Read Kambera ROMA 15 Bible Online

ROMA 15 - Kambera bible

ROMA 15

¹Nyuta duta ma-màndungu la etinda jàka nggàraya na pawainda, lupangu-maka bàdi ta-patoru-nya na mbotu etina na tau na ma-maluputu pawaina. Àmbu takeha ni bianya na pambaha eti wànda nyuta wikima-a.

²Na nyuna lupangu-maka bàdi nyuta haàtu - haàtu ta-pambaha eti dua wikinda dàngu angu dedinda na pahàmu wàna nyuna, ka naparu-kangu pa-undungu na pawaina.

³Nadu i Karitu ba nda na-kanandi-mbunya na pambaha eti wàngu la nduma wikina. Tuna yia na pa-tulihu la Huratu Matua, “Mbuu ndàbada da pa-paaka wàdanggau Nyumu, nanggàna ni-kaka nyungga,” ba wàna.

⁴Mbuu ndàbada da pa-tulihu la Huratu Matua jiaha da pa-papekangu wànguta. Nadu da lii papekangu da pangala-nda welingu la Huratu Matua, jiaha da mawua-nda pa-torungu wàngu dàngu àtalu hi peku monu-ndanya i Ala.

⁵Màla àruki i Ala, na ma-wuangu-ya na torungu dàngu na omba eti la tau, ka nandula àrukai kai luri kahau etingu, nunjuya na ngerangu-na i Karitu Yehu.

⁶Bai wàngu pakahau etingu mbuu ndàbami la pa-parànjangu pawotu-nya i Ala, na Amana na Mirinda i Yehu Karitu.

⁷Jia ba tuna angu dedi, màtawa kai maràngga panggepi hàmu etingu dàngga angumi, hama tuna i Karitu ba nanggepi-kai nyimi la pa-bunjuku wàna i Ala.

⁸Nadu, ingàdaya, ba mbàda lumu-nanyaka na tau Yahundi i Karitu ka paloha-nya ba napa-tutungu i Ala la pa-pahàra-nja da panjanji-na la boku la mangilu-nda.

⁹Rukuna ba nahàmu-nja eti i Karitu da banjaru hawiangu, jia-duyaka hi kiri pa-mangunju-danya i Ala. Tuna yia na pa-tulihu la Huratu Matua, “Tuna nuduka hi kuwotu-nggau napa la hongada da banjaru-ka, napa kuludu wotunya na tamumu,” ba wàna.

¹⁰Hili nimanyai na pa-tulihu tuna yia, “Hawola karia-nyawa na banjaru-na i Ala na papindi ha dimi banjaru-ka!” ba wàna.

¹¹Dàngu yiana-mbu, “Wotu-nyawa i Ala, ha dimi banjaru mbutami, màtawa mbuu ndàbana na tau ka dawotu-nya Nyuna!” na mawàna.

¹²Dàngu yiana-mbu na papanii-na i Yahaya, “Welingu la ana umbuku-na i Ihai napa na-kawudaku na haàtu na ma-pareta-ha napa da banjaru; lai Nyunaka napa na ngia pa-monungu-da da banjaru,” na mawàna.

¹³I Ala jiaya na ngia pa-monungu-mi. Màla àruki ka na-paihi-nja da etimi wàngu mbuu ndàbana na mbaha etika, dàngu mànjaku rukuna bai pawai lai Nyuna, màta ka wàngu mbihana na Ngahuna i Ala kai parukangu pamonu-nya i Ala.

¹⁴Dou da angu dedinggu duku! Na-màndungu-ma duku la etinggu ba kanjupu dangu-maha da mahàmu lai nyimi. Ipima-nya dimi mbuu ndàba-naka, dàngu bai ngalangu-ma pa-maràngga papekangu-mbu dàngga angumi.

¹⁵Na nyuna jàka jia-haka da manda pira ngiada, ku-panamu-nggai wàngu pa-jorutungu-na la huratu yiana, maa ba mbàda wua-nangga-nyaka i Ala na wai ngera nuna.

¹⁶Mbàda panjadi-nanggaka ma-tanggu lumunya i Yehu Karitu ka paràha-ngga la ba - banjaru nda Yahundi. Tàka nyungga hi kuwunda-ya na pawunda ratu, na ma-bobaru-ya na Lii Mànangu welingu lai Ala, ka màtawa da tau nda Yahundi ka danjadi tanda maraku pa-kataku-na i Ala. Màla àru-kiwa na Ngahuna i Ala ka napa-njadiha tanda maraku pawotu pa-mehangu ndumana i Ala.

¹⁷Jia ba tuna, rukuna ba mbàda pa-mbulungu-ngguka dàngu i Karitu Yehu, peku-ngguka duku pa-hamemu wànya na paràma-nggu ndumana i Ala.

¹⁸Kutoru mbeni papanii tunggu nu, jiaya na manggàna-ya na paràma-na i Karitu-a daa lai nyungga, la pa-panjadi-ha tau manundu lai Ala da tau nda Yahundi. Kuwunda-ya nuna wàngu pawunda dàngu wàngu paràma-nggukai,

¹⁹da pa-pakariangu wàngu tanda pa-hangàtarungu dàngu da tanda mbiha manda ningu hamangu; mbuu ndàbada nuda ruku mbihana na Ngahuna i Ala. Mbàda bobaru ndàba-nggunyaka na Lii Mànangu rukuna i Karitu la ta - tauka, piti welingu la Yeruhali lundu la Ilirikumu.

²⁰Na parinju etinggu, jiaya la pa-bobaru-ya na Lii Mànangu welingu lai Ala la hau pangia - hau pangia, da mandedi ronguya na rukuna i Karitu. Maa ba nda kubihu-a pa-pakiringu paràma la ngia pambàda ràma tau hawiangu.

²¹Ninya na pa-tulihu la Huratu Matua, “Da tau da mandedi ngala ndoku-manya na lii langu rukuna Nyuna, napa daita-ya; tàka nyuda da mandedi rongu ndokuya, napa da-jàngapu-ya,” ba wàna.

²²Nuna-duyaka hi ningu mànu mapara-tahungu la pamai pa-tadalu-kai nyimi.

²³Na nyuna nàhu na paràma-nggu la nga - ngabana lai nu mbàda palundu-nggunyaka. Pinjangu ndaungu ba ku-rinjungu pa-tadalu-kai nyimi.

²⁴Napa jàka kuli hàmbu la paraingumi ba kulua la Hapanyulu, peku-ngguka pa-tàbuku-kai nyimi wàngguka pamonu-nggu, hi ku-harangu hawola dànggai hakudu. Hàlaka nu kumonu-nggai jàka pekuna kai ndula-kika ba jiaya na luanggu la Hapanyulu wànggu.

²⁵Na nyuna ka kulua kàdi nàhu la Yeruhali wànggu pangàndi-ha da pandula wànya na banjaru-na i Ala lai nu.

²⁶Nadu da kabungguru-na i Ala la Makandonia dàngu la Akaya mbàda patunju-danyaka la pawua-nja pa-ndulangu da angu dedi da mamila la banjaru-na i Ala la Yeruhali.

²⁷Dàngu mbaha eti-mada ba da pahama-nya nuna. Ràka-mana duna ba dandula-ha da angu dedi da mamila nu la Yeruhali; maa ba welingu la tau Yahundi-du hi da-ngalangu kanyuru welingu lai Ala da tau nda Yahundi. Jia ba tuna, ràka-mana ka ndula wànja kanyuru pinu tana da tau Yahundi paraï da tau nda Yahundi.

²⁸Jàka ku-palundu-nyaka nuna na wai ngerangu, dàngu jàka kupa-kata-njaka lai nyuda la Yeruhali da pandu-langu pambàda kangutungu, jia-yaka duna napa hi kulua la tana Hapanyulu hi kuli hàmbu la paraingu-mi.

²⁹Jàka kutàka-ka napa lai nyimi, jiangu-maka duna ba nadangu na kanyuru welingu lai Karitu na patàka ngàndi-nggunggai.

³⁰Lumuna i Miri Yehu Karitu, dàngu lumuna na pawua-na na Ngahuna i Ala, ku-kamahi weli puhu weli etinggai, màla àruki ka weli etimi bai hamaya dàngga nduma-nggu lai Ala.

³¹Hamayangu-wa ka na-pahàla-ka i Ala welingu la limada da tau nda pawai la tana Yundia, dàngu na pakundu dukunggu la pangàndi-ha da pa-ndulangu la Yeruhali, ka da-kataku hàmu etiha paraï banjaru-na i Ala lai nu.

³²Nu ba tuna nu, jiaya jàka wàna i Ala, peku mainggu wàngu mbaha etinggu lai nyimi. Hi na-nggaüru na etinggu la pahiku-mi.

³³Màla àruki i Ala, na mawua-nya mapeku-mahàmu na tau, ka naangu-nggai mbuu ndàbami. Amingu.