Read Kambera ROMA 7 Bible Online

ROMA 7 - Kambera bible

ROMA 7

¹Angu dedi! Nyimi mbuu ndàbami mbàda pimami-nyaka na uku. Jia ba tuna mipi-manya na-jorutu-na na uku la haàtu tau, mbulungu-ana la ngala lurina.

²Ngera hama tuna, na haàtu kawini maningu leina, na-jorutu-ya uku la mini leina mbulungu la ngala lurina na mini lei-ana. Jàka nameti-ka na mini leina pahàlangu-nanyaka duna na papaha-na welingu la jorutu-nanya uku la mini leina.

³Jàka na-papohungu dàngu mini haàtu ba naluri-ipa na leina, njuraku-nanya wànanya. Na nyuna jàka nameti-ka na leina, pa-namatu-nya la uku, kawini jua-yaka duna nyuna. Tàka jàka naleingu mini haàtu, nda njuraku-ananya.

⁴Tuna numbu na ngerami nyimi angu dedi. Mbàda meti pahàlangu-mika welingu la uku anggama Yahundi, ba mbàda papambulungu-kaika dàngu na ihina i Karitu, tàka hi namangu-nggai paraïna Nyuna na pambàda paluri beli welingu la meti. Hi paluri beliya Nyuna welingu la meti ka ningu lingunda lai Ala la lurinda.

⁵Nadu àmangu taluri nunjuya na hada tau. La rehi nu da parinju etinda da manjala da ma-miripu la etinda rukuna ba ninya na uku anggama, jiaha da ma-manyori daa la wikinda. Tuna nuduka hi tawunda-ha da ma-orangu la meti.

⁶Na nyuna nàhu nda na-jorutu-atapa uku anggama Yahundi. Meti pahàlangu-ndanyaka la uku na ma-taukuta àmangu. Nda tarajaku pa-namatungu-apa hama tuna na pawàngu la ma-wungangu, ba pa-namatu-nya na uku na pa-tulihu. Tàka nàhu rajaku pa-namatungu-ndanyaka la pawàngu na mabidi na papaita-nanda na Ngahuna i Ala.

⁷Jàka tuna nu, nggikina wàndaka bàdi? Na-kajàliku na uku anggama Yahundi wàndaka? Nda hidama! Na nyuna jiaya na ukuma na ma-papeka-ngga rukuna na njala. Nda kupi-anya duku làti jàka nggàraya duna na malumbangu, “Àmbu malumbangu,” jàka nda wàna na uku anggama.

⁸Welingu la uku anggama, na-ngalangu ma-kalongga na njala la pa-pamiripu màtu - màti pati-kingu la pa-malumbangu daa la etinggu; nadu jàka nda ninya làti na uku anggama, ka meti-nanyaka na njala.

⁹Àmangu kuluri mangu nda ningu uku anggamangu. Tàka ba ninyaka na uku anggama pakiringu-nanyaka paluri na njala,

¹⁰tàka nyungga meti-nggunyaka. Tàka na uku anggama na paluri wàngu ba wànda làti na pawuku la mangilu-na, hi jia bia-yaika na maparuu-ngganya na meti.

¹¹Maa ba na-hadangu-ya welingu la uku anggama-du hi na-ngalangu manggawangu na njala la pa-panyonga-ka dàngu la papa-metika.

¹²Na uku anggama ma-pawelingu lai Alaya, nimbihu-da da hupu lii daa la uku welida lai Ala, ba tuna damola dàngu dahàmu-ma.

¹³Màla, ka jiaya na mahàmu-ka ihu nu na ma-patàka-ngganya na pameti wàngu? Jiangu-ma ba ndia-a! Jiaya na njalama duna na ma-patàka-nya na pameti wàngu. Ba nawàngu pawànya na mahàmu, na patàka-ngganya na meti paraï njala, ka peku lohanguda da hadana na njala. Welingu la hupu liina i Ala hi itaya ba kanjupu akatu-ya na njala.

¹⁴Tapi-manya ba ma-pawelingu la Ngahuna i Alaya na uku anggama Yahundi; tàka nyungga tau maluputu-aka duku. Pambàda danggangu-kaka la panjadi ata njala.

¹⁵Nadu nyungga wiki nda kupi-anya na pawunda-nggu. Da pambuha-nggu da pawunda ba wànggu làti, nda jia-aha da pawunda-nggu, tàka pàku da pa-karaü-nggu eti, jia nihai da pawunda-nggu.

¹⁶Nu ba tuna, jàka kuwu-ndaha da ma-pahilitu la pambuha-nggu, nahàmu na uku anggama Yahundi, wànggu-duka nu.

¹⁷Jia ba tuna, nda nyungga-apa duku mawunda-ha nuda, tàka jiaya na njala na matauku-ka duna na mawunda-ha nuda.

¹⁸Kupi-manya ba nda ana haua mahàmu daa la wikinggu; nu la huri etinggu la hada tau-nggu. Maa ba rinjungu-manggunya làti pawunda mahàmu tàka nda ku-duluku-a la pawundaya.

¹⁹Nda kuwunda-aya na mahàmu na pawunda ba wànggu làti; tàka hi wunda ni bia-ngguhai da ma-akatu da panda mbuhanggu pawunda-ha.

²⁰Jàka kuwunda niha da panda mbuhanggu, nu nda nyungga-a duku mawunda-ha nuda, tàka jiaya na njala na matauku-ka na mawunda-ha.

²¹Jia ba tuna, ku-pambulu-nya ba kuka-nandinya ba jiaya na lawiti yiana na ma-manyori: nu, ka wundaya na mahàmu jàka wàngguka, jiaya na ma-akatu-ma-a na ma-kawudaku daa lai nyungga.

²²Na wini eti-nggu nambuha-manya na Ukuna i Ala,

²³na nyuna kupàda-manya ba ninya na hili hau uku na ma-manyori daa la wikinggu — nu na uku na ma-patumbaru dànya na uku pa-pajia-na na pangàda etinggu. Tuna nuduka hi ku-kadupulu niya na uku njala na ma-manyori daa la wikinggu.

²⁴Nu ba tuna, tuna yia na manggàna-ka nyungga: kuka-radaku wàngu eti dihanggu la Ukuna i Ala, tàka ku-rajaku wàngu huri eti taunggu la njala. Ai inai na ngera-angguka duku! Nggamu-aka na ma-pahàla-ka welingu la tàda ihinggu yiana na mangàndi-ka la meti? Malangu-na i Ala! Ba na-mbuhangu pa-pahàla-ka rukuna i Yehu Karitu.