Read Kambera ROMA 4 Bible Online

ROMA 4 - Kambera bible

ROMA 4

¹Jàka tuna nu nggikina wànda-nyaka bàdi i Ambarahàmu na boku la mangilu-na na banjaru-nda? Nggàra-yaka na padeni-na?

²Jàka na-kataku bi-duaya paraïna i Ala ba pelu tau maliya na etina i Ala rukuda da pawu-ndana, lata-mana-nyaka làti jàka na-hamemu wànja da pawunda-na. Tàka nda nangalangu-a pa-hamemu la hanggana i Ala.

³Ninya na pa-tulihu la Huratu Matua, “I Ambarahàmu napawai lai Ala, rukuna nu na pawai-na na-kataku-ya paraïna i Ala ba pelu tau maliya na etina i Alaya,” ba wàna.

⁴Na tau na maràma na-ngalangu wundana; nu na wundana pawua juangu-ya, nda ningua mawàna; nadu ba ngera-mananya duna.

⁵Na nyuna ningu tau na manda monu ninya na paràma wikina; na-huharungu wikina lai Ala na mapeka-nya mànangu na tau na manjala. Palata-nya nuna-duka na pawaina hi na-kataku-ya na tau nuna paraïna i Ala ba pelu tau na maliya na etina i Alaya.

⁶Tuna numbu na paita-na i Ndautu; jia-duyaka hi na-paoha-nya na tau pambàda kataku-na i Ala ba pelu tau maliya na etina i Alaya, bundu nda pangàda-nanja paraïna i Ala da pawunda-na na tau nuna. Tuna yia na paniina i Ndautu,

⁷“Oha-anaka na tau na pa-jàmangu njàlana dàngu na tau na pa-hungguru-na njalana paraïna i Ala!

⁸Oha-anaka na tau na panda palimba-na njalana paraïna i Ala!” wàna.

⁹Jiaya na tau na makata-nya na huri kària ihu na palaana nu ba napeka pa-ohangu? Jàka ndia na tau na manda katanya na huri kàrimbu? Mbàda tiki haha-ma-manyaka la mangilu-na ba pelu tau maliya na etina i Alaya i Ambarahàmu ba na-kataku-ya paraïna i Ala, rukuna ba napawai lai Ala.

¹⁰Màla pirangu-ka nu ba napeka-ya nuna paraïna i Ala? Ba ndedi nakàri ihu jàka ndia hi mbàda kàri-naka i Ambarahàmu? Ka ni hi jiaya ba ndedi pakàri-ya wàngguka, ba nda la hambeli-na nuki.

¹¹Ba la malamiri pàku-anaka hi kàriya, tàka nuna na kàri ba tanda-aya duna ba mbàda kataku-nanyaka nyuna paraïna i Ala, ba pelu maliya na etina i Alaya, rukuna ba napawai lai Ala. Na kataku-nanya paraïna i Ala ba ndedi-mapa na-katanya na huri kàri. Dàngu hi daama ndàbanya i Ambarahàmu la huri pangahu paraï mbuu ndàbada da tau mapawai lai Ala, dàngu ba tuna hi mbàda kataku-naha paraïna i Ala ba pelu maliya na etina i Alaha jiapa-kai ka nda dakata-nya na huri kàri.

¹²I Ambarahàmu daama-mbunya la huri pangahu paraï tau da makata-nya na huri kàri. Hi da-amanya la huri pangahu, nda jia biaya ba dakata-nya na huri kàri, tàka jia-mbuya ba daluri waiya i Ala hama tuna i Ambarahàmu ba ndedi nakata-nya na huri kàri.

¹³Nanjanji-ya lai Ambarahàmu dàngu ana umbuku-na paraïna i Ala ba manguna i Ambarahàmu-ya napa yia na pinu tana. Hi tuna nu na panjanji-na i Ala nda jia-aya ba na-karadaku la uku anggama Yahundi i Ambarahàmu, tàka jiaya ba napawai lai Ala hi na kataku-ya paraïna i Ala ba pelu tau maliya na etina i Alaya.

¹⁴Nadu jàka jiaha da tau da ma-karadaku-nja da uku anggama Yahundi-a da ma-kataku-ya napa na panjanji-na i Ala, ka nda ningu-apa linguna na waindanya i Ala, tàka na njanjina i Ala nda ningu ndoku-apa ihina.

¹⁵Na uku anggama Yahundi naparuu-nya na hukungu welingu lai Ala. Tàka jàka nda ningu uku nda ningumbu mapangga uku.

¹⁶Jia ba tuna palata-nya na pawaina na tau lai Ala hi ninya na panjanji-na i Ala. Nuna nu jia-yaka na pa-màndungu wàna la mbuu ndàbada da ana umbuku-na i Ambarahàmu ba pa-wuangu lai nyudaya nu na pa-njanjingu ba pawua juangu ma-welingu lai Alaya; nda mbulungu la tau makara-dakunya na uku anggama Yahundi bia, tàka lai nyudambu nu da mapawai lai Ala, hama tuna na pawaina i Ambarahàmu lai Ala. Nadu ba ama ndàba-dundanya i Ambarahàmu la ngera pangahu.

¹⁷Maa ba tuna yia na paniina i Ala lai Ambarahàmu, “Mbàda panjadi-nggunggauka nyumu ka na-amanggau banjaru dangu,” wànanya. Tuna nuduka i Ala ba na-wuangu-ya na pa-njanjingu-na lai Ambarahàmu. Tàka i Ambarahàmu napawai lai Nyuna. Jiaya Nyuna-maka na Ala na ma-paluri tau mameti; jiaya Nyuna-maka na Ala na mawàngu pa-kareuku bia ba na-padika-nya na manda ninya hi kiri ninya.

¹⁸Pa-daingu bia-nanya pa-monungu dàngu papawai i Ambarahàmu ka jiapa-kai ka nda ningu-apa pa-monungu. Rukuna nuna-duka hi nanjadi-ya amana na banjaru dangu. Hama tuna na pa-tulihu la Huratu Matua, “Da ana umbuku-mu napa kanjupu danguha,” ba wàna.

¹⁹Pi-mananya la rehi nu i Ambarahàmu ba nda peku-anapa paningu kawukuna, maa ba làpahu-mana-nyaka na kawedana dàngu mareni hangahu-ama-naka na ndaungu lurina; tàka hi nambuta-mbui na papaha-na, i Hara. Jiapa-kai ba tuna nda namàli-a na pawaina i Ambarahàmu.

²⁰Padaingu pawai-mana dàngu nda nandua nda-ndianya na njanjina i Ala. Ba tuna hama huka undungu-ma-ana na pawaina hi nawo - wotunya i Ala.

²¹Na-màndungu hàmuma la etina ba namàka-ma duna i Ala pa-pahàra-nya na pambàda njanjina.

²²Nuna-duyaka hi kiri kataku-nanya i Ambarahàmu paraïna i Ala ba pelu tau maliya na etina i Alaya.

²³“Pa-kataku-ya ba pelu tau maliya na etina i Alaya” ba wàna, nda lumu mehana i Ambarahàmu bia hi kiri tulihu-ya,

²⁴tàka lumunda nyutambu. Napa nyuta pa-kataku-mbuta ba pelu tau maliya na etina i Alata, maa ba tapawai-du lai Ala na ma-paluri-ya welingu la meti i Yehu na Mirinda.

²⁵Nu i Yehu pambàda pulingu-yaka ka pameti-ya rukuda da njalanda nyuta; tàka hi nahili paluri beliya paraïna i Ala ka pekuna nyuta la pa-papeku daa belinya i Ala.