Read Kambera ROMA 16 Bible Online

ROMA 16 - Kambera bible

ROMA 16

¹Ku-rinjungu ka datanda-ya i Pembi, na ana wininda wànggunggai. Jiaya na mandula-ya na kabungguru la Kengikaria.

²Kataku-ya ba jiaya na haàtu la banjaru-na i Miri. Maa ba tuna numa duna da tau mapawai lai Ala ba da-maràngga panggepi dua wikida. Ndula àru-kiya, jàka nakarai pandulangu lai nyimi, maa ba nadangu-maka na tau pambàda ndulana — dàngu lupa nyunggambu.

³Patàka-kinya na tambinggu lai Perikila dàngu i Àkuwila da angu ràmanggu la paràma-na i Karitu Yehu.

⁴Datika pameti ka-amangu keha ka pahàla-ya ba wàdangga. Ku-pamalangu manja nyuda — dàngu nda didi meha biaka nyungga, jia ndàba-mayai duda da kabungguru-ka da ma-welingu la banjaru hawiangu da nda Yahundi ba da-pamalangu-nja nyuda.

⁵Patàka-mbunya na tambingu la kabungguru ma-kanguhuru la umada nyuda. Tambi wànanggau wàminya i Epinetu na panamu-nggu. Jiaya nyuna-maka na kawunga tau la tana Ahia na mapawai lai Karitu.

⁶Tambi wànanggau wàmi-mbunya i Maria. Nu na mambàda ràma pa-mbangatungu ndumami nyimi.

⁷Patàka-mbunya na tambinggu lai Ànduruniku dàngu i Yunia.[18] Nyuda angu banjaru-ngguha dàngu angu tama-ngguhaka la uma kapàtangu. Ba ndedi kupawai nyungga lai Karitu, mbàda pawai mangilu-madaka duda nyuda. Tau patanda-maha duda la hongada da pa-pahurungu.

⁸Tambi wànanggau wàminya i Àmupaliyatu, na panamu-nggu, maa ba mbàda jiaya na angunggu la pa-pambulu dànya i Miri.

⁹Patàka-nya na tembinggu-nya i Urumbanu, na angu ràmanda la paràma-na i Karitu. Hama-mbunai na tembi-nggunya i Hataki na panamu-nggu.

¹⁰Tambi wànanggau wàminya i Apelihu. Papingu-mayaka na tuturu-na lai Karitu. Tambi wànanggai wàmi-mbunja da ihi umana i Aritumbulu,

¹¹dàngu i Herundiungu. Nyuna angu banjaru-nggunya. Tambi wànanggai wàmi-mbunja da angu dedi angu pawainda la kuru umana i Nàrakihu.

¹²Tambi wànanggai wàminja i Tirupena dàngu i Teripoha da maràma pambanga-tungu palumu-nya i Miri, dàngu i Perihi na panamu-nggu. Nyuna mbàda ràma pamba-ngatungu-mbunaka ndumana i Miri.

¹³Tambi wànanggai wàminja i Rupuhu dàngu na inana, ba beri ina wiki-nggunya. I Rupuhu tau papindi-na i Miriya dàngu tau pawotungu-maya.

¹⁴Patàka-nya na tambinggu lai Ahingukaritu, lai Palenggungu, lai Herimihu, lai Pàturombàhu, lai Herimàhu dàngu mbuu ndàbada da angu dedi angu pawainda da maninja lai nyuda.

¹⁵Tambi wànanggai wàminya i Pilulongguhu, dàngu i Yulia; hamangui i Neriu dàngu da ana winina; dàngu i Olimupa hamanai mbuu ndàbada da tau pawai da maninja lai nyuda.

¹⁶Imaràngga patambi-wa pa-namatu-nya na pa-oringu ba tau Karitu-ta. Mbuu ndàbada da kabungguru-na i Karitu da-patàkangu ndàba tambida lai nyimi angu dedi.

¹⁷Dou da angu dedinggu-duku! Kukamahi pambana-nggai: Pananjarungu-ma la tau na ma-patumbu-ya na pa-kawàringu dàngu na ma-kuwaru-ya na pawaina na tau hanggangu lai Miri. Nuna nu na pa-hilitu dàngu na pambàda pa-pekangu-kai. Wiliru-manja da tau tungu nu.

¹⁸Nadu da tau da matuda nu nda ràma-danya la ndumana i Karitu-a na Mirinda, tàka ràma-danya nduma pa-lànyapu wàda da eti wiki-ma-ada. Dapa-mandangu wàngu kareuku ma-minangu, da-panyonga-ha da tau da manda nggàra papida.

¹⁹Mbàda kada ndàba-mana-nyaka tauka bai manundu la lii papekangu rukuna na Lii Mànangu welingu lai Ala. Dàngu nahàmu wàmanya na etinggu ba timi nu. Na parinju-manggu jiaya kai manggàna la mahàmu, dàngu kai nduba ningu la ma-akatu.

²⁰I Ala na mawua-nya mapeku mahàmu na tau, napa nalu pangia wawaya lai nyimi i Kambàliku, hi na-pamuburu-ya. Màla àru-kiwa ka na-paliri mànunggai kanyuru paraïna i Yehu Karitu na Mirinda![19]

²¹I Timutiu na angu ràmanggu na-patàka-nggai tambina. Hamangui i Lukiu, i Yahungu dàngu i Hohipatiru da angu banjaru-nggu.

²²Nyungga Teritiu ma-tulihu-ya yiana na huratu ku-patàka-nggainya na tambi paangu dedingu-nda.

²³Na-pangàndi-nggai tambina i Nggayu. La umana nyunama ku-ngiangu ningu dàngu lai numai na ngia pa-lumungu-na na kabu-ngguruma. I Eràtuhu, na makata-nja da banda paraingu, na-pangàndi-nggai tambina. Hamanai i Kawàratu na angu dedinda. [

²⁴Màla àru-kiwa na Mirinda i Yehu Karitu ka na-paliri-nggai kanyuru mbuu ndàbami. Amingu.]

²⁵Pa-wotungu-ya i Ala! Nambiha-ma duna pa-paundu-nya na pawaimi nunjuya na Lii Mànangu welingu lai Ala na pabobaru-nggu rukuna i Yehu Karitu. Ku-bobaru-ya nu na lii langu nunjuya na papuru pekana-ngga i Ala; nu na rukuna na patikingu na madira dangu ngahu ndaungu-na ba nda napinya tau.

²⁶Tàka nàhu, la hupu liina i Ala ma-palupangu, pambàda peka-yaka hi paka-da ndàba wànya huratu pa-tulihu-da da wunangu, la mbuu ndàbana na banjaru-ka ka peku pawai ndàbada dàngu ka da-karadaku lai Ala.

²⁷Didi meha-ma-aya duna Nyuna na Ala, Nyuna mahupu manggàna-ya. Màla àruki ka pabunjuku-ya lundu nu - nu rukuna i Yehu Karitu! Amingu.[20] Yemaya na tembima, Paulu, atana i Karitu.