁶Jàka pambàda wuangu lai Ala-madu-yaka na kawunga kadipu roti, pa-wuangu lai Ala-mbuya nggubulu-na nu na roti, wàna-duka nu. Dàngu jàka manguna i Ala-yaka na amuna na ai, mangu-mbunanja da kahanga-na.

¹⁷Hawiangu da kahanga pingi haitungu — nu da tau Yahundi — pambàda lai-haka. Tàka nu la ruku kabela ba laiya hi pa-dumbuku-nya kahanga haitungu omangu, nu da angu dedi la hambeli tau Yahundi. Hi pa-dumbuku-nggau lai nu angu dedi ka peku pàda-munja mbuu ndàbada da mahàmu welingu la luri pangahu-da da tau Yahundi.

¹⁸Jia ba tuna àmbu pa-halela-duha nyuda da pambàda lai hama tuna na kahanga. Ipangàda-manya bàdi ba kahanga pàku-akai nyimi. Dàngu ba nda kahanga-a na mawua-nya pangangu na amu; tàka jiaya na amu duna na mawua-nya pangangu na kahanga.

¹⁹Na nyuna jiangu-maka duna upanii angu dedi, “Tubangu-ma na nyuna hi kiri laiha nuda da kahanga, jiaya ka peku pa-dumbuku-ngga nyungga la pingina!” jàka wàmu.

²⁰Deningu-mana nu. Na nyuna hi kiri wàrunja nyuda jiaya ba nda dapawai, tàka nyumu dumu hi kataku-kau jiaya bau pawai. Jia ba tuna àmbu ngànjangu wadunya nuna; tàka làti duna lupangu umangàdatu-ma bàdi.

²¹Nadu jàka nda na-paaïngu i Ala la pawàru-nja da tau Yahundi da mahama tuna kahanga memangu-ha àmbu kaka ànga-duya ba na-paaïngu la pawàru-nggau nyumu!

²²Jia ba tuna taita-ya yiana ba kanjupu hàmuya i Ala dàngu kanjupu pa-jorutungu-mbuya. Na-pajorutungu ba na-paluangu limana hangganja nyuda da manjala, na nyuna nahàmu eti-manai lai nyumu angu dedi — mili àru nyuna upa-daingu paluri la màjangu-na. Jàka ndia, pa-wàrungu-mbukau nyumu napa.

²³Jàka jia-haka da tau Yahundi, jàka da-manjaria-ka welingu la nda pawaida, pa-kataku beli-maha duda napa; maa ba nambiha-ma duna i Ala la pa-kataku beliha.

²⁴Nyumu angu dedi manda welingu la banjaru Yahundi, hama tuna, na kahanga haitungu omangu-kau. Nu ba tuna hi peku bi-duana pa-padumbuku-nggau la pingi haitungu hàmu, jiapa ka na-pahilitu-kai la huri mema - mamu dumu, ka rihi-amaka da tau Yahundi da pa-pangerangu la kahanga pingi haitungu memangu. Narihi muda-maka duna lai Ala la pa-pabeli-nja la pingi memada.

²⁵Angu dedi! Kumonu-manggai ka ambii kaka wikimi ba mbàda pi-minyaka mbuu ndàbana. Maa ba ninya duna na pambuha-na i Ala, tàka ndedi napi-anya tau. Tàka ka dapinya nyuda wànggunggai; yiana-ya: Hawiangu da tau Yahundi da-malihu, na nyuna na-malihu-da nu dirama-ana lundu natoma na dihana na tau nda Yahundi na ma-hurungu lai Ala.

²⁶Tuna nuduka napa hi namara ndàba na tau Yahundi. Ba tuna yia na pa-tulihu la Huratu Matua, “Napa namaiya na Hanganji Ma-pamara welingu la Hiungu; napa na-podahu ndàbaha da akatu-da da ana umbuku-na i Yakupu.

²⁷Napa kutura-ya na pa-njanjingu yiana dàngu nyuda la rehi jàma-nggunja da njalada,” wàna.

²⁸Rukuna ba nda dabihu da tau Yahundi pa-kataku-ya na Lii Mànangu welingu lai Ala, tuna nuduka hi muhuna i Alaha; tàka hi jiayai duna nu na pautu wàda da angu dedi welingu la hambeli tau Yahundi. Na nyuna rukuna ba papindi-na i Alaha, pa-daingu mbuha-mananja da tau Yahundi paraïna i Ala lumuda da boku la mangilu-da.

²⁹Nadu jàka mbàda pindi-naka tau i Ala dàngu hi na-pakanyuru-ya, nda jia yila beli-ananya paraïna i Ala nu na pambàda wundana.

³⁰Àmangu ndai karadaku-a nyimi lai Ala. Tàka nàhu mbàda paloha-nanyaka paraïna i Ala ba pahàlangu-minyaka welingu la njala, rukuna ba nda da-karadaku da tau Yahundi.

³¹Tuna numbui duda nu da tau Yahundi. La rehi nàhu nda da-karadaku-a lai Ala, ka peku paloha-nya ba pahàlangu-minyaka welingu la njala. Tàka nyudambui duda ngeru[15] pa-palohangu-ya na pahàlangu-da welingu la njala.

³²Nuda ba mbàda màta-nanyaka nggubulu-na na tau paraïna i Ala ka natauku-ha nda karadaku-da, ka peku paloha-nanja na mila-nanja eti nyuda mbuu ndàbada.

³³Kanjupu halawàlangu-ya na wuluna i Ala! Kanjupu tanjiku-ya na manggàna-na dàngu na pinguna. Nggamu ma-ngalangu pa-manginjiru-ha da botangu-na? Nggamu ma-ngalangu pa-jàngapu-ha jàka nggiki hama ràmana?

³⁴Tuna yia na pa-tulihu la Huratu Matua, “Nggamu nu mapinya na pangàdangu-na i Miri? Nggamu nu, tuna nu bàdi na mawàna-nya?

³⁵Nggamu nu mambàda wuanya ngga - nggàra i Miri hi pekuna la pa-karuhi-ya na belingu-na?” na mawàna.

³⁶I Ala na ma-padika-nya mbuu ndàbana. Welina lai Alama mbuu ndàbana dàngu ndumana i Ala-maha. Pa-wotungu-ya i Ala lundu nu - nu! Amingu.